قبلة احساس القصيد ! ( ووجهه وميلافه ! )
‏من بعد غبتي .. وانا الصبر الجميل وشاحي !

‏كنّ ورا صدري ' يويق الطير " من مشرافه "
‏ما لصوته غير ( نسناس الهبوب ) ملاحي

‏ما حسدت الطير في مرواحه / ومنكافه !
‏قد فلج صدر السماء ( منكافي ومرواحي )

‏كل ما هبت عليّ .. " النسمه الهفهافه"
‏(ضاع قلبي مثل ضيعة طيري وملواحي)

‏لا تلومين المشعّف ' لو يزود أشعافه
‏لاقيً له عنق ( ريميّه ) وعين ( وضاحي )

‏وجهه اليـك ، و" تباريح الحياه " ، خلافه
‏والله ان قلبه خَبل .. لكن "عقله صاحي"

‏مع مرور اللي يذوب الليل بين اكنافه
‏خلّي الصبح يتنفّس واجلسي وارتاحي !

‏في لواحظ عينك يدف الظلام أكتافه
‏الظلام اللي تقدّى به ، ضيا مصباحي !! )

‏ادفنيني تحت وبل الغيمة الشفاّاافة ..!
‏بين خمريّك .. ولمعة ثوبك التفاّحي

‏كن خصرك يوم يبسط للهبوب .. اطرافه
‏تارك(ن)له فرجة(ن) يلعب بها مسباحي

‏تشبهين الشعر حتى في ( عذوبة قافه )
‏كنّك اصبوحة بداها ناصر اِبن مناحي !!

‏ادري ان الفقد موجع وادري الحبّ آفة
‏ما أخبر انه مرنّـي .. ( تيارّه الاصلاحي )

‏وإن هلك طراد شفّه دون سعي اهدافه ..!
‏الصبر منجاي 'والعزم المكين سلاحي

‏يتعب المبدع ما يلقى فـ الحياه انصافه
‏ولّا انا قد جزت عن شفّي وجمع ارباحي ! )

‏ان خفضت جناحي يحجب القمر مهيافه
‏وان رفعت جناحي يضيق المدى بجناحي
- تركي العطاوي

يا الله جميله جدًا جدًا
ماشاء الله تبارك الله

صبحكم الله بالخير

اللهم صلِّ وسلم وبارك على نبينا محمد

‏قديم الهوَى قبل أرتمي للهوَى، وأزِلّ
‏خذ الحقّ قبل يضيع مستقبِله، وأجرَه

‏أعرْفِك وأتوْه فـْ كلّ حاجة معك، وأدلّ
‏وأعرف الصباح العذب مِن نَسنسة فجره!

‏يا مِلْح الشعور الصبّ، والجادل المبتلّ
‏إليَا ضعت في غيهبْه، واحتلت مِن عطره..

‏لا ترتاب! لك خوْفي قصيْدة، وصوتي ظِلّ
‏أنا أخاف قبل أحبّ، وأخاف قبل أكرَه..

‏وش الوِدّ لا صارَت حقوق المحبَّة: غِلّ؟
‏وش السرّ لا مرَّت عيون البشر.. عَبْره؟

‏أداريك وأركض بَين ما دقّ فيك.. وجَلّ
‏وأنا -العالم الله- عارف إحساسي، وصبره

‏تزلّ الدروب وكلّ حاجة «بعض من كِلّ»
‏مشاوِير، وأحلام، وظمأ هَاجِس، وفكرة

‏أشوفك وَطن قبل ارتحالي وأشوفك حِلّ
‏طلبتك وش أصدق من شعوري، ومن عذره؟

‏عساني إليَا ملّت ظْروفي معك، ما أملّ
‏من المبسم اللي يسرِق اليوم من بكرَه

‏أنا يا بعد من خان عَهْد السنين، وزلّ
‏إلى اليوم واقف تحت شبَّاكك.. أنتظره!

‏تردَّدت وانسلّت دموعي معك وانسلّ:
‏كلامٍ حَبس عذر المسافات في صدره

‏خذ -اللي تبي مما حوَته اليدين- وخلّ
‏أنا مثل مِن يرهن لأجل حاجته عمره!

‏أمانة يا أبو وجهٍ «يشوف المفارق حَلّ»:
‏إذا ماقدرْت تردّ ضحكتك؟ لا تشرَه!
- محمد السلطان

"وأعرف الصباح العذب مِن نَسنسة فجره"
اشارك الشاعر هذه المعرفه والله

قصيدة هذا الصباح العذب، عذبة للغاية

" خذ -اللي تبي مما حوَته اليدين- وخلّ
‏أنا مثل مِن يرهن لأجل حاجته عمره!" :(

بدوي لا أستحى من قول أحبك
راح ينًسج لك من اللهفة قصيدة
- عويّد الحجيلان

هذا لا قيل بيت عن قصيدة❣️

مرحبا

تحتري من سابع أبواب العبث وحيٍ يجيها
-بعدك ايامٍ- تتل الصمت وتجوّد عنانه

خاويه، حتى مافيه عروش خاويةٍ عليها
ما بقى شي بمكانه صار باقي في مكانه!

بارده، حتى القصيدة لي ما مدّت يديها
موجسه، حتى ظلام الليل معقودٍ لسانه

ظلّك أقرته الليالي وِرد من بين اصبيعها
وجهك أقفى والظلام يخاف من بارق ثمانه

علّم النود الليال الاوله لا تحتريها
وقتنا علّق مصاقيله وحوّل عن حصانه

لا فرح بنفوسنا، لا حزن حتى يعتريها
لا لقى التذكار درب، ولا لقى النسيان خانه

المدينة موغله في روحة الناس ومجيها
والشوارع تبتلع من عاكس العقرب زمانه

واجدبت حتى الصباحات وعثى التكرار فيها
ما بقى صبحٍ قديم يشابهك واسهر عشانه!
- نايف عبدالرحمن

مرحبا

المحبة أرض والفرقا أراضي
والزمن كله ترى لاغبت ماضي

والله إني ما أشوف إلا عيونك
إن رحلت اليوم أو طوّل مراضي

قالوا العـذّال والعـذّال مرضى
وش بلا حالك من الاشواق قاضي

قلت يهجرني حبيبي لين يرضى
علّموا الظالم ترى المظلوم راضي

جرّحوني في هواك وقلت أبشكي
ماهو من جرحي ولكن لـ إعتراضي

وش علي لو قطّعوا لاجلك عروقي
من رضى بالحب .. يرضيه التغاضي
- البدر رحمه الله

ليه محد شاركني هالقصيده؟ ما اعذبها واعذب شاعرها رحمه الله عليه

ما سمعت مثل إلقاء البدر ولا اظنني ابسمع مثل جماله

ليتني اقدر اشارككم المقطع
بس ابحثوا عن القصيده مسموعه :( ♥️

كفكف دموعك وشفني خير قدوه تقتديها
ماخذه من كلّ حاجه محزنه حقّ الدفاع

اختلق ضحكة بريئة أغلب الأحزان فيها
انتصر من ضحكتي والحاجه أم الاختراع

ماذرفت دموع عيني لجْل شخصٍ يحتريها
وما اخاف فراق لاني صاحبة قلبٍ - شجاع -

لو تقاس الاهتمامات بـ مدى بكيي عليها
مابكيت الا على فستان قصْر و روج ضاع

اشبه لطفلة تحَبس العبرة اللي تعتريها
ليين تبكيها على لعبة سقط فيها القناع

حالفه إنّ المسرّة ياااا تجيني يااا اجيها !
ذاخره لدروبها من معمعة صبري اقتناع

ابتغيها تضمّ حزني مثلما ضمّت يديها
الفقير اللي خلق من سلوة احلامه متاع

مختلف مفهوم تقديري للاشيا اللي ابيها
يشبه لطبع الكريم اللي هدا أكله و جاع

امي تقول ايّ حاجه ودكّ بْها - اتركيها -
وانت شخصٍ من غلاته رحت واهديته وداع

مساكم الله بالخير