مرحبا

لو جيت ادور لصوتي فالحناجر بديل
‏اخترت صوت يهب الحزن من مطلعه

‏اخترت لي ضحكةٍ صفراء وظلٍ هزيل
‏وجرح ٍ يوزّع على كل البلاد وجعه

‏الغاير المندفن والوارف المستحيل
‏هذا مصبه وسط روحي وذا منبعه
- نويحي البديري

جميله جدًا

‏إنتظرتك و استقر الماء… على .. جفن السحابة
‏أمطريني ، جيت أدور ذاهبة وأروي وسيمة

‏يا قريحة من شرب «مِن فَاك»«مَنْفَاك»و سرى به
‏السماء يشره علي بدره ويغريني أديمه
‏
‏كلما هبت رياحين الصَّبا وسم الصبابة
‏قمت أراجع عقدي الثالث وراعده و رزيمه

‏وش ورا الأعراب غير القوس و إحساس الربابة
‏والشديد اللي طوى "بيت الشِّعر" وشداد ريمة

‏نادميني كل ما -طاح الحطب- وأورقت غابة
‏وعاتبيني كل ما «ذعذع»من الغربي نسيمه

‏كون"موقعة الجُمل" صدرٍ غفى الفقد "وصحا/به"
‏معركة [صوتي]بها نصر و [صدى]صوتي هزيمة

‏جيت أسابق بالحياة الموت تدوين وخطابة
‏مستميتٍ شفت في (موتي) ورا معناك {قيمة}

‏كيف أجنِّب عن طعون الحرف و رموشك نصابة
‏لي عيون تشوف ، لكنها معاك أنتِ "كريمة"

‏آتجاوز كل فتق أخضر و أغني في رحابه
‏ليت شعري هو"طوى الوادي"و حي وآمن كليمه

‏ماتركتك في يدين الصمت عجز ولا مهابة
‏مستعد أرمي العصا "حية" شعر و البحر أهيمه

‏لكن اللي ردني و أضفى على الحزن الرتابة
‏واحدٍ قفت به الدنيا وروحه مستقيمة

‏قلت بعده كل شيٍ خير مابه ترك مابه
‏لين مابقى الزمن مني سوى نسخة قديمة

‏ الديار اللي "مضاربها" مع "طعوني" تشابه
‏لو لمست جبالها يمكن تزرفل لي محيمة

‏والدموع اللي ورا عينك مكاتيب و كآبة
‏خايف إني لو كتبت إحساسها تطلع يتيمة

‏شاعرك لو روَّق البيت القوي و أجلى ركابه
‏ذاخرٍ لك قفلةٍ يحيي بها عظامٍ رميمة
- شاهر اللغبة

رائعه للغاية

صبحكم الله بالخير♥️

ردية بين مزيد الوسمي و صالح النشيرا

اتعب وانا اقول الله، ماشاء الله تبارك الله

صبحكم الله بالخير

اللهم صلِّ وسلم وبارك على نبينا محمد

يارب عطني اكثر مْن اللي رجيت
وانت الكريم اللي عطاءه سرمدي

آنا امنياتي اكبر من اللي سعيت
ياربّ تشرق لي مثل صبحٍ ندي

دخيلك من الدرب لا مال وبكيت
واعووذ بك ياربّ من حظٍّ ردي

طلبتك تحقق دعاي اللي دعيت
تعبت اشيل احلامي براحة يدي

مرحبا

صدقة جاريه عن والد صديقتي رحمه الله، ارجو منكم المساهمه في نشره 🙏🏻💗

معذور قلبي لو بكى فـ فراقهم عذرٍ وجيه
راحوا وغزّة عقبهم لبْست لنا ثوب الحداد

غابوا وما غابت جمايلهم على الشخص النزيه
كانوا ضماد لجرحنا ولعجزنا كانوا عتاد

اخوان واجتمعوا لوجه الله وافترقوا عليه
الله يجمعهم سوى في جنّته يوم التناد

- الشهداء صالح الجعفراوي وأنس الشريف رحمهم الله

صبحكم الله بالخير

أوجدي مايسعد الذات ياذات الخمار
‏في حبال الوصل كم امنية .. علّقتها

‏الليال اللي لها طعم في الدنيا قصار
‏خايف ان العمر يمضي وانا ما ذقتها

‏أي حاجه ترتبط فيك تشعر بـ افتخار
‏وأي كلمة ماتجي منك .. ما صدّقتها

‏والله ان الشامه اللي على الخد اليسار
‏فارقتني راحة البال .. من فارقتها

‏ما يداوي جرحي الا العيون اللي تغار
‏وابتسامة وجهك اللي بعدك اشتقتها

‏من تحبينه ما يعرف شعور الانكسار
‏ما عليه من الاوادم ، ولا من مقتها

‏لو دريت ان باقي شوي ويفوت القطار
‏كان ما جمّعت احاسيسي .. وفرّقتها

‏مْتردد في قراري ، ولا عندي خيار
‏اغرقتني لحظة الصمت واستغرقتها

‏ما يعيق الحلم غير التردّد في القرار
‏ليتني ملّيت من حيرتي .. و أعتقتها

‏كنت محتاجك تهدّين روعي بأختصار
‏يوم غبتي ما بقى ضيقةٍ ما ضقتها

‏عاد انا ضيقي يبيّن مثل شمس النهار
‏وأسمح من الأمنية كان .. ما حقّقتها

‏كل رغبه لو تجيني بعد طول انتظار
‏ما تعادل لذة اللي تجي .. في وقتها
- فارس عمر

‏"والله ان الشامه اللي على الخد اليسار
‏فارقتني راحة البال .. من فارقتها " ااااالله!

مع اني خابر ان الشمس عقب غيابها بتبين
‏احس انها ليا غابت من عيوني تودعني

‏واشك انها ليا غابت تروح وتطرد المقفين
‏وانا الي شيمتي عن طردت المقفين تمنعني

‏ذرفت الدمعه الي عالقه حروه ثلاث سنين
‏لو ان الدمعه الي تنذرف ماهي ترجعني

‏ابي ذيك الدروب الي توديني ولا ادري وين
‏انا محتتاج دربٍ كل ماجيته يضيعني

‏احبك كثر ماذعذع هواك وسال دمع العين
‏وكثر ماقلت انت تحبني وتقوللي يعني
- سعد خالد