صبحكم الله بالخير🤍

من الخاص، كتب الله أجر من ساهم ونشر

مرحبا🤍

تصدّ القلوب من الغلا والنفوس تملّ
ياهون الجفا لا شافت العين ما تكره

على رمح صوتك ماتو المشكله والحلّ
سراب الدروب أصدق من الحرف والنظره

أحبك طواري بس ماعاد احبك خلّ
ولا زلت احب العذر بشفاك وانتظره

على رمشك تسيل المحابر وينبت ظلّ
انا تحته المحتار واللي غريب أمره

تزل ايدي برقمك مثل ما اللسان يزلّ
مع اللي تحده كلمتينٍ على صدره

توريني ابواب المفارق وانا ما ادلّ
مثل من يورونه قبل موتته قبره

تغلى بكيفك لو تصير المحبه غلّ
لكن لا تساوم من يحبك على قدره

تراي الفقير اللي غناته بكلمة ذلّ
تساما وهو لو جاد فيها دفن فقره
- ناصر مناحي

تصدّ القلوب من الغلا والنفوس تملّ
-ياهون الجفا لا شافت العين ما تكره-
اي والله يااااهونه

عذبه جدًا

يقول:
"أحبك طواري بس ماعاد احبك خلّ"
ثم يتدارك كلامه بـ:
"ولا زلت احب العذر بشفاك وانتظره"
لازال يحتري عذره وإن حدّه كبرياءه وكابر❤️‍🩹

ولا تحسب مطيح الدمع منِّي ضعف واستسلام
‏وانا كم لي اساير دمعة عْيوني واجاهدها ..

‏تعرْف اني عزيزٍ ما توسَّل للجفا لو دام
‏لكن والله يا بعض الليالي معك فاقدها

‏مضت ليلة،ماجابتك اخْيَر ايَّام وشهور العام
‏واخاف ان الاوَادم قبل لا اعايدك اعايدها
- نوف العثمان

اللهم صلِّ وسلم على نبينا محمد

يقول إبن القيم رحمه الله :
‏" الصدقة في يوم الجمعة بالنسبة إلى سائر أيام الأسبوع ؛ كالصدقة في شهر رمضان بالنسبة إلى سائر الشهور "

مساكم الله بالخير🤍

يقول سليمان الهويدي:
"أحب الكريم اللي يفرج عن المعسور
‏ليا من عطى حتى هَلَه ما دروا عنّه" ❤️‍🩹

صبحكم الله بالخير🤍

"‏ما تشيب الاماني لو تخيب الظنون
‏وما تضيق الحياة وعند ربي سعه"

لاذ بك يارب قلبٍ من الذكرى جزوع
في حماك من المواجع .. ومن تقليبها

هوّن ايامه ليا شاف منها مايروع
لا عليم الا انت يا الله بما في غيبها

انا لا نفسي عصيه ولا قلبي قطوع
اجفي الدنيا واعود واصير صحيبها

عن مشددة اللواحظ ومرخية السموع
قافلٍ بيبان .. ود العلوم وجيبها

مادرى باللي تكنّ الضلوع الا الضلوع
وش تبي تنفعني الناس لو تدري بها

اثرني في ضحكة الزيف لي عام مْخدوع
اتصنعها .. ولا ادري وش انا ابي بها ؟

صاحبي ما بعد ونس الليال الا الدموع
معك ياخوف الاحاسيس - من تغريبها

الغلا له عدة انواع .. وانت اشرّ نوع
جعل روحي همها منك ما يبطي بها

المشاعر بين حرب المواجه والرجوع
لا تزال ابرز علامتها .. تأنيبها

والحياة بلا ملامح صلاة بلا خشوع
ماتحس بها على كثر ماتشقي بها

لا اندفن كنز القناعه على باب القنوع
قلت تخطيها يمين الشقي وتصيبها

فان ذويت من اسمر القيض يالغصن الفروع
السما لا من رداها ولا من طيبها
- عبدالعزيز العبلان

الله يديم هالقصيد

"صاحبي ما بعد ونس الليال الا الدموع
معك ياخوف الاحاسيس من تغريبها

الغلا له عدة انواع .. وانت اشرّ نوع
جعل روحي همها منك ما يبطي بها" :(

مساكم الله بالخير🤍

البارحه غنيت يا حادي العيس
 واليوم صمتك عن عيوني حداني

اليوم تلعب بي رياح الهواجيس
ولادري عشانك ضيقتي أو عشاني

ما بين لوعات الجفا والوساويس
البرد ساكن ف ارتعاش المحاني

وانا حبيس الصمت سجن الاحاسيس
ضاق الزمان ولا وسعني مكاني

والنور طعمه في عيون المحابيس
مرٍ مثل طعم الكلام بلساني

متى بشعري يزهرنّ الكراريس
ومتى بقلبي يمطرنّ الأغاني

بيت الشعر ما هو كلام بقراطيس
ليت القصايد بالدفاتر مباني

والله ليفرق شعر من يرجي الكيس
عن شعر من ينحت صخور المعاني

ويبان فرقي باختلاف المقاييس
حتى تحس بصدق وش كثر اعاني

والا الأماني راس مال المفاليس
عزي لمن كانت حداه الأماني
- سعد الحريّص