صبحكم الله بالخير

الله على ذاك الطريق الي مانبغا منتهاه
‏يادرةٍ ناقش على صدر القصيد حروفها

‏رحنا ولا راح الشعور ولاسترحنا من وذاه
‏الحظ مايعطي المواليف قلب اشفوفها

‏في بحر عينيك الجميله مانفع طوق النجاه
‏سحرٍ تلحفه الجفون الي تشيل سيوفها

‏لا تلحقيني لوم فالي فات يامال الغناه
‏انا شجاعٍ واجه الايام .. تحت ظروفها

‏راضي لو اشوف الهجر واللوم واعوف الحياه
‏الا الدموع الي على خدك .. لاعاد اشوفها
- هاني حمّاد

ضاق صدري من غثى الوقت عقب الاتساع
‏جعل يسقى يوم عندي على الضيقه مدا

‏الطواري تدمر الحال بعد الانقطاع
‏اشهد ان ما عاد لي من طواريك مغدا

‏ودي ابوج التخاتيخ واذب الرفاع
‏واستعيد اللي لـ ماضيه واذكاره صدا

‏يمكن القى جرعة امال وشعور اقتناع
‏والعقل يسترجع الوعي والقلب يهدا

‏لا متى وانا احسن الظن واحسن الاستماع
‏والتمس لك عذر واعذرك واسجل فدا

‏اعتذر ما عاد به عذر قدر المستطاع
‏انت معك الصبر تعليقه وضيعت جدا

‏ان قدرت ازيح عن عتمت الشك القناع
‏ما قدرت ابدل الطيب الاول بـ الردى

‏الهوى زهرة شبابه تنسيك الضياع
‏ليتني ما طعت قلبي وجنبت القدا

‏مايفيد اللي يحبون طول الاجتماع
‏لازم يلبون يوم التفراق الندا

‏كل يوم ارسم بروفه على هيئة وداع
‏داري ان الحب تاليه فرقا وزهدا ):
- محسن بن مترك

صبحكم الله بالخير

‏نويت اصبر على كل الجروح النازفه : لله
‏عسى لله : ما يبقى جروح وللوجع بينه

‏انا ذاك الغريب الي خذا منْه الطريق اقصاه
‏وعن ارصفة الطريق مقصرٍ في حق رجلينه

‏طرق كل الدروب وصارت وجيه الدروب اشباه
‏وبقى من خطوته نصف التعب وتطيح من عينه

‏هو اكثر من يقول "بخير" واكثر من يحسّ بـ" آه"
‏يبيّن ثلث من صدق الوجع ويدسّ ثلثينه

‏رهن للمتعبين من الحنين غوايته وخطاه
‏وصار اول مطاف لشرهة احساسه وغاوينه

‏حياته ، غربته ، حزنه ، شعوره ، سيرته ، مرباه
‏دروبه ، سجته ، حلمه ، صدى صوته ، عناوينه

‏يهيجن كل ما عنّا شعوره طرقه ومعناه
‏ما دام الشعر يجري في دماه وفي شرايينه

‏وهو يا "بنت" يوم انّه يغنّي لك على ليلاه
‏تبنّي غربته يا "بنت" ، وإلاّ لا تحبينه!

‏ولا يشغلك تغريّب الاسامي والزمن سمّاه
‏تخطري واهجه واقري عليه ولا تسمينه

‏ترى ماهو حرام يصير حتى موطنه منفاه
‏حرام انّه يمر بحرّ شوق ! ——وما تمرينه
- نايف عبدالرحمن

جميلة جدًا

‏الطروق جزال و الطرقة بعيدة
‏والليالي حْداد وجد و ليل حالك

‏و الكلام اللي أقوله ما أعيده
‏مستعد أرجع و أعيده لك لحالك

‏بدويٍ تعرف البيداء قصيده
‏ساق روحه لين فيت في ظلالك

‏في معالم عينك النجلاء شديده
‏أرمشي و استسقي الماء من خلالك

‏وش تصير الروح لك "أمر"و "عقيدة"
‏ والمنية و (المهالك) و (المها،لك)

‏شاعرك قدت مساريه البديدة
‏لين شاف إنك قمر والليل شالك

‏جاء يبايع ضحكة الثغر الفقيده
‏وين ما زخت مطرك وطاب فالك

‏إن جفاك يذوب دمعه في وريده
‏و إن نصاك يصب روحه في دلالك

‏و إن كسر ضلع وتحولتي قصيدة
‏قال لك جرحٍ شكى منك وشكالك
- شاهر اللغبة

استمتعوا بقراءة هذه الجميلة

مرحبا

- آتخيّل -

من يدري ان الحبّ فنجاله مهيّل
لا يحرم الغالي من ملاقاة غالي

الحُبّ مهما زاد! بعيوني قليّل
وقلبي شغوف بحبّك مْن اول وتالي

حتى لو اني من مجافاك آتويّل
انت انت ماغيرك مناي وراس مالي

ياليتني بعيونك الثنتين أقيّل
ماكان ساهرت العنا بـ قشر الليالي

من قلت لقيانا -قدر- وآنا اتحيّل
وارسم خيالاتي واعلّقها قبالي

وارقص من الفرحه واغني وآتميّل
لا مرّني طيفك وبالغ في دلالي

وصرت آتخيّل .. واتخيّل .. واتخيّل
يوم اللقى مرهون في واسع خيالي

‏تمرّ الرِّيح فـ غصون الشعور وتستفزّ أسماي
‏وألوِّح من حقوق خْطاك، لين حقوق تشرِيفك

‏حبيبي وأنت"كلّ اللي مضَى لي والزمان الجاي"
‏ترى من غير تكلِيْف الحياة أشْعُر بـ تكلِيْفك

‏لقيتك فجرٍ يْدفّ الصّباح لـْ معترك ظلماي
‏وأنا ما ودي أشرح وأنت عاد يطول تعرِيْفك

‏عرَفتْ إنّي معاك إنسان قبل أشوف فيك إعداي
‏وخذيت الأرض مسعى لين مادت بي مشارِيْفك
‏
‏أحبّك كلّما سَال السكون، وضاع فيك حْكاي
‏وأحنّك عن تصاريف السّنين وعن تصارِيْفك

‏تزِلّ الناس وأحلام المحبَّة تسْتِلذّ خْطاي
‏وإذا ما مرِّني بارق عيونك؟ مرِّني طَيْفك

‏معي نجمتْك تغرِيْبة شعور، وفضلها مسراي
‏أجي ضيف الظنون أحيَانْ، وأحيانًا أنا ضيفك

‏وش اللي ما بقى؟ والعمر عاري، والقَدَر جرّاي
‏أنا خايف بعد زَيف العيون.. يْغرِّني زيْفك

‏أشوفك حظْوَة أيّامي، وضحكٍ يلْتعِج بشفاي
‏رغم كلّ الشعور اللي معاك، ورغم تألِيْفك

‏أردِّك وأنت فـ عيوني: ديار أحبابي، ومرباي
‏وطيرٍ ما شدَى إلا فوق غصنك واِهتوى رِيْفك

‏غريبة لو قدرت تْمِدّ صفحك.. في رجا يمناي
‏إذا حتّى ربيعك خفت منه، وخفت من صيْفك!

‏حبيبي لا تناسى ضحكتي، وأيَّامي، ومسعاي
‏وأنا حتى إليَا هبّ النسيم.. أذكر معارِيْفك!
- محمد السلطان

"لقيتك فجرٍ يْدفّ الصّباح لـْ معترك ظلماي
‏وأنا ما ودي أشرح وأنت عاد يطول تعرِيْفك" الله الله

مرحبا

يا أخير الكلام و منتهى دورة الأفلاك
‏عسى خير غيرك شر وجروحك الخيرة

‏أموتك شهيد وتبنعث [لهفتي] وأحياك
‏وأعيشك حياة و لذة "العمر" تعميرة

‏يخوفني إني قبل لا أفارقك و أنساك
‏تمرين -عادي- وأنتِ "الشك" و "الغيرة"
- شاهر اللغبة

‏كيف اجهلك وانت الهوى واحيان ملفاح النسيم
‏لا زال جرحك غالي، ولا زلت ماحول الكرا

‏مريت حلمٍ ما يمر، يا سيّد الفجر العتيم
‏طاولت فيه الي مضى بين الثريا والثرى
‏فيك الهلا، يا دعوةٍ مابين زمزم والحطيم
‏ما حرّك الساكن سوا طرياك يا اغلى من طرا
‏وانا قبل قد قلت لك من قلب والله العظيم
‏الشعر دمعة حانية والليل للعاشق ذرا !
‏ايه اذكرك مزن المطر واذكرك جمرة من هشيم
‏وايه ارقبك في كل درب وكل ليلٍ ينسرا
‏يا اوفى الجروح الدافية لا تنزع الشاش القديم
‏احياك عمرٍ كامل،
‏ولليوم جرحك ما برا
- محمد منيف

جميلة جدًا

صبحكم الله بالخير♥️

اللهم صلِّ وسلم وبارك على نبينا محمد