عسى الله يمدّ ظلال عمرك ياغصن الراك
‏يعزّيني إنك في حياتي: تعزّيني

‏أنا أبحث عن شعور السعاده هنا وهناك
‏لو أشوف موتي دونها قلت يمديني

‏بعد ما فقدت الحلم ياقلبي الشكّاك
‏ماعاد الدروب اللي تودي.. توديني

‏مزاجيّتي في كل الأحوال ما تخفاك
‏هي اللي تضيّع كل حاجة من يديني

‏ما ألومك ليا شفت الهبايب تجيب أقصاك
‏أنا مثلك أشوف الموسيقى تبكّيني

‏يامحبوبتي: عمري على طلّة محيّاك
‏لو يطيح دمعك طاح عمرٍ من سنيني

‏يا لولا لياليك القديمه ويا لولاك
‏تركت الحياه بدون أودّع محبيني

‏من المستحيل أنسى حياتي معك وأنساك
‏وأنا أشوف وجهك وين ماتلتفت عيني

‏لا زالت تسرّيني دروبي على مرباك
‏ولا زال صوتك رغم فقدك يناديني

‏أدوّرك في كل الأماكن عشان ألقاك
‏وأضيييع وتمر أيام ما يندرا ويني

‏قتلني رحيلك وأنقضى العمر مع فرقاك
‏تعالي وردّيني من الموت وأحييني

‏على سور دارك صرت أشوف الورود أشواك
‏ولا عاد جيّاتي عليها ، تسلّيني

‏بكى كل طيرٍ كان يضحك على الشباك
‏يغرّد وكنّه في وداعك يواسيني

‏أنا منصدم وأعيش يومي بدون إدراك
‏ماباقي معي من عقلي اللي يقدّيني

‏أسولف على طيفك وأغني على ذكراك
‏عسى الله يضمّد جرح قلبي ويهديني

‏مع إني ماعاد اعرف وين الزمن ودّاك
‏إلى الآن أقدّس ماحصل بينك وبيني

‏لو إني خسرتك عمر قلت: السنين فداك
‏لكن الخسارة في حياتي وفي ديني
- مشاري محمد

في قصايد مشاري عذوووبه

اللهم صلِّ وسلم وبارك على نبينا محمد

كفكف دموعك وشفني خير قدوه تقتديها
ماخذه من كلّ حاجه محزنه حقّ الدفاع

اختلق ضحكة بريئة أغلب الأحزان فيها
انتصر من ضحكتي والحاجه أم الاختراع

ماذرفت دموع عيني لجْل شخصٍ يحتريها
وما اخاف فراق لاني صاحبة قلبٍ - شجاع -

لو تقاس الاهتمامات بـ مدى بكيي عليها
مابكيت الا على فستان قصْر و روج ضاع

اشبه لطفلة تحَبس العبرة اللي تعتريها
ليين تبكيها على لعبة سقط فيها القناع

حالفه إنّ المسرّة ياااا تجيني يااا اجيها !
ذاخره لدروبها من معمعة صبري اقتناع

ابتغيها تضمّ حزني مثلما ضمّت يديها
للفقير اللي خلق من سلوة احلامه متاع

مختلف مفهوم تقديري للاشيا اللي ابيها
يشبه لطبع الكريم اللي هدا أكله و جاع

امي تقول ايّ حاجه ودكّ بْها - اتركيها -
وانت شخصٍ من غلاته رحت واهديته وداع
- مها

ما يرد القلب عن همه وعن سطوة جروحه
‏غير صبحٍ يعتق قلوب الحيارى صوت أذانه

‏فالرحاب اللي تمد العزم لـ النفس الطموحه
‏كني آخذ من معالم مجدها .. حلم و رزانه

‏الجبل مالي عيون الناس من شدة وضوحه
‏ما اخلفت فيه الرياح الهوج شي من إتزانه

‏في ذراه .. يغنّي الشاعر طرب ويمدّ شوحه
‏بين فكرة من مخيّلته !.. و كلمة من لسانه

‏استعاد الروح من يوم استعاد الشعر روحه
‏من يشوفه يحسبنّ الشعر واحد من خوانه

‏البلا إنه ، كل ما يبعد على البيدا .. شبوحه
‏ما يشوف الا رسوم أطلال من ماضي زمانه

‏العيون اللي من اللهفة !.. مطالبها لحوحه
‏ودها تبكي .. ولا أدري من تبي تبكي عشانه

‏صاحبي !.. ما مرّ يوم ألا ، ولك جيه و روحه
‏وش بقى غير الطيوف اللي لها قدر و مكانه

‏كنت أقول إن المشاعر عنك توبتها نصوحه
‏وأثرها عمرٍ ما يعطَى فيه .. عهد ولا ضمانة

‏الغلا .. في كل يوم يطيح صرحٍ من صروحه
‏أدرِك اللي باقي من الحب قبل يفوت أوانه

‏لا تحمّلك الخطايا !.. هم عذر ولا سموحه
‏إرجع أنت .. وكل شيٍ فات يرجع في مكانه
- عبدالله السراهيد

‏هنا يبدأ القصيد العذب مايبدأ القصيد الحاف
‏على دارٍ لها أكثر من ثلاث أيام ممطوره

‏أنا اللي ماسرى قلب الحبيبه بين وزن وقاف
‏لو إن الشعر يشرح حالته ويلامس شعوره

‏يقولون أستر جروح الغرام وقلبك الشفّاف
‏وأنا أقول القلوب الواضحة فالحب معذوره

‏عطيت ولا خذيت الّا الذنوب اللي على الأكتاف
‏عسى كل الذنوب اللي على الأكتاف مغفوره

‏ماخفت من الدروب اللي تقصّر خطوة الخوّاف
‏أخاف إن المنازل خالية والدار مهجوره

‏أهيجن لك طواريق الغلا يالناعم الهفهاف
‏أنا مشكور وأبيات القصيدة فيك مشكوره

‏وصلتك من طويلات الدروب ومن زمانٍ طاف
‏عشان الغرّة اللي مع مهبّ الريح مغروره

‏لا شحّت بك مشاوير الليالي ماعليك خلاف
‏تجين مع الصباح اللي عليك تغرّد طيوره

‏لا تغلبك الشكوك اللي تحاوط قلبك الميلاف
‏معاك الأرض مليانه فرح والنفس مسروره

‏لو أنزل في مداهيل الهوى من عالي المشراف
‏لا زالت رايتي في عالي المشراف منشوره

‏علاقتنا عفيفة والقلوب من القلوب نظاف
‏تصوّرها النجوم الساريه بالصوت والصوره

‏تمررك الطواري في تفاصيلي وأنا مزهاف
‏وأشوف الليل يرخي منكبه والريح مذعوره

‏ركنت العمر في راحة يدينك والحياة أهداف
‏وأنا فوق دهماً من مربط التاريخ مذخوره

‏سليل اللي سلايلهم فخر والمعجزات: إنصاف
‏من يلومه لا شافك معجزه وعيونك اسطوره
- مشاري محمد

مساكم الله بالخير

حساب قصيده في تويتر

من خلاله شاركوني قصايد فارقه تستحق النشر

مساكم الله بالخير

‏وين انا يا تضحياتي عن بلوغ احلامي
‏كلّ ما زاد العزم دربي يزيد صعوبه

‏ليه احسّ المجريات اللي تمرّ اعوامي
‏ما تشابه للطموح اللي مشيت دروبه

‏خايف اسهب بالكتابه ثم تجفّ اقلامي
‏وخايف اذخر فكرتي وتْمرّني مكتوبه

‏المدى اللي في سكونه تستهيض اوهامي
‏كلّ ما اغواني الطريق اعلنت عنه التوبه

‏من يعذرب في غيابي ما حكى قدّامي
‏هذا أنا لا جيت كلٍّ ينشغل بـ عيوبه

‏يا خفوقي لا تهزّك بـ الحياة آلامي
‏جعلها تكفير لإنسان اثقلته ذنوبه

‏السحاب اللي جحدني يوم اجي له ظامي
‏لا يجيني .. لا ارتويت و دمعته مصبوبه

‏والشروق .. اللي تمنّيته .. يزيل عتامي
‏ما قدرت اشرق معاه ولا لحقت غروبه

‏الفضا اللي ما يعاتب بالغياب أنسامي
‏ليه الومه يوم غابت عن فضاي هبوبه

‏والله إنّ الدمع ما جرّب يضمّ أكمامي
‏كيف اصافح بسمةٍ من خاطري مسلوبه

‏يا حبيبي لا تغرّك نظرة إستسلامي
‏الجمال اليوسفي يفضح وله يعقوبه

‏القصايد قبل اعرفك ما تعرف إلهامي
‏وذا قصيدي من عرفتك منفرد باسلوبه

‏كلّ ما غنّيت وإجتاح الحنين أنغامي
‏ذكرياتك زادت ابياتي طرب وعذوبه

‏يا نديمي لو تذكّرت بـ مداك أيّامي
‏من بعيد إذكر هوانا لا تقرّب صوبه

‏من تلاقينا وانا ادري إن الوداع إلزامي
‏من قبل وقت اللقاء وأقدارنا مكتوبه

‏بين عثرات الرحيل و رجعتي وإقدامي
‏ما نجا غير الرحيل اللي نجا بـ أُعجوبه
- فيصل القاضي

جميلة جدًااا

من تلاقينا وانا ادري إن الوداع إلزامي
‏من قبل وقت اللقاء وأقدارنا مكتوبه :(

عثى فيني الحزن وازريت ادوّر فالحياة ضماد
على الوجه المليح احزان مقريّه ومكتوبه

بعد ما كانت الضحكات تسبقني رضا وعناد
شفاتي عقبها صارت على الضحكات مغصوبه

دخيلك لا تشحّين القصايد يا حروف الضاد
من اللي يسعف الشاعر اذا ضاقت به دروبه؟

بعد ما ناحت الورقى وغنّت بالشعور الحاد
تأرجح قلبي المنهك ما بين الذنب والتوبه

طلبتك، وانت غفّار الخطايا رازق النشّاد
تفيض برحمتك عاللي هلَك من كثرت ذنوبه

انا ياربّ احبك حبّ مايطري على العبّاد
واخافك خوف لو وزّع على اهل الأرض ماتوا به

الافراح بحياتي دائمًا تلبس ثياب حداد
متى ياربّ تفرجها وْ أبدّل للفرَح ثوبه

تعبت اساير الأيام و اوطى جمرة المعتاد
والأيام السعيده من كِتاب العمر مسلوبه

احايل دمعتي من خوف اشمّت فيني الحسّاد
سنه واكثر وانا اجاهد دموع العين بصعوبه

ظميتك يا ملذات الحياة ونورها الوقّاد
انا ايامي قبل لا القى الفرج ماهيب محسوبه
- مها

هذا هو من مولده لآخر فصوله
‏من يِجسّ النبض مايقدر يجسّه

‏يبتسم ، والابتسامات الخجولة
‏امّا يِرخي " حبلها " .. ولا يمسّه

‏القليل " يبيّنه " لـ الناس حوله
‏والكثيير اللي عن العالم يدسّه

‏والله إن كل الكلام .. اللي يقوله
‏ما يجي ربع الشعور اللي يحسه
- عبدالله السراهيد

صبحكم الله بالخير والسرور

اللهم صلِّ وسلم وبارك على نبينا محمد