عندي حساب بتويتر يخص قصيده، لكن فكرتي ان يتبعه مجتمع بذات الفكرة

هذا حساب قصيدة عبر تويتر

صبحكم الله بالخير♥️

مئه مؤيد لفتح المجتمع خير وبركه

بكون ممتنه لو تنشرونه بين متذوقين الشعر

‏كلّ ما غطّا الشفق وجه السما
‏تكشف اللهفه عن القلب اللثام

‏يا اغترابي وش يكون الإنتماء
‏غير ذكرى مرّت مْرور الكرام

‏البياض اللي على وجهي نمى
‏خيط صبحٍ صافح ثياب السلام

‏والسواد اللي تحت عين العمى
‏ليلةٍ ما خانت اهداب الغمام

‏من متى الغيم يتغنّى بالظما
‏من متى النور يتفائل بالظلام

‏مين انادي ليه الوّح كلّ ما
‏سيّرت ذيك الملامح بالزحام

‏مدري اصوات الأماني ربّما
‏ولّا انا شكّيت بـ آمال الكلام

‏كنت اردّد يوم ودّعت الحمى
‏ما بقى بي لا عتاب و لا ملام

‏"جادكَ الغيثُ إذا الغيثُ هما"
‏يا زمانٍ ما عرف مسك الختام
- فيصل القاضي

‏تمهَّل قبل لا تَطرقك: نَفحة النسناس
‏ورا ليلةٍ فيها التعب مسْرِج جْياده

‏معك ما يخلي خاطري للهوى حسَّاس..
‏معك ما يخلِّي عاصي الخيْل.. منقاده!

‏أحبَّك ليالي، وأختلي بك رضا، وإحساس
‏وأعاوَد ضميرك، وأعشقه، وأعشق عناده!

‏أبي مِن غياهب ليلتك لو قليْل نْعاس:
‏على شان أداعب جادله، وأسرق شْداده!

‏حبيبي ترى ما لك ورا صفحتي مقياس
‏تغنَّيت بك.. وأثر المخاليْق نقَّادة!

‏إذا قلبي احتالَت سنينه معك، لا باس!
‏أنا أشوف في ضحكتك موْته، وميلاده

‏ذبحني الجَفاف، وجِيْت لك بَيْن يَاس، وياس
‏أعرْفِك ظمأ.. لو في طوارِفك ميراده

‏يكفِّيني إن طالَ الزعل: طلَّة، ومجَلاس
‏وأسوْلف لوَجهك عن غثى الوَقت، وجهاده

‏تمادَى على صدرٍ عروْقه عليك يْبَاس..
‏أبي غفلةٍ بَيْن أسوَد الرمش، وسهاده!

‏وش الجِيد لولا عقدك اللي بدون ألماس؟
‏عساي أنتهي له؛ كلَّ ما ذابت قلادة..

‏أحنَّك مثل ما أحنّ نفسي: من الوَسواس
‏وأحبَّك محبَّة «شايبٍ لأوَّل أحفاده..»

‏أمانتك لا تنسى اسمي إن غابوا الجلَّاس
‏أنا طالبك -لا طوَّل غيابنا- نَاده

‏ترى الحِلَّ لا خابَت مع الرامي الأقواس:
‏مرور الغزال اللي على غفلته، صادَه!

‏حبيبك لو إنه في ديار الهوَى عسَّاس
‏يشوف الدروب اللي تودي لك؛ بلاده!

‏وش أسوي إن زاد الحكي في عيون الناس
‏وأنا كلّ يوم.. أحبَّك أكثر من العادة!
- محمد السلطان

ما وصلك اللي ركب سكّة عبادي
‏يبدو إن السكه أطول من حياته

‏السفر ماغيّرك .. غيّر بلادي
‏ضعت فيه.. وكنت أدل اربع جهاته

‏فيه حبيتك وحبيت المبادي
‏والمبادي موت والحب إستماته

‏لاتخليك السنين تصير عادي
‏في عيون اللي يقاسمك أمنياته

‏و نادني .. لو لا حياة لمن تنادي
‏اسمي بصوتك -حياه- بحد ذاته
- مزيد الوسمي

-سهم الحُبّ-

‏احسب ان الحبّ وحده قادر يقدّي دليله
‏والحقيقه كثرما كنت اعرفه كنت اجهله

‏آه كم عشت الندامه والقهر في كلّ ليله
‏ليتني امسح خفوقي من شعوري واغسله

آتحايل بالمشاعر والهوى مافيه حيله
‏غلطتي طاوعت قلب ادناة حاجه تزعله

‏غنّ يا صوتي لعلّ القلب يشفى من غليله
‏واطلق عْنان الشعور تزول عنْك المشكله

‏كنت احطّه بالضلوع وكان في صدري مقيله
‏وكانت يديني وطنه وكان قلبي منزله

‏كانت حروفي كريمه يوم احاسيسه بخيله
‏وهانت ايامي عليه وهان قلبٍ يحمله

‏ليه صوّبني بسهم الحبّ وأرداني قتيله؟
‏وليه خلّاني وانا اللي بالهوى متفضّله؟

‏اعرف اني كنت فعيونه مهاةٍ مستحيله
‏ومصدر إلهامه وحلمٍ جاه من مستقبله

‏لو تساميت وقبلت بقسمة الحظ القليله
‏من يجاوب قلبي ان كثرت عليه الأسئله؟

‏يوم كان يشوفني بنتٍ على قلبه دخيله
‏كنت اشوفه عمر ما كان بحياتي مرحله

‏لا يتعذر بالشعور ولا يتعذر بالوسيله
‏ماهو بحاجه شعور الا بحاجه مرجله

‏هات لي من جعبة الورّاق.. للمطلع تتمّة
‏في ردون معتّق الغايات تبرير الوسايل

‏كل ما وارى المساء وجه النهار أطراف كمّه
‏أجمع شفوفٍ على كثرة مساعيها قلايل

‏يصعد الشاعر على مرأى من عيون الأئمّة
‏سلّم المحراب، ويفضّ الختوم من الرسايل

‏لو تماكن زلّة الكلمة على طرّاف فمّه
‏مقتفيته زلّة الخطوة على الجرف المهايل

‏ كان ما عيّن مرَدّ الي كتب.. من نزف دمّه
‏لا تغارب ضيعته -من عقب ما دلّ- القوايل

‏أتهادى.. من خباري كل شعب لـ سفح قمة
‏ كنّ في صدري ورى الزرفال طلّابة عقايل

‏داخلي من نزعة طيور السماء، للروح زمّة
‏جايزٍ عن بارد الفيّة من أطراف الخمايل

‏مستجدّ العمر ما عقب الظما ألا ورد جمة
‏و البقاء للي نذر لك وقفته، ولّا أنت زايل

‏في دروبك لا أستقامت خطوته، ميّل معمّه
‏يستحثّ لغايته ممشىً عدال.. وقلب مايل

‏لا تعدّاه الملام، ولا أقصرت عنه المذمّة
‏كان ما بلّ العروق الذاويات من المخايل

‏وأنت يا ملح القصيد، ودافعه، وأسباب همّه
‏شفني بعين الضمير الحيّ.. وتشوف الدلايل

‏سقت لك عمري، وسلّمتك جداه، وقلت سمّه
‏ ما حملت ألا الشعور العفّ.. بضلوعٍ نحايل

‏هاك ثرّ الملح فوق الجرح وأليا ضقت لمّه
‏وخلّني في وجه مردود البرا عن كل عايل

‏حاول النسيان.. في بالٍ معك: بيّاع ذمّة
‏ وأنتزع لك كل ما لا ينُتَزع عنوة؟ محايَل

‏وهذا أنا للدمع في عيني وعد مع برد كمّه
‏يا كثر ما لك ورى الضلع القصيّر من عمايل

‏كان جاذبك الرضا ليلة، تمثنى الركب يَمّه
‏في نحا الي ما أستعاض بطلّة عيونك بدايل

‏والله أنه بينه وبين النفَس والموت: ضمّة
‏جد بها، ولا أردم لمثوى الجسد حمر النثايل
- عبدالله البديري

قصر بال، وشح وصل، وقل دبره
‏والسؤال اجاوبه بـ "ادري" و "مدري"

‏والله اني حاسدٍ مثقاب الابره
‏يومه اوسع للهواء من ضيق صدري
‏- محمد البندر

صبحكم الله بالخير

‏يـا غُربة النفس الشَغوف الطمُوحة
‏الرفق لا اعـوّد من الدرب : حـافِي !

‏مـا اخاف لو حلمي تدَاعى صُروحه
‏ اخـاف مـا يدْفي عِظـامي : لحَـافي !

‏نفسي على طرد الأمـاني : لَحوحة
‏والمجْد قدْمي والهـوانة : خِـلافي

‏فيني تأنّـي لـوّ نفسـي : جـمُوحة
‏وفي صمتي الواضِح بلُوج إختلافي !

‏(عيني على رِفعّة طويق وْ وضوحه )
‏اليـا تسـاوت في عيوني ضفـافي

‏يـا بعْد من دمّل غيـابك جروحه
‏البُعْد يقْصر والليـالي ؟ تِشـافي

‏لو نرْجي اليدّ المنون الشحُوحة !
‏مـا نلْحق مْن العمر غير السوافي

‏دْموعك أثمن من مُبتغـاه وطمُوحه
‏وأثْمن من الحِلم البعِيد المجـافي

‏ كلْ درْب وسطه راحتيْنك بـ روحه ؟
‏لو خطوة أشواك .. بـ امشيه حـافي

‏يـا كثر مـا سْقتني حيـاتي : ملُوحة
‏لا شفت بـ عيونك سنـا العمر طـافي

‏واللي رخص فـ مْجاهد الرزق روحه
‏عليه من حرّ الدعـا ثوب ضـافي !

‏تبكيه مع عيني محـاجر طفوحة
‏اللي معَ حتى - مواشيه - وافي )؛

‏أبكيه لـ طرّو - حكـاه ومُزوحه -
‏واتخيّله كنّه بـ مجلسه غـافي !

‏من عقبه ووجهي لـ الأحزان لوحة
‏لا الدار يأويـني ولا الحِـجر دافي

‏اللي على الزلات نفسـه : دموحة
‏لو جـافته دنياه مـاهو بـ جـافي

‏يـا نظرة عيون الحزين : الفضوحة
‏لا تبيّنين مْن الـوجع شيّ خـافي

‏مـا بين أكتم همِّـي و بين ابـوحه
‏آحسّ حتّى البوح مـا هو بـ كـافي

‏واكبدي اللي حـاجته لك تلـوحه
‏أصبح مكـانه فيه " سجن ومنـافي "

‏عن كلّ شيّ إلا إحتيـاجي : سموحة
‏وعن كلّ نظـرة راهنت بـ إنجرافي

‏لو تكفي المخطين كلمة : نصوحة !
‏مـا تكفي الموجوع كِلمة : عوافي )؛

‏ويـا غُربة النفس الشَغوف الطمّوحة
‏اللي جرى لي من عنَى الوقت كـافي !
- نوران

حبيبي لو تضيق الارض وصدور العباد تضيق
‏يعز إنك علي مْن الزعل تقطع مراسيلك 

‏انا يا مرهف الاحساس مدري يا سُلاف الريق
‏بصدري ودي أضمك عن الاحزان واشيلك 

‏عليك أخاف من جرح الكلام و لوعة التدقيق
‏وأحنك من قساي ومن قسى الايام و آوي لك 

‏لك الله ماقدرت اسلا بعدك ولا قدرت أطيق
‏تفاصيل الحياه اللي مافيها من تفاصيلك 

‏يثير الليل شوقي و النهار يزيدني تشويق
‏من الاسرار وش درّا النهار اني صبا ليلك 

‏يا ربّة قلبي اللي ما لقى في غيرك التوفيق
‏ولا يوصل مقامه فـ الغرام إلاّ مواصيلك 

‏تعبت مْن الحقيقه والحقيقه ماتبي تحقيق
‏واكذّبها عن الشكه و اصدق كذبة أبريلك 

‏شعور الحب في قلب الشجاع اكرم من التلفيق
‏لذا ما أعرف اغنّي فيك ، كثر ماعرف أغني لك
- الأعشى

استقبل مشاركاتكم للقصائد واقتراحاتكم من خلال هذه النافذة

صبحكم الله بالخير

عقب المتاهات هذي .. استحق استريح ؟
ابطفي انوار عيني .. واسدل ستارها

خلوني اصد .. دام الصبر عندي شحيح
مالله خلقني من الصحرا وصبارها

ماعاد فيني اوقف لجل اوقف واطيح
عندي بقايا ملامح بحفظ اوقارها

اخطيت .. بس الخطا كان بعيوني صحيح
وكل الخطايا بريئه قبل تكرارها

الله يسامح غلوي .. بالغرام و يبيح
من صارلي اغلب احلامي .. ولا صارها

ليه اكتب الشعر .. واوراقي مداهيل ريح
تطير لبشع جروحه اجمل اشعارها

من غاب عني وانا اغتابه بكل المديح
امشي على قاع ذنبه وازرع اعذارها

مايسمعك من بغا مايسمعك لو تصيح
كم لي وانا مهمل دروبي وخطارها

صرت اتبسم على حزني .. وقلبي جريح
كبر المصايب تضحكني بأصرارها

تبقي الحقيقه .. وهي جل الكلام الصريح
بعض الاماني انا ماكنت مختارها !!
- سعد هندي العجمي

صبحكم الله بالخير