"على روح المعنّى بالهداوة يا مطر طشطش
‏ترفّق وارو كبدٍ يابسة من مبطي صيامي"

"جعل همّال السحاب اللي تلاعج برقه
‏في علاوي نجد ياخذ له شهر ما يفصل" آميين

"ما نسيتك من دعاي والدنيا جفاف
‏وشلون بنساك لاصارت الدنيا مطر؟"

مساكم الله بالخير🤍

‏جعل يفداك يا راسي، مباري الهبايب
‏الصواديف فـ معاندك تظلم بخَتها

‏غنّ ويطيب لك ما كان ماهو بـ طايب
‏من مقافي سنين العُمر لـٰ مقبلتها

‏لي ثلاثة ليالي من غياب الحبايب
‏وانا نفس العلوم ادور في دايرتها

‏أول الليل شابّ وتالي الليل شايب
‏كل ساعه عليّ تطول عن سابقتها

‏فاقد لي ذهيبٍ، غير كل الذهايب
‏اعقلتها المحبّه والظروف أطلقتها

‏وساقت الريح بخطاها صِدوق السحايب
‏وأودعتها الحيا وارتاحت و ودّعتها

‏إفقدوها ليا ظميَت عروق الرحايب
‏واذكروها ليا سالت بطون أوديَتها

‏أما انا ماني بـ باذل لها الا السبايب
‏لين ترجع بها الدنيا مثل ما خذتها

‏لو تقسّيني الدنيا على كل غايب
‏ماني مبدّلٍ مشاعري ناحيَتها

‏باقي لغيرها فأطرف ضلوعي نصايب
‏ودعوةٍ مجريات البين ما غيّرتها

‏كل ما إجترّت أيامي علي العقايب
‏يالله بحظ عقدٍ لبّسته رقبتها

‏بين سود القرون وبين بيض الترايب
‏ماني بـ ناشدٍ الايام عن خاتمتها

‏وان تحلوَت عيوني ناقضات الذوايب
‏رجّعتني نسايم عطرها مع جهتها

‏رجعة المؤمن اللي من معاصيه تايب
‏ما له الا يكفّر سيّته بـ حْسنتها

‏قانعٍ ما لقى عنها على الارض نايب
‏والله اعلم بعد ما هو بـ لاقي تحتها
- محمد المطيرات

"لو تقسّيني الدنيا على كل غايب
‏ماني مبدّلٍ مشاعري ناحيَتها" :(

زهقان منّي الركض .. من يركض معاه؟!
حتى خطاوي العمر كتّفها الملل

خلك محلك - طير في أيّ تجاه
شفني محلّي لا إتجاه ولا محل

ثوب المصير اللي معي ستره/ عراه
لا دثر الحكمة ولا عرّا الجهل

لو داخلي شيءٍ يثير الانتباه
ماتقدر تقول إنه يثير الجدل

حياة.. مافيها ولا ذرّة حياة
العايشين أغراب، والموتى أهل

رمضا السكوت إن يبّست غصن الشفاة
بأرض الكلام - ادفن محاصيلك جمل

القلب يتيمّم هجيرك .. للصلاة
وأذكره من زمزم مشاعرك اغتسل

من يوم جاك وخضرة الله في ثراه
غنّى الخريف بصوت يشبهك .. وذبل

زهقان منّي الركض.. وأنكرني مداه
واقف محلي، لا إتجاه ولا محلّ
- عبدالله الرشاش

الحالة الشعورية:
"زهقان منّي الركض.. وأنكرني مداه
واقف محلي، لا إتجاه ولا محلّ"

مسّاكم الله بالخير🤍

ياقلبي المملي وَله ياقلبي الصارخ أنين
لااا تختبر صبر البنادم في محارب غربته

تغريبتي؛ تغريبة المختار لأوجاع السنين
ظنّ الوجع محدود وقته والمشاعر لعبته

عوّلت عالوقت وتعدوى لي بسيفٍ من حنين
لين ذْبحتني وحدتي وآنا توقّى ضربته

أسابق الأيام واركض في دروب الحالمين
مدري لعب فيني الأمل ولّا لعبت فْحسبته

حلمٍ فهقته للسنين القادمه علْها تزين
لا تذرفه غيمه ولا جرد الأراضي تنبته

آنا اعترف بان البلا ماهوب من خاطر حزين
بلاي من قلبٍ كذَب قوله وصدّق كذبته

ولو غرّبتني دنيتي ببقى على ذات اليقين
بانّ الفؤاد ان حنّ لاهله؟ ما تشافت كربته

بعد الغياب وغربلة عامٍ من العمر الثمين
-تقت الديار- وكلّ مخلوقٍ يحنّ لتربته
- مها

في عيوني كنّك المال في يدين البخيل
‏ما انت لاقي ضحكةٍ منك ما صرّيتها

‏انت ضحكاتك زهابي وانا عابر سبيل
‏والفرص أصعب من إيجادها، تفويتها

‏يوم أحبك ما تخيّلت ادوّر لك بديل
‏والعلوم التاليه منك، ما حبّيتها

‏"خلّ دمعك لا يسولف ولا حتى يسيل"
‏من متى وعيونك تنام، ما راضيتها؟
- محمد المطيرات

ما تشبه رموشك اللي جارحه خدّك
‏الا مجاهيم عودٍ في مفاليها

‏وغصونك اليا تغنّت ميّلي قدّك
‏في ليلةٍ تتعب الشاعر مساريها

‏يادرةٍ ليل شعرك ما بحث سدّك
‏خفّي على الناس بيّحتي خوافيها

‏رزّي علم دولتك واستملكي نجدك
‏غنّي سلاماً على الدنيا وما فيها
- عامر بن مبشر

بس أنا ماكنت عارف
‏ان الاحلام ، الاماني ، المشاعر سيييل جارف
‏وقبل نغرق :
‏كانت ( أحبّك ) نجاة
‏وان خوفي كان مثل الدمع طارف
‏وان حبّك موت علمني الحياة
- عمر المسفر

اللهم صلِّ وسلم على نبينا محمد

صبحكم الله بالخير 🤍

هلا بالهبوب، ولو مواجع هبوب النود:
‏وجَع حاجة الطيّب ليا أحتاج للخايب

‏يا عودٍ خذل ليِنه عبث غصنه المنضود
‏وهو ما خذل بدره : عبث ليله الذايب

‏عن البال، ما راحت طواريْك لاجل تْعود
‏مثل : كل ليلة طيش مرَّت على تايب

‏طبيعي بِأنّ الناس تستشعر الموجود
‏وأنا أستشعرك موجود، وأستشعرك غايب
- صالح بن حمد

بيني وبين الرياض شعور عدّا مداي
يشهده قلبي ويشهد ربّي وربّها

لو تخالفنا المشاعر ما تبدّل هواي
ديرةٍ ضمّت حبيبي كيف ما احبّها؟
- مها

‏يـا غُربة النفس الشَغوف الطمُوحة
‏الرفق لا اعـوّد من الدرب : حـافِي !

‏مـا اخاف لو حلمي تدَاعى صُروحه
‏ اخـاف مـا يدْفي عِظـامي : لحَـافي !

‏نفسي على طرد الأمـاني : لَحوحة
‏والمجْد قدْمي والهـوانة : خِـلافي

‏فيني تأنّـي لـوّ نفسـي : جـمُوحة
‏وفي صمتي الواضِح بلُوج إختلافي !

‏(عيني على رِفعّة طويق وْ وضوحه )
‏اليـا تسـاوت في عيوني ضفـافي

‏يـا بعْد من دمّل غيـابك جروحه
‏البُعْد يقْصر والليـالي ؟ تِشـافي

‏لو نرْجي اليدّ المنون الشحُوحة !
‏مـا نلْحق مْن العمر غير السوافي

‏دْموعك أثمن من مُبتغـاه وطمُوحه
‏وأثْمن من الحِلم البعِيد المجـافي

‏ كلْ درْب وسطه راحتيْنك بـ روحه ؟
‏لو خطوة أشواك .. بـ امشيه حـافي

‏يـا كثر مـا سْقتني حيـاتي : ملُوحة
‏لا شفت بـ عيونك سنـا العمر طـافي

‏واللي رخص فـ مْجاهد الرزق روحه
‏عليه من حرّ الدعـا ثوب ضـافي !

‏تبكيه مع عيني محـاجر طفوحة
‏اللي معَ حتى - مواشيه - وافي )؛

‏أبكيه لـ طرّو - حكـاه ومُزوحه -
‏واتخيّله كنّه بـ مجلسه غـافي !

‏من عقبه ووجهي لـ الأحزان لوحة
‏لا الدار يأويـني ولا الحِـجر دافي

‏اللي على الزلات نفسـه : دموحة
‏لو جـافته دنياه مـاهو بـ جـافي

‏يـا نظرة عيون الحزين : الفضوحة
‏لا تبيّنين مْن الـوجع شيّ خـافي

‏مـا بين أكتم همِّـي و بين ابـوحه
‏آحسّ حتّى البوح مـا هو بـ كـافي

‏واكبدي اللي حـاجته لك تلـوحه
‏أصبح مكـانه فيه " سجن ومنـافي "

‏عن كلّ شيّ إلا إحتيـاجي : سموحة
‏وعن كلّ نظـرة راهنت بـ إنجرافي

‏لو تكفي المخطين كلمة : نصوحة !
‏مـا تكفي الموجوع كِلمة : عوافي )؛

‏ويـا غُربة النفس الشَغوف الطمّوحة
‏اللي جرى لي من عنَى الوقت كـافي !
- نوران

لو نرجي اليدّ المنون الشحوحة !
‏مـا نلحق مْن العمر غير السوافي :(