‏هبت لك النود ياقلبٍ جروحه جداد
‏يمكنها لك تجيب اللي ماجاب البريد

‏نارٍ بجوفي حطبها مايعوّد رماد
‏مدري حطبها خشب ولاحطبها حديد

‏وش عاد لو شفت عنقك ياظبيْ الحماد
‏ماعاد لي في نحرك وفي عيونك قصيد

‏بانت فلسطين ياقلبي وبانت سعاد
‏واللي خلا الله باطل ذا يقوله لبيد

‏اللي بقى من ثقافتنا الخطب يازياد
‏بس الخطب ماتصحي كل قلبٍ بليد

‏سادوا علينا نفايات البشر والبلاد
‏وحنا من الذل مانقدر نكفن شهيد

‏العز من وين واشجعنا يحب الحياد‏
والعز من وين واكرمنا يمد الزهيد

‏ضماد ! من وين لجروح الكرامه ضماد
‏وغزة تنادي ولا تلقى بالامة عضيد

‏ماعاد في روسنا روسٍ تحب العناد
‏ولاشجيعٍ الى زادوا خصومه يزيد

‏نسولف بغزة وبالظلم والاضطهاد
‏وماناخذ الا وحنا بالحسين ويزيد

‏اعداد واسراب لكن مثل سرب الجراد
‏مافيه نصرة ولا كثرة عددهم تفيد

‏مليون طارق مافيهم طارق ابن زياد
‏ومليون خالد مافيهم خالد بن الوليد

‏كم فيه نقفور بالاقصى تمادى وزاد
‏وبغدادنا للاسف ماعاد فيها رشيد

‏جيناتنا كل ابوها عاث فيها الفساد
‏وعقولنا ماتفرق بين وعد ووعيد

‏في كتب الامجاد ماباقي ولاحرف ضاد
‏حتى المماليك عقب العز عادوا عبيدا

‏لكننا مؤمنين بقرب وقت الحصاد
‏ولا على الله كبير ولا على الله بعيد

‏عيون الامة على محمد وريث الشداد
‏اللي مع المجد له سيره وحبلٍ جويّد

‏اللي زرع حبه الله في قلوب العباد
‏عليه الامال والله يفعل اللي يريد
- بندر الدويش

‏لا نرحّب بالضعوف ولا نهلّي
‏بالوجيه اللي عن المجد تْوارى

‏صرت احس ان كل اهل غزة هلٍ لي
‏وهالشعور اللي له القلب يتدارى..

‏مستحيل يحس فيه الخاين اللي
‏في خيانة داره ودينه تمارى

‏لو يقول ( القدس ) ماهي قبلةٍ لي
‏مارضت عنْه اليهود ولا النصارى
- محمد الكريدي

اللهم صلِّ وسلم على نبينا محمد

ما الفائدة من العلم ما لم يلحقه عمل؟

دعواتكم لأهلنا في غزة

كل طفلٍ فيك عايش بالضمير اللامبالي
مؤمن انه ضيف فالدينا.. وفالجنه مقرّه
- خالد بن طفلان

الوقوف وإلقاء هذه القصيدة على هذا المنبر لشرح معاناة أهلنا وإيصال رساله ذات معنى سامي ونبيل هو وقوف مشرف يرفع الراس ويبيض الوجه، عز الله ان امثاله يستاهلون الفزعة

واسأل الله ان تجعلها شفيعه له، ربي يبارك في كل شاعر صاحب مبدأ يسعى لإيصاله

‏ماهوب من دمع .. بلّلت الورق في العتيم
‏من ماي وجهي ! لقيت اوراقي مبلّله

‏خجول مابين طاري مرّ و واقع اليم
‏حتى الشعر كل ما ابداه اخجل اكمّله

‏مالي سوا دعاي لـ اخواني فـ غزة ؛ نديم
‏انا قبل ما ادعي الله .. ايدي مكبّله

‏ماني بـ ميّس من وعود اللطيف الكريم
‏سبحان من يمهل الظالم ولا يهمله

‏عبدك و مؤمن بـ نصرك يالسميع العليم
‏وهو نفسه اللي بعد يرجيك تستعجله

‏كل يوم (رقم) الوفيّات فـ تزايد عظيم
‏واخاف لا الناس تعتاده وتستسهله

‏مع ان حتى الرجال اصحاب حقٍّ مقيم
‏الطفل ! بالله وش ذنب الطفل تقتله!!

‏ورغم المصايب ماقد شافوا من الضيم: ضيم
‏شافوا المنيّة شهادة .. والسّخط مشكله

‏لاجمّع الابّ اشلا طفله من الجحيم
‏يقول جاني من الله طفلي ، وردّ له !!

‏ولاكرّر الظالم الظلم ، وضرب فـ الصميم
‏ماردّد لسان واحدهم سوى الحوقله

‏انتم الى النصر و الامجاد باذن الحكيم
‏واي واحدٍ "ماهو بـ معكم" الى المزبله
‏- مشعل عبدالله

هالقصيدة من مطلعها إلى قفلتها مدهشه، لكن الدهشة مختلفه هنا؛ يخالطها مرارة حقيقيّة جدًا

"من ماي وجهي ! لقيت اوراقي مبلّله" يا الله

‏من أعوام وانتي يافلسطين دمّك حار
‏ربى العز بيدك واستحى السيف لايثلم

‏صمودك مايقدر يقصفه مدفع الفُجّار
‏تخافك كثر ماترمي وتفجر وتظلم

‏وش أعظم من ان صغارك الواقفين كبار !!
‏وش أكثر من إن أعمار بـ الارض ماتنلم !!

‏يصير الدمار سلاح لاطاحت " الاحجار "
‏مع ان ماهو بكلّ راس من وقعها يسلم !

‏ولا استسلموا بالمعركة دونك الأبرار
‏لو ان بعضنا من قلّة الحيلة استسلم

‏نسب الظلام أوّل ، ومن بعد قصف النار؟
‏دعينا الله يْردّك على " ليلك المظلم "

‏مالي وجه أشوفك ، كل ليلة من الاخبار
‏عيوني سحاب ووجهي شهور ليل أدلم

‏تمنّيت أعود لمرحلة واعي ومنهار
‏أنا آحسّني من شدة الانهيار؟ أحلم

‏ماعندي من الاعذار حاجة ، من الاعذار؟
‏خذا الصوت روحه لين حط الدعا مكلَم

‏ياربّي لاتجعل دايم سلاحي الاشعار
‏أنا رجل ، وانت بماتحسّ الرجال أعلم

‏أوقّف مع المظلوم .. حتى من الكفّار
‏ولا قادر أردع كافرٍ مضطهد مسلم!
- أيمن الرويلي

اللهم صلِّ وسلم على نبينا محمد

اللهم أنر قبور موتانا و موتى المسلمين، يارب اجبر هذا الكسر باللقاء في جنتك

السلام عليكم ورحمة الله
مرحبا بآل قصيدة ❤️
زاد العدد في غيابي اللهم بارك
مبارك عليكم العشر الأواخر
لا تنسوني والمسلمين من صالح دعواتكم يا أحبه🥰
لنا جلسات بعد رمضان بإذن الله