‏أنا كبدي بقاياها رماد و خاطري موسوم
‏بعد ذيك الدموع الشعر وش يكتب على شانه !

‏ياطول الليل كنّ الصبح كسبٍ في يدين القوم
‏نهار الشيخ توخذ حكمته من راس شيطانه

‏لو قيودي حديد اشوى و لكنّ القيود سلوم
‏و مجدٍ ما يطاول طول سقفه غير عمدانه

‏يشاف لحال لو من فوقه نجوم و تحته نجوم
‏فرق عنهم مثل فرق الشعر عن باقي اقرانه

‏خلقنا الله لا نسحب بشوت ولا نشيل ختوم
‏ليا منا سحبنا الحدب شلنا الراس ب امتانه

‏ماعاد البال يدله عن ملامة مكثرين اللوم
‏أنا أول من لقى حريته فقيود سجّانه

‏أعز الحب حبٍ فوقه اسراب العذاب تحوم
‏يردّ القلب مثل الحاكم ليا زال سلطانه

‏يا شوف عيوني أطلال المعاتب دارسات رسوم
‏عليك العين يذكر وسمها و الروح ضميانه

‏ نسيتك ! والله اني عقب ذيك الجمرتين التوم
‏سوات الي على فراش الوفاة و حوله اخوانه

‏يواسونه بقوله طيب و عسى بقاك يدوم
‏و تقول عيونهم ف وداعة الرحمن و امانه

‏يسومون المحبة و انت ساكت ما فرقت السوم
‏حبيبي لا بعدك خيانة ولا قبلك خيانة

‏تواسيني جروحي من يدك لو خنجرك مسموم
‏دخيلك يوم تجرح من جفا ولا من ميانه !

‏غدينا كنك اردى الناس و انا الطرقي المعدوم
‏لو انشدك ارخص الي في يدك ماقلت لي عانه

‏اخذت من الهوى ما ياخذ المعطى من المحروم
‏و عطيت من الهوى ما يعطي الشاعر من احزانه

‏عسى عينٍ تذوّقك المفارق ما تذوق النوم
‏و لا تهنى بشوف إلا تشوف الضيق و اعوانه

‏شرد ذهني و حارت حيلتي و لّا وراي علوم
‏لو اسولف بها شفت الملحّن يلعن آلحانه

‏ورى ناعس هدبك الي من الله كن فيه سهوم
‏ليا اقرى جفنه اعزّ السلام يكبّ حجَانه

‏تناعس له مصابيح السماء قبل النهار يقوم
‏متى ما اذّن و صلّى ليته يصلي من إيمانه

‏ليا اعتقت الحرير و حال دون العسجد المردوم
‏خطير يحوز ظلّك عن هله و يوقّف وزانه

‏احسب اني عليك اجرى من البارق على الديموم
‏يا حيّ الموت و لا الهقوة الي مالها خانة

‏هقيتك كلمةٍ يردع بها الظالم عن المظلوم
‏و أثرك الكلمة الي بين قلب الزور و لسانه

‏عسى ما بيني وبينك ما بين البارحة و اليوم
‏يا لو كنّك حدا قصايدي في هيئة إنسانه

‏نهار اني تمثنيت البحر قدام اعرف آعوم
‏ عشان الي نهار موادعه وادعت نسيانه

‏ماشفت الدانه إلا شفت والله موتي المحتوم
‏أنا ما دامني حيّ الحياة اغلى من الدانه

‏أنا بعدك ما كنّي غير طيرٍ يوم ملّ الحوم
‏على كثر الشجر وقّع على شباك زنزانة
- متعب البقيلي

جميلة جدًا جدًا

آفل النور واجتاح الظلام المدينة
من يرّد النهار اللي خذته الغداري ؟

غروٍ اللّه خلق شمس الضحى في جبينه
من سناء غرّته شفت ل سناها مواري

غصنٍ أثمر بعد ما طاحت أوراق تينه
بعض الاغصان يثمر كل ماكان عاري

من يضم إبتسامات الوجيه الحزينة
للحزن ظلٍ في وجه الحزين متواري

ليه أعاتبكْ يا خلٍ فدى الكل عينه
وأنت صمتك على نجوى معاتبك" ضاري

أترك العذر ماني ناشد العذر وينه
رد ّحتى لو إنك ما ترّد اعتباري

عوّد مثل الأمان وحلّ مثل السكينة
وطيح مثل المطر لا طاح فوق الصحاري

تمسي وعيني الولهى لطيفك رهينة!
ما تصحيك لهفَة ؟ ما يسهرّكْ طاري ؟

ليت قلبك خذا من عودك الغضّ لينه
يا مخليني أشكي غربتي في دياري

وش يكون الحبيب إن كنت ماني ضنينه !
المعاذير ما تخمد لواهيب ناري

أنتشلني من انقاض الألم والغبينة
لا تورّي عيون الشامتين انكساري

قلبي المنفطر ردّه عن الياس ، دينه
سلعةٍ مالقت في سوق الأحباب شاري

كيف أبنساك ! واللهفه بصدري دفينة
من متى كان نسيان الحبيب اختياري !

ودّع الصبر قلب يشتكي لك حنينه
منهك من السْهاد ومن طوال المساري

كنت الوم السحاب ليا جفى ياسمينه
لك الحين أقدم للسحاب اعتذاري

موصد الباب دون الذكريات الحزينة
وش يذريك ؟ لا هبت عليك الطواري

خل كل الهموم اللي بصدرك سجينة
دام محدٍ عن اللي في حناياك داري

ما بقى للرحيل إلا صعود السفينة
ليت الأحلام كانت تستحق انتظاري

- سعود مهدي

"كيف أبنساك ! واللهفه بصدري دفينة
من متى كان نسيان الحبيب اختياري !"

جميله للغايه

بيني وبين الرياض شعور عدّا مداي
يشهده قلبي ويشهد ربّي وربّها

لو تخالفنا المشاعر ما تبدّل غلاي
ديرةٍ ضمّت حبيبي كيف ما احبّها؟

اللهم صلِّ وسلم وبارك على نبينا محمد

-عصيّ الترْك-

ياحبيبي لو وقفت بصفّ الاعدا والخصوم
عادني بحماك ألوذ وعادني بك مستجيره

ادري انك شمت عن حبي تحسْب اني بشوم
كيف اعافك وانت داري يوم ما للناس ديره

والله ان مْحبتي لك عرضها عرض السلوم
ما فرضها الله وَلكنْها فريضه عالعشيرة

يا حبيبي سامح الله قلبك القاسي الرحوم
ما سمح لي آتخطى غلطة الحبّ الكبيرة

مشكلتك انك عصيّ الترْك وجراحك تدوم
ولو تملّلت الوجع؟ يا جعلني للجرح اسيره

انحبس قلبي بدايرة المفارق والهموم
يستخير الله على الفرقى ويرجع يستخيره

كلّ ليلة ارسل الأشواق وآعدّ النجوم
يمكن الشوق يْتعدّاني ويوصل لك أثيره

كنت احبك من وعي وادراك والعقل مْغروم
وقالوا انّ الحب أعمى لو عطاك الله بصيره

يا سليل المجد عذري بالهوى انّك راس قوم
لي خفوقٍ ما لقى مثلك على شبه الجزيره

الشعور اللي تملّكني من اللي به ألوم؟
قلبي المغرم؟ أو انسانٍ مَـ يدرى وش مصيره

ضايقه دنياي فيني والنفَس شبه مْعدوم
يعلم الله مابقى الا الطير اغبطه فـ مطيره

قول -خيره- فالبعاد وفالمجافى عالعموم
بس دخيلك لا تقول ان الفراق آكيد خيره

رديف الشهامه


دامكم عابرين ديار سمح المحيّا
نزلوني بشمّ القاع ، واروي ضماها ..

نفسي اللي مداوي شوقها ما تهيّا
كنها " نجد " لامن كدّر الله سماها

الجسد راح ساري ، مير قلبي هنيّا
طاف كل الديار اللي سكنها وسعاها

هو رديف الشهامه؟ او رديف الحميّا ؟
او شبيه السحاب اللي روى القاع ماها ؟

ما تعرفون كفه يوم ذا الوقت عيّا !
يوم كانت عيون القلب خايب رجاها

ما تعرفون قلبه يوم همي تِفيّا ..
سِدرة ٍ وسط صدري كان قلبي جناها

فَتّح أبواب صدره لي ... و هَلّا وحيّا
ورحت قدام حزني افتخر واتباها

مُذّ توارى وعيني لَمْ ترى قَطُّ .. ضَيّا
لو يشوف الضرير شْموس نجد وضياها

كان حباً بثوب ِ الرشدِ .. ماكان غيّا
كان أُولى الأماني كان لي مـُنتهاها

والله اني لأحبّه حيل .. ما دُمتُ حيّا
لا وأحب امه اللي شالته في حشاها

ولو خَذ الله عيوني عقب سَمح المحيّا
اعصبوها بثوبه ، يشفي الله عماها
- بشاير المقبل

لا تنسون بشاير من صالح دعواتكم :(

اللهم صلِّ وسلم وبارك على نبينا محمد

تنتهي كل النقاشات يا الفكر العقيم
بـ ابتسامة عفو ماهي نفاق ولا ريا

والله ان القلب باقي على العهد القديم
من وفاه .. يحسب كل المخاليق أوفيا

قد خذيت من الليالي جروحٍ فالصميم
كثر مااخذت من يديني حبايب واخويا

آتغافل بعض الاحيان عن هرج الغشيم
وأستحي .. لو أكثر الناس مافيها حيا
- نايف السراهيد

أنا ذاك الغريب اللي عن أوطانه تناحى غرب
وأنا ذاك الوحيد اللي من الوحدة فقد صبره

أحب العشب و الشمس و خرير الماء و أحب الدرب
هذاك اللي -عن أميال الدروب الفارهة- شبره

أمره كل ما تلبس لي الدنيا قناع الكرب
ويصغر كل همٍّ كان قبل أجيه يا كبره

بيوته شاحبة و دروبه مْن تْراب و أهله غرب
مع أنه كان دار اللي ملوك الأرض تعتبره

أحبه من كثر حبي لـ هٰذاك اللطيف الذرب
قسيم الوجه/ملموم المفاتن / هادي النبرة

خذا من الظبي و من الذيب و من الحر و من الخرب
و جا يختال و يخلي ربيبات الترف عِبرة

شربته يوم و أستغنيت عام من الغذا و الشرب
شربته و انجبر كسرٍ هقيت إن الفنا جبره

وتعافيت وتلذذت الحياة ورحت أغني طَرب
أنا اللي تنفد بحور الخليل و لا نفد حبره

آثاري الحب! فالحالين شاعف بُعد ولّا قرب!
وآثاريني على كثر الحبايب ما معي خبرة

يا كنّ ضلوعي أشجار و معاليقي شرايد سِرب
و يا كنّي ملاك أسبح محيط الكون و أعبره

متى؟ وشلون! وأنا كنت أشوف الأرض ساحة حرب
وفيها كل -خطوة للبنادم- خطوة لقبره!
- سلطان الحوالي

اللهم صلِّ وسلم وبارك على نبينا محمد

امسيت وامسى ملْك جلّاي الاحزان
مستبشر(ن) بالخير دقَّه و جلّه

تفرّجت عقب العنااء يا حميدان
تستحكم الكربات ، والمفرج الله

ما يدرك اللي خاض في ظلم الانسان
ان العدل ماله على الارض ملّه ؟

الله يعز العود و عيال سلمان
ويعز شعب المملكه تحت ظلّه
- فارس السميري

الحمدلله كما ينبغي لجلال وجهه وعظيم سلطانه

نضحك للاطلال ما ناقف .. و تحكيْ الرواه
الشمس ما نية الغربال بشروقها !!

جدد وسوم الركايب سيدي واحتماه
يوم البنادق "صليل" النار بحلوقها

محمد اللي ولى عهد البلاد وحباه
وشيمة مسح خدها و عفة كحل موقها

راد الشباب ورقى طويق وتعلا حجاه
وشيد مُدن في قْفَرْ ماداج مخلوقهاا

وزاد اقتصاد ونهض بأمة وقدى دهاه
واللي شرى سهمها باسمه ربح سوقها

يا سدرة المجد ملهمنا بلغ منتهاه
والأرض تحت السماء و أحلامنا فوقها

والروض في راية الـتوحيد واحد مداه
إن ادبكت خيلها وان زرفلت نوقها
- شاهر اللغبة