‏شحَّت بروق اسمك، وجفَّت مرابيك
‏واِجتاحني عقب الزعل ما تهيَّا

‏أعْرِفك وأجهَل ما بقَى من مشاهيْك
‏وأقوْل -يا كلّ المشاوِيْر-: هيَّا

‏عذب المحيَّا، لو تباعَد حراويْك
‏أنْسِج لك دروب السفر في يديَّا

‏قلبٍ تعلَّق في هَواك، ومسارِيك..
‏حاوَلت فيه يحبّ غيرك.. وعيَّا
- محمد السلطان

جميلة جدًاا

باقي من الليل دربٍ خطوتي ما تبيه
فيه إلتفاته،وتلويحه، ودمع أنهمل

العام ، ما فيه دربٍ للأمل ما آهتديه
واليوم ماعندي لْفرقاك صبر الجمل

هزّ الهوى طارف اشواقي وكمّل عليه
ولي نفس من طيفك السرّاي عيت تملّ

قعدت ما عندي من مْعاتبي غير ، ليه
قلوب الأحباب ما تحضى بلمّ الشمل

ليتك تهجّيتي بْصمتي ، كلام الوجيه
وش حيلتي يوم خانتني بعدك الجُمل

رحتي ولا عاد باقي ، غير قلبٍ نزيه
مْكابد الوقت عاناه وحمل ما حمل

تعالي بْـ عذر لو العذر ماهو وجيه
إن جيتي اقول فقدك جرح مير أندمل

و سَمّي على الجرح يبرى، وإن بريت أنجحيه
ترا المحبه بدون جروح ما تكتمل
- ألِف

"ليتك تهجّيتي بْصمتي ، كلام الوجيه
وش حيلتي يوم خانتني بعدك الجُمل "

عذبة والشعور فيها طاغي

مساكم الله بالخير

اللهم صلِّ وسلم وبارك على نبينا محمد

دعت سمر الجدايل وانتخت بالقذلة الهلة
تبي مني عروس للقصيد ازريت لاغويها

ويوم اني لقيت لها الخلود وجيت ابوصل له
تنحرك الكلام اللي فهقها دون مغليها

خضع لك راس مسبوق القصايد وانحنى كله
وانا بك شاعر الدنيا ومشغلها وماليها

يذكرني رحيلك مجلسٍ باقي على حله
مداهيل الرجال اللي تنومسنا مواطيها

هنا سليت سيف يوفي الثارين من سله
هنا علقت رمح يطعن الجوزا ويطفيها

هنا بيّنت مصحفك الكريم ودلنا دله
معك نبدا مواعيد الكلام وننتهي فيها

هنا ساقيت غصن من غلا كنا تحت ظله
نسولف بالغنا يا بايع الدنيا وشاريها

هنا كان الرجال جبال ما تقبل خنا الزلة
عمايمها سحابٍ وابله باقي مواظيها

رجالٍ لو تشوف الما غدر ما شربته لله
نبت عشب الرضا يا سيدي بأول مغازيها

هل التوحيد وكنوز العلوم ونصرة الملة
رجالٍ يضحك التاريخ لولها وتاليها

هنا ماضيك ورياض الخليل اللي رعى خله
شربنا عذبها مدري لعبنا في مغانيها

هنا تخنقني العبرة وانا اكتب يا رسول الله
على قبرك نسيت الناس حاقدها وحانيها

وابو قبرٍ يتيه من الفخر بالبيد وتجله
على حسدٍ تبين من سمايمها وصاليها

و يهناك الوفا قبرٍ يضمك في ثرا تله
ما دامه بين فردوس الجنان وبين منشيها

وانا لامن ذكرت فراقك اللي في يدي غله
نسيت ان الليالي شيبتني من بلاويها

على بعد الزمان اللي يعقد الحبل ويحله
ليامني ذكرتك طاحت الدمعة وراعيها

سلام الله ما هز الصبا نسرينه و فله
على الطفل اليتيم اللي عطى الدنيا معانيها
- خالد العتيبي

من أجمل القصايد اللي قرأتها عن رسول الله عليه الصلاة والسلام

‏ما كلَّفك تسأل علي يومك رحلت؟
‏حتى الغريب لجرحي الدامي فطن!

‏ضاقت معاذيرك على القلب وسألت
‏وش ذنب قلبي يومه اختارك وطن؟

‏الحزن حلَّ بخاطري يوم استحلْت
‏من رحت والضيقات فالصدر قلطن

‏لا هزِّك الشوق وتحسّفت وخجلت
‏شوف الليالي وش عطيت و وش عطن

مرحبا

رحلت العمر لو تخطي مرابي بلادي
رجع الشوق قلبي في مرابي مضيقه

منت باللي تمر ويمشي العمر عادي ؟
أنت فرصة عمر مالي عليها طريقه

مت موتة غيور وعشت عيشة تمادي
كلها بالجروح وبالجوارح عميقه

ماعلي لو تضايق من غيابك فوادي
وجهي الزين قبله خف وهجة بريقه

ذكرياتك تمر الذاكره .. لا أرادي
عشتها لا شعورياً دقيقه دقيقه

مرني الصبح كنه عقب بعدك رمادي
فيه ظلمة شعور وفيه طمسة حقيقه

ليت وجه الزمن ماهوب لا أقبل حيادي
في وجه من تسيل العاطفيه بـ ريقه

عن شعور الغريب اللي فداله مفادي
حملته الليالي فوق مالا يطيقه

ان هدى فكره من الهم ما هو بهادي
عنده اللي يزيد الهم والغم ضيقه

بين صبر الغيور وبين ظلم الأيادي
كنت اجاهد ظلامك جهد وانا رقيقه !

غربتني الضنون .. وحركتني المبادي
وكبلتني وانا من قبل أعرفك طليقه

يا حبيبي لو انك منت غاية مرادي
كان ما شفتني في حبك أول غريقه
- سمحه

"منت باللي تمر ويمشي العمر عادي ؟
أنت فرصة عمر مالي عليها طريقه"

الله الله الله

قصيدة جميلة جدًا والله

مرحبا

وإن تسلَّيتْ.. يا وَجهٍ يدفّ النوايب
الهبايب على بال القصِيْد أجوديَّة

جِيْت أدوَّر ورا جِنحك ربوع، وقرايب
والديار أمحلَتْ، وظنون بالي جرِيَّة

كيف أجوَّد عزومي، وأتلع الجِيْد غايب
قبل روحي تمادى بيْن جَرْح، وخطيَّة

لو أعرف القدَر عقب التعب ويش جايب؟
ما تعرَّضتْ.. تيار الهبوب القويَّة

يا سميّ الضيَا، ما أدري سمي الهبايب
وِش خذى منك عسَّاس الديار ضْحويَّة؟

يوم أوْقف لـْ عينك في وجيْه الكتايب
طِحت قدام رِمشك.. خالياتٍ يديَّه

أعرفك قبل أخلق لـ كلَّ كلمة سبايب..
من بنات الرياح -أردى وصوفك-: عبيَّة!

كنت أسايرك؛ ليْن أميل فوق الترايب
وأرتمي.. ليْن أردّ أوَّل نهارك عليَّه..

ليه قلبي غدى من صوتك العذب ذايب؟
والهوَى شرَق، وعيون المشاوِيْر حيَّة

جعلني لا تساقيت الظمأ، والمصايب
أتردَّد على غصنٍ — فدى العمر فيَّه!

لو تركت الديار، ولو عقرَت الركايب!
نَجد ما كانت إلَّا في حضورك عَذيَّة

رحت بينك وبيْن أوَّل حياتي: نهايب
ما معي حيلةٍ.. فـ دروْبك السرمديَّة

فالليالي شعورٍ.. يُوْدِع العقل شايب
وفي الموادع.. كلامٍ يوْرِث الكبد كيَّه

وأنت لولاك ما هلَّت عيون السحايب
ولا استمالت عصافيْرك: غصونٍ نديَّة

أتصدَّد، وأهاب من العيون النشايب!
وأنت حتى عيونك.. فـ الهوَى حاتميَّة

كلّ ما قلت: يفداك الوَطن والحبايب
شفتك الدار، وحدود الوَطن، والهويَّة
- محمد السلطان

-طيفه العسَّاس-

تضيق الاماكن لا استضاقت قلوب الناس
مثل ما استضاق البيت يومه خلا منَّه

تمنّن علي في جيته وانتخى الاحساس
يلوذ الشعور ان جات الاشياء على ظنَّه

لو اني تمنّنت وسقيته بنفس الكاس
يخوفني الحبّ ان غدا فـ آخره مِنَّه

تحمَّلت ما لايدركه قلبه الحسَّاس
أحنَّه، لو ان قلبي من الهجر ما حنَّه

تطيح الدموع ان زارني طيفه العسَّاس
واحسّه يلبّي داعي الشوق ويكنَّه

وأنا مع جروح البارحه كلّنا جِلَّاس
نعزّي بعض في قلب محدٍ درى عنَّه

صداع الفؤاد اقسى ألم من صداع الراس
اثر لا الألم واحد … ولا الونَّه الونَّه

وانا لو شكيت الحظ ما قد شكيت الباس
ولا قد سكبت الماء على نار "يمكنَّه"

حبيب الليال السود ماذاق طعم الياس
مأمّل على نار الهجر تنقلب جنَّه

واذا يعرف الهجر الصريح و رجع محتاس!
أعرف الغياب وأعرف آصدّ ممتنَّه

قناتي الأخرى لقصائدي :)
حياكم الله