" الشفاحه تورد النفس العزيزه لـ المذله
‏نفسك اليا ارخصتها مره ؟ بترخصها نهاائي "

" غالبًا يحكم سلوك المرء جينات وجبله
‏شي تأباه المروءة .. صعب يأباه المُرائي "
انشهد :)

قصيدة رائعة

الصبح عيا لا يجي و الليل عيا لا يروح
‏والنوم طرقي والعيون ازرت تقلّط ضيفها

‏ويلي على نومة غرير وطول بال وصفو روح
‏وحاجاتٍ أعرفها، ولكن ما اعرف تعريفها
- سلطان بن بتلاء

إلين الفجر تعّبت المساري لين قل الحيل
تقدّيني هواجيس السهر .. وتتوّه دروبي

أنا تعرفني أرصفة الطرق وأشجارها والليل
كثر ماهيب تجهلني النوايا وقلب محبوبي
- نوف العثمان

سود الليالي علمتني حاجتين
‏ان الحياة دروس والعيشة كفاح
‏
‏ان حاربوني بالنجاح الساقطين
‏اقول حرب الساقطين اكبر نجاح
‏- محمد الشمالي رحمه الله

حَاول تخاف النَّاس من كِلَّ الجِهـات
‏بَعض البَشر ما ينعطى وجه .. وظَهَر
- سُرى

إلتقاطة رائعة :)

صبحكم الله بالخير 🤍

" ميدانكم نفوسكم؛ فإن انتصرتم عليها، كنتم على غيرها أقدر، وإن خذلتم فيها، كنتم على غيرها أعجز، فجرِّبوا معها الكفاح أولًا "

انتي بوجهي من الدنيا لايلحقك خوف
‏مصيرها تضحك الدنيا لنا لو تضيق

‏ياسيدة قلبي الصمت أقطع من السيوف
‏الحزن هذا .. على هذا الحسن مايليق !
- سلطان بن بتلاء

صبحكم الله بالخير 🤍

‏حبيبة خاطري فضّ الشعور من الوداع وجاي
‏و أنـا افـلّ الـثواني بالخَرَزْ،، حَبــه ورى حَبه

‏تعلقْـت النهــار أبتعثّـر بــه،، و أشـلّ خْطــاي
‏اذا الليلـة سماهـا من جحيـم و قـاعهـا غبــة

‏يا وين اروح من لعنة غيابه، و الشتا، و الناي
‏و أغانينـا. و جُـبّ الـذاكـرة أدنـاة مـا شبّـــه

‏تجرعت النسيم، و إرتمى صوتي على مغناي
‏تجرّح من تهاليــل الغيـاب اللي تلاعَــب بــه

‏أقلّب فالوجيه اللي تدوّر ضحكتي و حكـاي
‏و انا ماني بَعَرْف وجيههـم. . لكنّـي مشبّــه

‏تجهّم كل شي: دروبي، و وجهي، وكل اشياي
‏و رجـمٍ للضيـاع ابتعلّـى بــه ،، و ابقنب بّــه

‏سلام الله على طهر الشفوف وضحكةٍ بشفاي
‏بعَـدْ كـانت يديهــا،، تغرف الهتـان و تْصبّــه

‏حراوي نجمـةٍ فـاضت حنيـن، و عانقَتْ قمراي
‏و انا اشرب فضّته،، و ملامحي بيديـه منكَبّـه

‏ي وقت اخذ الثمن من ما تبقّى لي بعمر الجاي
‏عليـل القلـب يزهد بالثميـن،، و يشتري طبــه

‏دخيلك داوني، ، عطني سمر ليلة.. وأنا نَسّاي
‏أبدعي عن عـذابـات الغيـاب يْسـامحـه ربــه

‏لخاطر قلبٍ اذكر قال : لو يقسى علَيْ منفاي
‏" احبك لآخري " .. و أنا بعد للموت ابا أحبـه
- حمود المطلق

" عليـل القلـب يزهد بالثميـن و يشتري طبه "

يقول عبدالمجيد الذيابي :
أنا ما كنت لا بيّن ولا واضح ولا محسوب
‏ولا حتى القصيد اللي كتبته ، كان يكتبني

وفي سياق آخر قلت :
من قرا بيتين لي .. لا يعتقد انّه قراني
‏مال حرفي منتهى ومالي مثل حرفي نهايه
‏

وزرعتك في قفار القلب : نبتة شيح
‏وغدى صدري رياضٍ منتشي نَفله

‏ما تركت اللي وراء صدري عن الّناس مْحبوس
‏لأجل تغويني القصايد ذات يوم وأكتبه

‏الشعر يهشم ضلوعي كّل ليله قوس، قوس
‏_ كلّ ما صدّيت عنّه جوني الغاوين ْبه
‏..
‏الرضا والضّيق ما كانت على البال العمُوس
‏من يحوس البال هذا، وْمن يعرف يرتّبه

‏إن فرح ما شالته الأرض وتحلْواه الجلوس
‏وإن زعل عوّد يشيل الأرض عَلى منكبه

‏ليش أفتّش في ملامح ليلتي هذي وأحوس
‏الليالي من ملامحها على وجهي شبه

‏تكثر الحيطه، وتأخذ من كذا غلطه دروس
‏_والزمن ما يأخذ إلا من سنين المنتبه

‏كل موضع جرح في غيابة الصدر مُحسوس
‏جاعلٍ بيني وبين الخاطر السمح عْتبه

‏ما على هذا البساط الاحمدي من النفوس
‏_من يعلّمني بـ اسم صاحبه ولاّ بسببه

‏_لو ما خلّيت عنّه بنت بال ولا هجوس
‏كنت أنا الشخص الوحيد اللي يعرف مْسبّبه

‏للضحوك من الليالي معه.. لليل العبوس
‏عهد رجلٍ ما يبور.. "وسدّ وجهه وشنبه"
‏..
‏للبقى يا ضحكةٍ كم في أثَرها من عسوس
‏_حِفْيت الأقدام محدٍ دلّ بارقها عْربه

‏وقْفتي معها ما بين السَّلْم والحرب الضَّروس
‏_مكسبٍ ما لمْسته يمنى، ولا سيف سْلبه

‏لو ألاحي في بقاياها الرضا ماني مَهُووس؛
‏_ كانت الأيام في طارف رضاها معْشبه

‏جيتها والعمر من صالي حوادثه مْحسوس
‏ورحت منها ما أعرف أصْدق ظنوني وأكذبه

‏_ضحكةٍ كانت تجبّ الليل وتشبّ الشموس
‏والله ما أدري كيف ضاعت من يدي دون انتبه
- ‏ماجد النفيعي

- كانت الأيام في طارف رضاها معْشبه -

ضحكةٍ كانت تجبّ الليل وتشبّ الشموس
‏والله ما أدري كيف ضاعت من يدي دون انتبه :(

صبحكم الله بالخير 🤍