‏ومر العام ماشيٍ تغير و الليالي سود
‏و أنا واقف على أعتاب السنين أستقبلك أسرارك

‏فقدتك والعمر يمضي بنقصانه وفاء وعهود
‏تبعتك و الطريق أصله ضياع وفرعه ديارك

‏حضنت أرضك شهاب وحرتك سُمرة و شحك جود
‏يا وحيٍ كل ما ضوى قبسه أوقدت بآثارك

‏حبيبي وأنت ياللي في حقوقك تمتمات رعود
‏علامي كل ماخلتك وراه أمطرتني نارك

‏عكست الريح وأهدرت المسافات ونحرت حدود
‏وأخذت من الثرى حفنة خطاك وعشت بجوارك

‏ولا زالت ذعاذيعك تجدد يا رقيق العود
‏وتهب البال من باب الشمال وتشعل وجارك

‏أحن لضحكتك و لجمرها و لثلجها المبرود
‏و أمر الشارع اللي من بعيد يجسد أدوارك

‏فتل رمح البياض براسي الحربة وجيتك عود
‏بعثه الشعر من سر المجاز وبرزخة ثارك

‏وصح لساني إن طال السكوت ولا عليه زود
‏أنا شاعر ترك حتى اللغة تنصاع لـ أسوارك

‏يابعدي عنك مابعدي بعيد وكل أبوي قيود
‏لو إني من نحرك أقرب من السلسال لزرارك

‏حلالك ياوطن روح القصيد ويا سليل النود
‏تهجرني على مد البحر وأموت بحارك

‏اخذني للضياع و للهلاك وللجفاء المنشود
‏وش اللي ضرني لامن غديت وطال مشوارك
- شاهر اللغبة

‏أتساقى شرهة الأيام وأمد اعتذاري
‏كلما جف الكلام احتجت للروح القديمة

‏آه يا ملح السنين إن ضاع في ضحكتك ثاري؟
‏الحقايق مدلهمة شور والفرقى مقيمة

‏جيتني ما كنك إلَّا من حقوق الغيم ساري
‏واستعضت عن القصور الشامخة في ظلّ خيمة

‏ما جهلت إحساسك المرتاب لا زل اختياري
‏مرت فصول السنة والنار تأكل من هشيمه

‏ياحبيبي وانت عارف قدري ، وخابر وقاري
‏لاتحد اللي زرع لك ورد ، واستسقاك غيمة

‏فاتح لك كلما هب الهوى الغربي زراري
‏والله إني لو معه عطرِك؟ تعلّقت بـ نسیمه

‏السماء مشهد وداع، وريبة شعورك غداري
‏ورغم هذا خازن لـ [ عيونك الثنتين] قيمة

‏كيف أحبك ؟ وأنت مستسهل غيابي وانتظاري
‏كيف أعافك ؟ والهوى غلاب، وعيونك غنيمة

‏طل صبحك نوق بدو ] خيطت ثوب الصحاري
‏وجيت أدفّ الخوف وأذبّ لمساعيك الخريمة

‏لا تحاول.. والحبايب غافلة، والشك طاري
‏المحبة ما لها تالي... وشرهتها ظليمة

‏أعرف الرأي العقيم ولا تخيرتك مساري
‏الليالي لو نعرف [ظنونها] تبقى عقيمة

‏وأنت وحدك تستفز الصمت وترد الطواري
‏ما قدرت ألد لك تقدير .. وإلا أصد شيمة

‏نجمة مرت تهادى بين شكي، واقتداري
‏استباحت كل شيء "وكل طقه بـ تعليمه "

‏جعلني لا ضاعت أحلامي وسيرتك قراري
‏ما تخيب هقوة عيون بعد فقدك: يتيمة

‏ولا تنشد عن هزائم وقفتي وإلَّا انتصاري
‏الجروح اللي على خبرك على خبرك قديمة

‏هات لي عمر انتظاراتي، وشعري، واعتباري
‏والحقيقة لو عواقبها - على روحي - وخيمة

‏كل درب ما يجيب عيونك النجل اضطراري
‏والدروب اللي تجيبك يا آخر أحبابي كريمة

‏كم مضى لي بين أداري جرحك الأول، وأداري:
‏قلب إن ضاع الكلام اشتدّ لك: شعر، وعزيمة

‏ما علي من الجفاف إن طالت يدينه دياري
‏وين ما لديت أشوفك نوض برق، ووبل غيمة.
- محمد السلطان

أنا صبحي يفرق وحلكة مساي تلم
ولي قلب ما يسلى ولي نفس ما تطرب

أشوف الشوارع موحشة والمباني هم
شعوري غريب ومجريات الزمان اغرب

يا كم ليلة تستدرج اللهفة ويا كم
وقفت اتحرى طلعت الشمس من مغرب

قلوب الحبايب دافية مثل قلب الام
وهي كل طعنة عندها طعنة الاجرب

حبيب الظنون الخايبة .. يا حبيبي .. سم
وش ابعد مشاوير الحنين ووش الاقرب

تمر الدقايق بإنتظارك ثقيلة دم
واذا جيت قام يسابق العقرب العقرب

مع ان الطواري موجعه والجروح تشم
لا زالت طواريك القديمة هي المهرب

لا تشره علي ان حار ذهني وصمتي عم
يموت الكلام بحضرة الأنعم الأذرب

أخاف أتمادى في شعوري تجاهك ثم
أمر بمراحل حزنها غير مستغرب

واصير الوحيد اللي حفظ ذكرياتك صم
واشوفك تنام وتضحك وتاكل وتشرب
- سلطان حجاب

جميله جدًا

تنويه آل قصيدة
أنا ما احلل اي شخص يستغل وقتي وجهدي لحاجه في نفسه الله اعلم بها، اكثر من خمس اشخاص طلبوني قصايد بالنهايه طنشوا رسايلي! هذا غير اللي ياخذ القصيده ولا يرسل قيمة مجهودي بصريح العباره يسرقها!

اعذروني إن ازعجتكم لكن الموضوع مستفز جدًا

صبحكم الله بالخير

-بدون عنوان-

عثى فيني الحزن وازريت ادوّر فالحياة ضماد
على الوجه المليح احزان مقريّه ومكتوبه

بعد ما كانت الضحكات تسبقني رضا وعناد
شفاتي عقبها صارت على الضحكات مغصوبه

دخيلك لا تشحّين القصايد يا حروف الضاد
من اللي يسعف الشاعر اذا ضاقت به دروبه؟

بعد ما ناحت الورقى وغنّت بالشعور الحاد
تأرجح قلبي المنهك ما بين الذنب والتوبه

طلبتك، وانت غفّار الخطايا رازق النشّاد
تفيض برحمتك عاللي هلَك من كثرت ذنوبه

انا ياربّ احبك حبّ مايطري على العبّاد
واخافك خوف لو وزّع على اهل الأرض ماتوا به

الافراح بحياتي دائمًا تلبس ثياب حداد
متى ياربّ تفرجها وْ أبدّل للفرَح ثوبه

تعبت اساير الأيام و اوطى جمرة المعتاد
والأيام السعيده من كِتاب العمر مسلوبه

احايل دمعتي من خوف اشمّت فيني الحسّاد
سنه واكثر وانا اجاهد دموع العين بصعوبه

ظميتك يا ملذات الحياة ونورها الوقّاد
انا ايامي قبل لا القى الفرج ماهيب محسوبه

‏نجمةٍ حنّت على قلبه وحطّت في كفوفه
‏من ثمان سنين لين اليوم وكفوفه وطنها

‏حبها من قلب، ذاب بغيرته وأعماه خوفه
‏وجا يواريها عن عيون المخاليق ..ودفنها !

‏لوّها ما حنّت بقلب آدمي وأضحت بجوفه
‏كان يمدي كل مخلوقٍ سماويّ يحضنْها

‏وللقدر كفٍ ماهي بقلوبنا دايم عطوفه
‏والطيوف الراحلة لامن لفت يقتل شجنها

‏وأنتي أنتي كل ما مرّر على بالك طيوفه
‏سيّري بالعقل رغباتك ولايفلت رسنها

‏علّميهم عن لظى غلطاته، حكاية عزوفه
‏وكيف جاته كلمة الغفران طوع و ماوزنها !

‏وكيف فكّ الموت بيدينه على الروح الشغوفة
‏وكيف طشّ الخوف بعيونك وبدّد لك وسنها

‏وكيف كنتي جنةٍ ماهي بالأوجاع محفوفة
‏وكيف كنتي فرصةٍ بيديه لكن مامكنها

‏علمّيهم كيف لا حط الرجل عذره: ظروفه
‏ينهزم ما ذاق لذّتها .. ولا نام بعدنْها

‏قِدمه حصون الملام وخلفه أغلال الحسوفه
‏وتحت رجله غلطةٍ شيّب وهو يدفع ثمنها

‏واقفٍ ما حسّ في عمره وهو قاعد يطوفه
‏ينتظر لحظة من الماضي يرد الذات منها

علّموه إن مت وإن طوّل على قبري وقوفه
‏المشاعر لافنَت، وإن مات ما يرجع زمنها!

‏وعلمّوه ان مت لايحفظ قصيدي في رفوفه
‏ولبّسوا لوحاتنا وأحلامنا بأبيض كفنها

‏وعلّموه يسكّت إحساسه ولا يِتعب حروفه
‏لو لحقني قافها للموت وأوجعني لحنها
- يمام

اللهم صلِّ وسلم وبارك على نبينا محمد

مرحبا

وش تبي زود غير العمر .. عمري واخذته
‏أترك اللي يحبّك للسّهر ، والمساري

‏قد طلبت الله فْراقك ، ومنْك أسّتعذته
‏لا تشوف البشر ضعفي معك ، وإنكساري

‏يا كَسر خاطر اللي من حياتك نبذته
‏لو يكابر على كبر الجروح ، ويداري

‏انت شحّيت بـ إحساسك ، وانا ما شحذته
‏ويوم خيّرتني .. كان الفراق أختياري

‏يمكن يكون هذا أسوأ قرار أتّخذته
‏بس انا لازم اتحمّل نتيجة قراري
- فهد العيبان

انا لحالي ، واعرف الدرب هذا ما يجونه ناس
‏يحيّيني شجره و تعشب اللحظات ب دروبه

‏غريب ٍ حس في جرد المسافة والخطاوي فاس
‏يونس وحدته نسناس بارد لا طرق ثوبه

‏يشوف البرق حبره والسحابه ب المدى قرطاس
‏تسولف للشجر والناس والوديان ب عذوبه

‏نجومه كنها حبات بن ٍ والقمر محماس
‏فناجيل الشعر لا مره الهوجاس مشروبه

‏خياله كم خطب ودّ القصيدة و الدروب احساس
‏واذا جاها خطيب تقول انا من العام مخطوبة
- حمد المشيعلي

لا سرا الليل الطويل ولا غفوا سمّاره
‏جيت في عيني كلام وفي ضميري كيّه

‏لي شهر ماني بخير وقدرتي منهاره
‏وخاطري متضايق ونفسيّتي نفسيّه

‏ماني بـ محتاج للخلوه ولاني كاره
‏بس وين الخلوه اللّي في طرفها فيّه ؟

‏قبل يبدا الصبح بشغّل وافرّ الطاره
‏والقصيده من وجعها كنّها مرثيه

‏من مشلّه مرتع ام قلاده وهدّاره
‏فاهق الشيّط وراي وفاهق الشيحيّه

‏لا استوى خط الرياض اللّي عقب جرّاره
‏يستوي في البال وزن وفكره وقافيّه

‏شاعرٍ ودّه يوصّل للحبيب اعذاره
‏ويبتدي صفحه جديده ويحذف ماضيّه

‏لكن معييّ الزمان ومجريات اقداره
‏والظروف اللي تجمّعني معاه معييّه

‏الزمن ماجاني بـ خطواته المحتاره
‏والله انّي ماقدرت انسى هذيك الجيّه

‏جيّته جيّة غريمٍ جاي ياخذ ثاره
‏ولا ترك لي غير جرح ودمعتينٍ حيّه

‏مرتكب لي ذنب ماتنفع معه كفّاره
‏اه ياذنبٍ مانيب اعرف وش تاليّه

‏لا ذكرت ان الحياه ايّامها دوّاره
‏خفت من كل الليال السود والورديّه

‏احدن اليا غاب .. اموت ان ماعرفت اخباره
‏واحدن اليا غاب عنّي غيبته عاديّه

‏كان قلبي يستحس من الهوى واضراره
‏لين بيّن فيه من كثر التعب ماريّه

‏ومن فقدت اللي عليها الوقت فلّ ستاره
‏مابقى شيٍ يتعّب قلبي بـ طاريّه

‏ان كتب ربي .. بحطّ ايدي بـ يدك سواره
‏بعدها لا مت ؟ نفسي راضيه مرضيّه
- محمد فراج

ياروح روحي مع صواديف الايام
‏دايم ومقسوم الشقا من نصيبي

‏مرّي ليا زانت و طير السعد حام
‏وان بان ضعفي من عنا الوقت .. غيبي

‏مالي على شحّ الزمن شور و أحكام
‏أذبل شويّ شويّ محدٍ دري بي !

‏ياما دفنت بـ قافر الواقع أحلام
‏حتّى يقيني طاع شكّي و ريبي

‏و صحيبي اللي ذاخره درع و حزام ؟
‏اشدّ طعنه جاتني من صحيبي

‏الوقت مثل العدّ و ظنوني حيام
‏اقبل فتى ! و اقِفي بعجزي و شيبي

‏صرت أرغب الوحده بعد ضيعة العام
‏.. العام يومه ضرني زود طيبي

‏و مخاوي اوراقي وشعري والاقلام
‏تفزع لاضاق الصدر : (فزعة عتيبي)

‏اما البشر عرضتهم هب الانسام
‏وماقول يالانسام ودي وجيبي

‏انا الحقيقي واغلب العالم اوهام
‏الميزه اللي صارت اليوم عيبي ):
‏-محمد ابن هرشان

لمن يسأل عن قصائدي؛ كل ماهو مذيّل بإسم مها من كتابتي، بالإضافه لقناتي عبر التلقرام:

https://t.me/maha503

مساكم الله بالخير

‏أنا كبدي بقاياها رماد و خاطري موسوم
‏بعد ذيك الدموع الشعر وش يكتب على شانه !

‏ياطول الليل كنّ الصبح كسبٍ في يدين القوم
‏نهار الشيخ توخذ حكمته من راس شيطانه

‏لو قيودي حديد اشوى و لكنّ القيود سلوم
‏و مجدٍ ما يطاول طول سقفه غير عمدانه

‏يشاف لحال لو من فوقه نجوم و تحته نجوم
‏فرق عنهم مثل فرق الشعر عن باقي اقرانه

‏خلقنا الله لا نسحب بشوت ولا نشيل ختوم
‏ليا منا سحبنا الحدب شلنا الراس ب امتانه

‏ماعاد البال يدله عن ملامة مكثرين اللوم
‏أنا أول من لقى حريته فقيود سجّانه

‏أعز الحب حبٍ فوقه اسراب العذاب تحوم
‏يردّ القلب مثل الحاكم ليا زال سلطانه

‏يا شوف عيوني أطلال المعاتب دارسات رسوم
‏عليك العين يذكر وسمها و الروح ضميانه

‏ نسيتك ! والله اني عقب ذيك الجمرتين التوم
‏سوات الي على فراش الوفاة و حوله اخوانه

‏يواسونه بقوله طيب و عسى بقاك يدوم
‏و تقول عيونهم ف وداعة الرحمن و امانه

‏يسومون المحبة و انت ساكت ما فرقت السوم
‏حبيبي لا بعدك خيانة ولا قبلك خيانة

‏تواسيني جروحي من يدك لو خنجرك مسموم
‏دخيلك يوم تجرح من جفا ولا من ميانه !

‏غدينا كنك اردى الناس و انا الطرقي المعدوم
‏لو انشدك ارخص الي في يدك ماقلت لي عانه

‏اخذت من الهوى ما ياخذ المعطى من المحروم
‏و عطيت من الهوى ما يعطي الشاعر من احزانه

‏عسى عينٍ تذوّقك المفارق ما تذوق النوم
‏و لا تهنى بشوف إلا تشوف الضيق و اعوانه

‏شرد ذهني و حارت حيلتي و لّا وراي علوم
‏لو اسولف بها شفت الملحّن يلعن آلحانه

‏ورى ناعس هدبك الي من الله كن فيه سهوم
‏ليا اقرى جفنه اعزّ السلام يكبّ حجَانه

‏تناعس له مصابيح السماء قبل النهار يقوم
‏متى ما اذّن و صلّى ليته يصلي من إيمانه

‏ليا اعتقت الحرير و حال دون العسجد المردوم
‏خطير يحوز ظلّك عن هله و يوقّف وزانه

‏احسب اني عليك اجرى من البارق على الديموم
‏يا حيّ الموت و لا الهقوة الي مالها خانة

‏هقيتك كلمةٍ يردع بها الظالم عن المظلوم
‏و أثرك الكلمة الي بين قلب الزور و لسانه

‏عسى ما بيني وبينك ما بين البارحة و اليوم
‏يا لو كنّك حدا قصايدي في هيئة إنسانه

‏نهار اني تمثنيت البحر قدام اعرف آعوم
‏ عشان الي نهار موادعه وادعت نسيانه

‏ماشفت الدانه إلا شفت والله موتي المحتوم
‏أنا ما دامني حيّ الحياة اغلى من الدانه

‏أنا بعدك ما كنّي غير طيرٍ يوم ملّ الحوم
‏على كثر الشجر وقّع على شباك زنزانة
- متعب البقيلي

جميلة جدًا جدًا

آفل النور واجتاح الظلام المدينة
من يرّد النهار اللي خذته الغداري ؟

غروٍ اللّه خلق شمس الضحى في جبينه
من سناء غرّته شفت ل سناها مواري

غصنٍ أثمر بعد ما طاحت أوراق تينه
بعض الاغصان يثمر كل ماكان عاري

من يضم إبتسامات الوجيه الحزينة
للحزن ظلٍ في وجه الحزين متواري

ليه أعاتبكْ يا خلٍ فدى الكل عينه
وأنت صمتك على نجوى معاتبك" ضاري

أترك العذر ماني ناشد العذر وينه
رد ّحتى لو إنك ما ترّد اعتباري

عوّد مثل الأمان وحلّ مثل السكينة
وطيح مثل المطر لا طاح فوق الصحاري

تمسي وعيني الولهى لطيفك رهينة!
ما تصحيك لهفَة ؟ ما يسهرّكْ طاري ؟

ليت قلبك خذا من عودك الغضّ لينه
يا مخليني أشكي غربتي في دياري

وش يكون الحبيب إن كنت ماني ضنينه !
المعاذير ما تخمد لواهيب ناري

أنتشلني من انقاض الألم والغبينة
لا تورّي عيون الشامتين انكساري

قلبي المنفطر ردّه عن الياس ، دينه
سلعةٍ مالقت في سوق الأحباب شاري

كيف أبنساك ! واللهفه بصدري دفينة
من متى كان نسيان الحبيب اختياري !

ودّع الصبر قلب يشتكي لك حنينه
منهك من السْهاد ومن طوال المساري

كنت الوم السحاب ليا جفى ياسمينه
لك الحين أقدم للسحاب اعتذاري

موصد الباب دون الذكريات الحزينة
وش يذريك ؟ لا هبت عليك الطواري

خل كل الهموم اللي بصدرك سجينة
دام محدٍ عن اللي في حناياك داري

ما بقى للرحيل إلا صعود السفينة
ليت الأحلام كانت تستحق انتظاري

- سعود مهدي