حبيبي والعيون بدمعها تغارق
والفكر ما بين داعم وناقد

لا اشتقت والشوق بقلبي توارق
يجي منك بدل فاقد ؟

لك في حرم صدري مقامٍ مبجّل
أنتي وطن أعني له كل الولا

قلبي على حروف اسمك مسجّل
من وفا واخلاص ومن غلا

ما عرفت الجرح يا عيونك الخجّل
لين بدّلتي لبيه بـ هلا

قبل لا تبتل عيوني ولفراقي تهتدي
جيت أنفض بقايا مشاعر قبل تبتَل

لا يغرك دمي المنثور وارتجافة يدي
والله إن لي عزةٍ تجبرك تحني وتنذَل

صحيح عينك قبلتي ويدك مسجدي
وإن قلبي ديار وضحكتك جيش مُحتَل

وصحيح صوتك يورّد القاع الجرهدي
كلما نادى محبة .. يتل الخفوق تَل

وصحيح معنّقك نافر غلاه عسجدي
جل خالق تواصيفك على ذوقي جَل

تضمحل المساري وهمّي سرمدي
وأضيع ما بين ليش وشمعنى وهَل

أبي حل يرشدني وين نجم الجدي
أنا عن أمراضك النفسية أبي حَل

ليه أنت عزرا موتي ليه أنت مولدي
وليه الشمس تشرق ليا وجهك طَل

أكرهك كثر ما جرحك بقلبي ندي
كثر ما تحب عيوني بدمعها تبتَل

وأكرهك كثر ما سوّد الله وجه الردي
كثر ما أدنف قلبي بـ حبك وكَل

تفطّن للي همّه على دمعه تراص
دمعه من على مدمعه ما يخرّج

انحكم على كبد الهايم قصاص
يجي لك في كل يوم متعرّج

ما بقى بـ سلاح لسانه رصاص
بِث ما يخفيه صمتك وهرّج

تدرَّج بك .. حب ووفا وإخلاص
وصار الهوى فـ العيون متبرّج

ما يبي من دفا يدينك .. خلاص
ولا يبي يجلس بعيد .. متفرّج

إزرع بذرة الخير تلقى الخير بيجيك
وإن ما ثمر خيرك .. لا تلوم البذره

النفس تشوف لين تكره التسليك
وتنضج لين تصبح من الناس حذره

لا تاخذ بنظرتهم لو عذربوا فيك
يمكن إن العيون اللي تشوفك قذره!

يا مجرح القلب وأنت المداوي
وأنت اللي تصيّر بي اللي ما يتصيّر

تخيّر بالضلوع العوج والقلب غاوي
تنفتح لك أصفاد قلبي .. طب وتخيّر

لا تحبسين شوقك خلف الكواليس
أنا ما جيت إلا وأنا ميت من الشوق
تعرفين الشوق هذا ؟ ياهو خسيس
يعرف واجباته علي ويجهل حقوق

حلفت عيونك ما أسلّم دمعها للذل
ما تطيح وإن طاحت .. على كتفي

بقدر ما احتجت أحكي .. فضّلت السكات
وبقدر ما احترق قلبي .. حاولت البرود

لذّات الهوى وذنب الهوى وريحه العات
ما تبي من القلوب قلبٍ قاسيٍ جلمود

أغلى ما يملك الإنسان التصالح مع الذات
وأغلى ما تملك النفس .. عز الصمود

عساني إن عشت أعيش طيّب المدّات
وإن مت تبقى ذكرى الطيّب .. للخلود

ألا يا قاف اسطف من شعور
وركّب البيت من ندى أزهاره

النور نيّر نوره بيّن مع النور
يغني على ليالي النور بأنواره

يا نور العيون الشعر مستور
ونار نورك بيّحت عن أسراره

تسرّب من صوته المجرور
شعورٍ ما كشّف عن ستاره

يا أحلى ليل أسهره مخمور
يا أحلى نور شعشع بالنهارى

أجيك ضايق وأروح منْك مسرور
كل ليله أوعدك في رد الزياره

من شفت إني على نبضك غيور
دريت إن حبك توسّم علي بعبارة

من يقول يجي مع حضرتك ديجور؟
يا قمر ليلي ونوره وأعذب أطواره

يا نور العيون .. ماهي شهادة زور
لا قلت إنك للشاعر أجمل أشعاره

لا وأنا مانيب للحكي بيّاع
يا شوق عينٍ بالحنان تحوفك

لو إني تحت الأمر تبّاع
ما قلت أمّني بي خوفك

اسمعي لأبو نوره باستماع
وصبّي حنيني بضلع جوفك

"لبيه يابو عيون وساع"
أنا قسوتي ودّها تروفك

"أيُّوه قلبي عليك إلتاع"
جا يقبّل حدّة سيوفك

"مانيب من عاذلي سمّاع"
مستعد أعدّل عوجة ظروفك

"معذور لو صرت بك طمّاع"
ما أدوّر ندٍ في وصوفك

"ما ضاع عمري معك لو ضاع"
يكفيني من العمر شوفك

"سلّمت لك خافقٍ جزّاع"
جاي بحنينه يستامن كفوفك

اسكني في عرشك بالأضلاع
يا لطيف المحيّا من يعوفك؟

ما ذُقتِ منِّي أيا الحُسن المليح
لا صبابة عشقٍ .. ولا شِعرًا فصيح

استنزفتُ دُجًا بـ ليلي توَلوَلُ ليله
ما بيْنَ يديكِ حياتي أم ضريح

غنِّي على الوُرْقِ.. وانتحي عليَّ
إن قيسَ ليلى ذاق ويْحًا صريح

وجاء بعد الإرهاقِ مُتيمّمًا
في مرهم ماءكِ يا طِبَّ الجريح

فـ تَلوْتُ من الغزلِ هامةً
لا أدري يا وردتي أيُجدي المديح

سبِحْتَ بحارَ الشعر والقصيدِ إنَّما
بحرُ العشقِ لا يُجديهِ أن أتعوَّما

فالمخطئ من خطيئاتِهِ يتعلّمُ
ولو كان من هوى النفسِ مُغرَّما

إن الهوى كوًى يتجرَّعُ من قلبي
وأنا عالمٌ بأن هوانا .. مأثَما

ليلةً .. شعشعَ النورُ في غسقي
فعرفت أن ثغرُها مَن تبَسَّما

جلّ ربُّ السماوات في خَلقِها
وهبها ما يجعلُ الأصَمُ يتكلَّما

فلم أدرِ ما جَنَت يداي من ذنبا
فصلِّيتُ استغفرك ربّي تيمُّما

استغفرتُ ربِّي يغفر لي ذنوبيَ
إلهي .. أجِرني من نار جهَنَّما

لا أدلهم الليل جيت منهلك على فراشي
ترتسم على سقف العيون صورةٍ أعرفها

النظر يا نور القمر للنظر بالحيل عطّاشي
جايبٍ من حديث العيون للعيون أترفها

ما يطفي ثورة عنادي ولا يزوّد انتعاشي
سوى ضحكةٍ من محراب عيونك أغترفها

أواه يا شعورك أواه يا شعورك الجيّاشي
يوم إنه يسدل ستاير الليل .. ويعجرفها

مانيب بالمحبة يا بعد من لد .. غشّاشي
تجثو لك تواضع .. قصايدي وأصرِفها

والقصايد لك ما تنكتب على الماشي
تنكتب من حبر دم القصيد وأذرفها

أجي آخذ من عيونك ضحك المعاشي
وأروح وأنا السعاده جانيها ومقترفها

على كل انكساراتي وكل مطيح
لعزّتي اصرار ولمعدني عزيمه

الوجه واحد بكل نواحيّه صريح
لو إن العواقب كانت وخيمه

لا والذي لذّذ بلسانك التجريح
سكوتي ماهو خوف إلا حشيمه

لا تفتشين في مدلهمّات التفاصيل
تلقين شيٍ يزعلك يا نوم عيني

أنا يوم أجي لك في شعوري متجدّد
ما ورا يديني إلا قلبي والسواعد

لا تتعذّر بالظروف دخيل الله
كلّن زمانه قاسي ودنيته دنيّه

ما يضحك في غرورك وطغياه
إلا إنك عايشٍ دور الضحيّه

المبادي ما تتغير ولا لها مستجدات
ونفسي على قوتها كم لي أعاهدها

واجهت نفسي مواجهة "جلد للذات"
أنا من أخطائها تعبت أجاهدها

استحاله اعترف لو الليالي مدلهمّات
تتخثّر جروحي وتكثر وأكابدها

أنا مثل الغريق اللي يصارع حياة
قبلةٍ تاهت في منتصف مساجدها

أتغرّب عن النور وأصارع هالمعاناة
أنوّخ ركاب ظروف العمر وأعاندها