اللهم صلِّ وسلم على نبينا محمد

"الصلاةُ علىٰ النَّبي مُحمد ﷺ أفضلُ العِبادات،
‏لأَن الله تعالىٰ تولاّها هُو وملائِكتهُ، ثمَّ أَمر بِها المُؤمنين، وسَائر العبَادات لَيْست كَذلك"

صبحكم الله بالخير 🤍

‏تجمهروا في ضلوعي صبح و احتلّو
‏مدينة الفجر وسط الصدر و أغتالو

‏مشاعر الصدق و الحرمان و انهلّو
‏من كل وادي على قلب العنا شالو

‏اسيوف غيبه و خنجر ضيقه و سلّو
‏كل أسلحتهم بعد فرقاك و انهالو

‏شالو حنيني و طيبة قلبي و خلّو !!
‏دمعات عيني ، شف الدمعات كم سالو؟

‏مليت لا يذبحوني .. ليه ما ملّو ؟
‏أغتالو الصبح يا أبن الصبح و اختالو

‏ماهيب زله و اقول ان العرب زلّو
‏مليون مره !! و انا انادي و لا بالو

‏الأرض ضاقت و نجمات السماء قلّو
‏و أيام صبري عن الصدمات ما حالو

‏تنافروا عن حدودي ضيق و انفلّو
‏كأنهم من خلايا الذاكراه زالو

‏من عقب ماهم على ارض المسأله حلّو
‏شالو جملهم على الطرقات و اشتالو

‏حزني و ليلي و تفكيري .. و لا صلّو
‏صلاة ميت عليه من الرمل هالو

‏لا تحسب انهم بقوا بي للاسف ولّو
‏صحيح ما اعرف اميز كل ما قالو

‏لكني اذكر و هم بالقلب ما جلّو
‏يبوني انسى غرامك بس ما احتالو

‏تكلموا مع بعضهم عقب ما اغتلّو
‏و لا ارحموني و لا رافو و لا مالو

‏تعاون الربع في ذبحي و لا ذلّو
‏و من قبل لا يذبحوني هاك وش قالوا :

‏احبابه اللي يبيهم داخله ظلّو
‏ما بين قلبه و ضلع الصدر لا زالو

‏من عقبها ما نيب اميز لكن احتلّو
‏شوارع القلب قبل الصبح واغتالو

‏شالو حنيني و طيبة قلبي و خلّو
‏دمعات فرقى قبل فرقاك ماسالو
- عبدالله ذويبان

معك طعم المسا غير ومعك حتى السوالف غير
معك ياحلو تقليب المواجع بين كفينك

تبختر بين دقات الخفوق ونشوة التفكير
ترى كل الحياة اصغر من اللي بيني وبينك

أحس انك تجي والعشب ينبت والطيور تطير
واحس ان السحاب يلوح برّاقه على يدينك

احس بروعة الدنيا واحس ان الزمان بخير
واحسك للحياه اعذب ندى ما انت بمثل عينك

أشوف الصبح لا شال الشفق هز الظلام عصير
واشوف الورد يضحك مابقى الا ينشدك وينك

واشوف الريح تقبل مستخفه دمها وتغير
تنثر لك شعرك وتنتثر سلة رياحينك

ورا ماترقص القمرا بقلبٍ خانه التعبير
مثل ماترقص الألوان في مسرح فساتينك

دخيل انشودة العشق وذنوبٍ ترفض التفكير
دخيل آخر ربيعٍ مرني في حضن عشرينك

أنا اللي نزّلك من برجك العاجي وجاك يسير
يمدّ لْك اليمين ولا درى عن لهفة يمينك

واثرك تشوفني في حلمك اللي في رجا التفسير
على ذاك الحصان الأبيض اللي في ميادينك

شعرت بطعم سكينك من أول مابدا التقدير
تمثنيت العروق وقبل اكبّر جرح سكينك

لقيتك قبل ما ابحث عنك في الابراج والتبصير
قريتك قبل اموت بلذة قراية فناجيلك

أبي للناس اسولف بك واقول اللي يصير يصير
واحسك سالفه لو سولفوها شوهوا زينك

حشا لو تطري الفرقا ما اعدك راعي التقصير
عزاي اني ملكت بوقتها عرش اجمل سنينك

يقولون الزمان اغبر وانا اقول الزمان بخير
مادام اللي سكن في ناظري ما طاح من عينك
- ناصر القحطاني

عن جمال المحبوب في عين شاعره :
" واحسك سالفه لو سولفوها شوهوا زينك "

و عن لذة آلامه قال :
" معك ياحلو تقليب المواجع بين كفينك "

" حشا لو تطري الفرقا ما اعدك راعي التقصير
عزاي اني ملكت بوقتها عرش اجمل سنينك " آخ

آتضيحك عندهم كنّي على اوجاعي مصرّه
والوجع ما خفّ من ضحكي ولا كثرة مزوحي

قليلة حظ لكني أبد ماني قليلة شان ..

‏والله اللي طرف الليل والنوم استذار
‏والعيون ارخت هدبها وطاح وليدها

‏ياعيوني كل شيٍّ.. توقعتيه صار !
‏فكي عقال الملامه وفكي قيدها

‏مرتكب لي غلطةٍ ما يكفرها اعتذار
‏ماعرف ليه ارتكبها وليه اعيدها

‏ملّ قلب ٍولّعته التفاصيل الصغار
‏الظنون ظنونها والاكيد اكيدها

‏والقلوب اللي تعرف المنافع والمضار
‏لا شعاها شاعي أهل الهوى ، ياجيدها

‏أدركتني من خذتني جهارٍ من نهار
‏من متاهات المحبه خذتني بـ ايدها

‏بنت من وردوا على الموت شيبان وغمار
‏في تصلفاق الجزيره . . وفي توحيدها

‏خشف ريمٍ ذيرتها البلاجيك القصار
‏حالفٍ لو زان مضرابها ما اصيدها

‏في هواها استعذب الموت واوطى كلّ حار
‏واستظل بشمسها واتفرش حيدها

‏موميٍ بسنين عمري لقصاف العمار
‏بين دنّاقة عزاها وضحكة عيدها

‏من طهارة قلبها تنبلج شمس النهار
‏ويمسك ابليس العور هامته من كيدها

‏علمتني كيف يضحك على الحلم الزرار
‏وكيف تغفى مفردات القصيد بـ جيدها

‏وعلمتني كيف اغني مع الاسماء الكبار
‏قبل اعرف اركّب المفرده على ايدها

‏كل ماغنيتها خلف الاسم المستعار
‏اغمزت لي عينها تدري اني ميدها

‏ مايجي عندي للأبيات تقدير و وقار
‏غير لا منها سمعتها وقااالت : عيدها
- منيف الجراش

من زمااان عن هالقصيد الحلو

" في هواها استعذب الموت واوطى كلّ حار
‏واستظل بشمسها واتفرش حيدها

‏موميٍ بسنين عمري لقصاف العمار
‏بين دنّاقة عزاها وضحكة عيدها "
الله الله الله :(

" علمتني كيف يضحك على الحلم الزرار
‏وكيف تغفى مفردات القصيد بـ جيدها

‏وعلمتني كيف اغنّي مع الاسماء الكبار
‏قبل اعرف اركّب المفرده على ايدها "
دقة الوصف مبهرة جدًا

ضرورة الاعتدال ووَضْع المسافة في علاقتنا بالآخَر.

تقديم: عبدالرحمن الهاشمي.

‏الله اللي معطيٍ عزمي على القمّه نجاعه
‏وحده اللي ثبّت الأطواد بفجوج الوسيعه

‏شفني أطرد ذاير أحلامي وأنا عندي قناعه
‏بإنها عمرٍ سبوق خْطاي لا يمكن تضيعه

‏كل ما أسعى فالطريق اللي تحدتني سباعه
‏أترك عيون الشعر في طارف لساني وديعه

‏القصيد يزيدني قوه .. ويملاني شجاعه
‏وكلمة الرجّال ترقى به ليا صارت رفيعه

‏أتصبّر والعزيز إن ذلّ ؛ يزهد في متاعه
‏والخطوب اللي تقدّمني وتقفاني وضيعه

‏الله يجازي الليال السود وحتوف القطاعه
‏كثر ماثبتتّ ميقافي .. وعيّت لا تطيعه

‏ذاكرٍ ماراح من عمري ومتناسي ضياعه
‏ماني بـ نادم وأنا قدامي الدنيا سريعه

‏وارثٍ بيت الكرم والمجد أخوي من الرضاعه
‏لا تغارب كان لي بصمه ومنهاج وشريعه

‏كيف يبرد في يميني جمر ، ويرمّد شعاعه
‏وجدّي اللي يفرق المطلاع في راس الطليعه

‏الليالي حطّت الطيّب على جرف المجاعه
‏لين صار أكثر غصون الشوك تنبت في ربيعه

‏جاهله تحسب لها في شمّخ الأرقاب طاعه
‏كل ماشافت معادنها ذهب طمْعت تبيعه

‏يارفيقي من تميّز طيحته .. قبل إندفاعه
‏قلت عاده لا خثع وإن زلّ قلت إنْها طبيعه

‏ولو يلوح بعارض المنشى على الطيّب إشاعه
‏مايجازي باحث الزلّات من جنس الصنيعه

‏من يسدّ إذنه عن الهرّاج ويجنّب سماعه
‏كنّه اللي سد فوجيه الشياطين الذريعه
- سلمان بن محمد

" وارثٍ بيت الكرم والمجد أخوي من الرضاعه
‏لا تغارب كان لي بصمه ومنهاج وشريعه " جزااله

" الليالي حطّت الطيّب على جرف المجاعه
‏لين صار أكثر غصون الشوك تنبت في ربيعه "