فيه موضوع ياكل ويشرب معي من امس خلونا نتناقش فيه

النقد البناء وابداء الرأي بالشعر حق لكل متذوق بل لكل عربي، لكن أن يكون النقد وسيله للتعبير عن غيضك وحسدك من الشاعر هنا نحتاج نوقف شوي، النقاد يدرسون سنين أساليب وأدوات النقد حتى ينصفون الشاعر وقصيدته وتجي انت بتغريده ساخره تنسف الشاعر وقصيدته عشانك حسود وغيور هذا ماهو منطقي ولو قلت انا جاي انصف الشعر وافكه من المستشعرين ثق تمامًا انك تضره ما تنفعه

ملّينا من النقد العشوائي ومن النقد اللي يفضح حسد صاحبه

الادهى والأمر كلها من حسابات وهميه محد يطلع بحسابه الرسمي ويقول اللي يبي يقوله لأنه عارف ان ذي رخامه ما تطلع من رجال

والله ان طيب الاوادم ينعرف، واللي مخلص لك ينتقدك بالخاص وينصح لك باسلوب زين وتقبلها بصدر رحب لكن الخنبقه اللي صايره بتويتر حاليًا ما تصلح بالمره

على كثر الجراح اللي بقلبي ما شكيت الحال
تروح سنين من عمري ولا حسيت في راحه

سؤال الناس عن حالي؛ سؤالٍ موجع وقتّال
وجوابي لا اسألوني قلت: "مبسوطه ومرتاحه"

قدرت استر جروحي، ماقدرت استر شعورٍ سال
اكذّب صادق الاحساس والدمعات فضّاحه

جعل من كاد للقلب البري يوم الحشا منزال
يحاوطه الشقى والحزن من ذكراي يجتاحه

بتلميحه فهمت قلوب مشغلها الردى تحتال
وتعامى القلب يوم ان القلوب السود لمّاحه

كثر ما بهذلتني ذكرياتٍ عالقه فالبال
تناسيت الخطا لأني عن الزلّات دمّاحه

كبر معْي الشعور المرهق وكبْرَت معه الآمال
ياربِّي لا تخيّب شخص آماله هي سلاحه

باعيش العمر في رجوى الفرج لو انتظاري طال
ولو ان دوني ودونه باب؟ اكيد الصبر مفتاحه

رغم ما مرّ بي لازلت اتفيَّا الرجا والفال
ابتعافى و مصير القلب يتعافى من جراحه

2/6/2026 🎈

قصيده يوم الميلاد

مرحبا

معشر الشعراء حصلت رسمة شاعرية جدًا من يكتب عليها بيتين؟

كل مشاركه تنال على اعجابي بنشرها بإسم شاعرها

هذه الرسمة 💗

أجمل ما وصلني حتى الآن

إبداع والله

مرحبا
بمدد استقبال المشاركات
والله اني مستمتعه وانا اقرا لكم، حتى لو ما نشرتها فكره انكم حاولتوا تعني لي كثير

مع ذلك ما احب اجامل بالشعر لذلك بنشر اللي يجوز لي وينال اعجابي فقط💗

جميله للغاية

- مصعب خالد

تتجلى العذوبه في هذه الابيات، رااائعة

راائعة

مرحبا
انتهت الفقرة
شكرًا للجميع على المشاركه 💗

أعتق الليل يانور الصباح وتبدّد
ما بقى همّ ما برّك بدربي ذلوله

كل ما قلت زلّ الضيق قام يْتجدد
كل ما ارخى ضلام الليل الادلم سدوله

شدّ قلبٍ تبع طاري الحيا عقب شدّد
خطوةٍ ، يم منسوع الجدايل عجوله

ياهوى البال وجروح الهجر لو تَعدّد
أنت رجعتك تحيي قلبٍ أوشك ذبوله

غلّق الصبر وانا بين قارب وسدّد
وأنت لك خنجرٍ تِدمي وضحكه خجوله

يوم قفّيت .. كنّك بالخناجر تقدّد
قلب حزنه مقيم وضيّع اكثر حلوله

يعرف يحب ، لكن مايعرْف يْتودّد
خاف فقدك يوم إن الفقد ماكان حوله

كل ما جابك الطاري قعدت اتصدّد
كن مالك بوسط القلب صوله وجوله

ما اعتراك مْن الاشواق الثقيله وحدّد
قيمتي ، وايه انا اللي ما انّسى بالسهوله

وش بقى بعد ماقفّيت ، يا كود اردّد
ياسقى الله يوم أني عشت دور البطوله

واحدٍ قد وقف لـ رْضاك طاح متمدّد
ولا بقى في زهابه غير شعرٍ يقوله
- أَلِف

سوقي على بيت الغرام التحاسيف
يالي هدمتي كل شي بنيته
خسارتي في واقعي والتكاليف
عمر ن عطاك الود لين اشتويتيه
ازرعلك الورده وتقطف لي الزيف
ولا فيه شي مني الا خذيته
تسريبي النجمه ويسريبي الطيف
في ليلةََ ضو القمر محتويته
واعيد من ذكراك حلم المواليف
يالي معاهدني على مابغيته
واليوم اشوفك دون بابي مواقيف
واشوف منت لي بغيت وهويته
شجرت غرامك قطعتها العواصيف
وراح الظلال لي من اول بغيته
وفرقاك مثل البرد لمفارق الصيف
مانجتمع لو كل شيء نسيته
- الرشيدي

نختم بهذي المشاركه 💗