كان كلامك بلسم للناس الله يرحمه في مرة سألوا الشيخ فتحي صافي انو ليش بتمزح كتير في مشايخ بتنتقدك على هل الاسلوب ؟!

ضحك وجاوبهم مين خبركم انو الشيخ لازم يكون عابس ومعصب...... وليش لحتى ما أضحك وابتسم بوجه الناس...... ؟!

أرفع الناس قدرا من لا يرى قدره
و أكثر الناس تواضعا من لا يرى فضله
و أحب الناس إلى الله أنفعهم لخلقه
قال ﷺ :
(رأيت أقواما من أمتي على منابر من نور ، يمرون على الصراط كالبرق الخاطف ، نورهم تشخص منه الأبصار
لا هم بالأنبياء و لا الصديقين و لا الشهداء إنهم أقوام تقضى على أيديهم حوائج الناس)

الله يجعلني أنا وياكم منهم لحتى نبقى نضحك ونبتسم في سبيل قضاء حوائج الناس لوجه الله تعالى

العبرة بالأفعال والنتائج في أحلى من الضحكة والإبتسامة بوجه أخوك لما بتكون لوجه الله تعالى ؟!

أي نعم

صباح الخير

جمعة مباركة ياحلوين الله يسعدلي اوقاتكم بكل خير

تقبل الله طاعتكم جميعاً سامحوني تأخرت عليكم اليوم وصلت على بيروت أنا وصلاة الجمعة سوا فاضطريت روح على الجامع فوراً أنا والأخ يلي طالع معي هو وعياله صلينا بمعيته وبعدين طلعنا من الجامع وصلناه على الأوتيل بالرملة البيضا

اليوم الجماعة يلي طالعين معي دخلوا على البطاقة النقابية نطرنا شي نص ساعة بالحدود وبعدين مشونا دخل هو ومدامته وبناته أعمارهم تحت ١٨ جايين على بيروت ابنهم الله يسلمه نازل لبيروت من أوروبا بدهم يجتمعوا فيه وعطوهم اسبوعين

الحمد لله سفرتنا اليوم كانت ميسرة طلعنا من الشام ٩ وربع من فضل رب العالمين دربنا أخضر بفضل الله حتى بالحدود في شوية عجقة بس ماطولنا عم تمشي الامور

بقى هاد يلي صار معنا وهلأ عامل استراحة محارب بالرملة بدي اشربلي فنجان قهوة ماصحلي وقف على الطريق طلعنا سحبة وحدة وبعدين عندي استقبال مطار على ٤ العصريات دعولي بالتيسير تحياتي للجميع و100 وردة للجميع

حالة الحدود اللبنانية اليوم الجمعة 10/16

مساء الخير رجعة قريبة لحتى نحكيلكم عن حالة الحدود السورية اللبنانية اليوم

✅ اليوم متل ماخبرتكم في عجقة بالحدود من الجهتين يعني في سوريين منيح نازلين على بيروت وفي كمان لبنانية طالعين على الشام

✅ شي بطاقات نقابية وشي سجلات تجارية وفي مواعيد مقابلات سفارة وفي كمان ركاب مطار

✅ اجتمعت تقريباً بحوالي 6 مسافرين لبنانية قاطعين من مطار دمشق رايحين على السعودية محصلين تكت ارخص من مطار الشام

✅ كمان في كروب مهندسين وأطباء لبنانية نازلين على الشام مرقوهن على البطاقة النقابية أمورهم ماشية

✅ مواعيد مقابلات السفارة واصلة اسماء الألمانية والتركية فقط والبقية كانوا ناطرين البرقيات

✅ كمان لفت انتباهي في لبنانية عاملين مواعيد علاج طبي وعمليات كمان طالعين على الشام والدخول على سمة العلاج

✅ الطريق جيد كان ميسر الحمد لله والأمور ماشية حتى الضابط يلي مناوب بالحدود اللبنانية كتير أكابر ومحترم للأمانة عم يهون أمور العالم والناس

يعني حبيت أعطيكم لمحة عامة عن حركة السفر لبيروت اليوم من الشام تحياتي للجميع ويسعدلي اوقاتكم بكل خير

خدمة ترحال بيروت 00963999213539

( شو الفرق بين دخول اللبناني إلى سوريا وبين دخول السوري إلى لبنان عبر البطاقة النقابية ياترحال بيروت ؟!)

النقابي اللبناني :

✅ بده بطاقة نقابية+ وثيقة نقابية مستوفية الشروط الخمسة+ تاريخ الاصدار لا يتجاوز الشهر

✅ مسموح يدخل معه مرافقين الزوجة والاولاد تحت 18

✅ بياخد اسبوعين كاملين ( بدون مزاجية ) إضافة إلى معاملة محترمة وراقية من موظفين الحدود السورية

✅ بيدفع 50 دولار رسم الدخول إلى سوريا

النقابي السوري :

✅ بده بطاقة نقابية+ وثيقة نقابية مستوفية الشروط الخمسة+ تاريخ الاصدار لا يتجاوز الشهر

✅ مسموح يدخل معه مرافقين الزوجة والاولاد تحت 18

✅ بياخد من يومين الى اسبوع وممكن يعطيك اسبوعين ( حسب المزاجية ) إضافة إلى معاملة ناشفة من موظفين الحدود اللبنانية وممكن يكون في انتظار لوقت يتجاوز الساعة أحياناً

✅ بيدفع 12 دولار رسم طابع الدخول إلى لبنان

( حالة مطار بيروت اليوم وامبارح اليكم تقرير ترحال بيروت)

✅ مطار بيروت بعكس مطار دمشق امبارح كان متوسط الازدحام واليوم كان مزدحم معظم مراحل النهار

✅ ماشية حركة مطار بيروت بشكل اعتيادي وطبيعي وتحسنت من منتصف الأسبوع وحتى اليوم الجمعة

✅ اليوم عانينا من موضوع فقدان الحقائب عنا 4 استقبالات امبارح واليوم سجلوا ضياع حقائب

✅ في تشديد كتير على موضوع مدة الإقامات الأجنبية يلي جاية من أوروبا وحاجز على البيغاسوس أو Ajet واقامته تحت 6 شهور ماعم يمشوه بدون تذكرة عبور ترانزيت من مطار المغادرة بأوروبا

✅ كمان يلي السوريين يلي نازلين من افريقيا وقاطعين على المصرية أو على الإثيوبية واقامتك خالصة أو فايت على الفيزا إذا نازل على بيروت عمل OK TO BOARD للاحتياط منشان تريح راسك

✅ الطريق من الشام إلى مطار بيروت شغال ما أحلاه اموره جيدة جداً هل اليومين ومتحسنة المعاملة بالحدود اللبنانية للأمانة

✅ في كلام انو رح يشتغل الطيران بين الشام وبيروت قريباً عبر شركة طيران خاصة أعتقد فلاي دار ورح يرجع معها الدخول على الحجز الفندقي مع الالفين عبر الطيران



خدمة ترحال بيروت 00963999213539

حفاظاً على المصداقية مسافر سوري ذهب إلى مقر انطلاق باصات مطار دمشق الدولي التي تم الإعلان عنها ولم يجدها

( يبدوا جربوها مالقو عليها اقبال فتم الإلغاء)

( نشرة أخبار ترحال NEW NEWS تازة من الفرن )

🌹 شركة طيران Leav الألمانية فتحت خط جديد من مطار ميونخ على مطار الشام واول رحلة تيسير رب العالمين 2026/12/01

🌹 رسمياً تم إلغاء رسم البرقية على الحدود السورية للمسافرين اللبنانيين حاملين البطاقات النقابية على مبدأ المعاملة بالمثل يعني مابقى يدفعوا 50$ دووراررر

🌹 الهيئة العامة للطيران المدني السوري طالعت بيان للمسافرين المغادرين من مطار دمشق انو يجوا على بكير لانه متوقعين يصير زحمة على طريق المطار كرمال اعمال تمديدات الشبكة الجديدة واحتمال مايضل غير مسار واحد شغال بكل طريق

🌹 لحد الآن الأمور لايصة بين اخد وصد ورد منشان تشغيل الطيران على مصر رجعت الأخبار تتخربط شوي على كل حال بنخبركم إذا صار شي جديد

🌹 طيران فلاي ناس السعودية صارت اكتر شركة اجنباوية بتشغل رحلات على المطارات السورية وسبقت التركية والقطرية والملكية الأردنية

🌹 السورية للطيران رح تفتح خط مباشر بين حلب وموسكو اعتبارا من تاريخ 2026/11/18

🌹 تم البت بموضوع افتتاح مطار تدمر الدولي ورح يكون مطار سياحي شبيه بستايل مطار صبيحة بتركيا نفس السيستم

🌹 4 شركات طيران 3 عربيات وشركة وحدة اجنباوية زادوا عدد رحلاتهم إلى المطارات السورية بعد ارتفاع تصنيف الأمان عالمياً ضمن الأجواء السورية

🌹 منشان المطار الجديد تقريباً خلصوا 80% من التشطيبات وركبوا ( الآرمات على مبنى الصالة الجديدة) والكلام انو الافتتاح رح يكون أول السنة الجديدة

🌹 بعد ماتم افتتاح خط باصات مطار دمشق من البرامكة طلع مسافر صور فيديو الساعة ١٠ بالليل من البرامكة عم يقول انو راح على مكان الباصات ومالقاهم

🌹 أخيراً مافي داعي تعلق بنقطة لحتى يوصلك الخير نحنا مابنستخدم هل الأسلوب تبع شحادة اللايكات ولكن في حال لطشت البوست ياريت تذكر المصدر ولك جزيل الشكر

( المسكين سيارته 2025 راح محركها بسبب البنزين الله يجبر ضرره ويعوض عليه )

لاحول ولا قوة الا بالله العلي العظيم حسبي الله ونعم الوكيل

"مين يعوّض هالكارثة؟"، مواطن سوري يطالب بمحاسبة المسؤولين بعد تعطل سيارته الجديدة إثر تعبئة البنزين

وجّه أحد المواطنين مناشدةً إلى وزارة النفط وحماية المستهلك في دمشق، بعد تعرّض سيارته، وهي من طراز 2025 ولم تقطع سوى 8 آلاف كيلومتر، لعطلٍ قال إنه وقع عقب تعبئتها بالبنزين من محطة في منطقة البرامكة، ما اضطره إلى نقلها برافعة

وقال في مقطع مصوّر: "برسم كل مسؤول عنده ضمير بدمشق، مين يعوّض هالكارثة؟ ومين بيحمي الناس من وقود عم يخرّب سياراتها؟"

وتساءل عن ذنب المواطنين في تحمّل تكاليف إصلاح باهظة، مضيفاً: "شو ذنب المواطن يدفع ملايين تصليح بسبب وقود مغشوش وتنفك سيارته الجديدة؟"

وطالب بفحص محطات الوقود والتحقق من جودته، ومحاسبة المسؤولين عن أي مخالفات تثبتها الجهات المختصة، إلى جانب تعويض المتضررين.

( ياصباح الخير ويامساء الخير و تحياتنا للجميع من بيروت)

منارة بيروت ومن شباك السيارة نعلن انو بهي اللحظات وصلنا بيروت بخير وسلامه ربي يسعدلي صباحكم ومساكم وأوقاتكم بكل خير

عطلة اليوم الأحد الناس هون شمستها عالية بتكون صارت ١٢ الضهريات ولسا العالم نايمة اليوم طلعت من الشام الساعة 8 الصبحيات من العدوي نواحي دار الشفاء وصلت على مفرق الصبورة الحجة أم ايمن يلي طالعة معي هي وبناتها نسيانة كيس الأدوية بالبراد لفينا ورجعنا على الشام اسناولنا كيس الأدوية ورجعنا طلعنا من جديد وهلأ تنية وصلنا الحمد لله بخير وسلامه بفضل الله تعالى كان مشوارنا ميسر بفضل دعوات الحجة ام ايمن فرحت كتير اني ما انزعجت كونه رجعت من نص الطريق وبلشت أدعية وقراءة قرآن طول الطريق أي الحمدلله رب العالمين يسرها بالحدود دغري مشونا معها جرين جارد ختملها مباشرة وبناتها باسبورات أميركية على الماشي وقفنا على الطريق شربنا قهوة والصبايا كان لازمهن شوية أغراض من شتورة اشتروهن وضلينا كارجين على بيروت نزلتهن بالاوتيل وهلأ بدي روح عند الكومجي عير الدواليب عندي دولاب شاكك فيه انو فيه طراوة

( رح نحكيلكم شو صار معنا اليوم بأول استقبال من مطار دمشق الصبح)

اليوم كان عنا اول استقبال من مطار دمشق الصبح على الساعة 7 وطبعاً الكابتن طالع من 6 الصبح لحتى يكون على الموعد للاسف بسبب أعمال صيانة الطريق على مايبدوا الورشات يلي عم تشتغل عم تترك مخلفات معدنية على الطريق قطعة حديد مبسطة ومجلوخة ضربت دولاب السيارة الخلفي اليميني طبعاً طقم الدواليب عمره الفني 3 اسابيع ولكن قدر الله وماشاء فعل عند الجسر السادس صارت معنا القصة وبدلنا الدولاب ووصلنا لعند المسافر اعتذرنا منه على التأخير وكان انسان راقي ومتفهم للموضوع ولكن نحنا عتبنا كبير على الورشات الفنية القائمة على صيانة طريق المطار:

✅ مشكورة هيئة الطيران المدني امبارح طالعت بيان شرحت فيه حالة الطريق فنياً وطلبت من الناس يطلعوا أبكر من الوقت المعتاد لانه في كذا تحويلة على مسار الطريق

✅ العتب المفروض يكون في مراقب فني على الورشات لازالة الأنقاض والمخلفات الناتجة عن أعمال الصيانة متل للصفائح المعدنية المرنة والوصلات المعدنية المبسطة اضافة الى برادة الحديد والفيبر

✅ هاد طريق سفر يعتبر لازم يكون عليه مراقبة فنية أحيانا في سيدات بتطلع بسيارتها الخاصة على المطار لتستقبل ابنها او حفيدها أو حدا من أسرتها تخيل يصير معها نفس العطل بهيك طريق والساعة 6 صباحاً اقرب كومجي عليك بيكون بحتيتة التركمان وإذا لقيته فاتح !

✅ بقى رجاء الكل ينتبه ويطلع بكير امبارح صار كتير في تأخير بالوصول للمطار وحسب ماخبرونا في 4 حالات مالحقوا طيارتهم لأنه بيصفوا الوقت على النقطة بالطلعة من الشام

مرة تانية بنتوجه برسالة اعتذار من مشترك الخدمة يلي تأخرنا عليه اليوم صباحاً وبنتمنى من الجميع الأخذ بهذه الملاحظات بعين الاعتبار والله يحمي الجميع يارب ويرد عنهم وعنا الأذى والضرر