طفوا انوار الشوارع و اقفلوا باب المدينه
‏قلبوا كل المواجع وافتحوا كل الجروح

‏العزا يا سعود عز وبيح الخاطر كنينه
‏بسألك ياسعود والصادق مع الصادق نصوح

‏من يواسي حزن نجد ومن يكفكف دمع عينه
‏مثل مانوره تعبر ..ومثل ماخالد ينوح

‏ناحت الورقا وناح الورق والدنيا حزينه
‏وخنقتنا عبرة الفرقا على الغالي السموح

‏يابدر لولاك ماكنا لهالدنيا رهينه
‏لو تعودنا المفارق.. ماتعودنا ننوح

‏يابن عبدالمحسن الدنيا مشاعرها حزينه
‏مابقا في القلب حب ومابقا في الصدر بوح

‏المسافر راح ..آه ياحزن السفينه
‏ وين ذاك العاشق الصادق ابوقلبن نصوح

‏وين بدر اليوم ياهل طويق بدر اليوم وينه؟
‏واهني باريس فاضت فوق هام السحب روح

‏من يراضينا علينا من يبادلنا حنينه
‏من يذكرنا الغرام ومن يعلمنا الوضوح

‏من يصافحنا بقلبه قبل يصافحنا بيدينه
‏وين اهيم الليله في حب الرياض وين اروح

‏يابدر ونجوم وحروف وقوافيك المتينه
‏ السؤال الصعب مثل الشمس في الوجه الصبوح

‏يابدر بعدك مشاعرنا خواطرها حزينه
‏يابدر بعدك تقاسمنا المواجع و الجروح

‏لاح صوتك في عيوني وانتثر في عيون (زينه)
‏ مثل براق على العارض يابوخالد يلوح

‏ ياقصور العز .. ياسيفه وياقبضة يمينه
‏يابوخالد ..من سمح لك يابدر...عنها تروح!!؟؟
- فهد المبدل

وداع:
‏باكر تطيح اوراق وتْخَضّر اوراق..
‏من غير ما نعرف حكاية شجرها!
‏وباكر يمرّون المواعيد عشّاق..
‏ولا ينترك باقصى الحنايا خبرها!
‏وباكر تضم امجادنا كل الآفاق..
‏لا شك من يكتب عظايم صورها؟!
‏وباكر تصير الأمسية حفنة اشواق..
‏وَلا تِطاير عِقْلها عن غترها!
‏ولا تاقف الدنيا.. باهلها.. على ساق..
‏من صورةٍ مرّ القلم وابتكرها
‏ان كانها بالشعر: من غيرك استاق..
‏أجمل معانيها وصافي عبرها
‏وان كانها بالفعل: كم يبْستْ ارياق..
‏وما غيرك اللي كل ما ضاقت: ارها!
‏معقول ترعى فيضة صدورنا: نياق..
‏ولا ينحرق باطيب وسومك وبَرْها؟!
‏ما أعذبك ملقا.. ويا مرّك فراق..
‏وداع يا بدر الليال وقمرها
- فهد عافت في رثاء البدر

اللهم صلِّ وسلم على نبينا محمد

رفّ الهدب وإنحنى راس القصيد وطمن ْ
‏وجتني : حَوَرها مدار ووجنتيها سنا

‏بنتٍ .. تزيد القلايد في نحرها ثمن ْ
‏وشلون ترخص ملامح وجهها للعنا؟

‏كانت بعيد أمنياتي .. لين قالت تمن ْ
‏وتقرّب الحلم من كفّ السنين ودنا

‏قلت أصبري لين أخلّد طلّتك بالزمن ْ
‏وجهك — خِلق للقصايد ماخِلق للفنا
- سلمان بن محمد

فيك ما كان الجمال إلا جميلٍ في كرام
‏للشعر فيك انتباهاته ولله مقصده

‏أفسحي للناس كل الناس لحظة اهتمام
‏لا متى! ما فيه قبل الحسن هذا وبعده!
– ماجد النفيعي

‏"سالبه لب المدايح وتيجان الوقار
‏وفارقه في جيل متشابهه نوعيته"

وش ورا ليلك إلا نجمةٍ من سهادي
كلّما شعشعت جوّد حياتي رحبها

بين أعسك ديار، وبين أدوّرك وادي
ضيع العمر همسات العيون وعتبها

أذكر .. آخر مساري خطوتك في بلادي
يوم قفّت ركايبها، وشدّت عربها

جيتك أكثر من إني في رجاويك غادي
شاعرٍ ما بقى بك فكرة؟ ما كتبها

سيّل الأرض شعر، ولبّس الغصن شادي
وما سلا في يديه؟ إلا سراير ذهبها

كنّه البدو يوم استودع البدو حادي
عقب تلت ضعاينها، وهَدت قببها

كيف فضت سمارٍ لوحته البوادي
كيف شحت بضحكتها، وشدَّت عربها

وش يأجّج شعورٍ خلف الأسوار صادي
يوم حتى الحقايق دون وجهه سلبها

قلت أحبك وقالت والله إنك ضمادي
ولا توقيت عن شلف السنين، وسَببها

وجيت أسوق المنايا غارقٍ في عنادي
لين علقت حلمي في طوارف هدبها.
- محمد السلطان

"رغم تقصير العذر وياي في شتى الوسايل
‏كان لي صدرٍ وسيع وكان لي قلبٍ شهم

‏وانت مثل الهم لو عنّيت صدري ما انت زايل
‏ماخذ الضحكات مني تارك الباقي لهم

‏مو مهم ان مروا الاحباب في عيني .. قلايل
‏المهم انك بعيني -واجد- وهذا .. مهم "

" ‏اقدر أغيّر فيني أشباه واضداد
‏إلا الوطن والاسم والحب ما اقدر

‏وما للمحبة موت واضح وميلاد
‏ لا جيت اصغّر قيمة الحب يكبر

‏هواك ما ينقص مع الوقت .. يزداد
‏كل ما تعتق .. يِذهب العقل اكثر "

"الصريح تحذفه العربان في سجن أنفرادي
‏تالي الأيام قول الحق نوع من الجريمة

‏يا زمن لا نيتي سودا و لا وجهي رمادي
‏أنا من قومٍ تشوف الموت أحب من الهزيمة

‏يفرقون أهل المبادي عن قليلين المبادي
‏مثل ما تفرق عن الأحجار الأحجار الكريمة"

خذني من يدين الحنين لراحتيك
واستوقف اللحظات يا أعذب ندم :(

اللهم صلِّ وسلم على نبينا محمد

مع انسام الشتاء طاريه هبّ ومع هبوبه فيح
عطر ذكرى اللقا الاوّل قبل عامين يوم انّه

يطيّح كل زعل من قبل ما دمع العيون يطيح
قبل ما يرحل و يترك دموع العين : يبكنّه

عقب ليل الحزن وجهه لفى شايل ضيا التصبيح
وعوّد ضحكة اللي حول عامٍ : ما ضحك سنّه

ذكرت اسمه وهلّل به لساني كنّه .. التسبيح
وسهيت وما دريت الا وأحاسيسي يبارنّه

ذكرته ماني بناسي وانا اللي في هواه ابيح
شعوري لافرض ذكراه فرض الشرع والسنّة

مراويح السحاب ان جابته تنبت بصدري شيح
وتبهج قلب حاطنّه همومه لين صكّنّه

على الله يوم زلاته ماهي تحتاج للتوضيح
و اجنّبها عن لسان الملام المرّ .. والمنّة !

وانا يوم اترك دموعي على هيئة قصيد تطيح ؟
تجفّ بـ كلّ - صح الله لسانك - لا لفت مِنّه !

وانا لو زحت عن بالي طيوفه ما قويت ازيح
شعورٍ كل ما يطري .. يدفّ الونّة بـ ونّة

تحشرج في لسان البوح والبرهان والتوضيح
سؤالٍ ما قوى لساني يبدّي به ولا يكنّه

حبيبي لـ امتلى صدر الليالي ضيقة وتجريح
تجي صبحٍ ينور في فضاي الليل ويحنّه ؟

يااكرم خلق ربي لاغدى كف الوصال شحيح
لا تعطي نار هجرانك .. وعيني ترجي الجنّة

الوم الناس والذكرى وكل دمعة وكل تجريح
ولا لوم الضماير في فؤادك يوم حبّنّه !

يقلّ الحيل ويضيع الصبر في كفة الترجيح
وموال المفارق ما عزفت وقلت لك غنّه !

ولا ودّي تدور لـ الغياب ولـ الخطأ تصحيح
مقاضيب الحزن قلبي من اقصى الصدر تلّنّه !

وامانه لا تمرّ وعطرك تجيبه هبوب الريح
وتهبّه في حشى صدري وافزّ بشوق منجنّه

عليك الله صارحني قبل يقتلني التلميح ؟
لا تترك مابقى في خافقي معقود في ظنّه

ترا ماعاد لي قدرة اشيل من الالم وازيح
ونفسي ملّت وطابت عقب هيل الغلا وبنّه

( ترا مدّ المواصل للحبايب مايبي تصريح
مادام قلوبهم ما بين شفقانه .. وممتنّة ؟

وانا من لحظة وداعك معانق كفّي : التلويح
وكل ما اقول سيّره الفراق يقول .. يمكنّه ):
- نوران

ووجهي كل ما مسّه من الغربة وصب وأحزان
‏طفت فيه الحياة ..ولاذكرك أشعل قناديله

‏ياربي وأنت جلاّي الظلام الراحم المنّان
‏يارب المرسلات ورب قلبي وانت تاوي له

‏أعوذ بنور وجهك لاتصيّرني ضعيف ايمان
‏تلقّاني بعطفك يا كريم ان قلّت الحيلة
-يمام

ليه اكف الدموع ؟ و كلها من نصيبه
‏معه يا حلو مشكلتي , و يا حلو حلّي

‏جعل ربي يجيب الدعوه اللي تجيبه
‏كان يا كبر حظي فيك يا الدمعه اللي

‏تاخذ الحزن مني لـ الدروب الرحيبه
‏من شعور المقصر لـ انشراح المصلي

‏جيت دربي خضر وغصون قلبي رطيبه
‏وصعبه اروح كلي مثل ماجيت كلي

‏كل ماقلت وينك ؟ قال افا يا الحبيبه !
‏من لقى فيك روحه ، مايروح متخلي

‏قلت والحب ؟ قال الحب انا عندليبه
‏اجمعي كل عمري ، و انثريه و تجلي !

‏كل لحظة تسلي ، في غيابك كئيبه
‏وكل لحظه كئيبه ، في وجودك تسلي
- العنود الواصليه

عليك - أغار - لوّ أنّي قنوع وعارفة قدري
‏ولكنّ النسا تبني .. على مثلك ؟ أمانيها )؛

‏انا أدري ماحدٍ واصل مكاني بالحشا وأدري
‏على غيري : طواريق القصايد .. ما تغنّيها
- نوران

أنت ِ اللي عطيتي كل الأشياء قيمة
‏يا سمّو الأحاسيس و مقام المشاعر

‏يوم شفتك تحبّين المطر ، صرت ديمة
‏ويوم شفتك تحبّين الشعر ، صرت شاعر
- سعود مهدي