ترا الشده !.. أول مرحله لـ إنتشال اللّين
‏على الهون لا تشكين يا نفس .. لا ضقتي

‏ظروف الليال .. تحطني بين زين و شين
‏لكن الفراق ؟.. اللي خذا عقلي و وقتي

‏يا وجه الغلا : مهما غيابك يطول سنين
‏تراني ؟.. على حطة يدك كانك أشتقتي

‏رحلتي !.. وخليتي لـ قلبي " غلا بيتين "
‏( تعلّقت ) فيها ! .. يوم فيها تعلّقتي
- ناصر بن مفلح

أتباعد شَرْهة الأحباب.. وأستأذِن محلّي
‏بَيْن نزعات الهوَى؛ مرَّت رِيَاحك سرمديَّة

‏أنت لولاي أعرفك -في طيَّة الأيَّام- منّ لي؟
‏أنت لولا ضحكتك.. شِفَت الليَالي مهمهيَّة

‏الهوَى له لحظةٍ وَحْده معك: صبح وتجلَّي
‏يوم ترتاب العقول، وتَسْكن النَّفس العصيَّة!

‏آه يا مِلْح السِّنين، وسكر أيَّامي.. وْخِلِّي
‏رجَّع أحلامي معاك.. أو رجَّع أيَّامي نديَّة!

‏شفت بك تِرْحَالي وعوَّد هواك، وشفت حلِّي
‏مير حالَتْ دوني ودون أخذك: نجد العذيَّة!

‏لا تساوِمني على صدر المعزَّة، وأنت ظِلِّي
‏عن لواهيب الوداع.. ولفحة الحظّ الرديَّة

‏الظمأ هذي مشاوِيْره على الغصن المدلَّي
‏كم مضى له في حنايا خاطري: روحه، وجيَّه

‏جِيت أشدَّد خطوة الأيَّام في دارك، وأهلَّي
‏وأرتمي.. بَيْن الكثير من الرِّضا، والقابليَّة

‏بس عيَّتْ عن ثمين أوْقاتنا: لحظة تغلِّي
‏وعدت أشيل أغلى معاذيْر المحبَّة في يديَّه!

‏من يوصِّل لَك خفايا ريبة العمْر المولَّي
‏لين تدفع عنَّي: رماح السنين السمْهِريَّة

‏أتعرَّض لأجلك سهوم التعب، وأسوق جِلَّي
‏والهوَى.. بيتٍ تلاعبه الرياح العارضيَّة
‏
‏ما بكيتك لأني أعرف البكى: عذر التخلِّي
‏يمكن يطيح الغلا مع دمعتي: ذنب، وخطيَّة

‏القصايْد ما تردّ الغايبيْن ولا تسلَّي:
‏ولا لها حيلة على ردّ الرِّضا، والمقدريَّة

‏بس تبقى في ثنايا الذكريات، وفي سجلِّي
‏مثل غصَّات الملوَّح.. فالديار العامريَّة!

‏أنت كلّ اللي بقى من نصفي الثاني، وكلَّي
‏كيف أداعب جادلك وأسرق من الجِيْد: ضْحويَّة!

‏لا تخوَّف كان ما زان الزمان.. وزاد غِلَّي
‏جفّ عمْري بين زلَّات الغرام، وبين غيَّه

‏كلّ ما مرَّت لياليك المِلاح.. وقلت: طِلّي
‏اِستردّ البال.. شرهات السنين الأوليَّة!

‏معك قلبٍ لو يميل الوَقت كلَّه، جايزٍ لّي
‏أعرف إنّه ما يعرف من الظنون إلَّا النقيَّة

‏جعلني ما أنسى معارِيْفه، ولا أخلِّيه للّي
‏ما يداري رِقَّته، وإحساسه، وشمْسِه، وفيَّه

‏لا تحدَّد وِش يحبَّ القلب فيك، وِش يخلّي
‏أنت عطني من رضاك شوي، والباقي عليَّه!
- محمد السلطان

"ما بكيتك لأني أعرف البكى: عذر التخلِّي
‏يمكن يطيح الغلا مع دمعتي: ذنب، وخطيَّة"

‏تراقبك العيون اللي تحبك والمحب يخاف
‏عسى ربي يجيرك من عيون الخلق عز وجل

‏على ماآعطاك من زود الجمال ونادر الأوصاف
‏أنا ماآلوم من خافوا عليك من الحسد والغل

‏مع إني ، لو تكلمت بـ حيادية عن الانصاف
‏من الواجب عليهم يفرشون الارض ورد وفل

‏هم اللي مايبون الناس تجرح قلبك الميلاف
‏وأنا اللي باني آماله على موعد لقاك .. و زلّ

‏عسى ظلما مشاوير المواصل والشعور الجاف
‏فدى وجهٍ ما غطّى نوره !.. ألا شعرك ، المبتل

‏ جمع ربي مشاعرنا الرقيقة .. عند وزن و قاف
‏مثل ما يجتمع في وجهك الآخاذ شمس وظل

‏شعوري يوم أحس إن النصيب أقوى من الاهداف
‏شعور اللي تصيبه فـ الضلوع رْصاصة المحتلّ

‏يا منسوع الجديل .. الجرح لا يسمع ولا ينشاف
‏إذا في خاطرِك تجرحني اجرحني !.. تراك بـ حل

‏أنا مهما نقلت من الحمول اللي ماهيب خفاف
‏أشوفك ( حلم ) لا يعلى عليه و لغز ما له حل

‏مع إن الناس من حولك كثير ولا عليك خلاف
‏يراودني شعور !.. إنك حبيبي ، يا حبيب الكلّ
- عبدالله السراهيد

"شعوري يوم أحس إن النصيب أقوى من الاهداف
‏شعور اللي تصيبه فـ الضلوع رْصاصة المحتلّ" يا الله

صاحب القصيد العذب، الله يغفر له ويرحمه ويسكنه فسيح جناته

"يا كثري يوم أوزع بسمتي في شارع الغياب
ويا قلي يوم أحاول حاجةٍ ماهيب مكتوبه" :(

مرحبا

كنت ابيك تكون شي.. وصرت شيٍ ثاني
‏والخطا ماهو خطاك.. انا الخطا بعيونه

‏يوم اهيم بصوتك الفيروزي الرحباني
‏وآتخيل كل كلمة من فمك موزونه

‏خاب ظني .. ليت ظني فيك ماخلاني
‏ابني احلامي على حاجه ماهي مضمونه

‏وليت ماجاني من احساس الندم ماجاني
‏شيٍ يحطم صميم القلب قبل ركونه

‏الجفا اللي عقب لذة وصلك الإنساني
‏والسلام البارد اللي عقب طول المونه

‏اعتذر لك عن خطاب اسلوبي الوجداني
‏الآدمي مهما حصل يبقى رهين ظنونه
- مزيد الوسمي

رهن للمتعبين من الحنين غوايته وخطاه
‏وصار اول مطاف لشرهة احساسه وغاوينه

‏يهيجن كل ما عنّا شعوره طرقه ومعناه
‏ما دام الشعر يجري في دماه وفي شرايينه

‏هو اكثر من يقول "بخير" واكثر من يحسّ بـ" آه"
‏يبيّن ثلث من صدق الوجع ويدسّ ثلثينه

‏حياته ، غربته ، حزنه ، شعوره ، موطنه ، منفاه
‏دروبه ، سجته ، حلمه ، صدى صوته ، عناوينه

‏وهو يا "هند" يوم انّه يغنّي لك على ليلاه
‏تبنّي غربته يا "هند " ، وإلاّ لا تحبينه!
- نايف عبدالرحمن

جميله جدًا

مكبوت، وشْعوري من الصبح مكبوت
‏والليلة من الخوف ليلة اخيره ..

‏مطر، وليل ٍ أدلم، وْوحشه، وْنوت
‏واطراف ترجف برد واطراف غِيره

‏وانا احترق.. ماهو من الضوّ والكوت
‏قلبي يساومني على اخر ذخيره

‏الله يجعلني من جْروحه آموت
‏ولا آتعافى منْه وآحبّ غيره.
- نوف العثمان

‏تمثنَى روْض صدري واسترحْ يالخاطِر المرَّار
‏عسى ما يَجذب السُّود الوساع إلَّا مغاتيْري

‏أشدَّ الرِّيح لـْ غصون القصيْد وتستلذّ الدار
‏وأقدِّم لك عباير خاطري.. وأغلى معاذِيْري

‏معي مِنْ وِين ما هبَّت ظنونك فالحياة أسرَار
‏أشوفك بعد زلَّات السنين، وقبل تقصيْري

‏تبَعتِك وأنت تَقدِيْر المصيْر، وَسطوة الأقدار
‏مقادِيري كثيرة وأنت واحد من مقاديْرِي!

‏فدى وَجهك مشاريه المدى، والحزن، والأعذار
‏وغصنٍ ميَّله صفق الهبوب، وفزّ له طيري

‏أحبَّك.. وأختلي في جِفْن عينك والحقوق كْثار
‏معاك أعذب مسافات الهوَى وأحلى مشاوِيْري..

‏يا مِلْح الوَقت قلبي ما عليه من السكوت أسوار
‏لا زلت أشوفك فسانح هواي، وشرِّي، وخيْري

‏أنا بَيْن أتعلَّق في ديَارك.. والهوَى سيَّار
‏وبيْن تمرّ في عيني رضا، وتشدّ تفكيْري..

‏أخافك كلّ ما هبَّ الهوَى.. وارتابَتْ الأشجار
‏مثل ما أخاف لا طال الوداع؛ ألقاك مع غيْري
- محمد السلطان

فتحت الرسائل الخاصه بالقناة لمشاركه القصايد والآراء والملاحظات، حسابي الشخصي لطلبات الكتابه فقط

مرحبا

اللهم صلِّ وسلم وبارك على نبينا محمد

لمع برق الشعر وانساقت انسامه وانا مشعوف
‏ومعا ذالك فقير وشايف لي فالبحر دانه

‏ياليت الصدر مثل المسجد اللي بالذكر محفوف
‏تمنثاه الطمأنينه من اركانه الى اركانه

‏تيممت ودعيت الدعوه اللي من صميم الجوف
‏عسى رب السماء من دونها ما صك بيبانه

‏وعرفت ان بيت ربي هو ملاذ اللي عليه ظروف
‏وشعرت ان الحياة الخارجيه وسط زنزانه

‏حزنت اني من اللي جاو للمسجد مجي ضيوف
‏وحسدت اللي يشوف ان روضة المحراب مسكانه

‏اسوي المعصيه وانشد ضميري نشدت الملقوف
‏واعرف الرد ! يعني نشدتي له مالها خانه

‏ضميري لا سكت لازم يجيني من سكاته خوف
‏وليا منه تكلم مستحيل اسلم من لسانه

‏من التوبه قريّب جعل مايصدفني الصادوف
‏قبل لا أفارق الدنيا فراقٍ ما اعرف اوااانه

‏اخاف من النهار اللي جميع الناس فيه وقوف
‏هنا وقت الحساب وواجهه الديان ديانه

‏لا جات أمة محمد بالعمل جعل العمل مخلوف
‏وانا ماجبت معي الا الثقه فالله سبحانه !!

‏ ياصلى الله على وجه الرسول المصطفى المعروف
‏شفيعي في نهارٍ مايزل الحق ميزانه

‏هو اللي يوم غيره بالشفاعه ماهو بمكلوف
‏بيشفع لأمته يوم القيامه بدت اقرانه

‏لا قلت اني عقب ما أموت بملى العين منه شوف
‏تهاونت الحساب وطاب موتي على شانه

‏يشوف الشاعر ان الوصف صار اصغر من الموصوف
‏ليا جا يمدح اللي سيرته بالطيب رنانه

‏عجل وشلون باللي يملك الأجيال بالمعروف
‏مثل مايملك الألباب بأخلاقه وبأحسانه

‏نعرفه من كلام الكتب واقصاها نقط وحروف
‏عجل وشلون باللي صاحبوه وكأنو أوزانه

‏من فراقه بكى الغصن المشوك بكيت الملهوف
‏عجل وشلون مايبكي عليه انسان وانسانه

‏بكى شوقاً لرؤيتنا وحن من وضعنا المأسوف
‏لو انه شافنا ما هلت دموعه من أعيانه

‏حن اطيبنا يشوف الظلم لكن كنه المكتوف
‏ياطيبه لو يشارك خاطر المظلوم بأحزانه

‏رسول الله هو داحر طغاه هو نصير ضعوف
‏هو أشرف من خلق وأذل كل الخلق عدوانه

‏تباهى الأرض به بين السماوات بغرور ونوف
‏وعاقبها الولي على الغرور ب حر فقدانه

‏عرج به للسماء كأنه من حدود الوطاء مخطوف
‏ونزل للأرض قدها فيه مفجوعه وشفقانه

‏هو الأول بالأخلاق الحميده والنقا المكشوف
‏مع انه اخر رسول وجاء يبلغ بأخر ديانه

‏سجله بالفخر مافيه مجدٍ ماهو بمضيوف
‏هو اطيب من يفاخر واطيب الجدان جدانه

‏ترك مرباه يوم ان المصايب جمرها مهفوف
‏ورجع له عقب ماصح الصحيح وحطم أوثانه

‏على لزاز ياكم لز جمعٍ للعداء مصفوف
‏لا وجّه غرته لصفوفهم ما جوّد أعنانه

‏عقب ماوقفوا مثل البناء المتماسك المرصوف
‏هدم صف العداء خير الأنام بحافر أحصانه

‏هم اللي واجهوه بظلم ويدين وشعر وسيوف
‏وعفى عنهم لوجه الله مع انه كان بأمكانه

‏ينزل سيفه اللي يفصل المفصل من الغضروف
‏على كل رقبه والراي راي الله وسلطانه

‏ومن الكعبه صدح صوت الأذان الشاجي المألوف
‏وشافو كل اهل مكه بلال وسمعوا أذانه
- علي آل صبيح في رسول الله ﷺ