انا نفحات الصادق اتخرجت من الزعيم الازهري وحاليا طبيبة عمومية، البحوث بالنسبة لي ما كورسات ومحاضرات نتعلما ومتطلبات تخرج او حاجة مفروض اعملا عشان السي في بتاعي وخلاص، البحوث بالنسبة لي اسلوب حياة، حاجة بحب اعملا وبتستمع و انا بعملا، انا مؤمنة جدا انو البحوث هي بداية الحلول لمشاكل التنمية وهي وحدة من العوامل البتقاس بيها تطور الدول، عشان كدا كنت دايما بفتش لكل جهة انا بقدر ازيد فيها خبرتي في البحوث والاقي ناس شغوفين واتعلم منهم وناخد وندي مع بعض. من زمان في بالي اني امشي احضر ورشة او نشاط من انشطة الجمعية بس كل مرة ما بتتسهل واحتمال كان لخير لانو اول يوم ادخل فيو المقر كان للانترفيو بتاعي البي بسببو انا اسي نائب امين مكتب البحوث.
من أول يوم لي في الجمعية الحمدلله لقيت الييئة محفزة جدا ولقيت ناس طموحين وناس صغار في العمر لكن كبار في العقليات والانجازات، وعملنا خطة زابطة شديد للدورة الجديدة وان شاء الله الجمعية حتتطور وتمشي لقدام.
انا بنصح اي زول لقا فرصة انو يجي بس يوم يزور المقر ويشوف الناس دي بتعمل في شنو ما يتردد نهائي، لانو حتكون نقطة تغير في حياتو، وبابنا مفتوح لكل الناس الحابة تتعلم و تستفيد، سواء كنت طالب، طبيب امتياز، او طبيب عمومي او نائب اخصائي او حتى اخصائي.
حاليا نحنا فاتحين العضوية للانضمام لي مكاتب الجمعية، دي فرصة ممتازة لاي زول بحب يشتغل وعاوز يتعلم ونتعلم منو احنا كمان، ما تفوتوها اببببدددا.
كفاية أنو البروف موجود ومتفاني جدا للعلم ومن اول يوم شفتو حسيت قدر شنو هو عندو رؤية خاصة بيو بإنو ينشر العلم ويحفز الناس انهم ينجزو في مجال البحوث.
فإن شاء الله نقدر ننجز الدورة دي مع التيم الجميل جدا.

🔹تابعوا صفحتنا على فيسبوك
https://www.facebook.com/1245287582196211/

#Humans_of_DRG
DRG_MediaOffice

سلامٌ الله عليكم و رحمة منهُ و بركات
أنا وضاح إبراهيم رجب طالب في كلية الطِب والعلوم الصحية جامعة أمدرمان الإسلامية
المستوى الأول الدفعة ٣١ عضو في مجموعة داؤود البحثية
أنا كوضاح إنتمائي الأول لمجموعة داؤود كان من أول يوم ألاقي بروفيسور أبشر حسين ربنا يحفظو و  يديهو العافية فكان يوم عادي جداً قاعد في المسيد و إستدعاني الشيخ محمد الخير إبراهيم" ربنا يحفظو و يديهو العافية" عشان ألاقي البروف عشان أقدر أعرف شنو هي مجموعة داؤود و منو هو بروفيسور أبشر حسيت و من اليوم داك بتذكر مقولة البروف لي " ما حتفهمنا إلا تجينا "
اليوم البعديهو و اللي كان الجمعة ٧/٣/٢٠١٩ دا اليوم الإتغير فيهو كل شي فيني
اليوم داك أنا إستشعرت المعنى الحرفي لكلمة "طالب الطب "
حسيت بي نفسي صغير شديد وسط مجموعة من الدكاترة الكبار 
صاح كنت ضايع وسط الجوطة دي بس شفت نفسي واحد منهم و إن شاء الله حأكون حاجة ولو بسيطة من كيان داؤود العظيم .
تقريباً كنت أصغر زول يخش المجموعة  في مرحلة مبكرة زي دي بس حسيت نفسي حأكون أكبر المستفيدين  و فعلاً لقيت نفسي ماشي كويس في المجال البحثي و في العيادة كمان
حضرت ورش كتيرة جداً في فترتي دي و مشيت قافلة ولاية النيل الأبيض لي جبل أولياء و كل يوم بحس إني بزيد حاجة عن زملائي المعاي في الدفعة.
صاح بدري إني أقول إني وصلت للمرحلة الدايرها بس مجموعة داؤود كانت  أفضل مرحلة خلال دخولي لي رحلتي لعالم الطب و في النهاية بشكر  بروف أبشر حسين جداً إنو خلاني أكون جزء من الكيان العظيم دا
و إنت كطالب بنصحك تصطحب مجموعة داؤود معاك من البداية لأنو حتوسع ليك سقف طموحاتك و توصلك ل ما بعد الأفق و دايماً إتذكر مقولة البروف "ما حتفهمنا إلا تجينا"


🔹تابعوا صفحتنا على فيسبوك
https://www.facebook.com/1245287582196211/


#Humans_of_DRG
DRG_MediaOffice

أنا خباب أبشر حسين محمد أحمد، طالب في السنة الخامسة كلية الطب جامعة الخرطوم، عضو في مجموعة داؤود البحثية تحت إشراف أبونا مدثر الباهي العمود القويم للمجموعة وبروفيسور أبشر حسين ودكتور محمد ملك الدار ودكتور أحمد ربنا يجزيهم كل الخير منذ أن كنت في السنة الجامعية الثانية، مجموعة داؤود البحثية أنا بعتبرا باب عظيم من أبواب الخير في مسيرتي الطبية اللي تكاد تكون حتى الآن قصيرة جداً جداً، المجموعة فتحت لي أبواب وفرص عظيمة للدنيا والآخرة، أدتني فرصة ال Human touch (أو اللمسة الإنسانية) اللي هي أهم أساسيات الطب متمقلة في العيادة المجانية الاسبوعية اللي استمريت في المواظبة عليها لمدة ٤ سنوات حتى الآن، والأيام العلاجية لمختلف ولايات السودان، أما من ناحية تانية استفدت فايدة ما بعدها فايدة في جانب البحوث الطبية وطريقة كتابتها من الألف إلى الياء ابتداءً من لقاءات مناقشة مقترحات البحوث اللي المجموعة بتنظمها بصورة دورية وبيحصل فيها تلاقح مختلف الأراء والأفكار والاقتراحات من البروفيسور والاستشاريين ونواب الأخصائيين والأطباء العموميين وحديثي التخرج وطلبة الطب في لوحة تناغمية جميلة جداً، فالعاوز أقولو إنو الكلام القلتو دا كلو على بعضيهو (كالعادة بطبيعة أي حاجة مفيدة في الحياة دي) حار جداً جداً للزول الما عندو صبر وحيزهج من اول الطريق وبعرف ناس كتااار بدو وما قدرو واصلو فأنا شخصياً كنت بحضر العيادة الخيرية وباقي النشاطات الخاصة بالمجموعة وما بديت اندمج وافهم شي إلا بعد ٤ او ٦ شهور بس كان عندي قناعة عميقة إنو الموضوع زيو وزي أي شجرة ما حتقوم في يوم وليلة ومحتاج صبر واجتهاد شديدين والحمدلله الواحد قدر في خلال ال٤ سنوات يشارك في قرابة ال ٣٢ ورقة بحثية قدمناها في اكبر المؤتمرات العالمية ونشرت في العديد من المجلات دا غير عمل الخيري العظيم البيقدموهو أفراد المجموعة البتعاقبو عليها منذ إنشائها وخلال السنوات الماضية (البروف عندو مقولة إنو كل ما تمشي مجموعة بتجي مجموعة أحسن عليها من جميع النواحي) ودي حاجة الواحد شافا بعينو أثناء وجودو خلال السنوات الماضية وبمختلف الأجيال المروا وعاصرهم كلهم ومنهم القاعد في السودان وكتير منهم غادر فكأنو في قوة خفية وراء المجموعة.
فالواحد واثق بإذن الله إنو الشباب لو واصل بالحماس دا بعد عدة سنوات المجموعة حتنشئ أكبر مركز خيري في أفريقيا (أو إمكن في العالم) لعلاج أمراض الجهاز العصبي بالمجان وفيهو مركز بتاع أبحاث على مستوى عالي بإذن الله.

#Humans_of_DRG
DRG_MediaOffice

أهلا و سهلا
أنا يوسف فضل الله عثمان (بلية) خريج جامعى أم درمان الإسلامية – كلية الطب و العلوم الصحية (24) .
القصة بدت قبل 4 سنوات تقريبا , كنت قاعد في الداخلية بتونس مع صحبي هجو و سينيري العزيز جدا يونس صديق , كنا بنحكي عن صعوبة الباطنية و أنو ما لاقين زول يشرح لينا و نستفيد منو كويس , قال لينا : أمش لي بروف أبشر حسين في بانت أحضروا معاهو من المغرب لحدي 2 صباحا و بعدها أضربوا معاهو الفتة و تجوا راجعين الصبح . قلنا نمشي نجرب و حدس ما حدس .
نصحيتي للطلاب القراءة ثم القراءة ثم القراءة , لأي طالب في المرحلة السريرية خصوصا ما تخلي فرصة أنك تحضر عيان و تقدموا لي البوص أو حتى لي سينيريك . كلنا في يوم ما كنا بنخاف و بنتلعثم و لي للأن لكن مع الزمن بتقل تدريجيا .

فيما يخص البحوث ربنا أكرمني بحضور أكثر من 10 ورشات مقترحات بحوث و شاركت في 3 بحوث أهمها بحث ( التغيرات في شبكية العين عند مرضى الملاريا الوخيمة ) بصحبة البروف و أنصح أي شخص عندو اهتمام بالبحوث أنو يشارك في أي فرصة بحث بيقدر عليها لأنو نفعها متعدي و لي صاحبها النصيب الأكبر من تعلم طريقة كتابة مقترح البحث بصورة سلمية الى تحليل البينات مرورا بكتابة المقترح ثم النشر و تعلم العمل الجماعية.
و من أجمل نشاطات المجموعة بالتأكيد هي نشاط العيادات المتحركة و الثابتة و اللي ما في مثيل ليها في السودان كلو , كلامي ما بيوصف روعة و جمال العيادة، و اختم بكلام البروف : (( يا يوسف ، كان داير الدنيا تعال العيادة ، و كان داير الأخرة تعال العيادة ))

ربنا يوفقكم لكل خير

#Humans_of_DRG
DRG_MediaOffice

أنا هيام عبدالمنعم العميري..بقرا رابع طب جامعة الخرطوم

اتعرفت على مجموعة داؤود البحثية من كنت في أولى جامعة وأكتر حاجة حبيتا فيها إنها complimentary to all aspects of life ,يعني بتجي ما بتلقى علم طب بس, لأ بتلقى فقه فن أدب أي شي 😂

كنت بحضر في الأول ال proposal meetings بس وكنت بستناها بفارغ الصبر، وحقيقة كانت من أكتر الحاجات النمت لي ال critical thinking، وخلتني أتعطش أكتر إني أدخل في مجال ال research من بدري شديد.

في سنة تالت( 2018-2019) بقيت المسؤول الإعلامي لمجموعة داؤود البحثية،
وهنا اتعرفت -على القرب أكتر- على كوكبة جميلة ومتميزة جدا، وبقيت بحضر عيادات الجمعة والأيام العلاجية للمجموعة.

ولهسي أي زول لو سألني نفسو يعمل extracurricular activity فطوالي أول شي بيجي على بالي أدلو بمجموعة داؤود البحثية، ونصيحتي ليكم كلكم في المجموعة أي زول بتجيهو أي فرصة يشارك في بحث طوالي يشارك لأنو بتستفيد بتستفيد.

#Humans_of_DRG
DRG_MediaOffice

‎30-مارس-2018

منزل البروف سابقاً و مقر المجموعة حالياً ندوة بعنوان مرض زيادة كهرباء المخ من منظور طبي و فقهي،
و لفت نظري العنوان جداً لانو فيه ربط مسألة طبية بناحية دينية فكان عنوان مميز ونادر التطرق فيه ، وكنت جداً متحمسة للحضور .
البروف كان محاط بهالة عظيمة و الطلبة والحضور كانو رغم الهدوء الواضح عليهم الارتباط القوي بالمكان، استغربت الجو العام و الارتباط الشديد بين الكل و حسيت إني الضيف الغريب وسط العائلة.
بس عزمت من يومها أكون من ضمنم.

بعدها اتعرفت على العيادة و على بعض الدكاترة و الطلبة والشخصيات الممتازة و العظيمة جداً وعمو مدثر شعلة العيادة و قلب المجموعة.


تفاصيل كتيرة شدتني إني لازم أكون هنا كل جمعة رغم انو كنت في بداية سنتي التانية و ما فاهمة الحاصل شنو و منها عزمت انو لازم اتعلم لأصل لمرحلة إني اكون أهلاً للعضوية.

قل حضوري للعيادة جداً و لكن عزيمتي كانت كل يوم بتزيد وحبي و ارتباطي للمجموعة بزيد إلى أن وصلت سنتي الرابعة و الحمدلله اصبحت عضو رسمي في المجموعة.

العيادة هي ملجأ لكل طالب استحوذه الشعور بالخسارة و تاهت به الحياة في مسيرته.
العيادة إعادة نبض للأمل و للطموح و الرغبة.
العيادة مدرسة لتعمل التواضع والصبر و فهم لمعنى الطب و كيف يجب للطبيب أن يصبح إنساناً أولاً.

بنحبك جداً يا بروف وأنت أجمل معلم و أب، أدامك الله ذخراً لنا و للوطن و نتمنى نكون عند حسن ظنك دائماً .

سـارة عمـران فضـل الله.
المستوى الرابع جامعة العلوم و التقانة.

🔷تويتر - twitter
https://twitter.com/DaoudResearch?s=09

🔷يوتيوب - YouTube
https://youtube.com/c/DaoudResearch

🔷انستغرام - Instagram
https://instagram.com/daoudresearch?utm_medium=copy_link

🔷فيسبوك - Facebook
https://www.facebook.com/1245287582196211/

🔷تلجرام - Telegram
t.me/DaoudResearch

#Humans_of_DRG
#DRG_MediaOffice