): 🤍

ياحبيبي لا توريني طرف دمعك واحبّه
‏انت لك عينٍ ترد الآدمي لأول حياته

‏اعتبر قلبي حطب غابه وشب اللي تشبّه
‏لين تستانس دفاه ولين تستغرب ثباته
- ناصر مناحي

"لا تعود ان كان لك نيّة مغيب
‏لا تثير الجرح .. والجرح إندمل

‏تغري التوّاب .. بالكاس العطيب
‏وتدري انه لا رشف رشفه .. ثمل!

‏تبذر اللهفه .. وانا طيني خصيب
‏تحرث البستان .. من بذرة أمل

‏كل ذرّة حِس باحساس الصويب
‏حاربت عقلٍ على الفرقى صمل"

"ماضاق صدري لو ان صدرك من البعد ضاق
‏انا اكثر انسان ضيقاته صقلها صقل

‏ياما انتظرتك مابين الضيق والاشتياق
‏اثر اشتياقي ليا من زاد حبك يقل

‏مواصلك ما اقدره وموداعك لا يطاق
‏شف كيف حتى على قلبي ادق الثقل

‏احب معك الوصل واخترت درب الفراق
‏من عاطفة قلب مدري من رجاحة عقل"

جيتك معي قلبٍ من الشوق احترق
ضمّيه لك يشفى من حروق اشتياقه

.

و ترحل؟ دافن أيـام اللقى في صفحة النسيان
بـ دمعي تكتب الفرقى، واغنّيها من الماضي !

فقيدي، وان تمشورتك مسافة تعزف الخذلان
⁃هجير الدرب، وجروحي على شانك؟
⁃انا راضي

على ما كنت يا "وجه الطواري" أتبعك ولهان
وانا خابر مصير الدرب يوجعني على الفاضي
- ياسر المفرّج

المواقف مثل الأوراق في فصل الخريف
كل يوم يطيح ( رجال ) ويطير ( معروف )
- بدر الحريّص

‏مطلعٍ يمكن يطلّعني من الارض الفسيحة
‏حابس أبياته وراه وحالفٍ ماشوف غدّي

‏وقّفت لاماشية عنّي ولا هي مستريحة
‏وماني بمتعوّد ألزم عندها لاجات حدّي

‏ماسكة يدّي تحاليل ومشاريه ونصيحة
‏مار والله غير تقصر كلّها عن طول يدّي

‏لو ينام بـ ليله مبرّد أبو كفٍ شحيحه
‏نمت ليل البارحة من هول مالايام ضدّي

‏زارني جدّي ولاحصّلت له حق الذبيحة
‏واستحيت آقول كل اللي على عيني لْجدّي !

‏ياطويل العمر : قِصْر يديك جينا نستبيحه
‏والكلام اللي بصدري للسلامة مايقدّي

‏علّم الوقفات للّي شايف الدخان طيحة
‏واكْرم اللي رافع الرايات لاشدّ التحدّي

‏لاتقول الكلب يزأر غرب ، والدنيا كليحة
‏هذي تْسولَف على رجْل مْتعشّي ومْتغدّي

‏لو شبعنا خبز ؟ ماقلنا ترى هذا نبيحه
‏لو تقول ان الجبل يِحْلَب تركناها تعدّي !

‏ماني مْحاججْك في قول البخاري مع صحيحه
‏لكن آحاججْك بـ انسانيّتك لاباح سدّي

‏كنّ " ودّي " يوم تاقف تلطم الكبد الجريحة
‏خايف ان ماعاد يبقى كبد من وقفات ودّي !

‏ماكسبت مْن الرجال اللي تنصّوني فضيحة
‏بس وقْع الغربلة فيها أشدّ مْن التردّي

‏ناسي إنّا صاحبين ' أفلح ' من وجيهٍ فليحة
‏وانت وجهك عن فلاح الرزق بالدقن مْتصدّي

‏زابن الله والله اللي خالق الصدر وفحيحه
‏عن وعود شيوخ تاقف لاتجيب ولا تودّي

‏أوّل لْياسْرعت أهدّي حيل من شان المليحة
‏صرت خفّ الريش يوم أقفت
‏ولا أدري كيف أهدّي
- أيمن الرويلي

‏"كنّ -ودّي- يوم تاقف تلطم الكبد الجريحة
‏خايف ان ماعاد يبقى كبد من وقفات ودّي!"

مسّاكم الله بالخير🤍

جيت افتّش في حنايا العمر عن لحظة حنان
وما لقيت الا الحياة تنوشني بانيابها

كنت طفله آتهجى الخوف في كلمة أمان
وافهم الاشيا قبل لاقرا خفايا كْتابها

طفلةٍ -سهلة رضا- عيّا يراضيها الزمان
ما لقت من يخفض جْناحه وينشد مابها

لا تزاحم جوفها بعتاب فايتهْ الأوان
تضحك فـ وجه المقادير وتدنّ عْتابها

والظروف ان بهذلتها واختنق فيها المكان؟
عانقت صدر الحياه واستوسدت ألعابها
- مها

‏سريتك يا خدين البال عمرٍ ما يمرّه خوف
‏وخذتك من نجوم الليل واودعتك معاليقي
‏بعد ما كنت،
‏- مرتاب المسافة
‏- منكسر
‏- مكسوف
‏تطمّنت،وضحك قلبي،ولا شاف الصدر ضيقي !

‏ولكن ليه ما تبقى؟ ترى كلّ القصيد يْشوف
‏أنا أوّل من سرى دربك ولا بلّ الزمن ريقي !
‏رجعت وصرت،
‏- منزال الحسافة
‏- منعزل
‏- ملهوف
‏اقول إني أبي أنسى ولكن كيف تصديقي ؟
‏- ياسر المفرّج

جميلة جدًا

‏خابرٍ ليل المسافات - يا حزن السحاب
صرصرت ياسدرة الصمت ريح الثرثرة

‏ما قرأ من رفّي الموت غير أتعس كتاب
ولا كتب في دفتري العمر، غير المسخرة

‏لو أسافر عنك.. منا.. إلى مالا غياب
والله إنك في غياهيب صدري (مسفرة)

‏وش بوجهك؟! قلت (يمّه) كذا شكل العتاب
يشبه لمنْ؟! يشبه الغصن لا هلّ أخضره

غربةٍ ماهي من الماء، ولاهي من تراب
شيدت في وجهي الرث سور ومقبرة
- عبدالله الرشاش

‏لو أسافر عنك.. منا.. إلى مالا غياب
والله إنك في غياهيب صدري (مسفرة) :(

صبحكم الله بالخير🤍

"أنا لو ضاعت الدنيا وراي، و زادت الأتعاب
‏أجي كني صباحٍ كل هالعالم تهذري به" 🤍

"ولا عاد السهر ملفى، ولا عاد السنين أصحاب
‏تحاشيت المكان، ولا فقد سمعي؛ تراحيبه"

قصيدة عذبة جدًا