أداريك وأداري دموعك لا تسال
أطيح من طولي لو دمعك جرى

حفظت طاريك عن هرج الأنذال
وحطيتك بوجهٍ ما بـ يوم افترى

فيني من الأسئلـه حيرة سؤال
ولا أدري كيف سـؤالي أشهره

هل حبك حوالين قلبي أغلال
أو إنه مرض حال فيني واعترى؟

ما أدري شورا صوتك المحتال
لا عرفت نواياك ولا ليلي سرى

دامك ظلمتيني وين ألقى عدال؟
وأنتي أعدل من وطـى هالثـرى !

يا أغلى من الماسات والغـالين
وأغلى من الذهبان والياقوت

ولا أنت ياللي خزاماك بالحب فاحت
يا وداد مغرور والغرور أول طابعه

فدوتك روحي لو لضحكتك راحت
وفدوتك عيوني لا تغطّت دامعه

في هيامك عروقي ما استراحت
ولا طروا اسمك تشبّب عيني لامعه

بروق حبك على شط البحر لاحت
مثل وقفة طيّب أفعاله ناصعه

‏وكأن الله خلقني من ذات طينها !

أمشي درب محبته غرام وأسريه
ولو كان ممشاه جمرات ووعر

يا كـم أحبـه وأحن له وأغليـه
وأسمي على قلبه لو مرّه ذعر

أواه يا قلبٍ من الهَـم ملتاع
كن الهموم تبيـه وتجوع له

تشوف قلبي شوفة المطلاع
تمرّ خنجر وتجرح ضلوع له

يسيّر وهو ماله فالحزن داع
ويعوّد مع جرح موضوع له

خذاه اللي فالمحبه خْداع
وأنا فـ أمر محبته مطيوع له

يجي لقلبي وهمومه أوجاع
وأجيب الفـرح مخضـوع له

يجي والعتم في عيونه أتباع
وأضوي نار قلبي شمـوع له

يجي والعطش فيه منصـاع
وأملي الكاسـات دمـوع له

شاريه سر فالضلوع منذاع
كنه نصفي وأنا منـزوع لـه

فداه قلبٍ قبل لقياه ضاع
شراعـه بـالغرام مرفـوع له

له عشقٍ في جوف الأضلاع
مخلوق ومسبي ومرجوع له

أحبك أكبر من تفسير وتعبير
أحبك عمر عاش بينك وبيني

إن جيتي ما همني عقبك طوابير
وإن رحتي .. دخيلك خذيني

أنا من بني عطا زبن المعاصير
عطيتك الهوى لا تخذليني

وأنتي من عتيبه دون تقصير
تاخذين ميت إحساسي وتحييني

حبيبة الهوى ما أملك معاذير
حبك فهق قلبي .. انصفيني !

أنتي أجمل من وطى هالثرى

يا وردٍ تباين في براري وبين عجاج
رغم قلّ الأمطـار .. ندّى

يا بدرٍ في الليال الحالكات وهّاج
يا وش يضوِّيني سوى قدّه؟

على شفاهك مسراي لين حجاج
ليلٍ مشيته مستهيم فـ خدّه

من أول مسا وأنا لحضنك احتاج
لآخر صبر بيّح للهوى سدّه

حبك سباني خذا من بحري أمواج
تمكنّي استحوذني ولا فيه ندّه

الصبح أبطى يوم الليل بكّى
أنظارٍ على نار شوقها شاقين

يا لايمي … باب اللوم صكّه
الحب ما يعرف دمٍ ولا دين

باقي لي وأوصل للجنون تَكّه
ارفقي بي يا بنت السلاطين

ما دوّرت عن غرقتي بك فَكّه
مع إن أنتي نهر وأنا من طين

حبك ما مسّته ريبه ولا شكّه
وصدق المحبة ما تبي تخمين

بمشي معك الطريق لآخر سكّه
ولاني سائل موديتني على وين

اخذي كل ما فيني كلي حلالك
دامك فالمكانه والقدر شاهقه

سبحان من ميّزك وميّز جمالك
عـن كل حسن خلق الله فايقه

حتى الأرض غارت على ظلالك
تدري إن لك طلة بزينها غارقه

هندامك، رقيّك، وأطيب خصالك
في كل حالاتك فارقه .. فارقه !🤍

يا وردة خريف في ريح الهوا العات
ما شفت من الحزن فيك إلا غْبره

طوّقيني بمحبتك من كل الجهات
واحضنيني لا مِن دمع عيني جرى

وطّنيني بين صدرك يا ملح الحياة
ما لقيت بغربتي غيرك ديار وقُرا

امطريني مزنك .. وجفافنا موّات
كل جرحٍ في حضرة وجودك برى

يا بنت الغمام الـقصايد تناديك
وأنا شاعر أملك بالمشارف مرتبه

لا تقولين الشكوك تاكل معاليك
وأنتي الشعور اللي عجزت أكتبه

فـ عيوني شفتهم مزايا مساويك
يا راحتي بيـن الظـروف المتعبه

أنا بايع أفراحي وجاهي وشاريك
أبـسقيك من وبل الغرام أعذبه

اضحكي أبي الضحكة بشفاتيك
يا بهجة فؤادي ويا بعد الأصحبه

ولا تخافين إني على يوم أجافيك
دام لك بصدري مشاعر مرعبه

تراك بـعيوني وقلبي بين أياديك
يا غزال معرّب أصول ومنسبه

أنتي الغلا .. اللي ما يغلى عليك
وأنتي الذنب اللي بعيش أذنبه

جنح الليل استنطق جروحي يا بنت الشعر
ومشاعري من بادي الوقت.. على حالها

أحاول أهرب من جرم المحبة ما من مفر
كلما تجاهلتها .. أرجع غريق بـ جالها

قلبك العاشق إلى متى ما يبحث لي عذر
وأنتي تعرفين الظلم بظروفي وبأغلالها

احتويني تعب قلبي من المهارب والسفر
عن شموس القيض أبي عيناك وظلالها

أبيك من بداية أحبك.. لآخر حدود الصبر
وأنا من راس قومٍ ما رضت هوان إذلالها

أنا العاشق اللي غلطته عليك غلطة عمر
سامحي جرحي يا بعد هالبشر وأزوالها

سامحي قلبٍ بالهوى في عيونك مندمر
يـالقمره اللي ما سوى ذراعي طالها

بشوفتك تروى المعاطيش الحيام
مثل ما يروي المزن يباس الصحر

مرِّي على بيتي لو إن بيتي خيام
أنتي مرورك يخلي الخيمه قصر

قلبي يحنّك كل الليالي
ويسلاك في عز همّه

أنتي ما تمرين في بالي
أنتي بالي وأبوه وأمّه

عشقتك هبال ضيّعني هواك
سريت ليلك .. وأنا مدري شتاليه

وصلت لك حافي والدروب أشواك
تقطّعت رجلي والوصال ارتجيه

كيف أهوى سواك وأنا هنايا هناك
وأنتي يطيشك حتى الشعر النبيه

البعد عنك موت وقربك هلاك
وأنا الهلاك اللي يجي منك أبيه

كيف أتوقّى عذاباتي وكيف أنساك
وكيف أفرح وأنا أفهق الليل وأبكيه

وكيف أتسلّى عنك وكيف أسلاك
وكيف أتعوّذ شيطان فكري واتّقيه

أنتي أول غرام واعي بدون إدراك
كيف أدني قلبي عنك وكيف انهيه

لا تمدين يدك وداع، الوداع فتّاك
مديها لجرحي المنهك واحضنيه

ولا طاحت دموعك ومحدٍ جداك
هذا صدري .. تعالي ارتمي عليه

أنا لو ما ملكت فحياتي أيّة أملاك
لا حضنتك حاضن الكون باللي فيه

أبغى من الأمل فرصة أخيره
أواجه بها أيامي المتكدره

ما عاد بقى فمحاجري سيره
سوى أنتي والدمعه المتحدره

أتعبتني هالليالي، صبر وهم وجَلاده
عافتني أقدامي وعلى كبدي مشيت

سرى قلبي في الخلاوي بدون عتاده
تشوّك الدرب وأرهقني ولا اشكيت

ما بين عقلي وقلبي حرب استباده
إما تنهيني أو هم تنهيني فانتهيت

جيت يمك قبل قلبي يشد شداده
ورحلت وأنا من همي ما شفيت

الظلم طبعك ونوم الظالم عباده
لذا ؛ عنك سلت روحي وأنا اعفيت