كم حرّةٍ من طيّباتٍ حراير
تسوى مية رَجّال في عين ابوها
- ناصر الفراعنه

الله الله 🥰

ثلاث شهور وآنا افضّل العزله عن الجلاس
ماغير أمشي على طاريك وأسولف على ظلّي

أقوم هناك كن الليل يبغيني بكلمة راس
بنفس الموعد اللي قلت فيه لدمعتي هلّي

کرهت الناس عقبك وإقتنعت إنّي عدو الناس
أشوف قلوبها تدعي عليّ، وقلبك يهلّي

أحبك وأعشقك وأموت فيك لـ آخر الأنفاس
ألا يابري حالي من غلاك وياوجود اللي

يجامل فالتعامل مع شعور الكائن الحسّاس
وهو من زحمة الأشواق وش ياخذ وش يخلّي

عساني فدوتك لا تاخذك مني يدين الياس
وأنا أدنى عارض يروح بْبعضك، يروح بي كلّي

تعوّد بالسلامه، يلعب بخصلاتك النسناس
وأشوف عيونك تقيم الصلاه ورمشك يصلّي
- مطلق بن شويه

‏لو تقتحمني عاصفة وتزلزل أركاني رِيـاح
‏صوت الأمل فيني يقول:إن العواصف بتهدا

‏لو صاعقه تنزل علي ولا تخلي لي جناح
‏صوت الأمل فيني يقول:إني بطييير بلا مدى
- مهذل الصقور

علّم اللي مشقيٍ نفسه .. بنفسٍ مستريحة
بإنّ أنا موجود فوق أرضي وتحت ظلال غصني

منشغل بأحلامي اللي دونها قومه وطيحه
أقتنص حلو الفرص ..قبل المنايا تقتنصني

ولو يحاول ينتقصني "نقص" قلت: الله يبيحه
والله انْه يزيدني رفعة لا حاول ينتقصني

ما تكدّر خاطـري .. ذمّـة خبيثين الشريـحه
وما تفرّح قلبي المدحة من اللي ما بخصني

انصَحوني "صَدّق احساسك "ولا طعت النصيحه
والله إن قلبي قبل تقرصني العقرب قرصني
- مشعل الزعبي

يا الله من هالأبيات، الله يعظم أجر الشاعر اللي يوصف شعوري كذا

"منشغل بأحلامي اللي دونها قومه وطيحه
أقتنص حلو الفرص ..قبل المنايا تقتنصني" :(

هالبيت سيرة ذاتية مختصرة:
"ما تكدّر خاطـري .. ذمّـة خبيثين الشريـحه
وما تفرّح قلبي المدحة من اللي ما بخصني"

لي فترة طويلة وانا اتغنّى بـ:
أنا .. ما كنت ذنبٍ تاركه مأجور
أنا كنت الثواب اللي عليك انهال

ينجرح قلب لكن ترتفع هامه والله اني لاموت ولا انحني راسي
لو رماني زماني وسط دوامه العواصف شديده والجبل راااسي

انقل الحزن وامشي منتصب قامه قاسي الوقت..لكنّي بعد قاسي
واسمع الحلم يصرخ لحظة اعدامه رابط الجاش..ماهز الخبر باسي

عزتي غاليه والناس سوامه قلت ماطيع حتى تقطع انفاسي
زانت ايام عمري، شانت ايامه مارجيت العزاء من رحمة الناسي

من عجز لايدوس الهم باقدامه لازم انه مع الايام ينداسي
يندمل جرح قلبٍ ماتت احلامه بس ماضن يبرا جرح الاحساسي

يوم صارت مابين القلب والهامه ويش ابي بالحياه اليا انحنى راسي؟
-مساعد الرشيدي طيّب الله ثراه

"يوم صارت مابين القلب والهامه ويش ابي بالحياه اليا انحنى راسي؟" :(

"انقل الحزن وامشي منتصب قامه
قاسي الوقت..لكنّي بعد قاسي"

22-2-2023
#يوم_التأسيس

"بما أنه يوم التأسيس ؛ فلنتذكر أن الأصالة ليست محصورة في بُرقُع وعِقَال، بل إنه من بين كل هذه الموروثات القديمة والنادرة لا شيء أثمن من أن تَرِثَ نُبْل أجدادك وأصالة ماضيك، وأخلاقَ "أغضُّ طرفي ما بدت لي جارتي"، أجدادنا الذين يحمون الديار، ويذودون عن الذمار، ويسرعون لنجدة الجار "

-تذكير مهم-

حيّ طاريها

من نجح في وحدة بْلاده وتوحيد القلوب
‏واستعان بمنهج الدين اشهد بْـ أنّه رمى 🇸🇦

الديار اللي تفيّت ظلّها -كل الشعوب-
في قلوب الناس تملك بيت من أرض وسما

من شمال الدار لين آخر مسافات الجنوب
والسعودية وطن يشعر -غريبه- بانتما

في رياض المملكة نحيا على انسام الهبوب
وفي صحاريها محد عانى من شعور الظما

شعبها ينسج لها من أعظم الأفعال ثوب
ويوقف بوجه العدو وقفة تُراق لْها الدما

والمليك اللي فتح للشعب آفاق الدروب
يكتب التاريخ وقفاته ويشهدها العمى

من نجح في وحدة بْلاده وتوحيد القلوب
واستعان بمنهج الدين اشهد بْـ أنّه رمى

دارنا؛ دار العطا..مهد الكرم..وامّ الشعوب
دارنا اللي في ذراها كلّ مكروب -احتمى-

تشرق امجاد الوطن فينا لو الدنيا غروب
والأكيد فـ سلمنا ما تستريبه ربّما

في تفاصيل المشاعر حبّ ما عنّه نتوب
نشرحه بالإنتماء .. وبالولاء .. وبالحِمى
- مها

شرع الله قلادتك وزمامك الضاد
ورملك مزعفر وهملولك فضيله
- فيصل مهنا