الحبيب اللي سواليفه طويله
لو يسولف دهر ماشبعني كلامه

يوم يحشر كلّ خلٍ مع خليله
جعلني احشر معه يوم القيامه
- مها

صبحكم الله بالخير ♥️

اللهم صلِّ وسلم على نبينا محمد

الهوى.. هذا الهوى مربى عِنادي
وذنبي اللي ما املّ من اقترافه

مثلما عندي من اللهفه تمادي
ليت لي سلطه على القلب وشغافه

يالبياض اللي خطف منّي سوادي
كيف تقوى البعد؟ دام البعد آفه

لا تقول ان الغياب احيان عادي
والله انه ذنب ما دونه حسافه

اغترابي طال والوحشه تنادي
والليال تنوح من بُعد المسافه

يا بلادي .. يا بلادي .. يا بلادي
ضمّني لك كان مافيها كلافه

ما طلبت الا انت يا غايه مرادي
انت.. يابو وجهٍ آحبه واخافه

من يحبّك اعرف انه فيك غادي
والسبل كلْها تودّي لاعترافه

حتى لو حطّمت يالغالي فؤادي
قلبك اللي عافني .. مقدر اعافه

العقل مع كلّ طاري لك يفادي
والفؤاد بمسجدك طال اعتكافه
- مها

‏والله اللي طرف الليل والنوم استذار
‏والعيون ارخت هدبها وطاح وليدها

‏ياعيوني كل شيٍّ.. توقعتيه صار !
‏فكي عقال الملامه وفكي قيدها

‏مرتكب لي غلطةٍ ما يكفرها اعتذار
‏ماعرف ليه ارتكبها وليه اعيدها

‏ملّ قلب ٍولّعته التفاصيل الصغار
‏الظنون ظنونها والاكيد اكيدها

‏والقلوب اللي تعرف المنافع والمضار
‏لا شعاها شاعي أهل الهوى ، ياجيدها

‏أدركتني من خذتني جهارٍ من نهار
‏من متاهات المحبه خذتني بـ ايدها

‏بنت من وردوا على الموت شيبان وغمار
‏في تصلفاق الجزيره . . وفي توحيدها

‏خشف ريمٍ ذيرتها البلاجيك القصار
‏حالفٍ لو زان مضرابها ما اصيدها

‏في هواها استعذب الموت واوطى كلّ حار
‏واستظل بشمسها واتفرش حيدها

‏موميٍ بسنين عمري لقصاف العمار
‏بين دنّاقة عزاها وضحكة عيدها

‏من طهارة قلبها تنبلج شمس النهار
‏ويمسك ابليس العور هامته من كيدها

‏علمتني كيف يضحك على الحلم الزرار
‏وكيف تغفى مفردات القصيد بـ جيدها

‏وعلمتني كيف اغني مع الاسماء الكبار
‏قبل اعرف اركّب المفرده على ايدها

‏كل ماغنيتها خلف الاسم المستعار
‏اغمزت لي عينها تدري اني ميدها

‏ مايجي عندي للأبيات تقدير و وقار
‏غير لا منها سمعتها وقااالت : عيدها
- منيف الجراش

تجديد عهد ♥️

الظما درب سلكته في سبيلك
يوم الحّت رغبتي على غيابي

قلت وش تبغى و قلت ابغى دليلك
نجّني ولا تمكّن من صوابي

لا تسولف لي عن اقصى مستحيلك
انا عمري ضاع و احساسي ضبابي

الثلاث جروح من قسوة رحيلك
و الثلاث سنين من زهرة شبابي
- محمد بن ماجد

يحزني اقول من بعد الغياب الطويل
مافيه ذكرى قدرت انسى تفاصيلها

عيني دخيلة عيونك ، يا منجي الدخيل
والله ، ما تستاهل الدمعه مظاليلها

اترك احبك وعطني قبل احبك دليل
يكسب رضى نفسي اللي طافحٍ كيلها

اشتقت لك و اللقا معقود بـ المستحيل
و الروح تطفي من الوحشه قناديلها

يسألني الليل لا مال بـ هواه الجديل
وشلون يقدر يبكي نافلة جيلها ؟

ارسل سلامك ليا هب النسيم العليل
النود ماهيب تبطي في مراسيلها

وعد بني في كل شي ، الا عذاب الرحيل !
عيني ماهي من مزن يوم انك تخيلها
- العنود الواصلية

شفتك ومن بعد ذاك اليوم ماعاد اشوف
‏من يوم جت عيني بـ عينك و قلبي غريق

‏علمني وشلون تشرح حبك أربع حروف؟
‏حملّت كلمة أحبك فوق مالا تطيق

‏تقول ياليت مال الناس عندك شفوف
‏و اقول احبك ، و غيرك جعلهم في حريق

‏شعوري اللي بدونك بين وحشه و خوف
‏شعور شايب توحش في عزا آخر صديق
- العنود الواصلية

"أنا يا رب لو كانت حظوظي في حياتي قِلّ
‏عزاي إنك لطيف وكل شيٍ .. موكلك أمره"

صفير الريح ف الباب الحديد وفي جدار السور 
يشابه صوت فقدان الحنين لصاحبٍ غايب

يا صوت الغايب المرغوب لو مريت بين الدور  
نبت عشب الأماني بالخفوق المخطي التايب

صدى الذكرى يمر بسر صدري والصدور قبور  
وانا ما قلت يا صوت الصدى ويش انت لي جايب

أحس إن الزوايا قاسية وإني بدون شعور        
وأشوف إن الصداقة شمع من قل الوفاء ذايب

أبنفض جوختي عن منكبي والواردات صدور    
أنا مانيب واقف في مكان الخايف الهايب
 
رفيق العام عن تقصيرك الواجد معي مشكور   
أنا عذري شجاع إن رحت منك وخاطري طايب

يمرونك عشاشيق الكلام ولابسين الزور         
وترميني قدَم ريح الظنون وتحسبك صايب

عذرتك ما لحقتك بالملام وقلت فيك قصور    
جبر كسر المشاريه الكبيرة خاطر الشايب
 
ياوجه الطيب في ضحكك مواسم من رضا وسرور
حضر وجه العشم عن وجهك اللي ما حضر نايب

أبي بيني وبينك للسنين المقبلات جسور      
على كثر الأسي ما ابغى الصداقة قدرها سايب

أخذت آخر طموحات السنين وقلت وين النور   ونفضت غبار صدمات الرفيق وظني الخايب
⁃ سعد بن بتال

صبحكم الله بالخير♥️

اللهم صلِّ وسلم على نبينا محمد

( السعيد من وفقه الله لكثرة الدعاء)
‏في هذا اليوم الفضيل ⁧ #يوم_الجمعة⁩ ساعة شريفة ⁧ #ساعة_استجابة⁩، والأكثر على أنها بعد العصر.
‏-الهج بالدعاء .. أكثر من الدعاء .. افتقر في الدعاء .. ادع دعاء المضطر، فالله جل وعلا يجيب دعاء المضطر وإن كان كافراً، فكيف بدعاء المؤمن المضطر المفتقر.
‏-قال ⁧ #ابن_كثير⁩: فالسعيد من وفقه الله تعالى لسؤاله، فإنه تعالى قد تكفل بإجابة الداعي إذا دعاه، ولا سيما المضطر المحتاج المفتقر إليه.

قدلي و أنا افضل العزله على الاجتماع
لعل نفسي بعد روع الفراق تهدا

و البارحة طاح من وجه الصحيح القناع
و عرفت قدر الهنوف اللي خطاها قدا

صلت على قلبي و طافت طواف الوداع
و لازال لجروحها بصمه و صوت و صدی

و بداية الحب من رغبه و حب اطلاع
و نهايته حسره و شرٍ مامنه مغدا

جتني سواة البشاير و إقبلت باندفاع
و راحت مراح الجمايل يوم راحت سدی

أومن برب العيون الناعسات الوساع
سلهامها ياخذ العشاق لـ أبعد مدا

سهوم نظرتك ما يقدم عليها الشجاع
حتى لونه من اللي ينطحون العدا

لعيونك معرّض عمري لدرب الضياع
واللي بقى منه واللي راح جعله فدا

احنّك من الوداع و من جروح الوداع
مثل ما احنّ الرفيق الطيب من الردا
- جابر النشيرا

تمرّ سنين عمري ما لحقني خوف
لو ان الوقت ياخذني لميعادي

مثل منهو تجاهل قيمة المعروف
تجاهل هالحقيقه قلب متمادي

وش اللي غيّرك يا قلبي الملهوف
بعد ما كنت فحساب العمر غادي

أنا كم لي احارب حزني المألوف
سنه ما حدّني غير الحزن حادي

ذرفت مْن الدموع اللي يبلّ الجوف
وَلا كفّت دموعي تحيي الوادي

بعد ما قلت عمري بالفرح مخلوف
تجدّد حزني -فـ تاريخ ميلادي-
- مها

أمطِر علي وجهك الطاهر كرهت الخيال
‏قلبي من البارحة على مقيظ الرمل !

‏متاعب الروح ظميا صوّتت لك تعال
‏معك جروح العمر يا غايتي تندمل

‏انطق "احبك"
‏ويضحك قلب، ويروق بال !
‏- انا من النظرة العذبة تراني ثمل !
- ياسر المفرج

شح الكلام.. وغصن الأحزان ميَّاس
وجفَّ الشجر، واستأذنتني طيوره

واحتجت أموتك شعر، وأحيا بك إحساس
وأركض.. ورا بيبان بيتك، وسوره

ما زلت في صدر المقادير - عسّاس
ممحل، وبارق ضحكتك شع نوره

إلى خذاني جرحك العام؟ لا بأس
أشدّ من جرح المحبة، شعوره

أنا أعرِفك مثل الأمل في آخر اليأس
وألمس مدادك في زعله، وسروره

قلبي معك من وين ما هب نسناس
يرفى صواديف الزمن في حضوره

وشلون ينسى طلتك يا أعذب الناس؟
لا صار وجهك - كل ساعة - يزوره
- محمد السلطان