शून्यातून विश्व निर्माण करणारा 'खाकी'तला जिद्दी प्रवास: PSI संतोष चव्हाण

चंद्रपूर जिल्ह्यातील जिवती सारख्या अतिदुर्गम आणि अत्यंत गरिबीच्या परिस्थितीतून पुढे आलेले संतोष चव्हाण यांनी आज (१७ मार्च २०२६) पोलीस उपनिरीक्षक (PSI) पदाची ६ वर्षे यशस्वी सेवा पूर्ण केली आहे. स्पर्धा परीक्षेची तयारी करणाऱ्या प्रत्येक विद्यार्थ्यासाठी त्यांचा हा संघर्ष एका दीपस्तंभासारखा आहे.

संतोषने सुरुवातीला पोलीस भरतीची परीक्षा दिली होती, पण दुर्दैवाने काही गुणांनी त्याचे सिलेक्शन हुकले. तो खूप निराश झाला होता. तेव्हा मी त्याला  म्हटले, "जाऊ दे, तू PSI ची तयारी कर, तू नक्की PSI होशील!" या एका विश्वासाने त्याच्यात नवी उमेद जागवली.

पुण्यात स्पर्धा परीक्षेचा अभ्यास करताना त्याने केलेला संघर्ष मी जवळून पाहिला आहे. मी तेव्हा एका अकॅडमीत कार्यरत होतो. दिवाळीच्या लक्ष्मीपूजनाचा तो दिवस होता. पुण्यातील मेस बंद असल्यामुळे जेवणाची मोठी अडचण होती. एका गैरसमजामुळे दुसऱ्या दिवशी जेवणाचे साहित्यही उपलब्ध होऊ शकले नाही. अशा सणासुदीच्या दिवशी संतोष आणि त्याचा लहान भाऊ विनोद (जो आता जलसिंचन विभागात कार्यरत आहे) यांना चक्क उपाशी राहावे लागले. पण विशेष म्हणजे, त्या उपाशी पोटीही त्यांनी दिवसभर लायब्ररीत बसून आपला अभ्यास सुरूच ठेवला.

परिस्थितीला कधीही दोष न देता, पोटातील भुकेपेक्षा यशाची भूक मोठी मानून त्यांनी हे यश खेचून आणले आहे. स्पर्धा परीक्षेतील विद्यार्थ्यांनो, पैशांची किंवा परिस्थितीची कितीही अडचण असली तरी जिद्द सोडू नका. उपाशी पोटी, प्रामाणिकपणे घेतलेली मेहनत आज संतोष चव्हाण यांच्या अंगावरील 'खाकी' वर्दीच्या रूपाने फळाला आली आहे.

PSI संतोष चव्हाण यांना पुढील वाटचालीस हार्दिक शुभेच्छा!

- समाधान निमसरकार