مثل سالف ايامك ابيّه ووكر احرار
ورود ٍعلى حوض المنايا فداويّه

تحاموك وافنوا دونك المال والاعمار
على شان صبح ٍ فيه " نصرة وحريّة"

ايا شام منتي لا لحافظ ولا بشّار
امويّة وتبقين يا شام امويّة
- صالح الهويملي

ماناخذ ونعطي على حساب البلد
‏خذ من شواطينا الخليجية الأكيد

‏حنا يابو سلمان روحٍ في جسد
‏ولا على ماقيل دمٍ في وريد

‏إنجازك انجاز الخليج إلى الابد
‏انت اللي تحقّق وحنا المستفيد

‏مثل اغتنام الفرصه اللي ف المهد
‏تقدر تعيد الشرق الأوسط من جديد
- مزيد الوسمي

صبحكم الله بالخير

اللهم صلِّ وسلم وبارك على نبينا محمد

لدعم الشاعر أيمن الرويلي

يغفَل الشباك و يوصي على النور الستاره
‏والستاره ما تغط النور و النور يتسلل

‏ماحدٍ يعشق نهاية ليله و مبدا نهاره
‏غير قلبٍ لا يحرم فـ الهوى ولا يحلل

‏يابعد من كنت ولا أزال له رهن الاشاره
‏جف سمعي وان بخلت بعذب صوتك ماتبلل

‏كان مالك في ليالي عمري الباقي زياره ؟
‏لاتزور القبر لين يبيد عظمي و أتحلل

‏أنتظرني لين اجي غيمه لـ ماطرها غزاره
‏حالفه لا آنساب بين اصابع إيدك و آتخلل

‏من قدر قبلك يشوف الدره بدون المحَاره ؟
‏من سمع صوت الظلام؟ وعلم الليل يتجلل ؟

‏ياحبيبي يوم أغني " هل رأى الحب سكارى "
‏مامعي غير الخيال اللي يجيبك و آتعلل

‏ولا انا لو ضاع معك العمر ماشفته خساره
‏ناصل السبعين و أنت بـ عيني الطفل المدلل

‏هات عذرك قبل لا يقفي جديلٍ في شقاره
‏مثل مجدول الشليل اللي مع الريح يتفلل
- العنود الواصلية

صبحكم الله بالخير

اللهم صلِّ وسلم وبارك على نبينا محمد

مساكم الله بالخير

عليك ازكى السلام المعتبر يالشامخ النواف
‏ماني بـ اللي يهمّش موقفك يالمرقب العالي

‏ميانتنا تراها دمعتين ووقفتين وقاف
‏بعض الاحيان مثل ميانة الجالي على الجالي

‏لايفجعك الفراق الا بديت اطرّي المنكاف
‏ترى ربي خلقك لحالك وخالقني لحالي

‏انا ليه اكترث للشمس لا هفّت وراء المشراف
‏وهي لاهفّت اول مايقفّي عني ظلالي

‏على كثر العباد اللي على مترامية الاطراف
‏مايجذبني حنين الا الحنين لـ ربعها الخالي

‏اوقّف واتباهى لا دعتني ساعة الميقاف
‏حسب مبدا الثقه ماني بـ متغطرس ومتعالي

‏ماعفت من الطلوع الا الطلوع اللي على الاكتاف
‏ولا احب من النزول الا النزول لـ رغبة الغالي

‏وانا يافاتنة نجد العذيه ماعلي خلاف
‏لا قفّيتي على فال الغلا وانا على فالي

‏بداية كل ثورة كبرياء من نظرة استعطاف
‏وش اسوي وانا راسي عزيز وقلبي موالي

‏دفعنا بـ المشاعر كلها في حرب الاستنزاف
‏ماباقي غير يفصل في الامور ويلحق التالي

‏بدايتها تراني معتبرها رحلة استكشاف
‏ولا ادري كيف وصّلنا الطريق لـ وضعنا الحالي

‏يقولون الحذر لمّاح واقول الحذر خواف
‏كلام اللي يغامر والعمر في دبرة الوالي

‏تشوفين الحمول ثقال واشوف الحمول خفاف
‏عموماً يمكن اني مشتبه ولا يورّالي

‏مثل مايحفظ المصلاح قدر الفارع الميلاف
‏تمثني روض صدري وازبني من قسوة اهمالي

‏وإلا دارت صواديف الزمان وقلتي اسمي حاف
‏فـ امانه لاتجين لـ جرحي اللي كان متشالي
- معلّقه صالح النشيرا

من دروبٍ، فتك فيها الزمن ما قلت : قافي شاب
‏عساني .. لا أستمالت خطوتي ما أضيّع أهدافي!

‏وقفت، وما وقفت إلا عشان أدخل مع أكبر باب
‏معي طاروقٍ .. أسمع له صدى في راس مشرافي

‏أعرف مهيَّب الصامل، وأعرف مجري الهيَّاب
‏وأعرف أفرق مثل ما يفرق الطيب عن الهافي

‏لا شفت اللي تدرهم به ركابه للعلا، و يهاب!
‏عقرت بعيري و رحت أخذ أحلامي وأنا حافي

‏طموحي، يوم أسج البال و أعدّي على المرقاب
‏أفوز بـ ليلةٍ .. يحضر قمرها ( مولد أنصافي )!

‏طرقت من الشعر ما يدفع الناقد على الاعجاب
‏و جنيت من الهوى ما يجني المجفي من الجافي

‏"معاذير الغلا" تجعل دوافع جيتي بأسباب!
‏وانا لولا أشتياقي ، كان ما شالتني أطرافي

‏تخطّيت المشاعر والعيون تقول يا كذاب
‏كلامٍ تكشفه عيني.. طبيعي يكشفه قافي

‏يكفيني .. ليا مريت داره والهوى غلاب؟
‏أعسّ الدار وأمدّ النظر واللي حصل كافي

‏ضحايا الحب ! ما فيهم طرف ينقال له منصاب
‏سكاكين الحبيب .. تخلي الموات متعافي !!

‏على كثر الكلام اخترت لي كلمة بدون إسهاب
‏ترا ما زال عندي ما يسلي جرحي الخافي

‏معي قلب بدويٍ .. ما يعرْف يعاتب الغياب؟
‏أعَرْف أغيب .. لكن مستحيل أناظر خلافي.
- فهد الشلاحي

جميل جدًا

مساكم الله بالخير♥️

تمايل يا غصين الراك وارم الشال
على حْضورٍ مُهيب ونفس غوّايه

ودقّ قلوبهم مع دقة الخلخال
جعل من يجهله مايطرب لنايه

أنا لو امشي بهوني مشيت اختال
كذا طبع الغزال ان كانه الغايه

مع النسمات اميل ويلعب السلسال
سعيد انه على جيد المها تايه

انا اعطي للجماد احساس ما ينطال
وأبثّ الروح فيه و تنخلق آيه

مثل ما اعطي محبّيني من الأفضال
عطيتك يا حبيبي أعذب حكايه

بتبطي وانت يالغايب حبيب البال
وأكيييد ان ما لقصّة حبّك نهايه

شربت الشوق ماهزيت لك فنجال
أراضي خاطرٍ ما دوّر رضايه

جعل ربي يغيثك ماطرٍ همّال
لعلّ الله يبلّ ظماك وظمايه

بعد فرقاك يا كم نحت عالاطلال
جعل حزني عليك البارح كْفايه

تأكّد ما لغيرك فالحشا منزال
ولا احدٍ غيرك اشجاني من اقصايه

ولا ادري كيف عقبك ماتت الآمال
وشعري صار يكسر قلب قرّايه

غريبه كيف يهنى لك غيابٍ طال
مع انّ عيوني الثنتين -سبّايه-

حزينه.. والليالي صمتها قتّال
ياليت الدمع للأحزان محّايه

ذرفت دموع عيني لين كحلي سال
انا لي قلب هشّ وعين بكّايه

وقصيدي كلما هِلّت دموعي انهال
كأنه عالمواسى ماخذ وْصايه

لقيته عن هجير الذكريات ظلال
لو انه للملا يوشي بي وشايه

حبيبي..يا حبيب الحلّ والترحال
أنا وياك .. لو ما كنت ويّايه

سريتك يا حبيبي والدروب طوال
لعلّ الدرب يرحم ضعف سرّايه

واذا مريت دربك وابتدا الموّال؟
دخيلك .. شرّبوني موية قرايه

غزالك لو سهامك صابته لازال
يحبّ آخر جراحك فيه للغايه
- مها

يلاعبك الهوى والارض خضرا ياعويد الراك
‏يناديني حفيفك ليه ظلّك مايناديني ؟
‏
‏لو أفواه الشماتة بالملام تحطّني مسواك
‏عزاي الطهر في وجه الشبه مابينك وبيني

‏من الاسوار ياسورٍ دخلتك كنت أخاف حمْاك
‏تخيّلتك ضياعي .. ماتخيّلتك تقدّيني !

‏من أحداث الليالي؟ لاغريب تشوفني شكّاك
‏ياليت ان كثرة الاحداث ترحم قلّة سنيني

‏أنا يرضيني انك تكسب بفعل الصحيح رضاك
‏ولا يرضيني انك تفعله من شان ترضيني

‏على كثر الشكوك اللي تطولك من كلام عداك
‏طرى مشواري اللي فالبداية كاد ينهيني

‏لقيت الاحترام بداخلك والصدق في مبداك
‏أنا في كل خطوة ضايعة قبل أوصلك ويني؟

‏ حزين ان الستاير واقفة ماتشكر الشبّاك
‏على صفق الهبايب؟ وقفة الشباك تعنيني

‏صحيح آخاف بس آخاف من تقصيري بذكراك
‏ولا احط البلا فالناس .. لاصار البلا فيني

‏بدون إدراك كنت بكل حرف مْن القصيد أدراك
‏تخلّيني جسد لكن " قصايد " لاتخليني

‏أقول لرايتك لارفرفت جعل السنين فداك
‏تراني جيت لك ماعندي الا الشعر بيديني

‏لو تْطيحين من عيني قدرت اوادعك وانساك
‏لكنّك في خيالي واقفة والطايحة عيني
- أيمن الرويلي

حزين ان الستاير واقفة ماتشكر الشبّاك
‏على صفق الهبايب؟ وقفة الشباك تعنيني

شعر شعر