شركة آبل تستعد لإطلاق نظارة الواقع الافتراضي الخاصة بها 🥽
يتوقع أن تكون سعر النظارة 3000 دولار فقط 🥺

شركة مايكروسوفت أطلقت نسخة جديدة من برنامج Teams معاد تصميمها بتقنيات مختلفة لتوفير أداء وسرعة أعلى بمقدار الضعف مقارنة بالنسخة الحالية.
البرنامج كمان هيوفر ميزة جديدة وهي إمكانية عمل شخصية 3D تستخدمها لحضور الاجتماعات المرئية لو مش حابب تظهر بشكل شخصي.
برنامج Teams حاليا وصل إلى 280 مليون مستخدم شهري.

النهاردة لجنة تداول السلع الآجلة في الولايات المتحدة CFTC رفعت دعوى قضائية ضد منصة تداول العملات الرقمية Binance ومديرها التنفيذي Changpeng Zhao بدعوى انتهاك قواعد التداول والمشتقات..
من الحاجات المريبة في ملف الدعوى كانت رسائل من الهاتف الشخصي للمدير التنفيذي على تطبيق Signal !
الشهر ده المذيع الأمريكي الشهير تاكر كارلسون طلع في بودكاست وقال إن وكالة الأمن القومي الأمريكية NSA قدرت كانت بتتجسس عليه وقدرت توصل إلى رسائل خاصة بيه من تطبيق Signal لأنه كان بيحاول يعمل لقاء حواري مع الرئيس الروسي فلاديمير بوتين!
حتى الآن مفيش معلومة مؤكدة هل سرقة الرسائل دي تمت من خلال اختراق الهواتف، ولا تطبيق Signal بيعاني من ثغرة أمنية بيتم استغلالها من قبل أجهزة المخابرات.. فلو بتستخدم تطبيق Signal لغرض الحصول على خصوصية في المحادثات خلي بالك عشان ممكن يكون في مشكلة حاليا في التطبيق.

الأسبوع ده انعقدت مسابقة الاختراق الشهيرة Pwn2Own واللي شهدت اكتشاف 27 ثغرة Zero-Day وربح جوائز تخطت مليون دولار + سيارة تيسلا Model 3.
أبرز الاختراقات كانت:
macOS
Windows 11
Microsoft Teams
Microsoft SharePoint
Ubuntu Desktop
VMware Workstation
Oracle VirtualBox
Tesla Model 3

بداية من العام القادم شركة Valve هترفع الدعم عن ويندوز 7 & 8.1.. وأي جهاز بيشتغل بالنظامين دول مش هيقدر يشغل برنامج Steam ❌
شركة مايكروسوفت رفعت دعم التحديثات عن النظامين دول، واستخدامهم حاليا فيه خطورة.. فأي حد بيشتغل بويندوز 7 أو 8.1 يا ريت يحدث لويندوز 10.. ولو جهازك قديم شوية ممكن تستخدم لينكس بدل ويندوز.

الأسبوع ده جوجل حذفت تطبيق شركة Pinduoduo، ثالث أكبر شركة للتجارة الإلكترونية في الصين، من متجر التطبيقات ❌
الشركة عملت نسخ من التطبيق متوفرة على متاجر غير متجر جوجل بلاي بتحتوي على برمجيات خبيثة وبتستغل ثغرات Zero-Day في الأندرويد للقيام بأمور منها:
▪️ عدم السماح للمستخدم بحذف التطبيق
▪️ حذف تطبيقات المنافسين من موبايل المستخدم
▪️ سرقة بيانات المستخدمين من الهواتف
▪️ الوصول لمعلومات الواي فاي والموقع الجغرافي
▪️ التجسس على التطبيقات الأخرى وإحصائيات استخدامها
النسخ الخبيثة من التطبيق كانت موقعة رقميا من الشركة، يعني استغلال الثغرات وإضافة الأكواد الخبيثة تمت من خلال الشركة نفسها.
لو التطبيق موجود في جهازك احذفه فورا.

عندي مقال في الموقع بيتكلم عن طريقة معرفة باسورد الواي فاي بتاعك في حالة نسيته ولا حاجة..
أكتر عبارة بحث بتبعت زيارات للمقال من جوجل هي:
معرفة باسورد واي فاي الجيران 🙂

شركة نوكيا بتجهز لإطلاق شبكة إنترنت 4G على القمر خلال العام الحالي 📶
الشركة هتعتمد على صاروخ من شركة SpaceX لإرسال معدات الشبكة.. استعدادا لمهمة ناسا القادمة Artemis 1 اللي هدفها إرسال بشر إلى سطح القمر بحلول عام 2025.

شركة مايكروسوفت أعلنت إنها هتبدأ تستخدم أداة شات Bing لتقديم إعلانات للمستخدمين 🪧
مايكروسوفت هتسمح للشركات بالدفع مقابل ترشيح منتجاتها للمستخدم بشكل مضمن داخل الإجابات.
مسألة الإعلانات كانت من أحد أسباب تأخر جوجل في استخدام تجربة الذكاء الاصطناعي للبحث، لأن النسبة الأكبر من أرباح الشركة هي من سوق الإعلانات التقليدي اللي جوجل بتسيطر عليه.
في نفس الوقت هل ده ممكن يأثر بشكل كبير على درجة حيادية المعلومات اللي بيقدمها الذكاء الاصطناعي، لأنه هيكون مجبر على تطويع الإجابات عشان تكون مناسبة لعرض الإعلانات؟

إيطاليا تقرر حظر ChatGPT ❌
امبارح هيئة حماية البيانات الإيطالية Garante قررت حظر أمرت شركة OpenAI بحظر خدماتها في إيطاليا بسبب انتهاكها النظام الأوروبي العام لحماية البيانات GDPR بسبب:
- انعدام الشفافية: عن البيانات اللي جمعتها الشركة من المستخدمين واستخدمتها لتدريب الأداة.
- عدم وجود أساس قانوني للمعالجة: يعني عدم الحصول على موافقة المستخدم لجمع واستخدام بياناته.
- عدم التحقق من العمر: الأداة مش بتستخدم أي وسيلة للتحقق من عمر المستخدم، اللي من المفترض يكون عمره 13 عام بحد أدنى.
- الخرق العام لحماية البيانات حسب التصميم: انتهكت الشركة قوانين النظام العام GDPR، وكان من المطلوب منها الامتثال لجميع هذه المتطلبات كان يجب أن يتم تضمينه في الخدمة منذ البداية، منذ وقت الشراء، بما أن الخدمة بتوفر اشتراك مدفوع.
الحظر ده ممكن يتم تطبيقه من دول أوروبية أخرى، بما إن الانتهاكات للنظام الأوروبي العام GDPR.
طبعا دي انتهاكات لبيانات المستخدمين في الدول العربية بردو.. بس احنا مفيش حد عندنا مهتم.

تقنية جوجل لمشاركة الملفات Nearby Share أصبحت حاليا متاحة للويندوز 🖥
برنامج Nearby Share للويندوز نسخة بيتا أصبح متاح حاليا للتحميل والاستخدام في مشاركة الملفات مع الأندرويد بسهولة، بنفس طريقة مشاركة الملفات بين أجهزة الأندرويد 📲
عشان تشارك الملفات بين الكمبيوتر والموبايل من خلال Nearby Share لازم يكون عندك:
▪️ موبايل أندرويد بإصدار +6.0
▪️ كمبيوتر بويندوز 10 نسخة 64-Bit
▪️ لازم يكون الكمبيوتر بيدعم الواي فاي & البلوتوث
▪️ لازم يكون الكمبيوتر والموبايل متصلين بنفس الشبكة
لينك البرنامج في أول تعليق 👇

امبارح تويتر بدأ يحذف علامات التحقق القديمة للمنظمات اللي رفضت تدفع 1,000$ كل شهر للاحتفاظ بعلامة التوثيق.. بداية من حساب جريدة النيويورك تايمز اللي بيمتلك 55 مليون متابع.
مشاهير كتير أعلنوا عن رفضهم الدفع لتويتر مقابل علامة التحقق.. منهم لاعب السلة الشهير ليبرون جيمس.. بالرغم إن العلامة هتكلفه 7$ فقط في الشهر.
ماسك خد على قفاه واشترى تويتر بـ44 مليار ودلوقتي قيمته 20 مليار.. ودلوقتي عايز يعوض الفرق من جيوب المستخدمين..

بعد ما تم إجبارها من الاتحاد الأوروبي على التخلي عن منفذ الـLightning واستخدام منفذ شاحن USB-C.. شركة آبل بتخطط في حيلة جديدة من خلال استخدام منفذ USB-C في الآيفون القادم، لكنه مش هيشتغل بالطاقة القصوى إلا من خلال الشواحن الخاصة المعتمدة من الشركة MFi certification program !
يعني لو معاك آيفون وشاحن مش هتقدر تستفيد بالسرعة القصوى للشحن إلا لو كان شاحن معتمد من آبل.. ولا كإن الاتحاد الأوروبي عمل حاجة!
شركة مفيش عندها بربع جنيه سلكان..

إغلاق موقع Zippyshare بشكل نهائي ❌
الواحد زمان لما كان يحمل حاجة ويلاقي رابط التحميل Zippyshare كان بيفرح بسبب سهولة التحميل من الموقع من غير انتظار ولا ضغط على إعلانات ولا كابتشا ولا أي حاجة.. تدخل تضغط داونلود وتحمل..
الموقع اتقفل بسبب ارتفاع التكاليف وانخفاض أرباحه مع وجود منافسين بخدمات متطورة.. وكعادة أي بيزنس بيقف مكانه من غير تطوير هتكون نهايته الخروج من السوق.

الهواتف العادية ما زالت تحقق عدد ضخم من المبيعات، مع ارتفاع مستمر في نسبة زيادة المبيعات سنويا 📈
شركة HMD Global اللي ما زالت بتصنع هواتف نوكيا القديمة بتبيع سنويا ملايين النسخ.
أمريكا كانت من أكتر الدول اللي شهدت ارتفاع في حجم مبيعات الهواتف العادية خصوصا بين المراهقين والجيل زد Gen Z كمحاولة لتقليل الوقت اللي بيتم إضاعته على مواقع التواصل الاجتماعي.

معظم الناس عارفة ستيف جوبز أحد مؤسسي شركة آبل، وناس أقل عارفة ستيف وزنياك؛ المؤسس التاني والعقل المدبر للتكنولوجيا اللي قدمتها آبل في بدايتها.. لكن ناس كتير متعرفش إن آبل كان ليها مؤسس تالت وهو رونالد واين..
رونالد ده مشهور بواحد من أغبى القرارات الاستثمارية اللي حصلت في التاريخ.. لأنه قرر بعد 12 يوم فقط من تأسيس الشركة إنه يبيع حصته فيها.
باع رونالد حصته اللي حجمها كان 10% يوم 12 أبريل 1976 مقابل 800 دولار.
حصة رونالد اللي باعها من شركة آبل قيمتها الحالية 260 مليار دولار 🙂

شركة سامسونج رفعت الدعم عن 3 هواتف:
Galaxy S10
Galaxy A30
Galaxy A50
الموبايلات دي مش هيوصلها التحديثات الأمنية أو تحديثات السوفتوير والواجهة من سامسونج تاني.. لكن كالعادة ممكن يتم الاعتماد على الروت & الرومات..
ولا عزاء لبتوع التفاحة 👋

متجر شركة آبل في واشنطن اتعرض للسطو وسرقة 436 آيفون بقيمة 500 ألف دولار 😢
2 لصوص دخلوا كافيه مجاور وعملوا فتحة في الحيطة دخلوا منها للمتجر ولموا الموبايلات اللي كانت موجودة وهربوا 💔

شركة Home Security Heroes نشرت تقرير عن أداة لتخمين كلمات المرور مدعومة بالذكاء الاصطناعي اسمها PassGAN.. ومن خلال التجربة على قائمة فيها 15 مليون كلمة مرور قدرت الأداة تخمن:
▪️ نسبة 51% منهم في أقل من دقيقة
▪️ نسبة 65% منهم في أقل من ساعة
▪️ نسبة 71% منهم في أقل من يوم
▪️ نسبة 81% منهم في أقل من شهر
كلمات المرور الآمنة من التخمين بواسطة الأداة هي كلمات المرور المكونة من 18 خانة وبتضم حروف كبيرة وصغيرة وأرقام ورموز.
دي قائمة بتوضح قدرة الذكاء الاصطناعي على تخمين كلمة المرور حسب قوة الكلمة 👆

ميزة القنوات سيتم طرحها في واتساب قريبا 😒