بنت السماء قبل الأراضي تضمّك
أروي ضماي و خيّلي فوق راسي

يا جعل أبوك اللي عَقد خطبة أمك
في جنة الله لا استوَن الرواسي

متاني أروى من شهاليل جمّك؟
عامين و حْوار القناعة ، سياسي

من ليّن اثنينك ليا عذب فمّك
مسااافةٍ ما تستسيغ المراسي …

و شلون أشيل الحب كلّه و همّك!
و أنا عساي أملى بـ متني ، لباسي

كم ناضت عيوني و لا حنّ كمّك
أنسي و كم ذاق النهايات ، ناسي

دامه برد مع دورة الوقت ، دمّك
ابحطب جذور المحبة بـ فاسي

و أحفظ تفاصيل الليالي و أصمّك
على الأقل لا طحت ، طحت متواسي

حدّ الكرامة و أن جرح لا يهمّك
ألطف من يدين الضعيف المواسي
- عمر الودعاني

بانت مواريك يا حلم الليالي و بنْت
امسك كفوفي و بيّن لي طريق الفرح

شف حالي الحين لا ترجع على كيف كنت
اللي جمع ماضي الأوجاع ليته طرح

مـ أعتب على الجرح لو خارت عزومي و لنْت
أعتب على كيف صار و من هو اللي جرح
- عمر الودعاني

صبحكم الله بالخير♥️

عسى مدهال ملهوف الحشا للرايح الصباب
يصب من الوله ويعانق المحبوب محبوبه

كلام الحب وعيون القصيد ونظرة الإعجاب
تناقلها القلوب الخالية.. وتروح مجلوبه

ونور الشمس والماء والظمأ والريح والترحاب
فدا للجادل اللي من زلال الغيم مصبوبه

تقول: الآدمي قلبه رهيف إن حب حن وذاب
وأقول: القلب راح قلادةٍ في عنق رعبوبه

عنودٍ كل يوم أقرأ عليها صفحتين كتاب
وهي سطرٍ من سطور الكتاب وثامن إعجوبه

مضى عمري على طرد الهوى وأثر الهوى غلاب
وأنا راضي أعيد حكايته وأعاود ذنوبه

ما عندي للقصيد الا الجروح اللي من الأحباب
ولا عندي جديد الا الغرام وتالي دروبه

حديثي في تفاصيل الحياة وكل فصل وباب
والأجدر بالحديث إن نعمة النسيان مسلوبه

يا كثري يوم أوزع بسمتي في شارع الغياب
ويا قلي يوم أحاول حاجةٍ ماهيب مكتوبه

الأحداث الأخيرة كلها حيرة وحرب أعصاب
وقلبٍ ما يرجعه لحياته غير مطلوبه

أوقف كل ما هب الهوى في عالي المرقاب
وأغني مثل من عدى الرقيبه راس مشذوبه

وش يطمنك من بعد الجفا يا قلبي المرتاب
وأنا شاعر يشوف البيد بيته والقلق ثوبه
- مشاري محمد

العشب أذن الثرى والغيم صوت السما
هي كلها كلمتين وكل قاعٍ تسيل

حبيبتي كانك الما قلت كلي ظما
وإن صرتي أنتي ظما أصير أنا سلسبيل

من قال بس إن زينك فيه كن وكما
ياروحي أنتي مثال لشي ماله مثيل

ياعل عينٍ ترف بحضرتك للعما
وياعل عزٍ مهو ماطاك يمسي ذليل

ماشفتي النور في حضن الظلام أرتما
مثله ترى الحب في حضنك يدوّر مقيل

خليك من كل ما أين ما طالما
حتى عيون المحال تشوفك المستحيل

الزين فالناس قاع وزينك أنتي غما
وحتى على النور لك ولظل ظلك جميل

ولو مامسحتي جبين الشمس أبد ماحما
والورد إلى شم عطرك قام عوده يميل

والخلق من طين ونور ونار وأنتي بما
والا الهوى به خلق لي هالخفوق العليل

شفتي الى من كبر شوق الحبيب ونما
تلقين لمعه لدمعه في عيونه تخيل

حبيبتي كان قلبي بالضلوع احتما
لك رمش من حربته ما يسلم الا قتيل

والعشب وجنة ثرى والغيم شفة سما
هي كلها بوستين وكل حبٍ يسيل
- عبد المحسن بن سعيد

الحبيب اللي سواليفه طويله
لو يسولف دهر ماشبعني كلامه

يوم يحشر كلّ خلٍ مع خليله
جعلني احشر معه يوم القيامه
- مها

صبحكم الله بالخير ♥️

اللهم صلِّ وسلم على نبينا محمد

الهوى.. هذا الهوى مربى عِنادي
وذنبي اللي ما املّ من اقترافه

مثلما عندي من اللهفه تمادي
ليت لي سلطه على القلب وشغافه

يالبياض اللي خطف منّي سوادي
كيف تقوى البعد؟ دام البعد آفه

لا تقول ان الغياب احيان عادي
والله انه ذنب ما دونه حسافه

اغترابي طال والوحشه تنادي
والليال تنوح من بُعد المسافه

يا بلادي .. يا بلادي .. يا بلادي
ضمّني لك كان مافيها كلافه

ما طلبت الا انت يا غايه مرادي
انت.. يابو وجهٍ آحبه واخافه

من يحبّك اعرف انه فيك غادي
والسبل كلْها تودّي لاعترافه

حتى لو حطّمت يالغالي فؤادي
قلبك اللي عافني .. مقدر اعافه

العقل مع كلّ طاري لك يفادي
والفؤاد بمسجدك طال اعتكافه
- مها

‏والله اللي طرف الليل والنوم استذار
‏والعيون ارخت هدبها وطاح وليدها

‏ياعيوني كل شيٍّ.. توقعتيه صار !
‏فكي عقال الملامه وفكي قيدها

‏مرتكب لي غلطةٍ ما يكفرها اعتذار
‏ماعرف ليه ارتكبها وليه اعيدها

‏ملّ قلب ٍولّعته التفاصيل الصغار
‏الظنون ظنونها والاكيد اكيدها

‏والقلوب اللي تعرف المنافع والمضار
‏لا شعاها شاعي أهل الهوى ، ياجيدها

‏أدركتني من خذتني جهارٍ من نهار
‏من متاهات المحبه خذتني بـ ايدها

‏بنت من وردوا على الموت شيبان وغمار
‏في تصلفاق الجزيره . . وفي توحيدها

‏خشف ريمٍ ذيرتها البلاجيك القصار
‏حالفٍ لو زان مضرابها ما اصيدها

‏في هواها استعذب الموت واوطى كلّ حار
‏واستظل بشمسها واتفرش حيدها

‏موميٍ بسنين عمري لقصاف العمار
‏بين دنّاقة عزاها وضحكة عيدها

‏من طهارة قلبها تنبلج شمس النهار
‏ويمسك ابليس العور هامته من كيدها

‏علمتني كيف يضحك على الحلم الزرار
‏وكيف تغفى مفردات القصيد بـ جيدها

‏وعلمتني كيف اغني مع الاسماء الكبار
‏قبل اعرف اركّب المفرده على ايدها

‏كل ماغنيتها خلف الاسم المستعار
‏اغمزت لي عينها تدري اني ميدها

‏ مايجي عندي للأبيات تقدير و وقار
‏غير لا منها سمعتها وقااالت : عيدها
- منيف الجراش

تجديد عهد ♥️

الظما درب سلكته في سبيلك
يوم الحّت رغبتي على غيابي

قلت وش تبغى و قلت ابغى دليلك
نجّني ولا تمكّن من صوابي

لا تسولف لي عن اقصى مستحيلك
انا عمري ضاع و احساسي ضبابي

الثلاث جروح من قسوة رحيلك
و الثلاث سنين من زهرة شبابي
- محمد بن ماجد

يحزني اقول من بعد الغياب الطويل
مافيه ذكرى قدرت انسى تفاصيلها

عيني دخيلة عيونك ، يا منجي الدخيل
والله ، ما تستاهل الدمعه مظاليلها

اترك احبك وعطني قبل احبك دليل
يكسب رضى نفسي اللي طافحٍ كيلها

اشتقت لك و اللقا معقود بـ المستحيل
و الروح تطفي من الوحشه قناديلها

يسألني الليل لا مال بـ هواه الجديل
وشلون يقدر يبكي نافلة جيلها ؟

ارسل سلامك ليا هب النسيم العليل
النود ماهيب تبطي في مراسيلها

وعد بني في كل شي ، الا عذاب الرحيل !
عيني ماهي من مزن يوم انك تخيلها
- العنود الواصلية

شفتك ومن بعد ذاك اليوم ماعاد اشوف
‏من يوم جت عيني بـ عينك و قلبي غريق

‏علمني وشلون تشرح حبك أربع حروف؟
‏حملّت كلمة أحبك فوق مالا تطيق

‏تقول ياليت مال الناس عندك شفوف
‏و اقول احبك ، و غيرك جعلهم في حريق

‏شعوري اللي بدونك بين وحشه و خوف
‏شعور شايب توحش في عزا آخر صديق
- العنود الواصلية

"أنا يا رب لو كانت حظوظي في حياتي قِلّ
‏عزاي إنك لطيف وكل شيٍ .. موكلك أمره"

صفير الريح ف الباب الحديد وفي جدار السور 
يشابه صوت فقدان الحنين لصاحبٍ غايب

يا صوت الغايب المرغوب لو مريت بين الدور  
نبت عشب الأماني بالخفوق المخطي التايب

صدى الذكرى يمر بسر صدري والصدور قبور  
وانا ما قلت يا صوت الصدى ويش انت لي جايب

أحس إن الزوايا قاسية وإني بدون شعور        
وأشوف إن الصداقة شمع من قل الوفاء ذايب

أبنفض جوختي عن منكبي والواردات صدور    
أنا مانيب واقف في مكان الخايف الهايب
 
رفيق العام عن تقصيرك الواجد معي مشكور   
أنا عذري شجاع إن رحت منك وخاطري طايب

يمرونك عشاشيق الكلام ولابسين الزور         
وترميني قدَم ريح الظنون وتحسبك صايب

عذرتك ما لحقتك بالملام وقلت فيك قصور    
جبر كسر المشاريه الكبيرة خاطر الشايب
 
ياوجه الطيب في ضحكك مواسم من رضا وسرور
حضر وجه العشم عن وجهك اللي ما حضر نايب

أبي بيني وبينك للسنين المقبلات جسور      
على كثر الأسي ما ابغى الصداقة قدرها سايب

أخذت آخر طموحات السنين وقلت وين النور   ونفضت غبار صدمات الرفيق وظني الخايب
⁃ سعد بن بتال

صبحكم الله بالخير♥️

اللهم صلِّ وسلم على نبينا محمد