شركة أمازون كشفت عن شكل محطات الاستقبال لمشروع الإنترنت الفضائي الخاص بيها Kuiper المنافس لمشروع Starlink 🛰
أمازون هبتدأ في تشغيل خدمة الإنترنت الفضائي بداية من العام القادم بسرعة من 100 ميجابت حتى 1 جيجابت في الثانية 😢

شركة مايكروسوفت النهاردة أعلنت عن شيء مهم جدا وهو دمج تقنيات GPT-4 أحدث إصدار من نموذج الذكاء الاصطناعي لشركة OpenAI في حزمة البرامج المكتبية الخاصة بيها Microsoft 365.
في المؤتمر تم عرض بعض الاستخدامات المميزة للتقنية اللي هيكون اسمها Copilot واللي هتقدر إنها تنشئ مستندات كاملة، تعمل عرض تقديمي PowerPoint كامل بناءً على مستند، المساعدة على إنشاء وتنظيم وتحليل البيانات في ملفات إكسيل وغيرها من الأمور.. وهيكون متاح للاستخدام على كافة برامج الحزمة بالإضافة إلى برنامج Teams.

فريق Project Zero التابع لشركة جوجل نشر امبارح تقرير إفصاح خطير عن وجود 18 ثغرة معظمهم ثغرات Zero-Day في بعض شرائح الموديم اللي بتصنعها شركة سامسونج.. الثغرات دي ممكن استغلالها يسمح للمهاجم باختراق الموبايل فقط من خلال معرفة رقم هاتف الضحية وبدون أي تدخل منه.
دي أبرز الهواتف اللي فيها المشكلة:
▪️ سامسونج جلاكسي S22, M33, M13, M12, A71, A53, A33, A21, A13, A12, A04
▪️ فيفو S16, S15, S6, X70, X60, X30
▪️ جوجل Pixel 6 & Pixel 7
لو معاك موبايل من الموبايلات دي تقدر تحمي نفسك من خلال إلغاء تفعيل خدمتين على الموبايل الأولى Wi-Fi calling والتانية Voice-over-LTE (VoLTE) هتلاقيهم موجودين في إعدادات الشبكة على الموبايل.. في انتظار إصدار سامسونج وباقي الشركات لتحديث أمني على مستوى السوفتوير.

محرك بحث Bing بيستخدم GPT-4 أحدث إصدار من نموذج الذكاء الاصطناعي الخاص بشركة OpenAI.. وقائمة الانتظار تم إزالتها..
لو عايز تستـخدم GPT-4 تقدر تدخل للمحرك من متصفح Edge وتضغط على انضمام إلى قائمة الانتظار هيتم قبولك مباشرة وتقدر تستخدم الأداة بالضغط على Chat Now.

شركة WE عاملة باقات شحن جديدة لغاية 2 تيرابايت بخصم 50%..
لكن تيجي تكلمهم في حجم الباقة الأساسية الحقيرة يقولك أصل مفيش بنية تحتية 🙂

شركة مايكروسوفت في أحدث إصدار مستقر 111.0.1661.44 من متصفح Edge أضافت ميزة جميلة وهي دمج محرك Adobe Acrobat PDF مع قارئ الملفات الإلكترونية في المتصفح..
الميزة دي غرضها تحسين قراءة الكتب الإلكترونية مباشرة من المتصفح، مع وجود كل الأدوات المهمة زي أدوات تحديد النصوص والبحث داخل الكتاب والانتقال بين أقسامه والطباعة وحفظ أي تعديلات عليه وغيرها من الأدوات المهمة بدون حاجة إلى أي برامج أخرى 👌

مستخدمين كتير لويندوز 11 اشتكوا من تحديث النظام الأخير رقم KB5023706 وإنه سبب بطء كبير في سرعة بعض أنواع SSD وكمان سرعة الواي فاي.. بالإضافة لمشاكل في فتح التطبيقات وحدوث مشكلة شاشة الموت الزرقاء..
لو بتستخدم ويندوز 11 وقف التحديثات حاليا لغاية ما يتم حل المشكلة.

النهاردة كنت عايز أحمل حاجة تورنت.. روحت لموقع 1377x .to ابحث عنها ولقيتها..
دخلت عشان اجيب الرابط لقيت مفيش أي حاجة لا رابط للملف ولا رابط Magnet ولا أي حاجة.. وكل اللي ظاهر إني محتاج أحمل VPN!
المشكلة دي أول مرة تحصلي في الموقع ده وفضلت حوالي نص ساعة بدور على إيه سببها لغاية ما اكتشفت إني كتبت اسم الموقع غلط والموقع الأصلي اسمه 1337x وفيه موقع مزيف بنفس الاسم مع تعديل بسيط 1377x 🙂

بعد أكتر من 17 سنة من الخدمة..
إغلاق موقع رفع الملفات المجاني الشهير Zippyshare.
الموقع اللي تم إطلاقه في 2006 كان من أشهر مواقع التحميل على الإطلاق، ووصل لعدد زيارات +40 مليون شهريا.. لكن بسبب اعتماد الموقع الرئيسي على الإعلانات كوسيلة لدفع تكاليف الخدمة اللي ارتفعت في السنوات الأخيرة وانخفاض زيارات الموقع بسبب زيادة المنافسين وتقديم خدمات متطورة أكتر.. انخفضت أرباح الموقع لدرجة بقت لا تسمح باستمراره.
الموقع هيوقف بشكل نهائي خلال أسبوعين.

شركة مايكروسوفت بتخطط لإطلاق متجر ألعاب للأندرويد والآيفون منافس لمتاجر جوجل وآبل 📲
الإعلان تم على لسان فيل سبنسر رئيس قسم الألعاب في الشركة اللي قال إن الشركة جاهزة لتقديم المتجر السنة القادمة بشرط موافقة الجهات التنظيمية على صفقة استحواذ مايكروسوفت على شركة الألعاب الشهيرة Activision Blizzard.
مايكروسوفت بتبلع السوق حرفيا 👌

شركة مايكروسوفت النهاردة أعلنت عن أداة Bing Image Creator لإنشاء الصور باستخدام الذكاء الاصطناعي
الأداة بتعتمد على تقنية DALL-E model الخاصة بشركة OpenAI، وتشبه في الاستخدام أداة Midjourney لكن مفيش فيها نفس المحددات للتحكم في الصورة، وكمان مش بتدعم لغات غير الإنجليزية.
مع ذلك أداة مايكروسوفت أسرع في إنشاء الصور ومجانية ومتوفرة حاليا للمستخدمين في جميع الدول حول العالم.
عشان تستخدم الأداة هتدخل للرابط (أول تعليق) من متصفح Edge وتكتب وصف للصورة وممكن تحدد أسلوب فني لتصميم الصورة مثلا زي الأسلوب التجريدي Abstract وبعد كدة تضغط Create وتنتظر الصور.

تحديث iOS 16.4 القادم للآيفون هيوفر ميزة Voice Isolation عزل الصوت للمكالمات الهاتفية 🔊
الميزة هتعطي الأولوية لصوتك وتمنع الضوضاء المحيطة.. وهي حاليا متوفرة في بعض تطبيقات الـVoIP زي FaceTime.. لكن دي أول مرة هيتم تقديم الميزة للمكالمات الهاتفية.

شركة Meta أعلنت عن طرح نسخة محسنة من تطبيق واتساب لنظام ويندوز بتدعم المزامنة على أجهزة متعددة.. يعني تقدر تستخدم حسابك على الكمبيوتر حتى لو الموبايل مقفول.
البرنامج كمان هيدعم مكالمات الفيديو الجماعية حتى 8 أشخاص، ومكالمات الصوت الجماعية حتى 32 شخص.
#أخبار_متهمكش

كل عام وأنتم بخير 💚
بنفكركم بموقعنا للبث المباشر لإذاعة القرآن الكريم.. واللي تقدر من خلاله تسمع البث المباشر للإذاعة من أي جهاز بسهولة.
▪️ الموقع خالي من الإعلانات
▪️ بث مباشر 24/7 بدون انقطاع
▪️ بيشتغل على الموبايل والكمبيوتر وأي جهاز
▪️ بيشتغل في الخلفية، يعني تقدر تشغله وانت بتستخدم الموبايل، وحتى لو قفلت الشاشة
لو بتستخدم موبايل انسخ الرابط من البوست وافتح الموقع من المتصفح.
▪️ البث بيشتغل من الكمبيوتر أول ما تدخل الموقع بشكل تلقائي، لو هتدخل من الموبايل لازم تضغط على زر تشغيل ▶️ عشان البث يشتغل.
▪️ تقدر تشارك الموقع أو البوست بأي طريقة تحبها.
https://www.holyquranradio.com/

إغلاق موقع BreachForums أكبر موقع للتسريبات على الإنترنت ❌
الأسبوع الماضي تم القبض على أحد مديري الموقع اللي كان بينشر باسم Pompompurin في نيويورك، ويبدو إن معلومات الدخول الخاصة بيه للوحة التحكم في الموقع تم كشفها أو هو بنفسه سلمها، فالأدمن التاني "Baphomet" قرر إنه يقفل الموقع بشكل نهائي لأنه الخوادم وبنية الموقع تم اختراقها.
موقع BreachForums كان مسئول عن أسوأ تسريبات حصلت خلال السنين اللي فاتت أشهرهم تسريب بيانات مليار مواطن صيني، بالإضافة لتسريب بيانات مئات الشركات التجارية، وبيانات ملايين المستخدمين لمواقع التواصل.

امبارح قناة التقنية الشهيرة Linus Tech Tips اتعرضت لاختراق، والهاكر كالعادة غير اسم القناة لـTesla وعمل بث مباشر لفيديو بيتكلم فيه إيلون ماسك ومجموعة من الشخصيات المعروفة عشان يروج لرابط موقع بينصب فيه على الناس من خلال إيهامهم بتحويل عملات رقمية وهيتم ردها الضعف لمحفظتهم.. أيوة في ناس بتصدق العته ده 🙂
المهم طريقة الاختراق اللي نبهت عليها أكتر من مرة على الصفحة كانت من خلال سرقة ملفات تعريف الارتباط أو الكوكيز Cookies الخاصة بالمتصفح واللي بتحتفظ بجلسات المواقع نشطة عشان المستخدم مش هيسجل دخول ببياناته كل مرة يحاول يدخل موقع.
الهاكر بعت إيميل فيه ملف PDF ملوث بمالوير، وشخص من فريق القناة فتح الملف ونشط المالوير اللي قدر من خلالها الهاكر يسرق كل الكوكيز الخاصة بالمتصفحات على الجهاز، وبالتالي قدر يحصل على تحكم كامل في القناة بدون حاجة لمعلومات الدخول (الإيميل والباسورد).
الطريقة دي أسوأ اختراق ممكن حد يتعرض ليه، لأن الهاكر بيقدر يوصل لجميع حساباتك في وقت واحد، ومفيش حاجة هتحميك منها ولا حتى المصادقة الثنائية 2FA.

أفضل حلول الوقاية هي:
▪️ الانتباه للروابط اللي بتوصلك من إيميلات مجهولة.
▪️ عدم تحميل أي برامج أو ألعاب مكركة مجهولة المصدر.
▪️ دايما عندك أنتي فيروس قوي وتعمل فحص للملفات اللي ممكن تشك فيها قبل تشغيلها.
▪️ الانتباه إن ملفات الـPDF ممكن تستخدم في الاختراق زي ملفات الـEXE عادي.
▪️ أصحاب الشركات والمؤسسات عليهم مسئولية تدريب الموظفين أمنيا.. لأن خطأ موظف واحد ممكن يؤدي لاختراق الشركة بالكامل.
▪️ لازم يتم الانتباه إلى امتداد الملف قبل تشغيله، لأنك ممكن تحمل ملف صوت أو فيديو ولما تشغله تكتشف إنه مالوير بامتداد EXE.

إعلان لعبة Counter Strike 2 😯

لما حد يبعت إيميل لبريد الإعلام والصحافة لموقع تويتر press@twitter .com بيوصله رد آلي فيه الإيموجي ده بس 💩
دي طريقة تعامل واحد من أكبر 5 مواقع تواصل في العالم مع الصحافة تحت إدارة الزعيم الملهم..

موظفين تويتر وصلهم إيميل من إيلون ماسك عن مِنَح أسهم في الشركة كانوا اتوعدوا بيها..
الغريب إن ماسك قيّم الأسهم على أساس إن قيمة تويتر الحالية 20 مليار دولار فقط.. أقل بـ24 مليار دولار عن المبلغ اللي دفعه للاستحواذ على الشركة (44 مليار دولار).. ده غير إنه كان اقترض 12.5 مليار دولار لإتمام صفقة الاستحواذ 🙂