اللهم أنر قبور موتانا و موتى المسلمين، يارب اجبر هذا الكسر باللقاء في جنتك

السلام عليكم ورحمة الله
مرحبا بآل قصيدة ❤️
زاد العدد في غيابي اللهم بارك
مبارك عليكم العشر الأواخر
لا تنسوني والمسلمين من صالح دعواتكم يا أحبه🥰
لنا جلسات بعد رمضان بإذن الله

اليوم بمشيئة الله ستكون الجمعة الأخيرة من رمضان وسوف توافق ليلة ٢٧ ..
وفيها ساعة استجابة ..
ودعوة للصائم عند فطره ..
فانتهزوا هذا اليوم العظيم وما فيه من بركات و خيرات وتزودوا فإن خير الزاد التقوى ..
أكثروا فيه من الصلاة على النبي محمد ﷺ
وأكثروا فيه من الدعاء وفعل الخير ..
وفقنا الله و إياكم وجعلنا من الفائزين المقبولين وممن أعتقت رقابهم من النّار

ياربّي أنا ضعفت وضعف الإنسان شين
‏وتعبت من حاجةٍ " تسلبني إرادتي "

‏اعتقني مْن الشُعور الي ماهو فـاليدين
‏ومن دمعةٍ ما شهدها غير " سجّادتي "
- سمو

يارب غصنٍ بـ صدري لو لمسته وقع
‏أرسل لي مْن الغمايم ما يبلّه وأعيش..
‏ٓ
‏وأزرع بصوتي سوالف ما سقاها وجع
‏من ضحكة الغيم، والا من حمامٍ وريش
‏ٓ
‏لو يلمح الصبح دمعٍ في كلامي، رجع.
‏لو يرجع النور، ليلٍ في خيالي يطيش!
- بدور

تصدقوا ولو بالقليل واكسبوا أجر الصدقة أجر عظيم يُظلِلّ صاحبها يوم القيامة🤍

مرحبا آل قصيدة
اكتبوا في بحث القناة- العيد - وتطلع لكم كل ابيات العيد السابقه

كل عام وانتم بخير آل قصيدة 💘

"طلّةٍ ماهيب منك تساورها الظنون !
‏اكثر اللي ناسب العيد وجهك باختصار"

"على عيدك مبارك تاقف آمال إنتظاري سيد
‏هي اللي كانها ما جات منّك ماااا لها شاغر"

صبحكم الله بالخير❤️

سولف على النوّار والنود والريف
‏هَمسك رشاش وضحكتك برق غيمه

‏تمطر على البيداء من السيف للسيف
‏أربع ليال . . وخالف السيل ديمه

‏منها الغصون تصير خضر ومواريف
‏من عقب ماكانت يباس وهشيمه

‏سولف ، وبعّد عن حشاي التحاسيف
‏و دكّ الهجوس اللي بصدري مقيمه

‏ومجدلٍ ماله على احدٍ معاريف
‏الا يديك .. اللي تليّم عتيمه

‏الفقر ماهو فقر قل المصاريف
‏الفقر فقر .. اللي ماحطّك نديمه

‏ خذني ودثرني عن الهم والحيف
‏معك .. أحس لباقي العمر قيمه

‏والشوق يمطر فالضلوع المهاديف
‏أربع ليال وخالف السيل ديمه
‏- مطلق بن شويه

ما بقى في خارطة صدري لا شعب ولا قيادة
‏يالوحيد اللي جمع ضدّين . . راحل ، ومتبقّي

‏أنت حقٍ . . دونه الرجّال ــــ ما يذخر عتاده
‏واعتقد ما جيتك آطالب بـ شيّ .. الا بـ حقي

‏أشهد إن ابوك عقّب . . غادةٍ من بطن غادة
‏وأشهد إنه .. يوم ( نقّاها ) من الغيد متنقي

‏أحسب ان حظي من عيونك مثل حظ القلادة
‏وين ما لقّيت . . واجهت السعد ــ يمّي ملقّي

‏واقتنعت إنك ( قدر ) ــــ ما تردعه قو الارادة
‏لو تواجهني . . بـ حد السيف ، ماني بـ متوقي

‏اعتبر .. كل الضلوع فداك يا " ظبي الحمادة "
‏أخذ كل اللي تبي ( تاخذ ) . . وبقّ ، اللي تبقّي
- عبدالله السراهيد

ياروضة الشعر باقي فيك غصن طري
الفاس لو ياخذ غصون الشجر ماخذاه

انا رواية قديمه بس ما تنقري !
استصعبتها العقول وحاربتها الرواه

كنت ابتعد عن مجادلهم و اغض بصري
واحط الامال في بكره وف اللي وراه !

من عقد الأمر من خلاه ما ينطري ؟
من حرمه من خفض سقفه و عنا نفاه

من حطه ابعد من المريخ و المشتري ؟
مع اني اشوفه اقرب من كموم العباه !

ماخترت أجي شاعره بس القصيد قدري
ونصيبي اللي تملكني و عشت بذراه

أصبحت غيمة على الساحه يهل مطري
تنبت به الارض شعر و يرتوي من قراه

الدرب هذا طويل ، و ليل ما ينسري
يهرول الذيب فيه ولا يحصل عشاه

ان كان قلبي على مسراه ماهو جري
حذفت قلبي وحطيت بـ مكانه حصاه

جهاته أربع جهات و قبلته تحتري
غيمٍ بروقه تلوح و تلفت الانتباه !

واليا سفتك السحابه يا رياض أزهري
يمكن ما يلقون فيك الا " سمية مهاه "

يارب عزم و صبر والصبر لو ينشري !
شاركت يعقوب في صبره على مادهاه

الذيب من دم يوسف ندري انه بري
وانا من الحزن خاشرت العمى في عماه

جاني قميصين ماردن علي نظري !
وباقي لي الثالث اللي فيه اشوف الحياه
- العنود الواصلية