-تجديد عهد-

وانا اللي كل ماشيّدت للنسيان دونك ســور
‏جرى في خافقي سيل الحنين الجارف وهدّه
‏
‏عساك الحِّل ياحلم الوصال وموعدٍ مهجور
‏تلاشى كنّــه أصحاب الرخـا في حزّة الشِـدّة
- محمد العايد

بين الكثير مْن التساؤل، والقليل مْن اليقين
‏المشكلة؛ ماني بـ أعرف المشكلة، وأحلّها

‏أنا تعبت مْن الوصل والبعد والناس أجمعين
‏وقلوب تبغيني.. وأنا، ما عاد أبيها كلها
- صالح بن حمد

كلّما هبّت رياحه قلت يا عودي تثنّى
كلّ نسناسٍ يجيبه لي يحقّ لْه المروفه

هذا انا لجل اللقى قمت آتزين وآتحنّى
وارسم الكحل فـْ عيوني لجله بروحٍ شغوفه

آتأخّر عن وعَدنا لا بغيت انْه يْتعنّى
وآتحلوى موعدٍ بالعمر مايقدر يطوفه

فرصةٍ وياه ما يرضا لو انها تضيع منّا
جعلني فدوتْه لا طوّل على بابي وقوفه :(

يوم طاحت عيني بعينه ضحك ضحكة معنّى
وشافني من عين قلبه مثلما عيني تشوفه

أرسم فـ يدّه قلوب الحُبّ احسّ انْها وطنّا
ذا حبيبٍ تُرسم الأحلام من راحة كفوفه

ان سِكتّ ابدى مشاريهه وعيّا لا يْتهنّى
وان سمع حسّي نِده والشوق يتلاعب بـ جوفه:

(دندني يا قبلة اشواقي وغنّي ما تغنّى
واطربي مادامك انتي بسّ فالقلب مْحيوفه

قلبي اللي تملكينه حالف اليوم يتجنّى
يدري انك سابيه عقلي بنظراتٍ عطوفه)

والله اني قلت له: (يا فدوة عيوني تأنّى)
خايفه من كثر حبّه لي تغشّاه الحسوفه

قال: (انا ما اندم على حبّي لو العالم فتنّا
الأكيد اني بحبّك وألعن الحب وظروفه)

وكلّما هبّت رياحه قلت يا قلبي تمنّى
ويتمنّى -كل مرّه- لو تمرّ احدى طيوفه

تمر البال يا زهر الصباء معْ غاديات النود
‏ حديث أحلامنا يصعب على الملهوف نسيانه

‏معك ذقت الأمان ومعك أحس إني بدون قُيود
‏ أنا قلبي أمانة في يدك و يشوفك آمانه

‏يا كم عاشق تهاوى في بلاطك يالعيون السود
‏ يجاهد فيك نفسه والعيون السود فتانة

‏عيونك غير يا ذات الدلال المترف من الخود
‏ من عيونك غديت أوّل سجين يحَب سجّانه

‏على طارف لسان متيمّك كان الكلام وُرود
‏( أحبك : نرجسّية } وأقطتفتيها من لسانه

‏تباهي في ذراي ولك يلين الخاطر الجلمود
‏ جعل قلبٍ يوريك القسى ما يقبل إحسانه

‏ملك دنياه من يملك هواك وحلمه المنشود
‏يا كم سلطان رحتي من يديه و زال سلطانه

‏أعرف إنك بحر واللي نجاء من غبّته مولود
‏ من يخاف البحر ما يستحق يفوز بالدانة

‏كثير من البنات الفاتنات مهفهفات قدود
‏ عطاك اللّٰه قوامٍ ما عطاه لكل ريّانة

‏على ذاك النحر ما خيّم إلا الفاحم المفرود
‏ وعقد الماس ، وأحداق الفتى ، وآهات حرمانه

‏ذهاب العقل سلسالٍ غدى حول الخصر معقود
‏ يا غصنٍ كيف ما سال الذهب ما بين رمّانه ؟

‏لي الأغصان مالت وأنثنى لي كل ليّن عود
‏سعادة عاشقك لامن تهاديتي على أحضانه

‏وش اللي تطلبين مْن الزمن والله عطاك سعود !
‏حبيبك يا كثر من يقلب الدنيا علشانه
‏- سعود مهدي

جميلة جدًا

اللهم صلِّ وسلم وبارك على نبينا محمد

مساكم الله بالخير

يا ليت الزمان يعود بي لاول المشوار
‏قبل . . لا تقص أحداث الأيام تذكرتي

‏وتاخذني الدنيا ، عن الدار وأهل الدار
‏غريبٍ يضج بـ غصّتي همس حنجرتي

‏شعوري شعور التايه المرغم المنهار
‏آعرف آوّلي .. لكنّي آجهل وش آخرتي

‏أنا اللي بعد زود الغلا .. والسلام الحار
‏تنازلت .. لـ عيون المها ، عن مكابرتي

‏يابنت المطر مالك مصدٍ عن الامطار
‏من الغيم . . ولا من نسيمه تعطّرتي

‏عرفتك وانا نفسي صبوره على الاقدار
‏قبل تختبر . . صكات الاقدار مقدرتي

‏ماعاد آعرف من كثر ماني معك محتار
‏تغيّرت انا . . ولا أنتي ، اللي تغيرتي

‏يا شين الخطايا يوم تكبر مع الاعذار
‏تروحين كنك مخطية . . ما تعذّرتي

‏كلام العيون . . يبرر الواقع اللي صار
‏عطاك الزمن عدة خيارات واخترتي

‏ورحتي وأنا من يوم رحتي غريب أطوار
‏من الضيق صرت آدور في نفس دايرتي

‏يا ليت الكلام اللي حبسته ورى الاسوار
‏مجرد " رسايل عالقة " في .. مذكرتي

‏على كثر ما كانت . . ليال الوصال قصار
‏على كثر ، ما كانت " طويلة " بـ ذاكرتي
- عبدالله السراهيد

وَضَّاح يا بَرْق الجبيْن، ومسارِيْه
‏لولا حقوقك؛ ما عرَفت المحبَّة

‏العِلْم علْمك قبل كلَّ المشاريه
‏طالبك لا مات الحطب لا تشبَّه!

‏عن مبسمٍ ما جاذبتْني حراوِيْه
‏ما خاف في كلّ المعاذيْر.. رَبَّه

‏ما جِيْت أدوَّر غربةٍ كلَّها تِيْه
‏جِيْت أرتمي بيْن النهار، ومصبَّه!

‏وجهٍ تمادى في مشاوِيري، أبيْه
‏لا زلت رغم صدوف الأيَّام؛ أحبَّه

- محمد السلطان

صبحكم الله بالخير

‏أتساقى شرهة الأيام وأمد اعتذاري
‏كلما جف الكلام احتجت للروح القديمة

‏آه يا ملح السنين إن ضاع في ضحكتك ثاري؟
‏الحقايق مدلهمة شور والفرقى مقيمة

‏جيتني ما كنك إلَّا من حقوق الغيم ساري
‏واستعضت عن القصور الشامخة في ظلّ خيمة

‏ما جهلت إحساسك المرتاب لا زل اختياري
‏مرت فصول السنة والنار تأكل من هشيمه

‏ياحبيبي وانت عارف قدري ، وخابر وقاري
‏لاتحد اللي زرع لك ورد ، واستسقاك غيمة

‏فاتح لك كلما هب الهوى الغربي زراري
‏والله إني لو معه عطرِك؟ تعلّقت بـ نسیمه

‏السماء مشهد وداع، وريبة شعورك غداري
‏ورغم هذا خازن لـ [ عيونك الثنتين] قيمة

‏كيف أحبك ؟ وأنت مستسهل غيابي وانتظاري
‏كيف أعافك ؟ والهوى غلاب، وعيونك غنيمة

‏طل صبحك نوق بدو ] خيطت ثوب الصحاري
‏وجيت أدفّ الخوف وأذبّ لمساعيك الخريمة

‏لا تحاول.. والحبايب غافلة، والشك طاري
‏المحبة ما لها تالي... وشرهتها ظليمة

‏أعرف الرأي العقيم ولا تخيرتك مساري
‏الليالي لو نعرف [ظنونها] تبقى عقيمة

‏وأنت وحدك تستفز الصمت وترد الطواري
‏ما قدرت ألد لك تقدير .. وإلا أصد شيمة

‏نجمةٍ مرت تهادى بين شكي، واقتداري
‏استباحت كل شيء "وكل طقه بـ تعليمه "

‏جعلني لا ضاعت أحلامي وسيرتك قراري
‏ما تخيب هقوة عيون بعد فقدك: يتيمة

‏ولا تنشد عن هزائم وقفتي وإلَّا انتصاري
‏الجروح اللي على خبرك على خبرك قديمة

‏هات لي عمر انتظاراتي، وشعري، واعتباري
‏والحقيقة لو عواقبها - على روحي - وخيمة

‏كل درب ما يجيب عيونك النجل اضطراري
‏والدروب اللي تجيبك يا آخر أحبابي كريمة

‏كم مضى لي بين أداري جرحك الأول، وأداري:
‏قلب إن ضاع الكلام اشتدّ لك: شعر، وعزيمة

‏ما علي من الجفاف إن طالت يدينه دياري
‏وين ما لديت أشوفك نوض برق، ووبل غيمة.
- محمد السلطان

"جعلني لا ضاعت أحلامي وسيرتك قراري
‏ما تخيّب هقوة عيونٍ بعد فقدك: يتيمة"

سكان صدري جلو من سور صدري بعيد
‏ولا عاد يسكنه غير الصمت من حينها

‏أستغفرالله باقيٍ فيه ساعي بريد
‏عنده رسايل عتب ضاعت عناوينها

‏ينشد من اللي عليها مفردات القصيد
‏قصيدة العمر فكرتها وتلحينها

‏اللي هي آخر مواطن والوريث الوحيد
‏لـ أحلامي اللي نسى الرسام تلوينها

‏مدري وش أقول يالساعي لكن الأكيد
‏عصفورة الصدر ملّت من بساتينها

‏أستاذنتني قبل مدة بقلبٍ بليد
‏قلت أنتقي في الدروب اللي تحبينها

‏وراحت على نفس ذاك الدرب مابه جديد
‏بس الجديد أنها أقفت ما بكت عينها

‏لا همني كون اوادعها وداعٍ مجيد
‏ينصف غلاها وينصف عشرة سنينها

‏مشهد حياتي وداعٍ لا انتهيته يعيد
‏نفسي قدرها كذا جعل الله يعينها

‏جعل الظروف الثقيله والزمان العنيد
‏يكتب لها صبرها باقي موازينها

‏عشت العمر كني العامل بسكة حديد
‏من قلت جاني نشدني: (رحلتي وينها؟)

‏تعبت أوجّه زحام الراحلين الشديد
‏الناس مدري وش اللي بيني وبينها !
‏- عبدالله ال لزيوح

جميله جدًا

مابين ذنب الجواب وبين حِل السؤال
‏البدو بانوا بوضحٍ في طرفها شعلا

‏علمي بها يوم واروها قريب الزوال
‏في ساعةٍ لبست الديرة ثياب الخلاء

‏و إن قدت الريح من صدري وإذا الليل طال
‏ياناعس الطرف ما للنوم طاري ولا

‏به من يعوض مدى عينك ظِلال وضلال
‏شاعرك كل ما شعبتِ ركب دمعك جلا

‏كل عام وأنتِ مقام الروح و أسمى مقال
‏لو كنتِ أجفل غريزة من ظبي الفلا

‏حتى لو إنك نزحتي من ضلوع الشمال
‏«ماودعك من يضم الحرف وما قلى»

‏كم سجدةٍ في مضارب ضحكتك لاتزال
‏تكرر الروح وتسبح لوجهك ولاء

‏ما تشرق الشمس ،ويكون الزوال احتمال
‏من شرف الرجم حن مع الغياب و تلا

‏ياسدرةٍ في ثرى الممكن و بعد المحال
‏الشعر وهبة وقديس المحابر غلا

‏ماقلَّت النود من دارك وحي و ابتهال
‏إلا استوت سيرتك خلف الخفوق وتلى

‏لا الغيم يجهل مدى روحي خِيال وخَيال
‏ولا الأرض طينيتي ولا النجم و إن علا

‏زل الكلام وتمادى الصمت صمت الليال
‏ياويل لبيه مما بعد كلمة هلا

‏أنتِ جعلتي من الرجل الكئيب ارتجال
‏و أنا حتويت الجروح وقلت مابي بلاء

‏ماقلت و عيونك الوجهه لويين المآل
‏حتى سبرت الدموع المالحة من إلى

‏وهذا أنا الواقف لحالي و أنا أخو العيال
‏مابين بانت سعاد وبين أبكي على
- شاهر اللغبة

استمتعوا

في اكتشاف شاعر جديد متعه منقطعه النظير

تصدّ القلوب من الغلا والنفوس تملّ
ياهون الجفا لا شافت العين ما تكره

على رمح صوتك ماتو المشكله والحلّ
سراب الدروب أصدق من الحرف والنظره

أحبك طواري بس ماعاد احبك خلّ
ولا زلت احب العذر بشفاك وانتظره

على رمشك تسيل المحابر وينبت ظلّ
انا تحته المحتار واللي غريب أمره

تزل ايدي برقمك مثل ما اللسان يزلّ
مع اللي تحده كلمتينٍ على صدره

توريني ابواب المفارق وانا ما ادلّ
مثل من يورونه قبل موتته قبره

تغلى بكيفك لو تصير المحبه غلّ
لكن لا تساوم من يحبك على قدره

تراي الفقير اللي غناته بكلمة ذلّ
تساما وهو لو جاد فيها دفن فقره
- ناصر مناحي