تجديد عهد

معك قصرت وادري لك علي حقوق
لنا مده وانا في حال وانت فـ حـال

وجيت استجدي لعتمة خطاي شروق
ترى فاح العذر باصب لـك فنجـال

وتبختر يا وطن فيني وراسـك فـوق
ابشعر بك هنا فـي مهجتـي تختـال

تبعثر بي غـلا ودي ألمّك شـوق
ابستطعم من شفاه الفـراق وصـال

كثر ما كان بي بـرد لدفـاك يتـوق
ابتوسدك حضن فـ غيبـة العـذال

وطن من رق عشقك مانـي بمعتـوق
تكبل به محبـك وارتضـاه اغـلال

انا السبّاق لك فـي غفلـة المسبـوق
اذا حليت بك واختـار لـه ترحـال

انا عاشق ترابك هو بقـى معشـوق
سواك ابذر به احلام السنيـن امـال

نخل كل السوالف والقصيد عـذوق
تعال اخرف من اطراف الحكي مـوال

على جدار السهر علقت صوتي مـوق
يغني بس لا من ضقت دمعـه سـال

تنفستك فجر كـان المسـاء مخنـوق
يا اخضر بعد ما ليل اصفراري طـال

سماك امسى لسان الحال وانت بـروق
بعد ما لحت وش ينطر لسـان الحـال

سوى وبلٍ مواعد له يبـاس عـروق
عشان يـبلله مـن صـادق الهمـال

يا مبحر بي مـن المعلـوق للمعلـوق
انا نهام واحساسي شجـن يـاااا مـال

تبي تعرف اذا غنيـت بـك طـاروق
من اقصاي اسمع اش ردد حمام البـال

احبك .. ايه احبك ما تبـي منطـوق
اذا وطّنت في ديـار الكـلام افعـال

وطن يا والديني مـا يجيـك عقـوق
عقب ربيت فينـي للهجيـر ضـلال

كأني مـن بقايـا طينتـك مخلـوق
لذا لا يمكن سنينـي تصيـر اطـلال
- محمد السعيد

اللهم صلِّ وسلم وبارك على نبينا محمد

انشروها، كتب الله اجر من قام عليها ومن نشرها

مرحبا بالجميع

‏ضروري انوه على أمر مهم
‏أنا اصيغ مشاعركم على ألسنتكم واترجم ما يصعب شرحه من خلال -حروفي- هي حقي الشخصي ولا اسمح بأن تنسب أبياتي لأي شخص لأنه فقط اشترى مني ثمن الصياغه، ما خبرت الرسام لما يرسم وتُباع لوحاته تنسب الرسمات لشاريها بل تعود نسبتها للرسام نفسه، لذلك في حال طلبتوا مني قصيده تترجم مشاعركم انا ما اسمح انكم تنشرونها بإسمكم، انا احافظ على خصوصيه المشاعر بعدم نشري لكل القصايد الشخصيه الخاصه هذا لا يعني اني اتبرّا من كتاباتي أنا مثل ما احفظ خصوصيه المشاعر لأهلها اتمنى من الجميع يحفظون حقوق الملكيه لي.

‏شاكره تفهمكم

صبحكم الله بالخير

أحب الوجيه البيض كره الوجيه السود
ولا احبّ أجامل واكره اللي يجاملني

مواطن لي حدودي مثل ماعليّ حدود
ولايمكن اسمح للخلايق تساهلني

يشوف الضعيّف كل وقفة شرف منقود
وانا ما اشوفه شي من شان يشغلني

ولائي لداري دم ماحتاج فيه شهود
تجاهلت صوت اللي من الناس يجهلني شيء

نِعم بالدول والمملكة ماعليها زود
مع معزّي أطول روسهم مايطاولني

ماوقف مع محمد عشانه من آل سعود
أوقف مع محمد عشانه يمثّلني.

أببقى معه مادمت فوق الثرى موجود
واباعيش اشوفه يوم عن يوم يذهلني 💚
- أيمن الرويلي

" الرجل اللي مايهتم في وطنه وفي دينه وعروبيته ماهو برجال"

‏ندافع عن عقيدتنا ندافـع لو تروح أعمار
‏وصبــيٍّ مايـدافـع تربـت يســراه ويميــنه

‏لنا دستــور نحكـم به ولا يغـدر بنا غــدار
‏مضــينا به وقــمنا به ولا حنــا مخــليـنـه

‏ليا زادت رقوم القوم رجعنا الرقوم أصفار
‏تحت راية بطل بالحق مرضينا ومرضينه
- خلف بن هذال

صبحكم الله بالخير

قبل كتابه قصيدة بنيّة الدفاع عن الدين والوطن، استحضر اخي الشاعر قول الله تعالى {مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ}
الخوض في الأعراض وهتكها ماهو بمرجله ولا فيه شاعريه ولا يمت للدفاع عن الوطن والدين بصله، اذا ما عندك كلمة تجمّل فالسكوت خيار مناسب

‏ما عدت ألوم الشعراء على بعض السكوت لأن الوضع الحالي في انحدار وفي هذا الصدد يقول حزمي بن سعد:

‏الله ولا بعض الكلام اللي يحطك في حرج
‏الكلمة اللي « ماتجمّل » خلها في فالها
‏
‏ودك يقولون العرب وش فيه ساكت ما هرج
‏ولا يقولون العرب « ليته سكت ما قالها »

صبحكم الله بالخير

ياليت لي جنحان واقدر على الطير
كان ارتميت بحضن غرّ السحايب

تعبت اجامل نفسي بقولة : بْخير
ماطاب حال و قلبي الهشّ طايب

خانتني ظروفي ولا خان تعبير
بعض الحروف احيان تصبح عقايب

كنت احسبه غير البشر واصبح الغير
في قلبي اقرب من عن العين غايب

ما عاد لي نفسٍ صبوره على السير
ولا عاد لي قلبٍ من الحبّ ذايب

كنت انتظر منه التفاته وتقدير
ما كنت اظن جروح هجره عطايب

قولوا له ان فكّر يجيني بتبرير
يرجع يدوّر في غيابه سبايب

لو كلّ شيٍّ بالعمر منكتب خير؟
مصيرها ترجع تدور النوايب

‏يا لبيه يا وجه الرضا و الجناب السمح
‏يا عذب الوصوف و شف بالي و ترويقة

‏مضارب رموشك في خفوقي مضارب رمح
‏عليك الله ارفق فـ الخفوق و معاليقه

‏معك لـ القريحة لهفة و لـ المشاعر جمح
‏تهادى ولك عذب القصيد و طواريقه

‏انا اقول عاتبني يا مجمول وأكتب وامّح
‏علي الحرام اني معك ما اعرف الضيقه
- عمر الوهيطي

‏في هامش البال -والذكرى محطة عبور-
‏أنا أكثر الي عرفك .. وعايشك عن كَثَب

‏كنت الكلام الجلي.. ماكنت بين السطور
‏الي يحثّ السكون، ويستثير الصخب

‏لك البقاء؛ من مسيري بك ليوم النشور
‏قيفانك أركان .. وأوزانك عريبة نسب

‏ولي منك مايستفز من الشعور: «الشعور
‏في كل لحظة تجلّي وإرتعاشة هدب»

‏أسرفت بك.. لين ضاقت بك وساع الصدور
‏وزهدت باللي بقى بك يوم زلّ الطرب
- عبدالله البديري

اللهم صلِّ وسلم وبارك على نبينا محمد