أرتاحي .. وخليني أخدمك تكفين
يكفيك من عمر الشقا اللي خذيتي

‏زال اني أشم الهواء .. لاتضيقين
أنا معك .. وانتي على مانويتي

‏شوفيني بـ عينك مثل ما تمنين
و أرهن لك الدنيا على باب بيتي

‏أجي عشانك كحل عين وعجب عين
و أرضى على عدواني .. ليا رضيتي

‏انا الجموع اللي من يسار ويمين
وانا العزاااااوي كلها .. لا أعتزيتي

‏أكسر لك الظرف القوي كسر روتين
وامشي على مشهاك في ما اشتهيتي

‏مخاوفي .. ماعادت اللي تعرفين .!
تغيرت .. وأنــا مثــل ماهقيــتي .!

‏مريت في صدمه وذقت الأمرين
بس أحتقر شكواي لا من شكيتي

‏الموت عندي والحياة .. متساوين
إلا .. لا رحتي في عيوني وجيتي

‏اخاف اموت .. وتفقديني وتبكين
وما أحدٍ يضمك عقبي .. ليا بكيتي

‏واخاف .. من موعد علاجك تسجين
وما احدٍ يجيبْ لْك الدواء لا نسيتي

‏واخاف.. لا منك بغيتي تقومين
ما احدٍ يفز ويسندك لا ارتكيتي

‏واخاف .. لا منك بغيتي تنامين
ما احدٍ يمد لْحافك ليا استويتي

‏واخاف .. لا نمتي قبل ما تصلين
ما أحدٍ يجي ويقول يُمه صحيتي ؟!

‏واخاف .ما احد يْقول لك يوم تدعين
أبـشـرك ... زانت بعـد ما دعيتي !

‏واخاف .. لا جلستي وخاطرك شين
ما احد يعرف من نظرتك وش بغيتي؟

‏واخاف .. لا قلتي ما ابي الاكل هالحين
ما احد يحلف ما يأكل ان ما كليتي

‏واخاف.. لا منك طلعتي تقضين
ما احدٍ يقف ويحاسب اللي شريتي

‏واخاااف وااجد وااااجد انك تروحين
ياويلي أن رحتي .. ولا عاااااد جيتي
- ميلاف

تباطيت الفجر، وأنا عيوني تنتظر وش جاب
‏كأن أنظارها في رملة الشبّاك منصوبة

‏مضى عنّه شهر، خافه تهانى للغياب وْغابّ؟
‏أو انّه بين طيَّات الليالي ضيّع دْروبه

‏أعامل غرفتي كنّ الزوايا غرفة إستجواب
‏أجيها "مرتبك" وأروح والأنفاس مسلوبة

‏وراح البال يستطرد ظماه، وفالسراب تْراب
‏أخاف اللي أمرّه من مشاوير الفكِر : حوَبة

‏أكيد أن المسا ما هو بـ يفتح -للسهارى- باب
‏إذا ما طارت طْيور الفجر في صوت رعبوبة

‏يحسْبون أن زراقك لا تغيَّب فصّ ملح وذاب
‏لكنْك الموج، والربّان، وأنت البحر، وعْيوبه

‏ورى عذب الكلام، وعشرةٍ ما خانها الطلَّاب
‏فناجيل الظروف اللي ورى مسراك؛ مشروبة

‏ركزت الرمح في ملقى الجموع وجيت ضرس وناب
‏أخيْط القوم، وأساوي براس الرجَل : عرقوبه

‏يوم أنّه عنتَرة شاف لْثغرها في السيوف أسباب !
‏أشوفك من ورى غْبار الخيول تْقول: روفوا به

‏فداك الصبح، وأحلام الصغار، وضحكة الأصحاب
‏وبيضان القلوب ــ ولابس النيِّات مقلوبة

‏فداك الشك لا صاروا لي أخوان السنين : أغراب
‏وراحوا، كل قلبٍ يحرق اللحظات بأسلوبه

‏نسى الله من نسى وجهك ليا ضرَّ المغيب أحباب
‏وراحوا كل قلب يْراجع اللي فات من صوبه

‏تعدّ الجرح؟ في صدري معك مساحة إستقطاب
‏تحاليت الجروح، وكل حاجة منْك مرغوبة

‏أجاهر بك، لأنّك ما أنت ذنبٍ يرهق اللي تاب
‏أنا عبدٍ يخاف الله، ولا قد جاهر ذْنوبه

‏أنا عبدٍ لقى فـ قلبك -سكينة- كنّها المحراب
‏وكبّر به قبل يذنب، وسلّم معلن التوبة

‏لقيتك وأنت غايب في الوجيه العابرة تنساب
‏يورَّى أن كل جلد يشيل منّك من ورى ثوبه

‏لقيتك في الدروب وفي الصور والصوت والرحِّاب
‏ودوبه في مواويل اللحون، وفي الشِعر دوبه

‏لقيتك في قصيدة لـ "المحيـّا" والعيون غْياب
‏"تعدّوا ينشدون الصبح عن رمشك وضاعوا به"

‏معْ انّ الذكريات وناسها ما هم بـ عِتق رْقاب
‏سجينة بالي اللي ما تملّ يْدينه جْيوبه

‏أحسْب أن السنين أن طوُّلت تستاذن الغيِّاب
‏وتبدا تمحي آثار السوالف، نوبه، ونوبه

‏وعرفت أن الزمن ما يستحي، وأن الأمل كذّاب
‏إذا ما هان "جرح" الآدمي ما هان "محبوبه"
- صالح بن حمد

أجاهر بك، لأنّك ما أنت ذنبٍ يرهق اللي تاب
‏أنا عبدٍ يخاف الله، ولا قد جاهر ذْنوبه

‏أنا عبدٍ لقى فـ قلبك -سكينة- كنّها المحراب
‏وكبّر به قبل يذنب، وسلّم معلن التوبة

اللهم صلِّ وسلم وبارك على نبينا محمد

صبحكم الله بالخير

لا تعذليني يوم أجرّ الصوت في راس الطويل
‏الليل توّه ماسرى والشمس بكره باديه

‏أنا حياتي ما بقى منها كثير ولا قليل
‏غير القصيد اللي كتبته في مرابي ناديه

‏بنتٍ تثنّى في ضواحي نجد وتفلّ الجديل
‏جيت أتداعى في مرابيها وروحي غاديه

‏واللي ورى صدري على الميعاد مايبغى دليل
‏قلب بدويٍ ما رعت به غير بنت الباديه

‏مانيب مستغرب يزلّ العمر ويخفّ الثقيل
‏الوقت حادي وأغلب العالم معه متحاديه

‏أغيب وإن شفت البروق تلوح فالطرف الكحيل!
‏أرجع على صوت العزاوي فوق ظهر العاديه

‏بين الطواري والقصيد العذب والبيت الجزيل
‏أنا أحترق من داخلي والناس حولي هاديه

‏مانيب مثلك كل ماغنّيت.. يالغصن الظليل
‏تومي بك الأنسام وتغني عليك الشاديه

‏أنا سحابٍ حنّت رعوده وحوّل فالمسيل
‏لعيون من تمشي تحت وبله وهي متهاديه
- مشاري محمد

مد صوتك يا أوّل الأحباب قبل أسريك كلي
‏ واسترد العارض المنشود لين أسرق جفافه

‏يا حبيبي كل ما اشتدّ السحاب، وسال، قلي
‏ من تحب عيونك من الناس وإلا من تعافه

‏أتمنى طلّتك، صوتك وش أحدد، وأخلي
‏الجفاف يحدّني.. والبيد زادتني صلافة

‏إن عذرت الطاري المرّار في طيّة سجلي
‏ما عذرت عيونك النجلاء على قل الكلافة

‏أتماهى مع ديارك.. فيك ترحالي، وحلّي
‏ لين أرجع سيرة العاشق ورى جسر الرصافة

‏في مقامك أنسج الغيمة على الغصن المدلي
‏ قِل لعودك: يأخذ من البارق الوسمي لحافه

‏وأنت وحدك تمنح الأشياء مقامات، وتجلي
‏ما بقى إلا ظاميٍ ما بلّت غيومك ضفافه

‏كيف عينك تقتل الرجال، ورموشك تصلي
‏ليش صوتك يجرح الأيام وأحبه، وأخافه

‏الهوى دربه طويل وحرّ شمسك جايزٍ لي
وأنت أرقّ احساس من ريح الصبا واعذب مسافه

إن قدرت اكسر جناب العطف في لحظه تغلّي
نازعتني دون كفّ الصفح لحظات ارتجافه

‏شِرَّد الأحزان..مابعد السكوت إلا التخلي
لاتقصّر في حقوق الولف وتزيد الحسافه

لك علي اوقف الدنيا وانا جالس محلّي
شاعرك لو شابت ايامه معك ما شاب قافه
- محمد السلطان

ولهت لك واشتقت واجد وحنّيت...
‏...و اقرب" سعادة في عيوني " بعيدة !

‏لو قلت احبك في أي جملة و صدّيت
‏... من طيبتي بتصير جملة مفيدة !

‏اعتبري انك " بيت " دايم وانا " بيت "
‏... يمكن يجمّعنا القدر في قصيدة
- تركي بن مطر

وش ينسّيني عبق ماضي لياليك المليحه
‏مستحيل أنسى ، لو النسيان للإنسان عاده
‏- فهد العيبان

مساكم الله بالخير

جادك الغيث يا دارٍ ربا فيك خلّي
‏كثر مَـ افشيت سرّك لـ الهبايب ، وابحته

‏رحت كلّك بلا رجعه ، وانا رحت كلّي
‏يمكن الموت لوْ قدمي يعرّض نطحته

‏عايشٍ في رجا وصلٍ ماهو حاصلٍ لي
‏مابقى باب ما طقّيته ، ولا فتحته

‏الغلا بيننا ماهوب حاجة تغلّي
‏كم خطا من قبل لا تعتذر لي دمحته

‏الأكيد انّي كنت اشعر بـ رفض ، وتخلّي
‏من كِذا رحت عنْك ، وموقفي ما شرحته

‏ليت لي حيلةٍ واحتال في طيفك اللي
‏وين ما لدّت عْيوني بـ دربي لمحته

‏ودّي انساك .. بس شلون ابنساك قلّي
‏وانت من وين مايونس خفوقي جرحته

‏هاك قلبي تقاضى منّه .. ولا تخلّي
‏حاجةٍ في ضميرك باقيه لو ذبحته

‏لا تحنّه ، ولا تاويه واخذه تسلّي
‏اضرم النار في جوفه ، وفوقه ، وتحته

‏انت لـ اشفيت غلّك كنّك اشفيت غلّي
‏استبيح الخفوق ، وعاذرك لـ استبحته
- فهد العيبان

تحديث جديد ♥️

السلام عليكم ورحمة الله
لكثره الطلب وبعد تفكير طويل فتحت الباب لكتابه الأبيات، وفقنا الله واياكم♥️
لطلبات الكتابه بمقابل مادي التواصل خاص @maha031

لمن يسأل عن قصائدي؛ كل ماهو مذيّل بإسم مها من كتابتي، بالإضافه لقناتي عبر التلقرام:

https://t.me/maha035

صبحكم الله بالخير

اللهم صلِّ وسلم وبارك على نبينا محمد

‏الليلة البال ماهو صوب ذات الخمار
‏ما كن لليل هذا في الليالي شبيه

‏ما للمواعيد يا شوق البشاير نهار
‏الصبح ماهو بعيد إلاّ على محتريه

‏خمريّة القّد صبّت لي من الغي نار
‏ومدّت لها كاس ما ذاق الكرى مشتهيه

‏كل أمنيات الهوى في قائمة الأنتظار
‏كم قلت : لا للهيام وقالت النفس : ليه ؟

‏مشاهي النفس جمّه والأماني كثار
‏النفس لو خيّروها كل شيٍ تبيه

‏غياهب التيه شتّى والحياة اختبار
‏من شِعلته نور عن درب الهُدى ما يتيه

‏بئساً للأشعار والأضواء وللأنتشار
‏ان كان مالي قصيدة في المقام النزيه

‏ما في محبتكْ يا أم المؤمنين إختيار
‏محبتك فطرة القلب السليم النبيه

‏يا أطهر نساء الأرض ما ضاهى وقارك وقار
‏الخاسر اللي طعن في عرضك وخاض فيه

‏في سورة النور جاك من السماء الإنتصار
‏من واحدٍ كل خلقه بالعفو ترتجيه

‏يا زوجة أشرف عباد الله زهاك الفخار
‏أنتِ الحبيبة وبنت أحبّ صحبه إليه

‏العمر رحلة قصيرة والليالي قصار
‏ما للبنادم حصاد إلا غرايس يديه

‏عسى شفاعة رسول الله لا سِدل الستار
‏ تشملني ان كان مالي وجه بين الوجيه
‏
‏المسلم يذود عن عرض الحبيب ويغار
‏طوبى لمن في الدجى صلّى وسلّم عليه
- سعود مهدي