‏يا ليلة العيد ماني فيك طماعة
‏ماعاد عدتي ثمينة مثل ماكنتي

‏فازت على اسعد ليالي هالسنه ساعة
‏قد قال فيها حبيبي : مالي إلا أنتي
- العنود الواصلية

والعيد باكر، يا ضوى العيد كلَّه
‏يشبهك بهجة، وابتسامة، وتذكار

‏لله سلام ونظرة عيون .. لله
‏يا آسرة قلب، ومشاعر، وأنظار

‏على رغم ان المُهنِّين : قلَّة
‏معاك احسّ اللي يحبوني كثار
- سعد يحيى

عذبة للغاية

مرحبا آل قصيدة

جيتكم محمّله بأعذب أبيات #العيد

‏يوم عيدي يوم أشوفك تشترين الغالي
‏من حلالي لو يروح العمر مديونيّة

‏أرثعي في راس مالي دام راسك مالي
‏لا يهمك كم بقى فأرصدتي البنكيّة

‏مثل ما أنتي تستحقين اسمي و موّالي
‏تستحقين الذهب و الماس و العيديّة
- سلطان الحوالي

هالابيات اذا ماصارت اهداء لأحبابكم بالله وش تهدونهم؟ جميلة جدًا وفيها مشاعر خيالية 💘

‏عيّدي يا ام الحسن لا مثلك ولا زيك
‏ما خبرت من البنات اللي حلاها قدك

‏هي وجيه الناس تاخذ نورها من ضيك؟
‏هو نهار العيد يبدا مشرقه من خدّك؟

‏جعلني فدوة عيون الفاتن المتشيك
‏والجواهر والذهب في جيدك وفي يدك
- جزاء الغيداني

‏أتودَّد ضحكتك، وأعشق قليلك
‏وأرتمي في رمش عينك، وأتقيَّد

‏من صباحك وش خذى طرَّاف ليلك؟
‏أنت لو سادَ الزعل فيك، متسيَّد..

‏يا حبيبي قبل لا تَطْلِق جديلك:
‏واحدٍ ما شاف وَجهك.. لا يعيَّد!
- محمد السلطان

‏منزالك الأهداب.. يا ناسع الجِيد
‏إليَا تجوَّد كلّ خلٍّ — فـ خلَّه!

‏أساوَم عيونك، وأداريك، وأزيد
‏أمانتك سيف الزعل، لا تسلَّه..

‏مهما تثنَّت في هوَاك العناقيْد
‏أنا أعْرِفك، وأعْرِف هوَاك، ومحلَّه

‏وشلون أساوِي ضحكتك فأوَّل العيد؟
‏وضحكتك أرقّ من أوَّل العيد كلَّه!
- محمد السلطان

رائعة للغاية ♥️

‏افك الستاير و انتظر من ورا الشباك
‏متى الليل يجبر خاطري واكسر سهاده

‏أنا أحق بـ أنسام الهوى من غصون الراك
‏لو أني ما اميل أن هبت النود بزيادة

‏معي بعد هذاك الغياب الطويل ادراك
‏ادراك اللي يدري بـ الخطا كل ماعاده

‏حبيبي من الـ لبيه لا يا عساه فداك
‏ماعندي لك الا قلبٍ بما نبض جاده

‏يناديني النسيان ، و اسمعّه ذكراك
‏على صوت فيروز وعلى القهوة السادة

‏يازين الحظوظ اللي رمتني على مرماك
‏عنودٍ تقود الصيد و اليوم منصاده

‏لا تستغرب اللهفه على ضحكتك و رضاك
‏رضاك السحاب و ضحكتك صوت رعاده

‏تماديت في قلبٍ جبره الحنين و جاك
‏و معجبني انه فيك " مسلوب الإرادة "

‏تمادى علي أكثر ، مادام الغلا ولاّك
‏لك القلب مرتاح و لك الروح منقادة

‏أحبك ، قبل لا أختار في وصلك و فرقاك
‏ولا فيه احد يختار موته و ميلاده

‏وش العيد و ايام الغلا و المطر لولاك ؟
‏يا فرحة ملذات العمر و أجمل أعياده

‏انا لو دريت اني بحبك قبل لا القاك
‏ماعشت آتمنى حظ ليلى و ولادة

‏ولو اني عرفت أسمك قبل طلة محياك
‏نقشت اول حروفه على عنقي قلادة
- العنود الواصلية

وش العيد و ايام الغلا و المطر لولاك ؟
‏يا فرحة ملذات العمر و أجمل أعياده
♥️♥️♥️♥️♥️♥️♥️♥️

هالقصيدة عذبة للغاية

‏قِدْ ضاع في غبْ الوساع المساويد
‏قلبٍ عجز ياصل لـ يابس ضفافك

‏من عقْب ماهو يقطع البيد .. والبيد
‏جفافها ماكنّه الّا جفافك

‏والله لو انّ الراحه فْـ راحة الايد
‏ماشفتني قدامك ، ولا خلافك

‏لكن وش اسوّي بقلبٍ مقيريد
‏يغليك ، وانت لـ دمّ الاجواد سافك

‏متعلّقٍ بين النحر ، واتلع الجيد
‏ولا طرا في باله انّه يعافك

‏تزعل ، وتنضب لا زعلت المواريد
‏على حبيبٍ يرتجيك ، ويخافك

‏وعلى رضى قلبك تفزّ الجراهيد
‏وان لاح برّاق الحيا من رهافك

‏يميل عودك ، واتّدلّى عناقيد
‏ثمرْك .. وآحنّ لـ مواسم قطافك

‏ لا صدفةٍ جابتْك .. ولا مواعيد
‏يبدو لي ان هذا هو آخر مطافك

‏يا سِعد عينٍ تلمحك في ضحى العيد
‏ترفل بنفنوفٍ توشّى عفافك

‏يا موقّف الدنيا ، واهلها على حيد
‏مافيه احد قدْ مرّ جنبك ، وطافك

‏محسود من شافك من بعيد لـ بعيد
‏وشلون عاد اللي من قريب شافك !
- فهد العيبان

اللي مفعل التنبيهات المعذره على الازعاج، بس والله تراه ازعاج حلو ولذيذ ☺️

عاد عيدك مايسة عود ممشوقة قوام
" يابعد من نقّشت بـ الخضاب كفوفها "

كل صبح يبين من غرّتك شمسه زمام
عاد كيف الليل الأسود مغير يحوفها

فارقة طبع وتواصيف وجدود ومقام
مثل فرق الليلة اللي نخاف نطوفها

تشبهين اعذب قصيده تبعها ياسلاااام
كانت وشاعرك مغمور ( وسط رفوفها )

تلبسين الثوب الأحمر تواضع واحترام
وانتي اول بنت نور الشفق نفنوفها !

من نعومة خدّك يجرّحه ريش النعام
مايليق بخدّك الا السحاب وصوفها

كيف اعرف ( الاستقامه ) وعودك ما استقام
كثّر الله خيري اللي عرفت حروفها

كنتي ولا زلتي ألطف من يدين السلام
طفلةٍ تْطفي سنا البرق ، دمعة خوفها

من يشوف رماح عينك عليّه بالحرام
مايغبط الهند برماحها وسيوفها

يوم قالو : دام عيدك ، ولله الدوام
قلت : مايهنا لي العيد لين آشوفها
- محمد بن فضاء

يوم قالو : دام عيدك ، ولله الدوام
قلت : مايهنا لي العيد لين آشوفهاااا ♥️
جميلة جدًا

بين طيّات الوجيه الضاحكه والمسفهلّه
ما عرفت أكتم هواي، ولا عرفت أخفي مرادي

مرحبا، ما مالت غصون الشجر وأشتاق ظلّه
للحميميّه تحته، وللقصيد، وللتهادي

بـ القبال اللي تعجز الناس عن خالي محلّه
والحضور اللي بَعدْه حضور خلق الله عادي

تشتهيك الأرض، وغيوم السماء، والكون كلّه
والذهول في وجهٍ أبطى يشتهي طلّتك هادي

في مراتع -معشر الشعّار- ما دوّرت حلّه
قبْل أهيم في لِبّتك وأضيع ما دوّرت وادي

ما على وجه البسيطه بنتٍ تضاهيك لِلّه
قولي لـ من يبغى مثيلك: لا حياة لمن تنادي

جيتي أشهى من كلامٍ ساقه الطاري لـ حلّه
وأشهى من "لبيّه" لامن جاوبت صوت المنادي

تعرف عيونك رهيف الحب فـ الصدر وتدّله
لين بعدك صرت أشوف الغيد باللون الرمادي

أقبلي والريح تجمع شعرك شوي وتفلّه
كم عطى ربي يدين الريح من حظ الأيادي

منتظر مثل الكريم اللي ما ردّه يوم قِلّه
لا معي قلبٍ يبور، ولا معي صبر المهادي

لا انسدل فستانك اللي يعقد الحبل ويحلّه
فوق لينٍ يشتهيه العطر مانيب متحادي

أقبلي والعيد عيدك والشِّعر دقّه وجلّه
معك صار العيد غير وفيك توّ العيد بادي
- ماجد النفيعي