يوم أخذك اليوم الأسود من يدين البياض
كان لليل التفاته و للقمرى شهيق

من يقول إنك رحلتي و أنا خالي وفاض
والطعون أكثر زهابي و سكينك رفيق

أذكر إنه لاح برقك شمال من الرياض
والظمأ يشعب ركابي من الفج العميق

بدويٍ خال روحه ورا روحك وفاض
سيل من وادي حنيفه وسيل من الحريق

لا تقولين لقصيدي عن عيوني تغاض
والشعر عبدٍ ورا الصدر و شعوري طليق

إن مسكت النود و أرسلت ظامية الحياض
زرفلت في شاسع الصدر كلمة ماتليق

تاه حرفي في مهامهك و إيدك من فياض
علميني كيف أدلك على "البيت" العتيق

مرخصٍ وجه البدايد حميا و اعتراض
زال وجهك قِبلة الحرف و إحساسي رقيق

ياحقيقة ماضي العمر والعمر افتراض
ليه وأنتِ عيونك وساع،عين الماء تضيق

ما الشهيد اللي خذا الموج يوم الموت ناض
الشهيد اللي على الأرض لكنه غريق
- شاهر اللغبة

تذكرني قفله قصيدة شاهر بقصيدة لراكان يقول في قفلتها:
" من البحر دايم ينجون الغريق
المشكله باللي على الأرض وغرق"

يادار اخو روضه وسيف العز ماهو فالغماد
‏لا بارك الله في سيوفٍ دون حدك ماتسَل

‏انتي بلاد الكلّ ، ولّا الكلّ يعتبرك بلاد
‏ولّا ملاذ اللي يدلّ الدرب ، و اللي ما يدلّ

‏قلبٍ يوقف لك غلا بين التطرّف و الحياد
‏مهما لقى الدنيا و اهلها مشكلة ، يلقاك حلّ 🇶🇦🇸🇦
- محمد بن ماجد

ماهو غريب إن سهرت الليل وحداني
كل الليالي بلا خلان ساهرها
رح خلني عايش في غربة أوطاني
أجمع بقاياي قبل الصبح وانثرها
مابين صبري على ياسي وحرماني
ومابين الأيام ماضيها وحاضرها
أنسى إني إللي يشيل الجرح ويعاني
وارجع لذيك الليالي وأتذكرها
كم جابني درب ولا كم وداني
على طعون المواليف وخناجرها
-مشعان البراق

مرحبا

من الأطلال وش بقّى الزمان إلا رميم أطلال
قِفِي نَبْكِ على موت الشعور ووحشة أوراقه

يا بنت البال لا مالت غصون الصّبر من مثقال
سرابٍ مر بأطراف الحديث وسيّل أحداقه

تعالي من مداهيل البروق ثعول واسترسال
أنا أعدّك سحابة خير بالأفكار ودّاقة

بعيدة مولدك سبع البحور وسيرتك همّال
ثمينة كنّك يدين الجميل بساعة الفاقة

مدين لكل بيتٍ كان عن شمس الضَلال ظلال
يا لولا الله ثم أنتي طويت البيت و رواقه

أحنّك عن حزن صدري وأمنّي صدرك الآمال
وأحصّل في مدى حرفك دوا قلبي و ترياقه

وأخاف من الحنين اللي يخطّيني وأنا رجّال
وطى قلبه على درب القدى واستدبر أشواقه

كثر ماني طلبت الله يجمّلني حكي وأفعال
نهرت القلب لا يتبع حديث النفس وسياقه

ترى شاعرك لا طاح العتيم من الليال وسال
يصب النور بفجوج الظلام و يطرق آفاقه

يردّد كل ما طالت لياليّه وضاق الحال
"فتحنا للسما باب وخلقنا للفجر طاقة"

واذا يا فاتنة عين القصيد ويا عروس البال
نسى يذكرني التاريخ انا من شقّق أوراقه
- غانم الشراري

جميله جدًا

قبل ثلاث سنوات تقريبًا وفي كلاس مادة محاسبة الضريبة والزكاة تحديدًا وصل لإحدى الطالبات خبر وفاة والدها عبر مكالمه هاتفيه، شهدت موقف حزين جدًا كتبت على إثره هذه الأبيات, دعواتكم لوالدها بالرحمة.

نجم الثريّا

باتصالٍ ما خذا منّي ثواني
خذ نفَس عمري وخلّاني بليّا

انشدوا هاك الملا وشهو قصاني
شيييب عيني يوم توديعه تهيّا

دثّروني واقروا السبع المثاني
قلبي المكلوم تذعره الجفيّا

مسند ذراعي وملجاي وأماني
والذرى اللي فـ كْنفه كنت آتفيّا

من ضحك في غمرة آلامه عشاني
اشهد انّ الموت هلّا به وحيّا

ما فنى طيبه لو انّ العمر فاني
والخلايق تشهد لْـ سمح المحيّا

يااا توجّادي ويااا لوعة زماني
عالثرى اللي احتضن نجم الثريّا

اللهم صلِّ وسلم وبارك على نبينا محمد

- ميّ اللافي

للحزن ساحاتٍ بصدري مثل ساحات القتال
فيها الاصيل من المهار تعوّد بخيالها

ولا يطفي حر مابي من حرايق وأشتعال
الا الدموع اللي من عيوني يهل هلالها

لازال فيها دمعتينٍ للفراق ولاتزال
ذكرى هنوفٍ كل يوم أحطّها وأشتالها

راحت عسى الله مايلحقني مشاريه الرجال
تقول كنّي ماخلقت من التراب الاّلها

عزّ الله أنّي مانسيت أفعالها بنت الحلال
لعل ربي مايجازيها بسو أفعالها

أكبر جريمه ترتكبها فالهوى من وسع بال
هذي ضحاياها بقلبي شيدوا تمثالها

وشلون تهجرني وأنا مالي على الهجر أحتمال
وشلون تهملني وأنا مانيب أطيق أهمالها

وشلون تقطعني بسيف البعد قطّاع الوصال
وأنا لو أقطع عرق قلبي ماقطعت اوصالها

وشلون ماتشتاق,,ماترحم,,ماتذكر,,ماتسال
وشلون ماتطلق يدينٍ كبلت بأغلالها

وشلون مايطري عليها لاتفيت فالظلال
متشبثٍ لاوقفت جنبه قعد بظلالها

مكسور خاطر والسوال أعووووذ من ذل السوال
ياما أنتظر من برج هاتفها يبث أرسالها

لكنّ مال الآدمي حيله لامن الحظ مال
الميله اللي فال ربي خير له من فالها

هي افقدتني من هنا وأنا فقدت الاتصال
من يوم راحت لارسايلها ولا جوالها

ياقسوة الايام والحظ الردي والاتكال
على مقولة ( للمواقف واللزوم ارجالها )

يالله دخيلك من تردّاية نصيب وشين فال
من حيرة آمري ليت عندي حيلةٍ وأحتالها

أن أرخصت قدري وطاحت قيمتي والهجر طال
قولولها تترك مكابرها وتاخذ بالها

أنا من اللي فوق فوق و فوق فوق و عال عال
تركد ويركد عمّها معها ويركد خالها

لاوصلت للحد هذا لانقاش ولاجدال
تبعد وتنكف الامور دقاقها وجلالها

لو المفارق صعب والنسيان ضرب من الخيال
ارخاي راسي لايروق الها ولايحلالها

احفظ لها قيمة غلاها وأنتظرها من شمال
وإذا نستني هذي الدنيا وهذا حالها

أمّا أني أنساها نسى الله من نسى ذاك القبال
ياااااصبّ روحي صب دلتّها على فنجالها

قولولها لاستخسرت فيني ريالين أتصال
تهدي على ( جمعية الصم البكم ) جوالها
- مدغم ابو شيبه

جميله لأبعد مدى

راحت عسى الله مايلحقني مشاريه الرجال
تقول كنّي ماخلقت من التراب الاّلها :(

اللهم صلِّ وسلم وبارك على نبينا محمد

مرحبا♥️

أحبك ..آهـ انا ياليت قلبي .. شعلةٍ من نور
كريمٍ مثل شوق النظرة اللي تسكن أهدابك

أحبك وش بقى مني حطام العاشق المغرور
وما أظن الزمان اللي مضى يرجع من اسبابك

ولكن صدقيني الصدق في هذا الزمان شعور
يحبك من صدق لك مرةٍ ما همه عتابك

أمانه لا تصبين العمر في كاسي المكسور
يضيع العمر ما يبقى سوى الإبهام وانيابك

ابد ما هو قصيده كتبها لك شاعرٍ مشهور
ٍولا هو وردةٍ يذبل ورقها في داخل كتابك

ولا هو بسمةٍ صفرا على شفاة موات ٍبور
وملامح صورةٍ تخفينها حتى عن اصحابك

الا يا طفلتي ماهو الهوى هالشارع المهجور
ولا هو ريحة غبار الوعد في اسفل ثيابك

كذب من قال ورد العاطفه ينبت بظل السور
وجبان اللي يخاف الناس لو وقف على بابك

كتب لك كل مافي الحب من عذب الكلام سطور
و لكنه عجز يا طفلتي لا يكتب كتابك
- البدر رحمه الله

اللّي سرى ليلة الجمعه وعلى ولاه
عز الله إن ليلة فراقه دروس وعِبر

الله يسهل خِطا رجله و يغفر خطاه
من يوم شفته وأنا دار ٍ إن عنده خبر

لو ما أستباح العيون اللي بكت في رجاه
ماضاق صدر الرياض وضاق صدر الخُبر

خذ كل شيء وعطاني خنجر ٍ من جفاه
توغلت في ضلوعي قفلتين وشبر

هواية ٍ يستلذ إبها وهو في صِباه
والظاهر إنها تبي تكبر معه لا كبر

لو إيتمثنى حريره ضفتين القناه
قامت تغني له الامواج يا ( أسمر عبر )

وستارة القلب يادوب إلتفاتت مهاه
وتقدها من قِدم وتقدها من دُبر

أنا دخيل ٍ على ربّي وأنا في حجاه
من كسرة الخاطر اللي لا إنكسر ماجبر

لو ماقرى إسمي بعلبة ( زعفرانه ) نساه
قسّته الأيام وأخلفه الزمان الغبر

لا تامن الوقت لاشفت الحفاه الرعاه
يشيّدون القصور ويلبسون الوبر

وإن حاصرك زول من تغلي وضامك غلاه
إن ماذكرت النعش وإلاذكرت القبر

تدري متى تنفض يديك وتعاف الحياه؟
لأعطاك ربّي ( معاناه ) وحرمك ( الصبر )
- مدغم ابو شيبه