ماني بكيفك لا تفرّغت لبيك
والله لو أنه في يدينك مصيري
من راس مال الوقت عطني وبعطيك
زكاة وقتك خلّها لناس غيري

وترحل ما لحقك إلا القصيد وشرهة الطلاب
‏وقلبٍ ما يخونه في الحياة إلّا تجاريبه
‏⠀
‏أنا ماني بعاقلك الدروب.. ولا رضيت أحباب
‏حزين إني أشوفك حق، وأنت تشوفني ريبة

لي ثلاث سنين قانع ولا تفرق معي
‏أقبلت دنياي وأقفت ولا ناديتها

‏اسرحي يانفسي برحلتك واستمتعي
‏مابي افكّر بحاجة قبل توقيتها

‏واشبعي يانفس من عزّة النفس اشبعي
‏لو ماني قدّ الصعوبات.. ماسوّيتها


‏- سلطان بن بتلاء

عودت نفسي ما تحسّف على شيء
لأن العمر ما يحتمل للحسايف

بعيش لحظات الفرح دامني حي
وبزرع الضحكة بجرد الشفايف

ولا ألحق الشرهات شيءٍ ماهو لي
ولا عدت أجزع من فراق الولايف

إن غاب غالي فالحزن بأخذ شوّي
أيام وتـروّح علومه طرايف

موصيٍ قلبي لا شفت الخطأ عيّ
أمّا تعدلها أو تصد عايـف

أنت مثل الحياة الفانية بالتمام
عارف إني بخلّيها وحبّيتها

-عساف أبو ثنين

‏صديت صدة مستعيفٍ من الدار
‏عن حاجةٍ ما ودي اصد عنها

والله أنه مالحقني من ورى عِرفك حسَّافة
‏ خيرة أفضال السنين المقبلة والأوليـة

لك من سنين العمر لا غبت، عمر إنتظار
للموعد إن جيت وإن ما جيتني للصدف

أحنّك مثل ما أحن وجهي من المنقود
وأعدّك ليا عديت الأيام وش جابت

" قصّر الليل الطويل.. بـ سالفة "

‏الليّ خسرته من بعد عزم وكفاح
‏رزقٍ مهو مكتوب في شتى السبل

‏يزيدني ربـي ، سعاده وارتياح
‏كل مامشت الايام وأَحيَـت ما ذبل

‏"أول محطات التجاوز والنجاح
‏ما تلتفت ، لليّ مضى من قبل"

أنا لازم أشكر ربّي اللي عطانيَّاك
‏عسى اللي عطانيَّاك ما ياخذك منّي

— خالد مبارك

‏" ليه أحس إنْ الديار إللي بلا وجهك منافي ؟
‏وأنت جرحك قد تربّى بالصدر وأصبح قصيدة"

‏جلّاب الافكار . . افعل ما تحب وتشاء
‏دامك تعرف الحقيقه لا تهاب السبب

‏انا عليّ التسامح والرضى والعطاء
‏حتى لو ان الليالي من يباس وتعب

‏وش دخّلك يا "ندم" فيما يُسمى غباء
‏اصلاً شعور الندم اصدق شعور المُحب

‏الشوق رحلة عظيمه ترتقي للسماء
‏وانا رقيت السما ، وامطرْتلك من عَجب

‏تعال .. ودّي احس بنعمة الاكتفاء
‏الليل بعدك طويل وكل ليل اكتئب

‏هات آخر اطرافك اللي تستحق العناء
‏لا تلتفت للظروف وخل صدرك رحب

‏هات اجمل سنين عُمري و اقبل الانتماء
‏ارواحنا تشتعل . . وامواجنا من غضب

‏احبك اللي تعاني نظرة الازدراء
‏علمّتها ما تلين . . وعلَّمتني أحب

‏مدّيت لك ما تبقّى والحنين احتواء
‏قدّمتلك كل حاجه بس .. ما الله كتب

‏- أحمد صالح البحَّا

‏"اراقب الفرصة اللي ما تجي مرتين
‏ ويوم الله اتاحها لي، ما استغليتها"

‏اللي معَ نفسه .. ترى ماهو وحيد
‏ترى الوحيد اللي معَ الناس الخطا

‏" قفّى وأنا ما أحب طرد المقفين
‏أشجعه وأنا أتمنى رجوعه "