كل دمعة تبتليني.. ويفضحها غريب
‏والله انّ يشيب رمشي وانا اذكر مِلحها

‏واذكر اللي قاد ماها على الجفن الخصيب
‏واللي اطفى الشمع ليلة تباطا صبحها

‏واللي ارسل نجمة الحِلم فيها للمغيب
‏واللي استكثر رِضاها .. وجاد بجرحها
- هاجر

والله انّ يشيب رمشي وانا اذكر ملحها :(

قيمة الأحلام: أحققها معاك
‏ولذّة الأوجاع: لاداويتني

‏الرسايل ماتكفي من بغاك
‏وش ( صباح الخير ) لو ماجيتني؟
- فارس فايح

قصيدة جديدة 🤍

في صبيحة يوم فيه الحظّ جاد
سيقت البشرى لعبدٍ مفتقدها

فـ الثوان اللي غلبها الارتعاد
كم دعا شاكر وكم سجدة سجدها

اشرقت بنته على ظلما الفؤاد
وزمّت ايده بيدها تحضن سندها

يستريح البال من نسمة براد
كيف لا عانقته النسمه بيدها ؟

خلْقت بروحٍ سجيتها العناد
وانجبتها أمها فـ غاية جهدها

طفلةٍ عسره تشيطنها السهاد
ماتنام الا على حضنٍ عقدها

تستفز احساسها الحانِ بـ تماد
وتمتحن بدموعها مبلغ جلدها

امها تنشد لها - بانت سعاد -
لين ترخي راسها ويسكن رعدها

ليّنَت باس القوي ولان الجماد
وخرّت عزوم الأوادم في مهدها

في تبوسمها - ملذّة للعباد -
وفي بكاها ذاقت الدنيا كبدها

يلتحفها الحبّ من قبل المهاد
والمروفه طوّقت ناعم جسدها

المهاة اللي طفولتها - جهاد -
ماااا تقدّيها أوامر مضطهدها

من ربت في بيت حايفْه الوداد
مارضت جور العرب يسلب رغدها

المَره في عين الاعرابي : مُراد
لو سعت في خارج ايطاره وأدها

في حياته ، كانت الجرم الوكاد
والطريدة اللي بـْ ذنبه طردها

- مرتع آثامه - إلى يوم التناد
وصمةٍ في وجهه العاري وتدها

زاد دنياها شقا ، و زااادت عناد
وما كسب من هالحياة الا نكدها

بنتٍ تْشبّ اللهيب مْن الرماد
ما تهاب انسان نيرانه خمدها

خاطفه من سود الأيام السواد
وكْحلت في عينها النجلا سعدها

روحها الحرّة تعاف الإنقياد
من لفافة مهدها لْـ لفة لحدها

- الإهانه - ماهي بـ كبوة جواد
ما يهين البنت الا اللي زهدها

والمهاة اللي بختها اليوم ماد
نعمةٍ حلّت على اعرابي جحدها

يستضيق الكون من : ليلة هجاد !
يوم عمري ضاع في سالف عهدها

- قصتي - ما هندمتها شهرزاد
والخيال حدوده اقصر من أمدها

ألف ليلة .. شجّت جْراحٍ جداد
ألف ليله كم غبطت اللي رقدها

جاهليّتنا اهْلكت من فالبلاد
ونارها ، أصلت حياة اللي وقدها

ليت لي قدره على بعض الشداد
وانفث الأنفاس وآبدد رمدها

كان ما خلّيت للضيم امتداد
وما تركت ام البني ترثي ولدها

لو ضماد الجرح محتاج لضماد !
بفعل الأسباب واستعذب شهدها

مااا على الإنسان إلا الاجتهاد
والنعم تتسابق لعبدٍ حمدها

والجروح ؟ عْلاجها بـ الاعتياد
كم من جْروح الزمن وحده ضمدها

ماني بحاجة رخا ، بحاااجة عتاد
للسنين الحاضره واللي بعدها

خايفة ، زهرة شبابي للجراد
يذبل العمر القصير ولا احصدها

لو ضمنت ان صوتي المبحوح فاد
ماضمنت ان البشر تصدق وعدها
- مها

صبحكم الله بالخير 🤍

‏ربيبة النور .. انا باخر فصول الظلام
‏سْنين عمري غياهب تيه .. وانتي هُدى

‏من قسوة التجربه نصفي بهوت وحطام
‏والنصف الاخر يعيش الاحتضار بْـ هدا

‏جيتي وانا اللي نسى صوته طريق الكلام
‏هادي تسولف تفاكيره وخوفه صدى

‏رتبتي انقاضه بوجه ٍ يفض العتام
‏ومعك لقى له حياه وامنيه ؛ واهتدى

‏غياثّة القلب لك بالقلب حلم ومرام
‏ولك واهس ٍ تستثيره ضحكتك ويحدا

‏تداعت سْنيني لضحكتك طيش وغرام
‏وضجّت بك ايامي وْرود وصباح وندى

‏تقسّمت لك معاليقي طيور وغمام
‏ومعك غدى الضايع الميؤوس طفل وغدى

‏معك تمر الحياه بسحرها المستدام
‏ما ودي اعرف نهايتها ؛ ووجهك مدى

‏يا جارة الروح : في روحي صخب واحتدام
‏احس فيني نهايه وقعها ما بدا

‏تمر الاوهام في بالي مرور الزحام
‏واسري معي بال مشغول وعيون سْهدا

‏"اخر لقى بيننا" ، ما كان برد وسلام
‏لمحت الاحلام في سفح اليقين حْددا

‏اللي بتفاصيل صوتك شاف عمره وْهام
‏هو نفسه اللي منِه مرعوب .. ضايع جدا

‏اخر لقى كان في صوتك نفور وملام
‏بديت احس "استماتاتي عشانه" .. سُدى
- صالح الهويملي

‏- اخر لقى بيننا - ، ما كان برد وسلام
‏لمحت الاحلام في سفح اليقين حْددا

آه ياعمر المحبه ،، وريعان الشباب
‏وآه ياحلمٍ صدفه الزمان ولعوزه

‏كيف اسج وطيفه يمر والذكرى عذاب
‏وصورته كنها بنون العيون مبروزه
- عابر

‏للشعر جسم بداخله تنبعث روح
‏روحٍ من الاعجاز تنبض كِتابه

‏كلام متحوّر من الكتب واللوح
‏لافكار تشعر بـ السمو والمهابه

‏يلقى به الرجال عن ظلمته ضوح
‏وترقى به العذرا حدود السحابه

‏توجعني ان صاحت قوافيه وابوح
‏وادرى جروحه واستلذ بـ عِتابه

‏بدايته وزنٍ على الجمره تفوح
‏ونهايته ظلّ و براد ورحابه

‏احيان ورق يلاحي الغصن وينوح
‏واحيان ضحكه عن سموم الكئابه

‏احيان فوضى طفل معفي ومسموح
‏واحيان شايب ملبسه من رتابه

‏واحيان سمر وشعلته هم وجروح
‏واحيان خمر وكاستين وربابه

‏احيان احسه شخص واضح ومفضوح
‏واحيان دربٍ يوهمك في سرابه

‏احيان يتبع خطوتي وين ما اروح
‏واحيان ما بيني وبينه تشابه
- عويشر

من أجمل ما قرأت عن الشعر ❤️‍🩹

مسح حلو العمر في لحظتين وغادر و ماقال
‏عذر يجبر عزا ملح السنين و كبر هقواتي

‏عطاني جرح للذكرى ، تزول الروح ماينزال
‏عطاني جرح مايطري على بال انكساراتي

وش اسوي وانا بنتٍ رهيفة والغدر قتال ؟
‏اذا ماتت فـ محراب الخيانات ابتهالاتي

ياويلي من معاناتي ومن دمعي على الاطلال
‏ حرام اني ماعاد آلدّ عيني .. في معاناتي
‏
‏ يقولون الخساره في العمر والعافيه والحال
‏وانا اقول اخسر كل شي لكن : ما اخسر ذاتي
- أشواق الخليفه

هلا بالطريق اللي من أوحيت صوته فيه؟
‏خذَت بسمتي وجهي عن الصمت والهيبه

‏وتلفّت في عمرٍ لوى راحتي : بـ يْديه!
‏وقلت أجمع ظْروفك وجيب اللي تجيبه

‏أنا واحدٍ كل ما طرى له وصل غاليه!
‏يحط الظروف ، وسود الأيام في جيبه

فدا الباكر اللي ماني بـ عارفٍ وشفيه!
‏نسيمٍ لفح صدري من البارحة طيبه

‏يدبّ الضما غصنٍ تحرّى دلو ساقيه!
‏مثل ما تحرّى -سور قلبي- : معازيبه

‏تبعت السراب، وقلت ما ينتظرني ليه؟
‏وأثر ما ينسّيني -العشم- كثرة الخيبه
- صالح بن حمد

‏بين اللقا والبعد كم … خطوة مواريها سراب
‏مدري بقربك مرتوي مدري ذبح قلبي الظما

‏كنت الوطن لا مال وقتك ليه احسّ بـ إغتراب
‏كنت انتمي لك ، ليه مالك لا ولاء و لا انتما

‏كنت انتقي بين الخطايا لحظة بروز الصواب
‏كنت الوضوح اللي تشوفه ليه يغريك العمى

‏كنت السؤال المنطقي لا صارت الراحه جواب
‏وكنت الرضا قبل الزعل يطلب من الجرح الدما

‏كنت البراهين لـ سكون الوقت وانت الإرتياب
‏وكنت اليقين بـ عزّ شكّك ليه اشوفك ربّما

‏كنت الشتا يوم المقيظ يمرّ .. تلقاني سحاب
‏وكنت الغيوم اللي تغيثك يوم وبلك ما هما

‏على رصيف الأمنيات .. لـ خطوتي مافيه باب
‏إلّا و تقفّل .. يا رفيق اشتدّ ساعده و رمى

‏صار الرحيل اكثر هدوء بدون عثرات العذاب
‏وضاعت عناوين الأمان وخطوة امجاد الحمى

‏ذاك الشروق اللي تخبره .. ما بقى بـ نوره عتاب
‏طاح الشفق غرب الأماني وانطفى ضيّ السما

‏أمّا بعد هذا الشطر في داخله آخر ، خطاب
‏بوداعة الله يا طموحٍ في سنيني ما نمى
- فيصل القاضي

كيف تُوفق لاستغلال عشر من ذي الحجة | للشيخ: محمد المختار الشنقيطي