مرحبا

وإن تسلَّيتْ.. يا وَجهٍ يدفّ النوايب
الهبايب على بال القصِيْد أجوديَّة

جِيْت أدوَّر ورا جِنحك ربوع، وقرايب
والديار أمحلَتْ، وظنون بالي جرِيَّة

كيف أجوَّد عزومي، وأتلع الجِيْد غايب
قبل روحي تمادى بيْن جَرْح، وخطيَّة

لو أعرف القدَر عقب التعب ويش جايب؟
ما تعرَّضتْ.. تيار الهبوب القويَّة

يا سميّ الضيَا، ما أدري سمي الهبايب
وِش خذى منك عسَّاس الديار ضْحويَّة؟

يوم أوْقف لـْ عينك في وجيْه الكتايب
طِحت قدام رِمشك.. خالياتٍ يديَّه

أعرفك قبل أخلق لـ كلَّ كلمة سبايب..
من بنات الرياح -أردى وصوفك-: عبيَّة!

كنت أسايرك؛ ليْن أميل فوق الترايب
وأرتمي.. ليْن أردّ أوَّل نهارك عليَّه..

ليه قلبي غدى من صوتك العذب ذايب؟
والهوَى شرَق، وعيون المشاوِيْر حيَّة

جعلني لا تساقيت الظمأ، والمصايب
أتردَّد على غصنٍ — فدى العمر فيَّه!

لو تركت الديار، ولو عقرَت الركايب!
نَجد ما كانت إلَّا في حضورك عَذيَّة

رحت بينك وبيْن أوَّل حياتي: نهايب
ما معي حيلةٍ.. فـ دروْبك السرمديَّة

فالليالي شعورٍ.. يُوْدِع العقل شايب
وفي الموادع.. كلامٍ يوْرِث الكبد كيَّه

وأنت لولاك ما هلَّت عيون السحايب
ولا استمالت عصافيْرك: غصونٍ نديَّة

أتصدَّد، وأهاب من العيون النشايب!
وأنت حتى عيونك.. فـ الهوَى حاتميَّة

كلّ ما قلت: يفداك الوَطن والحبايب
شفتك الدار، وحدود الوَطن، والهويَّة
- محمد السلطان

-طيفه العسَّاس-

تضيق الاماكن لا استضاقت قلوب الناس
مثل ما استضاق البيت يومه خلا منَّه

تمنّن علي في جيته وانتخى الاحساس
يلوذ الشعور ان جات الاشياء على ظنَّه

لو اني تمنّنت وسقيته بنفس الكاس
يخوفني الحبّ ان غدا فـ آخره مِنَّه

تحمَّلت ما لايدركه قلبه الحسَّاس
أحنَّه، لو ان قلبي من الهجر ما حنَّه

تطيح الدموع ان زارني طيفه العسَّاس
واحسّه يلبّي داعي الشوق ويكنَّه

وأنا مع جروح البارحه كلّنا جِلَّاس
نعزّي بعض في قلب محدٍ درى عنَّه

صداع الفؤاد اقسى ألم من صداع الراس
اثر لا الألم واحد … ولا الونَّه الونَّه

وانا لو شكيت الحظ ما قد شكيت الباس
ولا قد سكبت الماء على نار "يمكنَّه"

حبيب الليال السود ماذاق طعم الياس
مأمّل على نار الهجر تنقلب جنَّه

واذا يعرف الهجر الصريح و رجع محتاس!
أعرف الغياب وأعرف آصدّ ممتنَّه

قناتي الأخرى لقصائدي :)
حياكم الله

‏لو يطول الغياب المرّ؟ ما طالت غرابيله
‏تجيبك دعوةٍ من رحت وصّتني عليها أمي

‏قطار العمر عدّانا ولازلت فـ رجا ليله
‏جعل ذعذاعها يوصل مداك وياخذك يمّي

‏كثر ما قلبك الولهان يأوي لي وآوي له
‏بكيتك يوم حظّي طاح في كفَّة بني عمي

صبحكم الله بالخير

اللهم صلِّ وسلم وبارك على نبينا محمد

مرحبا
استقبل طلبات كتابه القصايد والزفات مجددًا @maha031

وفقنا الله واياكم

"جعل صبحٍ ما يجيبك ولا يثبت غلاك
‏ما أتعايش مع نسيمه ولا أرقب جيّته"

صبحكم الله بالخير

اللهم صلِّ وسلم وبارك على نبينا محمد

مساكم الله بالخير

هين مردك للفرج يأكبر الضيق
دام الليالي تقتفيها ليالي

هي بس تبغى طول صبر وتوافيق
وأشيل هم الناس كله لحالي

وعمر المربط مايسوق المطاليق
والحر ماترضيه غير المعالي

ياصاحبي وإن زاد ظلم المخاليق
فلاتحسب إن الله عن الخلق سالي

والطيب يمحى العيب عرف ومواثيق
والا الخطا ماله على الطيب والي

واللي جرحني بين حدب ومعاليق
ماخفي عليك انه الى الحين غالي

ياحلمي اللي مالك اليوم تحقيق
حبك حقيقي بس وصلك خيالي

والحب يفضحني وان اخفيته يويق
وإن مامضالي بالوفا مابقالي

جرحتني مختار ياحالي الريق
واسامحك مجبور ياراس مالي

صوره ولا يحتاج الإحساس تعليق
أركض رجا ويطيح ميّس ظلالي

وان كان بيبان المشاعر مغاليق
فماهو جديد ان الزمن ماصفالي

ليت الهوى جمعه ولا فيه تفريق
أوليت ما للبعد فالقلب صالي

ياصاحبي وان شلت لك فوق ماطيق
فأنا لحالي جيت وأرحل لحالي

و هيّن مرده ينتهي كل هالضيق
وأقول للمره الأخيره تعالي
- عبدالمحسن بن سعيد

"عمر المربط مايسوق المطاليق
والحر ماترضيه غير المعالي" ❤️‍🔥

سلسه ورائعة

مرحبا

أحب مره لما اضحك من شدة طربي على القصيدة، آخ هذي الضحكة اشتقت لها جدًا