مشاركتي 🇸🇦♥️

‏يعيش البيرق اللي في حروفه طاله ونوماس
‏لا جا بين البيارق فارقً في مجده لحاله 🇸🇦

‏تباهي وش يردك بالمباهى قّدم جمع الناس
‏فرقك الله بـ بيت الله وخصك حافظً جاله

‏يادار المعرفه وديار ابوي وكل شامخ راس
‏يامنصى العلم لا ضاقت الامْور وكبرت القاله

‏نسيمك غير حتى في رحابك تّحلو الانفاس
‏عليك المجد يبني مطلعه ويجر مواله

‏ يلبسك الفخر يـ اغلى معازيبه عقود الماس
‏يباهي بـ ارثّك اللي طالته ما مثلها طاله

‏جمع شملك معزي من شموخ وقو عزم وباس
‏بـ سيفه لين صار الجهل يخشى شوفة ظلاله

‏تحت حكم الامام اللي خذاها من يدين الياس
‏ردع عنها الظلام وعزها من حاله وماله

‏معزي واسمه اكبر من كلامً داخل الاقواس
‏حفظ حد البلاد .. وواصلو من عقبه عياله

‏تحت ظل الملوك نعيش نعمه مالها مقياس
‏ولا ننشد من اللي ناشدً ابوه عن خاله

‏فـ ظلك يا ملكنا تّزهر اللي فـ التراب يّباس
‏وتعيش الدار من رؤية ولي العهد مختاله
- محمد بن عديس

جميلة جدًا

قديمي لا تخاف سهوم وَقتك والهوَى لا هبت
أنا أداري مقامي وأتعلَّق شرهة حْبالك

عسى يفدى تصارِيفك شبابي لا كبرت، وْشبت
أعرْفك وأتردَّد بَيْن شمسك، وأوَّل ظْلالك!

تقول إن الوِطن فكرة! وأقول إن الوَطن لا ارتبْت؟
محطَّات الرِّضا، وأقصى طموحك، وأجمل أمالك

تخيَّر ما بدأ لك في يديني والمدى، والخَبت
ولكن لا تساومني.. على داري، وترحالك..

وَطن فيك أتوطَّن عن ظماي من الجروح إن غبت
أحبّك قبل أقيِّد خطوتي في سَفحك، وجالك

أبدّل كلّ طيرٍ في سماي وكلّ غصن، ونبت
ولا أبدَّل صحارِيْك -المَوَات- وسافي رمالك!

أتوب من الهوَى، ومن الزعل، ومن الغلا، ما تبت..
عن فجوْجك، وأهلْك، وخيمتك، وأرْضك، ومدهالك!

يجيب الذلّ -خوَّان العهْد- يا موطني ما جبت
سوى عمرٍ أسوْقه (في ثراك) لـ كبر منزالك..

أنا يا تربة أيَّام الصِّبا.. لا طاب نَبتك طِبْت
إلين اليوم أشوْف إن اِعتناق الحقّ فـ أغلالك!

ترى بعض الشعور اللي خذاني من يدين الكبت
أحقّ إني أقوْله في هواك لـ حضرة إجلالك..

عساني كلّ ما ذابت عيوني يا دياري ذِبت
ما بين رمالك، وبحرك، وشمسك وأطول جبالك..

تراني لو كتبت من القصايد -يا وَطن- وأسهبْت
أحسّ إني إلين اليوم عاجز لا أحصي أفضالك!
- محمد السلطان

استمتعوا بالله في قراءه هالتحفة الفنية

‏تعيشين يامهد العروبه ، عتيقة جوخ
‏وعارضك تقصر بؤرة الشرّ من دونه

‏ولا زال في نجد المشرّف عيال شيوخ
‏ليا ضاع راي الشرق الأوسط يدلّونه
- محمد بن فضاء

‏"صباح الخير من قلبٍ يشوف إن الحياة بخير
‏مادام إن الغلا محفوظ والدولة - سعودية- " 🇸🇦

صبحكم الله بالخير

‏تبسمي لا لمحتي جرح وضماد
‏يا ام الرموش المراهيش الظليله

‏بين الحضور الكريم وبين الأعياد
‏مالك بحكم القدر قوة و حيلة

‏الليلة لـ فرحتك فالروح ميعاد
‏ووجيه أعاديك مصفوعه ذليله

‏حبيبتي كل عام ثيابك جداد
‏ومقدسة في عيوني يا نبيله

‏لليوم عنقا عيوف عيونك حداد
‏رغم ان سته وتسعينك جميلة

‏شرع الله قلادتك و زمامك الضاد
‏ورملك مزعفر وهملولك فضيلة

‏وأنفاسك المفعمه بالمسك والكاد
‏تعطر الشرق الأوسط كل ليلة

‏اخذتي الحب فأول عمرك عناد
‏ولا فيه قصة هوى ماهي طويلة

‏هامت حكومات فيك وهامو أفراد
‏وكتبك ربي لأبو تركي حليله

‏كان الإمام يخطب ودك بالأمجاد
‏وكنتي هنوفٍ تكدين الجديلة

‏فداك بالعمر وبركبٍ بعد قاد
‏قليل لولا المراهيف الصقيله

‏والنصر مهوب مربوطٍ بالاعداد
‏والصحبة الصالحة دايم قليله

‏بأسم الولا والبرا والملح والزاد
‏أدنى أربعينه يشب به الفتيلة

‏عرب مافيهم بلوش وفرس وأكراد
‏تعاهدوا ليلة ، يضيع الدليلة

‏مانرجع الا بعرش وشعب وبلاد
‏و برأس عجلان وعناد الأصيله

‏يسابقون الصباح ، لحلم ميلاد
‏حقيقةٍ تصبح لمقرن سليلة

‏ويْاعنك ما معزي بشارد ووراد
‏ولاّ طعن ( دونها ) بالسيف غيله

‏ضربه بالأجرب صعق صنعاء وبغداد
‏وخلا القبايل بمملكته قبيله

‏الله يعطر ثرى قبره ،، بعد ساد
‏تقرب الله بالأعمال الجليلة

‏وتوارثوا روحه الابناء والأحفاد
‏وحنا ورثنا المواقيف الجزيله

‏هذا ولانا يرفرف فوق الأشهاد
‏وهذا وفاهم مثل وبل المخيلة

‏واللي يريد ببلدنا ظلم وألحاد
‏يحسب حساب الخفيفة والثقيلة
‏- فيصل مهنا

من القصايد الوطنية المفضلة♥️🇸🇦

‏"شفتو هذا اللي حاط بشته وسادة
‏تراه يحكمها من الهيه للهيه

‏وبشته يظل الشعوب ويعز قاده
‏وكفّه يغيث الشرق الأوسط ويغنيه"

في دربكم يا راحلين مناكيف
تالي ليالي القيظ وأول خريفه

ردوا سلام أهل القلوب المواليف
على الوليف اللي نشد عن وليفه

لعذوق النخيل المهانيف ردوه
وعلى القصور اللي بوادي حنيفة

دارٍ لها بالقلب عشق وتكاليف
يا عل عين ما هوتها كفيفه

طبنا وشبنا وأتعبتنا المشاريف
والمرقب العالي هبوبه عنيفه

يا واردين العد كفوا المغاريف
اللي بقى دمع هماج ذريفه

والله لو دمعي يغيث الملاهيف
قطعت عرقي لين يصفى نزيفه

ياحظ من لاعرف منهو ولا شيف
إن طاب يحمد وإن تردى بكيفه

حنا ورثنا المجد عظم وغضاريف
لا ما ورثنا المجد تاج وقطيفه
- البدر

دارٍ لها بالقلب عشق وتكاليف
يا علّ عينٍ ما هوتها كفيفه🤍 🇸🇦

‏الله اكبر والشموخ اللي خطب ود السياده
‏مايعرف اللي من الضيقه على المرقاب عدّا

‏ياقف اللي للبلاد يسل سيفه من غماده
‏يدري ان السيف لا طول فـ وسط الغمد صدا

‏وش يقول اللي السحاب يعانق بشده بلاده
‏والفخر لا مرهم ما مر يومين وتعدا

‏في ذرا سلمان ابن عبدالعزيز وفي شداده
‏نعتلي صرح الشموخ ونكسب المجد المبدا

‏الزعيم اللي حباه الله بشعب وروس قاده
‏كل يوم يرددون يعيش حاكمنا المفدى

‏ياولي العهد يارمز السياده والاراده
‏ملهم العالم وفيك اصحاب الإنجاز اتقدا

‏كل يوم ومجدك المعمور قابل للزياده
‏لو يهدي الوقت فالإنجاز قلت شلون هدا

‏الوطن والدين والشعب السعودي وامتداده
‏دونها ياسيدي من كيد الأخصام اتصدا

‏السعودي مستحيل ينام مايبلغ مراده
‏قصتن يدري بها اللي لو ماجاب علوم ودا

‏ياقف الشعب السعودي صف من دون القياده
‏والقياده دون حلم الشعب تاقف واتحدا
- سلطان العقل

راائعة

‏قد مشينا فيك حافين في وقت الجهام
‏قد شرينا الموت من دونك بنعش وكفن

‏قد نثرنا لأجلك النور في عيون الظلام
‏واجتمعنا في قراياك وأصبحنا مدن

‏قد جمعنا شوقنا لك مواعيدٍ حيام
‏ وقد حلمنا بك مثل حلمنا بجنة عدن

‏والله إنا مالقينا مثل بردك سلام
‏والله إنا ماعشقنا وطن مثلك وطن
- بندر المحيا

حبيبتي .. والحب ماهو شويّه
‏ماله حدود وما تخطّه أيادي

‏ روحي ولا تغلى عليها.. هديّه
‏ حبي لها مافيه موقف حيادي

‏احبها فطره وعشق وحَميّه
‏ واهيم فيها وارفع الصوت شادي

‏لرمالها لحدودها الساحليه
‏ قرية ، مدينه ، رابيه ، سفح ، وادي
‏- فهد المساعد

للاعياد غنّا في نخيلك حفيف النود
قبل يطرق بحور القصيد وتفيض اشعار

تعطر بك التاريخ بالمسك والكمبود
وتفاخر بك الامه على نايد الاقطار

تحت حكم اخو نوره زمانك رخى ومْهود
فجوجك سما يا دارنا والنجوم ديار

نسايمك مثل الما على الخاطر الملهود
مآثرْك مثل الكيف والعود للخطار

لياليك غرّا مابها يالمليحه سود
تغطرف لها القمرى تشعشع بها الانوار

علمك يْتطارخ في سما المجد دون حدود
توّمن به الساري .. تسامر به السمار

هذي نخلتِك رمز العروبه مغنّ الجود
ومن دونها السيفين تردع عدّو الدار

شمالك وسيع الصدر وارضه مراتع ذود
صدح بالهلا والبنّ والهيل والمسمار

وعلى حدك الثاني بسدّ الرعود رعود
جنوبك مصيف الورد والغيم والامطار

واساس الحضاره والرغد شرقك المنشود
حضارتك منك وفيك ما جات باستعمار

ولحجازك النايف وجيه السنين شهود
تسامى فبيتين الله وسيرة المختار

وفي نجدك التاريخ .. والحاضر المشهود :
خذا من طويق المجد والعزم والاصرار

ولانا لحكامك محبه وورث جدود
نماري ونفخر في نباهم خفى واجهار

يومنّ الجزيره عجّها الملح والبارود
والايام مابين المغازي ورد الثار

ظهر لك معزي واحتمى بسيفه المجرود
حدود الجزيره لين صار الامان شْعار

بعد ثبّت ركونك بشرع الله المعبود
توارثك من عقبه حرار ٍمن اصل احرار

حرارٍ تعلوّا بك للامجاد خمس عهود
وهذَا العهْد تحت قيادة الحاكم البيطار

مليك ٍبحق الدين أمضى من العبرود
وعلى الحق لال سعود وقفه وطبع وكار

للاحلام درب الشعب في دبرته ممهود
وللامجاد والرؤيه تقدم سنده البار

وليّ العهد رمز المفاخر شبيه العود
له الشعر والتاريخ ياقف فخر وإكبار

مواقيفه تضد الضديد وتبلّ كبود
وقف دون حد الدين والمملكه والجار

تباهي على العالم تحت راية ابن سعود
يا دار ٍ على حدانها نرخص الاعمار
- صالح الهويملي