تيممت الصعيد، وطاح من عيني لذيذ النوم
ولا طاح الكلام اللي بصدري حنّ رعّاده

هجر جرد الصحايف مثل هجر العارض الديموم
وحضر مثل السحاب اللي هطل في غير ميعاده

أحسب البوح سطحي والشعر محدود قبل اليوم
حدوده دمع ابن زيدون واستعطاف ولادة

وعرفت انه محيط يكتب أمجاد ويحفظ سلوم
مهو محصور في لهفة حبيب وكبريا غادة

يانورة زمليني من عوايد بالي المزحوم
يضيع آدم ولا له غير حوى ضلع كالعادة

أنا شاعر مدينة ما دهلت النايف المزموم
عساي أوجد وانا في مكتبي مايصعب ايجاده

مع هدي النبوة والكتاب المُنزَل المعلوم
لقيت البيت وزنه من ذهب وحروفه عبادة

على درب تمثناه إبن أبي سلمى عداه اللوم
بعد بانت سعاد وجات خيل الموت ورّاده

صلاة الله على وجه الأمين الصادق المعصوم
نبيٍ طارت أسراب الشهب في يوم ميلاده

تطارد تحت بيبان السما كل امردٍ مرجوم
ليا منه سرق كلمة لقى نجمٍ بمرصاده

بزغ بدر الزمان اللي حباه الواحد القيوم
بنورٍ يسبر أغوار الظلام ويكشف أبعاده

يتيم صافح الدنيا وهو من والده محروم
وودع حضن والدته وسج البيد بمهاده

جمع الاشراف من هاشم ومن زهرة ومن مخزوم
ونفى عنه التكبر رغم كون أجداده أجداده

بعث في امة جهل مستضعفة مابين فرس وروم
وبامر الله نشر دين، ورسم نهج وصنع قادة

تجبر عمرو بن هند وشراسة عمرو بن كلثوم
ملخص عن سلوك أقوام نزّالة وشدادّة

تحت ليل الجهالة تنقل الحقد وتشيل الزوم
وبعد صبح الرسالة سامح المجلود جلاده

هدم بعزومه الشرك وبنا في المسلمين عزوم
وصاروا دونه ايدي حامية وارقاب سدّاده

أجلّ من الشعر بفروعه المنثور والمنظوم
وأبر الصحب صحبه وأحسد الحسّاد حسّاده

رحل عن تربة بلاده وعاده ماهو بمفطوم
وخذاه البين مره ثانية عن تربة بلاده

ودخلها بين تهليل الجموع بموعدٍ محسوم
على صهوة حصانه مادخل بحصان طروادة

معه جيشٍ وراه الذيب يهرف والعقاب يحوم
يظنّونه بيبدأ حملة إستئصال وابادة

تعلّت في كلامه عفة الهازم عن المهزوم
وتجلت في مقامه رحمة المعبود لعباده

لو العلماني أدرك من علومه علم كان علوم
ولو الملحد شهد عدله عدل عن فكرة إلحاده

وقف شاعر رسول الله يرد القوم تلو القوم
ياليت اني موقف في مكانه وانشد انشاده

"عدمنا خيلنا إن لم تروها" تنصر المظلوم
"تثير النقع" في دار الحريب وتخمد عناده

نعيد الماضي المختال رغم الواقع المشؤوم
مكايدهم عقيمة، وأمة المختار ولادة

عدوه خاسر مذموم موسوم على الخرطوم
سيصلى في سقر نارٍ على الكفار وقادة

ألوذ برحمة الله من حميم وشجرة الزقوم
وأعوذ بنور وجهه من صدود القلب واحقاده

أخاف أهوال يوم مايبلّل جادب الحلقوم
سوى رشفة من أكرم الاكرمين وسيد السادة

ذكرته وارتعش جفن ونشت بين الرموش غيوم
عساها بعد تكبيرة صلاة وفوق سجادة
– عبدالله السبيعي

سرى ليل وطلع فجر وعبر مابينهم عمري
تحايلت الفرح لكن تعرّى حزني المرتاب

مساكم الله بالخير♥️

اكسر جمود الصمت بسيوف الكلام
و سلّم و ردّ الصوت من باب الأجر

مالي سوى روحك أبادلها السلام
مصافحك يذيب قلبٍ من حجر

عطني من اوقاتك دقايق إهتمام
قلبي من اشواقه شويّ وينفجر

ياما سهرتك لين جافاني المنام
وياما احتريتك لين صادقني الفجر

رغمًا عن اتعاب المجافى والغرام
محبّتك كنزٍ من ينوله تجر

عاتب، تكلّم؛ ما على الغالي ملام
حتى لو ان قلبي من عتابك ضجر

لكن حبيبي لا تطرّي لي خصام
لي روح تقوى كلّ شيّ -الا الهجر-
- مها

صبحكم الله بالخير♥️

‏كتبت ومليت الأرض شعر و وله وهيام
‏ولا طعت فيك الناس والناس نقّاده

‏لو أضيع بك من ضاع فيك أنت ماينلام
‏وش اللّوم ونفوس المحبين منقاده

‏أشوفك وطن وتشوفني رحلة أستجمام
‏وأشوفك عمر وسنين ماهي بمنعاده

‏معي قلب واحد لو تقسمه خمس أقسام
‏يحبّك بكل أقسامه الخمس وزياده
- بندر الدويش

آسفك لا تحسب انها ديّتك لازهاق روح
من متى كان الأسف يشفع لجرم الآدمي ؟

الطريق اللي خذاني في دياجيرك " ينوح "
و كلّ خطوة سيّرتني لك ثمنها -من دمي-

الندم لو له ملامح ؟ بانت فـ وجهي جروح
مثلما بانت محبتْك - فـ حلايا مبسمي -

من يصدّق بانهياري خلف هالوجه الصبوح ؟
وضحكتي تسبق بكاي وبسمتي تسكن فمي

آتصبّر و آتأسّى في نبي الله نوح
واضحك بقلبي لو الحزن بجناحي مرتمي

كنت اخاف الصمت حتى صار يقتلني الوضوح وامتنعت مْن الكتابه لين ما ضاق نْسمي

القصايد يوم كانت تشرح احساس و تبوح
آتهجاها … مَـ كنْها كتبت بـ خطّ قْلمي

انطفى وهج الأمل بـ عيوني ومات الطموح
وسيقت ايامي على الحسره وانا سقت قْدمي

آتحاشى - ذكرياتك - بالتناسي والنزوح
وآتوارى عن حقيقه قيّدت لي معصمي

كلّما عزّمت أنسى رايتي البيضا تلوح
والحلول الممكنه خلف القصايد تحتمي

مشكلة عقلي : نبيه ومشكله قلبي : سروح
و بين هذا و بين ذاك آتوه وآجن واعتمي

آه من طيش الهيام ونزوة القلب اللحوح
اكسروني ؛ كسرة الابيات بلسان اعجمي

السؤال اللي سلب لُبّ الإجابه : وين اروح ؟
و غربتي غربة مشاعر بس لقلبك تنتمي
- مها

تعبت اكتب مراسيلي عشانك والشعر ينشلّ
دخيل الله من حرفٍ تعبت اعالج كسوره

اخاف انطق لك آحبك واصرخ في وجيه الكلّ
وعصافير الهوى تصحى من الاحلام مذعوره

يكيف اقدر على حلّك اذا انت المشكه والحلّ
وحلول العاشق المُثلى تحت رحمتْك مأسوره

انا ما جيت احبك بسّ، انا جيتك بـ ليت وعلّ
لعلّ الله يكتب لي معَك في هالعمر دوره

مهاتك تحتري من جرهديّ الوقت ينبت فلّ
لو سنين العمر في غيبتك ماهيب معذوره

تمنّيتك.. وانا ياكم لي اتمنى شموسك ظلّ
وعلى رفّ الأماني باتت الاحلام مهجوره

بعد ماطارت طيور الهوى بارزاقها يا خِلّ
كبر فيني الشعور وطيّر مْن العشّ عصفوره

تهاجر لك مشاعر قلب حَبّك فارتحال وحِلّ
معَ كل انتفاضه شوق مغبونه ومقهوره

بعد ما دارت الايام..واحساس الوله ما قلّ
هنا..خلف الضلوع العوج قلبٍ تربكه صوره
- مها

ضيّعتني
والدرب توّه ما بدأ
ناديت لك ..
والصوت يجرحه المدى
هيجنت لك
لين السحاب
خان السراب
وطاح الندى
سمَعْتني ؟
غنّيت لك واوجعتني
ردّيت ؟ أو ردّ الصدى :
"عالي السكوت ، ما أسمعك"
رحت و رحل صوتي معك
يا الله فدا ..
ماهو مضايقني الرحيل
أو عتمة الدرب الطويل
ضايقني انّك يوم رحت
رحلت .. ما ودّعتني
يا الله فدا
ما عاد لـ عتابي جدا
دامك مشيت الله معك
وروحي معك
إعذرني ما راح أتبعك
والّا اقنعك
قلبي على البعد اهتدى
يا الله فدا
الذكريات اوفى من احباب العمر
دايم تمر ، وتصافح يدين القمر
لا خانت يديك اللقاء
"ما لـ الجراح الّا الصبر"
على العموم ..
ما جيت لك بـ آرجّعك
جيتك عشان آودّعك
وغنّيت لك ضيّعتني
يا الله فدا
ليه اعتذر ؟
"كان الفراق اللي تبي ؟ الله معك" !
- فيصل القاضي

ارحبي يا اللي تزاحم لك اسراب القلوب
‏كنها تزاحم الناس في مشعر مِنى
‏
‏اشكريني يوم احنّك من كبار الذنوب
‏واعذريني يوم أزيدك مع العنوة .. عنا
‏
‏الضمير الحيّ نوعٍ من أنواع الحروب
‏" يا ضمير مدور المصلحة نوم الهنا "
‏
‏ما قدر يكسب محبّتْك يا الظبي اللعوب
‏غير أنا وأعوذ بالله من كلمة أنا
‏
‏ان تركتيني قتيلٍ على مفرق دروب
‏اكتبي فتّانة العصر مرّت من هنا
‏
‏واحفري قبرك وزاني وطيحي دوب دوب
‏ودي أقابلْلك لا قمت في دار الفنا
‏
‏والله لا وجهك بعادي ولا قلبي بطوب
‏مير ميلي لين اشوف المنايا والمُنى
‏
‏لا تشكّلتي مع الريح وانسام الهبوب
‏ما لقيت مْن العبارات غير الله لنا
- جمال بندر

ما كنت اعرف ان المكان اللي يضمّك موطني
وان البلاد الخاليه منّك .." محطات انتظار " :(
- مها

صبحكم الله بالخير♥️

أنا لجل الطموح اللي يقديني اعيش الحلم
تغانمت الحياة وعشتها عن رغم ما اكره

وأنا لولا الطريق اللي سلكته في سبيل العلم
رفضت احيا على شفات الأماني احتري بكره
- مها

مرحبا آل قصيدة

اللهم صلِّ وسلم وبارك على نبينا محمد

" يا ابن آدم من بغى شيٍ وصل له
‏بالعمل والجهد ماهو بالتمني

‏تحسب ان دنياي دايم مسفهله
‏وتحسب اني مستريح وتحسب اني

‏والفضل للي مظللنا بظله
‏يقدر الواحد من الضيقه يغني !

‏فكّر بـ مستقبلك دقه وجله
‏وانتبه له واصرف التفكير عني

‏ما انت حاسدني على ما اعطاني الله
‏لو عرفت اللي خذاه الله مني ! "

مرحبا آل قصيدة