اللهم صلِّ وسلم وبارك على نبينا محمد

كتب الله أجر من ساهم ونشر

الله هو المعبود ماله لا شريك .. ولا شبيه
‏جل وعلا .. عرشه علا كل العروش الفاخره

‏عز اليتيم ؟.. إللي فقد فـ أول حياته والديه
‏رغماً عن خشوم الوجيه الحاقده و الساخره

‏عم النبا و آهل القرى مابين رشد و بين تيه
‏آوايل العلم القوي ؟.. تنبي لـ عظم آواخره

‏أبو جهل : تبت يده .. و أبو لهب : تبت يديه
‏و إللي بعد على الضلاله جل جهده صاخره

‏أستنكروه ؟.. و قالو إنه ساحر و عقله سفيه
‏أهل العقول إللي مثل " مخ العظام الناخره "

‏ما يدركون ؟.. إنه ذكي و إنه نبي و إنه نبيه
‏منٍ .. من المولى يدلك ( لـ لحياه الزاخره )

‏فضايله ؟.. ما تنحصر والله يبي من " يتقيه "
‏أشرف نسب و أعظم فخر يا العالم المتفاخره

‏محازمه قومٍ معه .. تدعس على اللي ماتبيه
‏لا قام كلٍ يلتفت " فـ المحزم إللي ذاخره "

‏من بطن طيبه و جهو لـ النصر بيضان الوجيه
‏بواسلٍ؟.. بر الأمان أرست عليه " الباخره "

‏آعجوبة التاريخ ما توفيه .. مهما تقول فيه
‏( المجد ) كله سطره من أوله : لين آخره

‏هذا النبي المصطفى صلى الله وسلّم عليه
‏" الله يجمعني و يجمعكم معه فـ الآخره "
- ناصر بن مفلح

"آعجوبة التاريخ ما توفيه .. مهما تقول فيه
‏( المجد ) كله سطره من أوله : لين آخره"

عليه أفضل السلام وأتم التسليم

‏الشعور الليلة اكبر من مدا استيعابي
‏معتقَل في ظِل سَقفه وأربعة جدرانه

‏كلّ ما فيني من التقصير غير ثيابي
‏يشتكي لي من كثر خوفه وقل آمانه

‏أدعي إنّ الله يهيّي للرشاد اسبابي
‏ما يذرني للهوى ولوسوسة شيطانه

‏لا نويت آحثّ في درب الرحيل ركابي
‏ردّني صوتٍ .. لا زالت نبرته رنانة

‏الحنين المرتبط .. في لحنه الزريابي
‏سطوته سطوة عقيد القوم في عدوانه

‏ليه آولّي نفسي لـ غيره .. وهو اولابي
‏كيف آسلّي قلبي بـ غيره وهو سلوانه

‏البعيد اللي لا زلت آعدّه من أقرابي
‏فاقده فقد الضمير الحي لاطمئنانه

‏يا موقّفني بعد فرقاك على اعصابي
‏ما يزيد الحب غير محاولة نسيانه

‏جرحك الآخير ينعَم في كنَف ترحابي
‏ما تقول الا آخر العنقود بين أخوانه

‏صرت ادوّر في جروحك مايثير اعجابي
‏الخطا في عيني أهون من فراغ الخانه

‏يوم حبّيتك شَعَرت ان الجميع احبابي
‏كنت اشوف بعين قلبي واعترف بلسانه

‏لم يكن بامكان قلب الشاعر المتصابي
‏إنّه يحاول يكون اكثر من اللي كانه

‏من كثر ماهوب عن زود الزلل متغابي
‏حسبة الفرقا ما كانت يوم في حسبانه

‏رغم مفهومي للارض وديرتي وترابي
‏الوطن يمكن يكون انسان ولا انسانه

‏في محطات القطار اخر فصول كتابي
‏ماحسبت حساب عمري لين فات اوانه

‏وينه اللي كل ما ضاقت علي رحابي
‏أترك الدنيا واهلها وارتمي فأحضانه
- عبدالله السراهيد

"رغم مفهومي للارض وديرتي وترابي
‏الوطن يمكن يكون انسان ولا انسانه" ااالله

‏رد طارفك العتيق و لحّف الليل الاهلّه
‏و اذكر إني غارقٍ في ضحكتك و الليل هادي

‏غايبي و انت السنين الاوله والشوق كلّه
‏وش يردّك عن هوى بالي و شفي و إتّقادي

‏الظما.. شدّد هواي لـ نظرة العين المقلّه
‏لحظةٍ فيها الجفاف اول مشاريبي و زادي

‏يا حبيبي و إن عرفت ادلّ دربك ليش ادلّه ؟
‏خابرٍ في صوتك ايامي و فـ عيونك بلادي

‏و إن تخيّرتك ظنون.. ولوّحتك الريح زلّه
‏اترك الشاعر ورى عنقك يهيم فـ كل وادي

‏من مسافات الحياة اسري مقامك و استحلّه
‏و آتردد في مشاويرك و اسوق العمر حادي

‏دِق هَرجك يستلبّ السمع كيف إن مر جِلّه ؟
‏شفت في سيفك هواي وشفت في رمحك ضمادي

‏اتبسّط بك، و اعرف إني احبك و انت والله
‏منتحي عن ريبة شعوري و جدّي و اجتهادي

‏وش يحلّ الحزن يا ملح الحياه او من يحلّه؟
‏ اتعبتني بعدك الايام، وارهقني عنادي

‏جعلني لا مرّت ظنونك و جاء فـ الامر خلّه
‏آقف بـ وجه الليالي موقفٍ ما هو حيادي

‏ما لحقني في رجاك من السنين العوج ذلّه
‏انت من يلمحك في ديرة ولا يتبعك غادي
- محمد السلطان

صبحكم الله بالخير

-بين السطور-

آتوحّش كلّ دارٍ خلا منها السرور
مثل ما تستاحش الباديه من ناسها

كم يكلّفني حضورك ليا غاب الحضور
طيفٍ يْبدّد وحَش روحي بمجلاسها

إن بقيت؟ آوقّف الأرض لو كانت تدور
وان رحلت؟ اشرح لدنياي معنى افلاسها

قلت لعيوني تباكي على القلب الجسور
وسلهمت بدموع ورموشها حرّاسها

ماخذ من الليل ظلماه ومْن الفجر نور
حالفٍ تحفظ لعين المهاة نعاسها

ايه احبّك لو اعيش الهوى بين السطور
راضيه باحلامي اللي معَك نبراسها

وانت يا ساس الشعر لا يجي منّك غرور
تذبح الملهوف لك كلمةٍ من باسها

إكتب الشعر و تكلّم بما تخفي الصدور
القصيده منك ما أرتوي من كاسها

احفظك ما كنّي اللي اعرْفك من شهور
الثواني معْك ماجت على مقياسها

في مجيّك مرحبا بك واذا غبت مْعذور
لو ليال العمر دونك حفظت اتعاسها

منت منفى بالحياة او محطّة للعبور
أنت صحراء باختياري عشقت يباسها

يستميل القلب لك استماله للزهور
فيه من ريح الهوى وذعذعت نسناسها

كلّما اكتبك بقصيده تلقّاني الشعور
آه من بعض القصايد وجور إحساسها

الجديد :)

اسرفت في حبك جهر مانيب مثل المستحين
‏اللي يحبك يعتزي ويشوش ويرد البرا

‏مشاعري لك لو توزّع باليسار وباليمين
‏صاروا جميع الناس عشاق ونشامى وشعرا
- مبارك آل خليفه

مرحبا

الله ليا حط الضعافا مواليف
‏حط النشامى في طريق النشامى

‏— ناصر مناحي

ترا الشده !.. أول مرحله لـ إنتشال اللّين
‏على الهون لا تشكين يا نفس .. لا ضقتي

‏ظروف الليال .. تحطني بين زين و شين
‏لكن الفراق ؟.. اللي خذا عقلي و وقتي

‏يا وجه الغلا : مهما غيابك يطول سنين
‏تراني ؟.. على حطة يدك كانك أشتقتي

‏رحلتي !.. وخليتي لـ قلبي " غلا بيتين "
‏( تعلّقت ) فيها ! .. يوم فيها تعلّقتي
- ناصر بن مفلح

أتباعد شَرْهة الأحباب.. وأستأذِن محلّي
‏بَيْن نزعات الهوَى؛ مرَّت رِيَاحك سرمديَّة

‏أنت لولاي أعرفك -في طيَّة الأيَّام- منّ لي؟
‏أنت لولا ضحكتك.. شِفَت الليَالي مهمهيَّة

‏الهوَى له لحظةٍ وَحْده معك: صبح وتجلَّي
‏يوم ترتاب العقول، وتَسْكن النَّفس العصيَّة!

‏آه يا مِلْح السِّنين، وسكر أيَّامي.. وْخِلِّي
‏رجَّع أحلامي معاك.. أو رجَّع أيَّامي نديَّة!

‏شفت بك تِرْحَالي وعوَّد هواك، وشفت حلِّي
‏مير حالَتْ دوني ودون أخذك: نجد العذيَّة!

‏لا تساوِمني على صدر المعزَّة، وأنت ظِلِّي
‏عن لواهيب الوداع.. ولفحة الحظّ الرديَّة

‏الظمأ هذي مشاوِيْره على الغصن المدلَّي
‏كم مضى له في حنايا خاطري: روحه، وجيَّه

‏جِيت أشدَّد خطوة الأيَّام في دارك، وأهلَّي
‏وأرتمي.. بَيْن الكثير من الرِّضا، والقابليَّة

‏بس عيَّتْ عن ثمين أوْقاتنا: لحظة تغلِّي
‏وعدت أشيل أغلى معاذيْر المحبَّة في يديَّه!

‏من يوصِّل لَك خفايا ريبة العمْر المولَّي
‏لين تدفع عنَّي: رماح السنين السمْهِريَّة

‏أتعرَّض لأجلك سهوم التعب، وأسوق جِلَّي
‏والهوَى.. بيتٍ تلاعبه الرياح العارضيَّة
‏
‏ما بكيتك لأني أعرف البكى: عذر التخلِّي
‏يمكن يطيح الغلا مع دمعتي: ذنب، وخطيَّة

‏القصايْد ما تردّ الغايبيْن ولا تسلَّي:
‏ولا لها حيلة على ردّ الرِّضا، والمقدريَّة

‏بس تبقى في ثنايا الذكريات، وفي سجلِّي
‏مثل غصَّات الملوَّح.. فالديار العامريَّة!

‏أنت كلّ اللي بقى من نصفي الثاني، وكلَّي
‏كيف أداعب جادلك وأسرق من الجِيْد: ضْحويَّة!

‏لا تخوَّف كان ما زان الزمان.. وزاد غِلَّي
‏جفّ عمْري بين زلَّات الغرام، وبين غيَّه

‏كلّ ما مرَّت لياليك المِلاح.. وقلت: طِلّي
‏اِستردّ البال.. شرهات السنين الأوليَّة!

‏معك قلبٍ لو يميل الوَقت كلَّه، جايزٍ لّي
‏أعرف إنّه ما يعرف من الظنون إلَّا النقيَّة

‏جعلني ما أنسى معارِيْفه، ولا أخلِّيه للّي
‏ما يداري رِقَّته، وإحساسه، وشمْسِه، وفيَّه

‏لا تحدَّد وِش يحبَّ القلب فيك، وِش يخلّي
‏أنت عطني من رضاك شوي، والباقي عليَّه!
- محمد السلطان

"ما بكيتك لأني أعرف البكى: عذر التخلِّي
‏يمكن يطيح الغلا مع دمعتي: ذنب، وخطيَّة"