يا صبا نجد وش عذر النديم ونديمه
‏والدهر ما كلا واديك والخير ضافي

‏كل ما لاح برق وهلّ فالقاع غيمه
‏قلت وش يدفع قلوب العرب للتجافي؟

‏في رحابك قصيد وفي ترابك غنيمه
‏وفي برادك علاج وفي سمومك عوافي

‏شاعرك وش يسوي فالجروح القديمه
‏كل ليله مريض وكل صبح متعافي

‏ياكل من الظنون ويشرب من الهزيمه
‏ويتحمل مشاريه الرفيق السنافي

‏عاشقٍ قلبي أخضر مير نفسي كريمه
‏مستحيل أتقدم والمبادي خلافي

‏حال بيني وبين الحب شيمه وقيمه
‏وجرحٍ آوله دمعة عين وآخره خافي

‏كل ليلة بعد فرقاك ، ليلة آليمه
‏تستثير الدموع وتستفز القوافي

‏لو تقوم القيامه ذكرياتك مقيمه
‏ماجفتك الضلوع اللي طواها جفافي

‏أعترف لك ضميرٍ فيه للحب قيمه
‏ليتني مت ما أعلنت لغلاك إعترافي

‏يوم أبادلك حب ويوم اسمّيك ديمه
‏ويوم اقول العتب مرفوع والبال صافي

‏اثر قلبك ما حس بقيمتي يوم آهيمه
‏وأثر عينك كفيفه ما تشوف اختلافي

‏جعل عمرك يطول ولا يطاولك ضيمه
‏وجعل جرحي مع طوال السنين متشافي

‏أنتهت كل حاجة والنهاية وخيمه
‏ولا بقى في محطات العمر شوط إضافي

‏قصتي معك: كانت خاتمتها عظيمه
‏تحمل اسمي وتوقيعي وجرحي وقافي
- مشاري محمد

هنا شعر شعر شعر

ماشاء الله تبارك الله

‏يا فتّاك اللواحظ كيف تطعني بدون يدين !
‏أنا ما كنت آعرفْ ان العيون السود قتّاله

‏عليك الله و امانه من طعوني لين يوم الدين
‏مشاريهي قصايد و القصايد فيك مختاله

‏توادعنا و في خاطرك علم و في رقبتي دين
‏و تواجهنا و روحي ذايبه و خطاك ميّاله

‏على متني عهود مخضّبين السيف أبو حدين
‏يا متن مذيرٍ مافي رقبته غير سلساله

‏تنصّاه الهبوب الباردة و تزيد عوده لين
‏تزيده لين لو ما تقدر تحرك طرف شاله

‏قدرت اصبر و أنا اشوف الصبر من ليلة الاثنين
‏كريمٍ دارت الدنيا عليه و شانت احواله

‏تباطيت النهار و زلّ من ليل الشقا ثلثين
‏عسى الثلث الاخير اقصر على المرتاب من باله

‏وجودي يوم ادرّج خطوةٍ ما تطرد المقفين
‏ وجود الشايب الي مات دونه خيره عياله

‏بتفقدني ليا عمّ الآمان و كثرو السالين
‏و تلقاني ليا صحّ الصحيح و كبرت القاله

‏أنا من بيت شيخة قبل اعدّ البيت و البيتين
‏ذخر من ضربهم فالقوم فال الله و لا فاله

‏اغنّي في نباهم يوم اشوف الفعل شوف العين
‏و آعد الصدق لاقام الكذوب يمسسّ حباله

‏علينا يزبن التاريخ لا دارت رحاة البين
‏و بنا يستأمن المجد التليد و تكبر آماله

‏نجي مثل الحيا و الارض جرادا و البدو شرهين
‏حدانا ينقضي دور السنة ما فرّق خياله

‏ولدنا بين معلاق السمان الحيل و السكين
‏يردّد مرحبا قبل يتعلّم يلبس عقاله

‏طوارينا و كلمة و النعم مثل الدعاءْ و امين
‏لها فالدين و السلم المعرّب مجد و آصاله

‏و اسامينا تخدم سيوفنا يوم الليال سنين
‏أجل و شلون لا منّا تعزوينا على الطاله

‏نهين المال و نشيّخ مواقفنا و أبو بعدين
‏على إستعداد يرخص عمره و لا يرخص رياله

‏كبيرة يا مسحّبه البشوت أهل الجناب الشين
‏طمعتو في مكاسيب البحر و انتم على جاله !

‏وردّتو للعدود الي يكدّر دلو ماها طين
‏و تسابقتو على المنقود رجليه و خيّاله

‏وريث الأوله ما ينلحق لين الجبال تلين
‏ولا يسعى للمديح ، الطيب الأمداح تسعا له

‏يقولون العرب ذكر الحيا و الطيبين يبين
‏و ذكر معيض في شتّى الديار يسابق ظلاله

‏على مدّ النظر هذي حلاله لا تنشّد وين
‏حبته الأرض لو بين الجدي و سهيل منزاله

‏يجيه الضيف و يلقّي معاذيره طلاق ودين
‏تبرك له سمان الحشو قبل يهزّ فنجاله

‏تحاقرت المديح الي تكاثرته على الباقين
‏يا قلّه عند أبو طارق لا قمت آعدد خصاله

‏معه ما يجمع صفوف الجامعة لا غدت صفين
‏بشورٍ تزري اشوار الوجيه السود تغتاله

‏مع انه لو يحوف الناهية بالرمح ابو روحين
‏ما يثبت دونها غير الي عظامه ما تشتاله

‏إمارتنا التليدة من صقر و صقير لهالحين
‏و هي في ضفّ شيخٍ ما تجيه القوم عيّاله

‏على طاري عوْض بن صقر وش نعم وش نعمين
‏تعيد ونعم لين تشاف ف احفاده و فعياله

‏ياصفحات التواريخ اكتبي منّا ليوم الدين
‏ لْو ان سيرة بني عمي تبي تاريخٍ لحاله

‏مغاتير النوايا و المكارم و الجناب الزين
‏ماهي والله سواليفٍ على فنجال و بياله
- متعب البقيلي

ماشاء الله تبارك الله

قصيدة رائعة للغايه

هذي ليلة شعرية فاخره

مرحبا

اللهم صلِّ وسلم وبارك على نبينا محمد

انشودة لها وقع مختلف على القلب

يذكرني رحيلك مجلسٍ باقٍ على حله
‏مداهيل الرجال اللي تنومسنا مواطيها
‏
‏هنا سليت سيفٍ يوفي الثارين من سله
‏هنا علقت رمحٍ يطعن الجوزا ويطفيها

‏هنا بينت مصحفك الكريم ودلنا دله
‏معك نبدا مواعيد الكلام وننتهي فيها

‏هنا ساقيت غصنٍ من غلا كنّا تحت ظله
‏نسولف بالغنا يا بايع الدنيا وشاريها
‏
‏هنا كان الرجل جبال ما تقبل خنا الزله
‏عمايمها سحاب وابله باقي مواضيها
‏
‏رجالٍ لو تشوف الما غدر ما شربته لله
‏نبت عشب الرضا ياسيدي بأول مغازيها
‏
‏هل التوحيد وكنوز العلوم ونصرة المله
‏رجالٍ يضحك التاريخ لولها وتاليها

‏هنا ماضيك ورياض الخليل اللي رعى خله
‏شربنا عذبها مدري لعبنا في مغانيها

‏هنا تخنقني العبرة وانا اكتب يا رسول الله
‏على قبرك نسيت الناس حاقدها وحانيها
‏-خالد العتيبي

صبحكم الله بالخير

للعيون أهداف لاشدّ الكلام رحاله
وللطموح مْن المعارك بالفتى ماريّة

والقصيد أحيان حالة بس ماهو حالة
جوفنا في كلّ حال أحوالها شعريّة

سيّدي سلمان في كل الامور لحاله
والله ان العز في وجهه وفي طاريّه

العمر لو ينهدي كل العمار فدا له
والغلا لو ينوصف ماتمّ في ألفيّة

عنده الكفّين لاشدّ اللزوم وجاء له
كف من سوطٍ عذاب وكفّ من حنيّة

يرجح الميزان من رايه وطيب أفعاله
والمصاعب ماتنوخ الا لحاكم زيّه

هدّ صقر اسمه محمّد من حرار عياله
السماء من حنكته تمطر بـ يالله حيّه

كل ماقلنا ولي العهد تنبت طالة
والله ان كفه حصاد ونظرته وسميّة

من كثر مايعشق أرضه بالثرى وجباله
حط من لون الخزامى لون للزوليّة

كل حاكم لاوقف لازم يحط رسالة
والرسايل ماهي بدايم تجي خطيّة

وين نلقى له مثيل بهمتّه وآماله
ووين نلقى له شبه بالكورة الارضيّة

ازدهر بالشرق الاوسط تحت فيّ ظلاله
وعن لواهيب المعارك حطّهم في فيّه

لاشْرحت ذا لاين مْن اللي يدور بباله
فاحت الامجاد بين نيوم والقديّة

ماكترث لو حاربوه مْن العموم حثالة
ولا بلش بالغرب هو وابواقه المشريّة

في جبال طويق شبّه بالعزوم رجاله
وجاوبوه بعزمهم في كلّ وقفة حيّة

وسيّدي فيصل ابن نواف زبن الطاله
في ذراه نشوف نهضة جوفنا محميّة

شاهده كفاءة انفاقه وطيب اعماله
تحكي انجازاته المسموعة المرئية

ونائبه متعب ابن مشعل وحيّ خصاله
ماوقف للهيّه الا انه نطيح الهيّه

فيك يالجوف الهبايب تنثني مختالة
ليه أحس ان النسايم داخلك منقيّة

مادخل حدّك حزين الا وعوّد داله
بين زيتونك وخفّ نفوسك الجوفيّه

رفرفي بالراية الخضراء بعزّ وطالة
الفخر يكبر لاشاف الراية سعوديّة
- أيمن الرويلي

أرتاحي .. وخليني أخدمك تكفين
يكفيك من عمر الشقا اللي خذيتي

‏زال اني أشم الهواء .. لاتضيقين
أنا معك .. وانتي على مانويتي

‏شوفيني بـ عينك مثل ما تمنين
و أرهن لك الدنيا على باب بيتي

‏أجي عشانك كحل عين وعجب عين
و أرضى على عدواني .. ليا رضيتي

‏انا الجموع اللي من يسار ويمين
وانا العزاااااوي كلها .. لا أعتزيتي

‏أكسر لك الظرف القوي كسر روتين
وامشي على مشهاك في ما اشتهيتي

‏مخاوفي .. ماعادت اللي تعرفين .!
تغيرت .. وأنــا مثــل ماهقيــتي .!

‏مريت في صدمه وذقت الأمرين
بس أحتقر شكواي لا من شكيتي

‏الموت عندي والحياة .. متساوين
إلا .. لا رحتي في عيوني وجيتي

‏اخاف اموت .. وتفقديني وتبكين
وما أحدٍ يضمك عقبي .. ليا بكيتي

‏واخاف .. من موعد علاجك تسجين
وما احدٍ يجيبْ لْك الدواء لا نسيتي

‏واخاف.. لا منك بغيتي تقومين
ما احدٍ يفز ويسندك لا ارتكيتي

‏واخاف .. لا منك بغيتي تنامين
ما احدٍ يمد لْحافك ليا استويتي

‏واخاف .. لا نمتي قبل ما تصلين
ما أحدٍ يجي ويقول يُمه صحيتي ؟!

‏واخاف .ما احد يْقول لك يوم تدعين
أبـشـرك ... زانت بعـد ما دعيتي !

‏واخاف .. لا جلستي وخاطرك شين
ما احد يعرف من نظرتك وش بغيتي؟

‏واخاف .. لا قلتي ما ابي الاكل هالحين
ما احد يحلف ما يأكل ان ما كليتي

‏واخاف.. لا منك طلعتي تقضين
ما احدٍ يقف ويحاسب اللي شريتي

‏واخاااف وااجد وااااجد انك تروحين
ياويلي أن رحتي .. ولا عاااااد جيتي
- ميلاف

تباطيت الفجر، وأنا عيوني تنتظر وش جاب
‏كأن أنظارها في رملة الشبّاك منصوبة

‏مضى عنّه شهر، خافه تهانى للغياب وْغابّ؟
‏أو انّه بين طيَّات الليالي ضيّع دْروبه

‏أعامل غرفتي كنّ الزوايا غرفة إستجواب
‏أجيها "مرتبك" وأروح والأنفاس مسلوبة

‏وراح البال يستطرد ظماه، وفالسراب تْراب
‏أخاف اللي أمرّه من مشاوير الفكِر : حوَبة

‏أكيد أن المسا ما هو بـ يفتح -للسهارى- باب
‏إذا ما طارت طْيور الفجر في صوت رعبوبة

‏يحسْبون أن زراقك لا تغيَّب فصّ ملح وذاب
‏لكنْك الموج، والربّان، وأنت البحر، وعْيوبه

‏ورى عذب الكلام، وعشرةٍ ما خانها الطلَّاب
‏فناجيل الظروف اللي ورى مسراك؛ مشروبة

‏ركزت الرمح في ملقى الجموع وجيت ضرس وناب
‏أخيْط القوم، وأساوي براس الرجَل : عرقوبه

‏يوم أنّه عنتَرة شاف لْثغرها في السيوف أسباب !
‏أشوفك من ورى غْبار الخيول تْقول: روفوا به

‏فداك الصبح، وأحلام الصغار، وضحكة الأصحاب
‏وبيضان القلوب ــ ولابس النيِّات مقلوبة

‏فداك الشك لا صاروا لي أخوان السنين : أغراب
‏وراحوا، كل قلبٍ يحرق اللحظات بأسلوبه

‏نسى الله من نسى وجهك ليا ضرَّ المغيب أحباب
‏وراحوا كل قلب يْراجع اللي فات من صوبه

‏تعدّ الجرح؟ في صدري معك مساحة إستقطاب
‏تحاليت الجروح، وكل حاجة منْك مرغوبة

‏أجاهر بك، لأنّك ما أنت ذنبٍ يرهق اللي تاب
‏أنا عبدٍ يخاف الله، ولا قد جاهر ذْنوبه

‏أنا عبدٍ لقى فـ قلبك -سكينة- كنّها المحراب
‏وكبّر به قبل يذنب، وسلّم معلن التوبة

‏لقيتك وأنت غايب في الوجيه العابرة تنساب
‏يورَّى أن كل جلد يشيل منّك من ورى ثوبه

‏لقيتك في الدروب وفي الصور والصوت والرحِّاب
‏ودوبه في مواويل اللحون، وفي الشِعر دوبه

‏لقيتك في قصيدة لـ "المحيـّا" والعيون غْياب
‏"تعدّوا ينشدون الصبح عن رمشك وضاعوا به"

‏معْ انّ الذكريات وناسها ما هم بـ عِتق رْقاب
‏سجينة بالي اللي ما تملّ يْدينه جْيوبه

‏أحسْب أن السنين أن طوُّلت تستاذن الغيِّاب
‏وتبدا تمحي آثار السوالف، نوبه، ونوبه

‏وعرفت أن الزمن ما يستحي، وأن الأمل كذّاب
‏إذا ما هان "جرح" الآدمي ما هان "محبوبه"
- صالح بن حمد

أجاهر بك، لأنّك ما أنت ذنبٍ يرهق اللي تاب
‏أنا عبدٍ يخاف الله، ولا قد جاهر ذْنوبه

‏أنا عبدٍ لقى فـ قلبك -سكينة- كنّها المحراب
‏وكبّر به قبل يذنب، وسلّم معلن التوبة

اللهم صلِّ وسلم وبارك على نبينا محمد