‏يحاوطك المطر من كل يمه ، وتهواك النود
‏وانا روحي عليك من الوله ولها مثل ماهي

‏وحيدٍ دون ضحكك لو بقى فالعالمين حشود
‏غلاك اللي تربّع في حشاي الآمر الناهي

‏رجاي من البشاير ما يسر الخاطر المعقود
‏وانا قلبي تحت رحمة هواك وطرفك الساهي

‏ياكثر اللي ذبحني يوم اعيّن ،، بابك المسدود
‏وانا مالي غناةٍ عن وجود المعدن الزاهي

‏لو يزعلك شي ارخصت لك عمري ، ويمكن زود
‏على شان العيون يحق اموت .. اموت متباهي

‏انا ش اللي مريحني لا جيت الا العيون السود
‏ولامع ثغرك ، وكلمه من شفاك ومن شفاهي

‏ومجدولٍ تصبّب ، فاح ريحان ومكاسر عود
‏عن البرد اختلي به وآغفى ويطول متواهي

‏مقر النور مركازة تراقي عنقك الممهود
‏بعد ما يلتهي منها النبيه .. تنبّه اللاهي

‏وانا ضاميك سُقيا زمزم الماء صافي القرهود
‏بعد قيضٍ خطف لون السنين بعذره الواهي

‏تواكبك الغصون بكل لفحه من شذاك تهود
‏تقول ان قدّها مع قدّك الميّاس متماهي

‏وش النجم البعيد و طمعته دام القمر موجود
‏قسم بالله ما حولك شبيه ولا لك مضاهي

‏احبك ، والله اني ما استحيت من الغلا والجود
‏ارددها وانا وجهي طويل ومحزمي راهي
- فيصل السور

هذا الصباح برعاية هذي الجميلة♥️

"وش النجم البعيد و طمعته دام القمر موجود
‏قسم بالله ما حولك شبيه ولا لك مضاهي " ااالله ااالله

صبحكم الله بالخير

اللهم صلِّ وسلم وبارك على نبينا محمد

هذا زعيم العرب رمز العدل والصلاح
‏فخر العروبة وقايدها وناموسها

‏على شداده ملوك الأرض تبغى السماح
‏ماعاد تقدر تجيب الراي من روسها

‏يامر بنزع السلاح وينزعون السلاح
‏ويامر بضبط النفوس وتضبط نفوسها🇸🇦
- مشاري محمد

حفيد من بندقه ماتضرب الا الدماغ
‏عاد الجزيره يدق الشر نادوسها

‏اميرنا اللي له بيوت المدايح تصاغ
‏عرّاب لـ النهضه اللي ماقفل قوسها

‏يمشي خطى الواثق اللي مامشى من فراغ
‏كن العدا لامشا يمشي على روسها
- عايض العاطفي

صباح الخير

للناس اللي عقلها براسها فقط :)

اللهم صلِّ وسلم وبارك على نبينا محمد

‏فيك تشخيص البصاير ولك مد الكفوف
‏يا كريمٍ يكرمون الأكارم من عطاه

‏عالم اللي ما اعلمه، شايف اللي ما نشوف
‏خافيٍ سره والأسرار ما هيب تخفاه

‏لا جفانا القل واللي روابعهم ضعوف
‏جعل ربي ما يرينا غضبه ولا جفاه

‏ولا انقفل بابٍ من الرزق حراسه وقوف
‏فِتّحت بيبان الأرزاق من كل اتجاه
- سعد بن جدلان رحمه الله

وداعك شوق وفراقك جفاف وذكرياتك جيد
‏ونسيانك مثل : كذبه تشيخ فـ بال قايلها
- خالد حسن

على وَسْق الليَالي ما لقيت من الحقايق عِدَّ
‏أباعد شرهتي والله عليم بـ ْشرهة أصحابي

‏أشوْف إنّ السنين الأوَّله: بَيْن الغضب، والوِدّ
‏مسافاتٍ.. تجدّد خطوتي، وتضيِّق رحَابي!

‏لو إني ما تدارَكتْ المشاعر، والسهر، والجِدّ
‏مضى عمْري وأنا أكسِّر غصوني، وأطرد أسرابي

‏حبيبي أعرِفك.. وأنت متوزِّع بَين ضدّ وضدّ
‏ولكني أحبَّك، وأعشق اِسمك يا أخر أحبابي

‏أمِلّ من الديَار الموْحشة، وأنزل معك، وأشدّ
‏عسى دارك تبرِّد خاطري.. وتداري أعصابي!

‏أمانة لا تجازي من يحبَّك.. والسنين تْعِدّ
‏ترى حزني قديم، وضحكتي ما شقها نابي..

‏أعرْفك سيفٍ -إن مرَّ الحنايا- كن ما له حدّ..
‏أنا أستعذّب طعونه لو يخطّ الموت فـْ كتابي..

‏أقول إنك سؤال أحيان، وأحيانًا أشوفك رَدّ
‏أنا يا الله وِش جاري علي، ووش هي أسبابي؟

‏لو إني ما تحايل.. مثل خصرك يا رهيْف القَدّ
‏لا زلت أشدّ لك شدّ الركاب لـْ حكمة أعرابي

‏عشان الضحكة اللي ما لها بين الخلايق نِدّ
‏أسوق أقصى معاذير الغلا، وأشدِّد ركابي

‏لو إنه ما وقف بيني وبينك فـ البسيطة: حَدّ
‏أنا اللي واقفٍ بيني وبينك: «دمعة أهدابي»

‏أنا أولى بالهوَى، ودموع عينك، والهدب، والخدّ!
‏مع إن العبرة (اللي في خفايا صوتك) أولى بي..

‏إذا إنك ما دريت عن الجروح الموْجِعة، والصدّ؟
‏جروحي يا حبيبي كانت أدرى فيك وأدرى بي!
- محمد السلطان

يوم أضيّع دروبي .. ليه أدور دليله ؟
‏دام سبة ضياعي عين نجلا و شامه
‏
‏مادريت إن قلبي كان .. راعي طويله
‏لين واجه جروح الفاتنه : بـ ابتسامه
‏
‏تدري ان "ذبحة الغيله" بـ يدها نبيله
‏ليتها ما درت واقفت بحب .. و كرامه
‏
‏جرحها إللي على صدري وسام و فضيله
‏و من مقامه لقى فـ القلب حسن الاقامه
‏
‏راح عمري أضم الجرح في ( كل ليله )
‏لين ما ناحت الذكرى .. بدال الحمامه

‏صح عيني .. عيون إللي مضيّع خليله
‏بس ماضاع منها غير " وجه السلامه "

‏هي كريمة وصل .. بس الليالي بخيله
‏عذرها إللي تقوله لا نويت ( الملامه )

‏عادها الغايه .. اللي تفتقد لـ الوسيله
‏لو رمتني مابين الغطرسه .. و الزعامه

‏كل ماقلت أبي لي نوض برقٍ و آخيله
‏قالت البرق والله في جبيني ( علامه )

‏جاعلٍ مابقى فالعمر رهن الجديله
‏جعلها ما توردني " حياض الندامه "
‏- عتيم

استمتعوا

"لين ما ناحت الذكرى .. بدال الحمامه" ابداع والله وعذوبه طاغية

ماشاء الله تبارك الله

صبحكم الله بالخير