اللهم صلِّ وسلم على نبينا محمد

"عرفتك فـي بداياتي قلق شاعر وضيقة بال
تجي من صوب شطحات الخيال وتسكن اعماقي

من أول ليلةٍ شفتك عرفت أن السهر مدهال
لسربٍ من هجوسٍ رفرفت بجناح خفاقي

غرام أول قصيده وأول الخطوات والترحال
على درب ٍ مشيته ما معي غير أنت وأوراقي

يحدك صوبي الليل الحزين الصامت الولوال
وأنا أرخي لك جناح الحرف وأرفع لك ندى أشواقي

تحت جنح الظلام أشـوف لي بدر وجمر وهلال
أظـنـه وجه ٍ اتعبني وانا أمشي له على ساقي

ملامح بنت شيخ أن مت عنها ما بقي رجال
كثر ما أتبع غلاها ما وقفت وقلـت وش باقي

هي أول من ذرف دمع الوداع وصافح الرحّال
وهي آخر من بقي فالذاكره واحتلت آفاقي

عليها مــن بني عمي ملامح جدها الخيال
وعليها من بني خالي صهيل خيول واشراقي

تغطيها سما نجد العذيه والغلا والشال
لها ذكرى تزف الشوق حتى تمطر أحداقي

عسى من بهّر دلال الفراق وصب لي فنجال
يحاصره العطش والقيظ لا رحمه ولا ساقي"

" عسى من بهّر دلال الفراق وصب لي فنجال
يحاصره العطش والقيظ لا رحمه ولا ساقي"
الله الله

العمر راح اوّله وانا رهين انفصام
مابين وجهٍ ضحوك وبين صدر يغلي

حبيبتي يابداياتي ومسك الختام
يا كاتبة ماسبق، يا صانعة مايلي

طاحت دموعك وواستها دموع الغمام
ورموشك الغارقة صابتني بمقتلي

يمرني صوتك الطيب مرور اللئام
واشم فيه اجمل ايامي وريحة هلي

ياكم ضعت بضيا وجهك عليه السلام
و معاه ضیعت ماضيي ومستقبلي

ياخصرك المختصر كل الحسن والكلام
المستضيق الدقيق الفاضي الممتلي

ياودي ازويه بيديني واضمك وانام
واصحى وانا في ضيافة حضنك المخملي

دامك على مايرام، انا على مايرام
تحكمي في رضاي وضحكتي وزعلي

حقك علي ارسم ايامك بخير وسلام
وان زعلتك الليال السود حقك علي
- عبدالله ناصر السبيعي

اسأليني:
كيف حالك؟
اسمحي للروح تحكي لك ألمها
ودّي اصرخ
"ما لهذا الجرح آخر ؟"
هذا تاسع جرح فيني
ماني بحاجه لعاشر
تذبل بآهه سنيني
اسمحي للعين تدمع
وامسحي ما هلّ منها
اشغلي قلبك وبالك
وازعجيني في سؤالك
اسأليني
واسأليني
واسأليني
حسّسيني باهتمامك
وازعجيني بـْ :
كيف حالك؟
- مها

مسّاكم الله بالخير 🤍

سيري أُمامه بعد ما طال فيك المقيل
مري رحاب الخلا وارعي من أكليلها

الليله الشعر في صدري يحط ويشيل
هذي طيوف الغرام وذي مراسيلها

والساحه اللي تروّت بالقنا والصقيل
انا ليا جيت فارسها وحلحيلها (:

زهدت بالفكره الشارد وهذا الحصيل
يفرق عن القوم لا حطت معاديلها

لكن وش يحققك يا حلمي المستحيل
ويدينها تقطف النجمه وقنديلها !

حثّيت دونك ركاب وجهد ماهو قليل
وباقي لها لو يطول العمر باقي لها

قفّى خليلي ولا املك غير بحر الخليل
يرفا جروحي ليا ساقت هماليلها

يسولف الصبح عن نسمة هواها العليل
ويسولف الليل .. عن باقي تفاصيلها

انتي لك عيون والا نهر من سلسبيل ؟
ما يرتوي مستهيمك من مظاليلها

لا سلهمت شفت متصوب وجثة قتيل
وتلاعب ارواحها "دقة خلاخيلها"

تعبر مع القلب ماهي مثل عابر سبيل
تجي وتصبح مداهيلي مداهيلها (:

مانيب ابو الطيّب اللي ما قنع بالقليل
انا املك الارض يوم اقف واغنيلها
-أحمد بن تركي

"قفّى خليلي ولا املك غير بحر الخليل
يرفا جروحي ليا ساقت هماليلها" الله الله

"انتي لك عيون والا نهر من سلسبيل ؟
ما يرتوي مستهيمك من مظاليلها "

الطيف ذعذع نسيمه والحنين استدار
‏على طواري غلا اللي ماتناسيتها

‏لو يهزم الشوق قلبي لذة الانتصار
‏في لحظة ماتعرف الناس توقيتها

‏سترتها والمحبه ،، ستر والهرج عار
‏لاصار في من تحب وكيف حبيتها ؟

‏هي بنت عفه وانا للحب عندي وقار
‏ماني بـ من جيل ضمتني وضميتها )؛
- عابر

كما يقول عابر:

" فيك شعر الوصف غير قابل للنشر "

تركض على بيد الورق طفلة الما
و أنا عجزت آصبها في عـروقـي

مرة تجي مثل الوهم لكن أسمى
ومرة تجي مثل التعب.. مثل شوقي!

قابض على شعلة من الشوق و أكما
بعض العذاب، ويفضحنّي حروقي

جوارحي من حربة الضيق تدمى
و أزرت يدين البوح ترفا شقوقي

ليل الصبر تل المعاليق و أومى
فيها؛ و أكل تمري و حنطة خفوقي

لا المزن يعرفني ولا قلب سلمى
ولا البروق اللي تكاشح بروقـي

لا شك عيّت غيمة الوقت تهمى
على شجر عمري و يبست عذوقي

لو كان عشب الوصل بالروح ينمى
ما درهمن في قفر الأوجاع نوقي

بالله من خلى مدى النور: ظلمی
خلفي.. وقدامي.. و تحتي.. و فوقي

كم لي وأنا أرسم وحدتي نبع وأظما
ولا يبـلـلنـي ســوى دمـع مـوقـي

قدرت أرجـّع للورق طفـلـة الما
لكن عجزت آصبها في عروقي
- سهو السهو

" لو كان عشب الوصل بالروح ينما
ما درهمن في قفر الأوجاع نوقي "

عذوبه

-قدّت همومي لباس الصبر منّي-

خاطري تالي الأيام خاطر بزر
‏أثر قلب الجريح ادناة ما يزعِله

‏المعاذير ما بقّت لروحي صبر
‏خيبة الظن خلّتني رهين أسئلة

‏يا معّيشني الأوهام مالك عذر
‏من أختارك وعاف الناس لا تخذله

‏ما تطول الليال إلاّ على المنتظر
‏و المشاعر تموت إن طوّلت مُهمله
- سعود مهدي

"أثر قلب الجريح ادناة ما يزعِله" اي بالله

ما عاد لي قلب ٍ على توديع خلاّنه جسور
‏اللي ما يردعه الحنين ! البعد ماهو رادعه

‏هاجرت وأخترت الرحيل بصمت لن أقسى شعور
‏إنّك تواعد من سكن قلبك عشان توادعه
- سعود مهدي