يا شذى زهرٍ سقاه الماء من أوراق الخمايل
‏طلةٍ ما جاتني من شوق ماني مرتجيها

‏كل ما هبّت علي الغاديات من النفايل
‏عاودتني لحظةٍ ما فادت الأعذار فيها

‏ميل يا غصنٍ يغذيه الترف لامن تمايل
‏ليلةٍ فيها لقاك أبيع عمري وأشتريها

‏النهار يغيب لا فلّيت للريح ، الجدايل
‏السماء وش ذنبها ظلما جديلك يكتسيها

‏يا إبتسام النور فوق العشب من عقب المسايل
‏بعدك الأيام غوّايه ولا عدت اشتهيها

‏وين أولّي وأنت ساكن فالصورّ و فالرسايل
‏هي بقت سكة ما تطرقها طواريك وأجيها

‏اتحايل لأجل أصد من العرب وإن جيت احايل
‏نظرة النشاد و دموعٍ عسى الله يهديها

‏للغرام أغلال والناجين من حبسه قلايل
‏من دخل سجن الهوى حرّيته لا يحتريها

‏خلةٍ ماهي تلم الشمل مذمومة شمايل
‏ليه أخلي راحة فوادي تحت رحمة يديها

‏ليه أعود لك مدام إن ما ورى المعواد طايل
‏وش يرد اللهفة لنفسي على أشياء كنت ابيها

‏لو تساومني بكل الطرق وبشتى الوسايل
‏الكرامة جوهرة ما ساوم القناي فيها

‏يوجع إني في سبيل رضاك سويت الهوايل
‏وأنت مستكثر علي اسف ومستكبر عليها
‏- سعود مهدي

"يوجع إني في سبيل رضاك سويت الهوايل
‏وأنت مستكثر علي اسف ومستكبر عليها"

‏جادك الغيث ياقفرٍ بصدري سناوي
‏له زمن مانبت عشبه ولا سال سيله
‏فيه جرة هنوف وفيه مرقب نداوي
‏وفيه صوت يذكر كل خل بخليله
‏كيف ابسلاك ياوجه من الحسن ضاوي
‏العمى فيه يمكنه يقدي دليله
‏جيت له ناوي وضيعت وش كنت ناوي
‏جيت عابر سبيل وصرت راعي طويله
‏كانت عيونك الشاعر وانا كنت غاوي
‏وكنتي الغايه اللي بررت للوسيله
‏واجد اشباهك اليا عودن للغطاوي
‏ومالك اشباه لامن نقضن الجديله
‏فارقه مثل جدانك بيوم العزاوي
‏ونادره مثل حلم مايجي كل ليله
‏ياجميله الياضاعت كبار الهقاوي
‏دوري لي من اسباب الرضا ياجميله
‏الزمن شح بك وانا ماعرف الرجاوي
‏اعرف اقول تبا لليدين البخيله
‏احسب انا تقاسمنا الغلا بالتساوي
‏ويوم شان الزمن كلٍ عرف وش حصيله
‏قسمها قسم طماعٍ مقاسم حياوي
‏ماقتنع بالكثير ولازهد بالقليله
‏قبلة الروح والايام ماعاد تاوي
‏انجدي روحي المتهالكه والعليله
‏راح عمري وانا للوصل احث الخطاوي
‏ولجلك احارب اعراف ومبادي قبيله
‏مانكسر رمحي الا فوق درع الفتاوي
‏ويش اسوي وانا مسلم واحب الفضيله
‏اه ياقلبي اللي مال جرحك مداوي
‏اسف ان الزمن ماحط بيديك حيله
‏الخيارات في عمري مافيها سماوي
‏وانتي من السماء طهر وبياض وفصيله
‏واجد اشياء في عمري بتبقى مناوي
‏انتي اهمها يالصعبه المستحيله

‏- بندر الدويش
‏⁦ @bdweesh⁩

"فارقه مثل جدانك بيوم العزاوي
‏ونادره مثل حلمٍ مايجي كل ليله"♥️

اللهم صلِّ وسلم وبارك على نبينا محمد

في كلام ابن القيم عن إثبات اسم النور وصفته لله تعالى، قال واصفا نبيه ﷺ: (..وكذلك رسول الله ﷺ لما كان نصيبه من هذا النور أكمل نصيب كان أجمل الخلق ظاهرا وباطنا، فكان وجهه يتلألأ تلألأ القمر ليلة البدر، وكان كلامه كله نورا ومدخله ومخرجه نورا، فإذا تكلم رؤي النور يخرج من بين ثناياه، فكان أكمل الخلق في نوره الظاهر والباطن وكان نوره من أكبر آيات نبوته.
قال عبد الله بن سلام: لما قدم رسول الله ﷺ المدينة انجفل الناس إليه فجئت حتى رأيته، فلما وقع بصري عليه عرفت أن وجهه ليس بوجه كذاب، فكان أول ما سمعته يقول: (يا أيها الناس أفشوا السلام، وصلوا الأرحام، وأطعموا الطعام، وصلوا بالليل والناس نيام، تدخلوا الجنة بسلام»، فاستدل على نبوته بنور وجهه ونور كلامه بنوره المرئي ونوره المسموع). مختصر الصواعق: (١٠٥٦/٣).

صبحكم الله بالخير

‏ليله البارح حصيلتها «نيكوتين» وطواري
‏مجدبة لا صاحبٍ غالي ولا واهس قصيده

‏انتحت والياس ينهشني وياكل من وقاري
‏كن مالي فكر متوازن ولا نظره بعيده

‏لو ما ساعدني الحظ و تماكنت انكساري
‏اقفوا القوم بحلال العود و حصان الوليده

‏الله يقدرني … ارفا واحتمل وادمح واداري
‏التغاضي يرفع الرجال والحكمه تزيده

‏واللهم … لين في طبعي ولومي واعتذاري
‏وغلظه وشدّه على حفظ المبادي والعقيده

‏ودي انطح سيف خذلان الزمان بصدر عاري
‏ولا يراودني مجرد شك ف خصالي الحميده

‏وودي اعلّم بتجربتي وصبري وأنتظاري
‏وكارهٍ يقمز بحلقي ،، واحدٍ مانيب ميده

‏الطريق الملتوي ظن ووساويس ومواري
‏والكلام المقرحاني دربٍ معبّد وسيده

‏زارع الورد الرقيق اليانع بجرد الصحاري
‏كنه اللي يزرع الاحساس بقلوبٍ بليده

‏انا آسف .. والأسف كله على سوء أختياري
‏ليه مافكرت في باقي الخيارات العديده

‏ل لليال دروس وجروح ومشاريه ومساري
‏وعادة بطون التجارب تنجب الارياء السديده

‏ايييه ،، يا ملذة الدنيا ما دام الليل ساري
‏مدري شجابك على بالي لكن فرصة سعيده

‏اعتبرني مستفيد وماخذك مخرج طواري
‏ولاني لحالي ترى حتى القصيدة مستفيده

‏يا تلف روحي وحرماني وحزني وأندثاري
‏والله ان كني مضيع فرصة العمر الوحيده

‏وياوجودي كل مادار الحديث ومر طاري
‏ل الغياب و ل الوداع و ل الرحيل و ل الفقيده

‏وجد قصرٍ من عقب راعيه تذراه الذواري
‏من كبر حزنه .. تآكل بابه وصدا حديده

‏الفراق اللي دواعيّه … احتمالات ومحاري
‏ينتج الحزن الحقيقي والمعاناه الاكيده

‏اتلعٍ ،،، رده شعور الخوف عن رد اعتباري
‏ما درى محنة فؤادي قدايمها جديده

‏يحسبني لا وصلته بنتقم و أخذ بثاري
‏وانا ودي لا وصلته احضنه و أخذه بيده

‏- محمد جارالله السهلي

صبحكم الله بالخير

سلام الله على عنق المها يافارس ابن حمود
‏سلامٍ ينقله ريح المساء ويوصلّه قافي

‏عليك من الثنا مايروي الظامي من القرهود
‏ليا ضيّعت دربي.. دلّني يالصاحب الوافي

‏تولعت ومشيت الدرب لا فاقد ولا مفقود
‏وأثرني كل يوم أكتب قصيدة وأخسر سنافي

‏أجاهد في سبيل الحبّ.. كلّه لأخر العنقود
‏وأجاهر في غلاها كل ما عدّيت مشرافي

‏ترى قلبٍ تولّع فالهوى ما يلحقه منقود
‏ليا صار الهدف: حبٍ عفيف وخاطرٍ صافي

‏عسى كل العلاقات القديمه والليال السود
‏فدا بنتٍ مشاعرها جليد وصوتها دافي

‏غريبة: كنّها من بطن ريح ومن ظهر عبرود
‏أصيلة: كنّها المجد التليد وسيرة أسلافي

‏عظيمة: كنّها الدين الحنيف وحلمي المنشود
‏كريمة: كنّها يمنى الكريم وخيرها ضافي

‏أنا وشلون أقفّي وأتجاهل كل ميلة عود
‏وأنا أشوف أنّها "لذة حياتي وأول أهدافي"

‏أحنّ شعورها وأدرى عليها من هبوب النود
‏وأجيها والظمأ يرعى حشاي وعمري خلافي

‏يقولون الهوى سيفٍ صقيل وقاطعٍ مجرود
‏وانا أقول الهوى اللي قد جرحني ماهو بـ كافي

‏ماكنت أظنها تقدر تليّن قلبي الجلمود
‏بعد مالت تحت وبل السحاب ولانت أطرافي
- مشاري محمد

احبّك وأجنّب غلطتك رغم تقصيرك
‏عشان العمر في قربك العذب ما ينعاف

‏معي قلب ما يبغي حدٍ يسكنه غيرك
‏على كل نقّاضة جدايل ،، ماهو مضيّاف

‏لا تبدي علي عذرك وتسهبّ بـ تبريرك
‏انا معك لو صابك بهذا الزمان خْلاف

‏اجيرك وسط قلبي وفي وجهي اجيرك
‏معي جيرةٍ تشهد مواقيفها الاشراف
- مبارك بن وافي

معي قلب لا هبّت عليه الهبوب يحنّ
‏ياويل القلوب القاسية من عذاب الله

‏يقولون: عيش العمر وأضحك وسوّ وغنّ
‏وأنا أقول: كيف أعيش والقدس محتلّه

‏⁧ #غزه_تموت_جوعاً⁩
- مشاري محمد

مرحبا

‏صدق ولا كذب يا محبوبه السدره الحمامه
‏السماء نادتك والاغصان وافتها المنيّه

‏ولا انا مني علي احيان ياكثر الملامه
‏كلما مات الكلام اورقْت معنى وابجديّه

‏كان لك صوتٍ تسافر به جروحي للسلامه
‏يربك الاحلام مابين الفنى والسرمديّه

‏اذكر اني جيت ويديني على زند الكرامه
‏واذكر اني رحت والورد المدى والبندقيّه

‏للزمان وللمكان العذب نظره وابتسامه
‏جعل ما يلحقني المشروه والعين اجوديّه

‏قد سرى بالبال برّاقي وسميت الغمامه
‏ماعلي ان قيل سجّاتك تراها جرهديّه

‏نجد ماكانت هلاك وكان للفرقى زعامه
‏ينولد قلب ويموت وهي على خبري عذيّه

‏من يقول ان الحياة عنان وشداد ومسامه
‏لا يقول القيض مرباعي واقول الشمس فيّه

‏العيون اللي قريت اكبر خطاها مستهامه
‏والقلوب اللي عرفت تصالي الصمت ونديّه

‏ما تغير شيء فيما قيل عن ظبي وعدامه
‏مستجد الجرح لاصديت لايشره عليّه

‏قد تقهويت الغياب وقد تعللت الندامه
‏مايهون ولا تهون السالفه والشاذليّه

‏يجهل التاريخ من لا حط عند اسمه علامه
‏والبطل مرات من يسدل ستار المسرحيّه

‏يكفي اني كل ما حنيت قوّمت القيامه
‏انهزم مثل الصواب العذب في حرب الخطيّه

‏اسلمت كل القلوب ومات عرّاف اليمامه
‏وين حظ الغيب وايام المحبه جاهليّه؟
- فيصل العكشان

من أجمل ما قرأت مؤخرًا

-كرم جدّي-

رغم عسر البلا لازال جدي في رجا المعبود
كثر ما زادت اوجاعه عليه ازداد إيمانه

لو تْهلّ السحايب دمعها من حزنها الموعود
بتلقى الأرض مخضرّه صحاريها على شانه

واذا دونه ودون المرجله عجز و مرض وقيود
لقيته في ميادين الكرم يفرح بـ ضيفانه

يقهوي من تعنّى له بوجهٍ بالرضا معقود
لو الذكرى تلاشت؟ ما نسى مدّات فنجانه

شريط الذاكره عيّا بغالي الذكريات يجود
ولكنه عجز ينسى شيم بالروح رنّانه

يداري سمعته من خوف يلحق إسمه المنقود
مداراة الأبو لاصغر عياله واكبر اخوانه

يشوف ان كلّ طرقي مرّ داره .. مرّها مقصود
وشرّع باب قلبه .. ثمْ فتح للناس بيبانه

غناه فـ قلبه اللي لا عطى ما شحّ بالموجود
عطى كنّه يشوف الرزق في يدّين خلّانه

صحيح انّه نسى ماضيه لكنّ السنين شهود
كرم جدّي حمد صعبٍ على التاريخ نسيانه

مرحبا

"والله ان صدري معافى وخفاقي نظيف
‏لو أشوف الحزن في عين حسّادي زعلت"

اللهم صلِّ وسلم وبارك على نبينا محمد