مساكم الله بالخير

لو ماانقرا عنها خبر فـ الجريده
‏أو مابقى بعروق ضحكاتها دمّ

‏..و دولابها مابه ثيابن جديده
‏وان مرّت الاعياد ماهي بتهتمّ

‏لكنها غير .. ومساها فقيـده
‏فقدي لصوت يصيح بي : ياولد نَـمّ !

‏ايام كان الموت حاجه بعييييده
‏والناس ناس بْقسمة الخبز والهمّ

‏ايام كنت اكتب واحسّ القصيده..
‏حضن وحبيب وبيت واهْـل وبني عم
- عاطف الحربي

جميله جدًا :(

مساكم الله بالخير

اللهم صلِّ وسلم وبارك على نبينا محمد

مرحبا

‏تداعَتْ وَقفتي بَيْن أتمنَّى ما مضى، وأرتاب
‏مشاوِيْر السنين أرفق بواجد من مجارِيْها

‏أنا ما فزِّزتني في دروب الغايبين: أسراب
‏تجوَّدت الحياة وضاع صوتي مع مشاهيْها

‏أحبّ الليل، وأنسَام الصَّباح، وضحكة الأحباب
‏وأخاف الناس، وسهوم الوَداع.. وكفّ بارِيها

‏يقولون: الهوَى غلَّاب.. وأقول: الهوَى كذَّاب
‏سقيت الورد.. لكن الحبايب شحّ ساقيها

‏أرتِّب لك جروحي وأنتهي لك والطعون أنساب
‏حسافة يوم جادَت غيمْتي؛ ضاعَتْ هقاوِيها

‏أعرفك يا آخر حدود الكلام فـ شارع الغيَّاب
‏وِش يجاذِب ليالي خطوِتك والنجم سارِيها؟

‏معي من وِين ما هبَّت عيونك للوداع أسباب!
‏وَلكنَّي رفيق عيونك -النجلاء- وراعيْها

‏هوَاي الليلة اللي دونها وَجه البسيطة ذاب..
‏عساني ما خلا من ضحكةٍ ذاب الحيَا فيها

‏يملّ الصمْت ما ملَّ الكلام، وخاطري ما طاب
‏أعِسّ الخير وأسرِق من حقوق الوَسم طاريها

‏طلبتك كلَّ ما هلَّت مزونك للجفاف وغاب!
‏تبلَّل شرهةٍ -زلَّت حقوقك- عن عراويها

‏حبيبي فدوتك وَجه الصحيح، ونظرة الأقراب
‏ديارك لو يجفَّفها الظمأ؛ ماني مخلَّيها

‏أحبَّك وين ما حطّّت رِكاب الخاطر المرتاب
‏أمانة.. باعَد سهوم الموادع عن مرابيْها

‏تدرهم بك غلا، وإلَّا تدرهم بك غضب، وعتاب
‏ذلولك ما يناحيها النسيم، ولا يجاريها
‏
‏تمرَّ الناس ويشيب القصيد وعاشقك ما شاب
‏أنا لو تزعل عيون القصايد فيك أبى أرضيها..

‏أشوفكٍ ديرةٍ ميَّل شجرها (غيمك السكَّاب)
‏وأردّد خطوة النفس العزيزة في ضواحيها

‏يلبّسك الهوَى عذر، ويغطَّيك الرِّضا جلباب
‏وأداري رِقَّتك.. لكن حياتي من يداريْها؟

‏عليك الودّ لو مرَّت سنيني بيْن ضرس وناب
‏وراك أقصى معاذير الغلا ما غاب ساعيْها

‏تغرِّبك الديار وترتمي لك شجرة، وعُنَّاب
‏وأسخِّر لك حيود جبالها، وأضمّ أراضيها

‏مراكبك استحالَتْ وآخر الترحال ما ينعاب
‏أسمِّي رحلتك والناس حارَت وش تسمَّيها؟

‏عسى يفدى ظماك العذب وَجه الغادي الصبَّاب
‏وقصيدٍ ما يداعب وَجنتك، وإلَّا يواسيها

‏رماح الحبّ مقطوعة عهد والحزن ما ينجاب
‏يخيَّم في طراقي عَبْرِتك، ويشدّ عاليها..

‏معك صحبة ليالي وإن بقينا فـ الحياة أغراب
‏أصوْن أحداثنا عن عين بايعها، وشارِيها

‏ولا زال المدى عاري، ولا زال التعب جوَّاب
‏تنقَّى في جميل أيَّامنا.. واختار ماضيها..

‏وضاق الكون، وحدود الهوى والحِلّ والترحاب
‏وأنا للحين أغنِّي: «يا عيونٍ عزَّ واليْها»

‏تحمَّلت الشعور اللي ترَكني في يد الأتعاب
‏على شان العيون اللي تمنَّاني عبارِيها..

‏لو إنَّه ضلّ عن درب الصوَاب من الصواب وتاب
‏يكفّي روحه؛ يمرّ اعتذارك.. في طرَاقيها
‏
‏مع إني ما تساقيت الحروف ولا قفلت كتاب
‏لقيتك في مظاهيْر الدروب، وفي خوافيها

‏أحبَّك كلمةٍ ما هي ورا جِفن المساء تنساب
‏أعرف أبدأ بها.. لكنّي أجهل وش تواليها

‏حبيبي طالبك لا شحّ وَقتي لا تصكّ الباب
‏أنا حتى عيونك -لو وراها موتي- أبيها.
- محمد السلطان

"أحبّ الليل، وأنسَام الصَّباح، وضحكة الأحباب
‏وأخاف الناس، وسهوم الوَداع.. وكفّ بارِيها "

"معي من وِين ما هبَّت عيونك للوداع أسباب!
‏وَلكنَّي رفيق عيونك -النجلاء- وراعيْها "

"عساني ما خلا من ضحكةٍ ذاب الحيَا فيها"

كل بيت يقول الزود عندي، محمد شاعر متفرد جدًا اللهم بارك

لو علي اقتبست القصيدة كلها

ذا وجهك .. اللي بياض الوجه ما يجهله
‏لو كنت ناسي بياضه يا شبيه الغمام !

‏حيران تسأل من أنت ؟ و حيرتك موغلة
‏فـ الصمت وجروحك اللي ما لحقها منام

‏حتى المرايا قرت ف عيونك الاسئله
‏تكسرت من عتب نظره وصمت انهزام

‏في ذاكرتك : الليال المقفيه مقبله
‏شفها وهي ترجع بحزنك ثمانين عام

‏بعض الاسامي تضيع وبعضها مهمله
‏فتش عن اسمي .. يلوح لك .. وبعضه حطام !

‏نسيتني ؟! ما نسيت الدين والمرجلة
‏كأنها حالفه تبقى معك لـ الختام

‏اخاف يطري عليك الفجر وتعجّله
‏وتروح للمسجد ب قلب ٍ يشق الظلام

‏المسجد اللي تبيه ابوابه مقفله
‏باقي من الليل ليل ، ارجع عليك السلام

‏هذا الجماد المسمى بيت لو مدخله
‏له قلب .. ماغالطك وانته دليل الكرام

‏كريم حتى بصوم الفرض والنافله
‏تقول غدوا ضيوفي في نهار الصيام !

‏والدمعه تويق من عيني مثل سنبله
‏تعصف بها الريح وتشاور عليها الحمام

‏يا حزني اللي طعنت ولا قدرت اقتله
‏من وين لك حيل تطعني بنفس السهام ؟

‏يا ليت لي قلب لا زادت جروحه ، دله
‏ماكان صمتي على شفاهي يحطب الكلام
- حمد المشيعلي

يصف حمد المشيعلي معاناة مرضى الزهايمر في:
‏"حتى المرايا قرت فـ عيونك الأسئله
‏تكسرت من عتب نظره وصمت إنهزام"
‏إلى:
‏"كريم حتى بصوم الفرض والنافله
‏تقول غدّوا ضيوفي في نهار الصيام" يااا الله يا الله 💔

أمّا عن معاناة أهل المريض يقول:
‏"بعض الأسامي تضيع وبعضها مهمله
‏فتّش عن اسمي يلوح لك وبعضه حطام

‏نسيتني؟! ما نسيت الدين والمرجله
‏كأنها حاااالفه تبقى معك للختام" :(

باقي من الليل ليل ، ارجع عليك السلام 💔

تذكرت جدي رحمه الله كان مصاب بألزهايمر، وكل وقت يشعر انه حزّة صلاة يشمر اكمامه ويتجه للمسجد جعله في عالي جنته وموتى المسلمين :(

-مشهد شاعري-

يوم ارفع يديني إلى الرب الغفور
شفت فـ دعا الانسان مشهد شاعري

بين الرجا والياس دعوات وشعور
و وحدك ياربي أعلم بمشاعري

هذا الحزن عيّا يفارقني شهووور
مجتاحني من أولي لين آخري

لو ما تكلّمت انكتب بين السطور
ولو ما ذرفته انقرا في ناظري

صرت اكتبه شعرٍ عن القلب الصبور
وملّ الصبر منّي ومن دفاتري

يالله يالعالم بما تخفي الصدور
محتاجتك، وانت العليم بخاطري

صبحكم الله بالخير