"مثلنا ما يستحق المهونه والخداع
‏ما لبيض وجيهنا منك غير اكرامها

‏عن شحيحات الموارد فجوج الله وساع
‏لا تلوم نظاف الأيدي معا من لامها

‏ما يطيب العيش والراس ما عاش ارتفاع
‏وارتفع بالنفس لو ضامها ما ضامها

‏كل ما جينا نصافح.. نصافح باندفاع
‏مشكلتنا نعطي الناس فوق احجامها

‏كم صنعنا من جميل مع العالم و ضاع
‏وكم تغير طعمها يوم كف اطعامها

‏من كثر ما نكرم الوجه ويطيح القناع
‏كل هقوة طيب صرنا نشدّ حزامها".

‏"منصاي يا قضّاي عوز الملبين
‏لك الثنا و المقدره والإراده

‏تخفض موازينٍ وترفع موازين
‏منان حنّانٍ رؤوف بعباده

‏بياض وجهي في صفوف المصلين
‏لولا رجاي برحمتك يا سواده ."

‏" وهبتني مايدهش عبـادك من آيات البيان
‏و أكرمتني في عقلٍ ماياخذ من الجهّال شور "

ظل النخيل اللي على الارض وارف
لا مال من طرق النسيم المعلّل

انا النسيم اللي يحرّك طوارف
ثوبك .. وانا الغيم ان تناثر وبلّل

شعرك .. وانا كل اهلك ، والمعارف
ولا انت مثل النور حبّك تسلّل

بقلوب ، وعْقول الدهاه العوارف
من شافك اضحى بالحدايد مغلّل

ياعين من وكّر بروس المشارف
لاغبت عنّي طالبك لا تقلّل

وصلك .. وانا والله مثل مَنت عارف
يزورني طيفك ، واكبر ، واهلّل

ياجعل مالدموع عينك مذارف
سودٍ تحت وارف هدبها تظلّل

طفلٍ تهز إلهْ الحياة الديارف
من خلقته مايسمع الّا تدلّل

مرّت سنينه لين وَصْلْ لْمشارف
نهايته .. والحلم مات ، وتحلّل

ماعاد للدنيا بعينه زخارف
بعد الحزن بضلوع صدره تخلّل

ماغير بابه لـ الطواري موارف
عايش على ذكراك ، ولا تملّل

الحزن سيله في حناياه جارف
والحب دايم بالجروح يْتكلّل

خَذتي من الحزن مايكفيك ، وجْروحي
خَذَت من سْنين عمري مايكفّيها

لاجيت بـ اسلى غلاك ألقاك في بوحي
كنّ المشاعر عليك الله موصّيها

القلب مهما عَذلته عنْك مايوحي
والنفس أجاهد .. وابي فيها ، وابي فيها

أحتاج منهو يعاونّي على روحي
اللي معيّه تْطاوع شور راعيها

الجو غيييم وانا بنت الغيم لاشفته طرت معه ☁️♥️

‏عسى غيمٍ على دار الحبيب رْكام
‏تلوح بْروقه ، وترجف مراعيده

‏يفزّز كل ذاوي من نفل ، وخْزام
‏ويطرق عوده الغَضّ .. وجراهيده

‏تسيل ، ولا تجَفّل قايد الاريام
‏هدير الما يدندن له تهاويده

‏يذكرّني صبيب الغيم فيه شْمام
‏لاحوّل من سماه ، وْسال في بيده

‏مقاطير المطر على شفيف الجام
‏محاويل الدموع بـ ناعم خْديده

‏أبو قدٍّ تِقل ماخِلق فيه عْظام
‏وجودي ليتني سلسال في جيده

‏يا قوّه يوم قفّى يسحب الاقدام
‏وخلّى صدري لْـ حرّة تناهيده

‏وخلّاني على الآمال ، والاحلام
‏معلّق في رجا الله ثم مواعيده

‏يضحّكني من يقول العوض قدّام
‏وانا في كل يوم ارقب معاويده

‏وَنَس كل العمر عشته زمان العام
‏يا ليت انّ الزمن ينعاد ، واعيده

‏يمرْ مْن البشر مايشبه الانسام
‏خبرتوا من مسك نسمة هوا بيده !؟

‏ومع ذلك انا عندي يقينٍ تام
‏يقينٍ مَحَض ما يحتاج تأكيده

‏احسّ بْيرجع بْيومٍ من الأيام
‏متى هاليوم هذا ..؟ صعْب تحديده

كل يوم اعرف اشياء تصغر الدنيا في عيني اكثر ..
صدق من قال المواقف تكبر

جاني نصوح وقال : ما لأسمك حليّ
حطيه .. عن سرقة عديم الضمايّر

لا ترخصين اللي كتبتيه .. للعيّ
قلت الحزن خلّى قصيدي مغاير

منهو خذا بيتٍ على اسمه وهو لي ؟
ماهوب ماخذ من حشَاي العبايّر !

خلّه يحس انه ملك فـ العمر شيّ
ماعاااد تغريّ دهشة اهل البصايّر !

ان قاله الله حول شهرين وشويّ
لا اكتب على جيّة فقيدي بشَاير :(

‏على جال الشعيب اللي شْجرته ماوطاها السيل
‏حطبت اليابس من جرومها حتّى إنّي اشبّك

‏بعد زَلّ الربيع ، وعوّد القاع المريف مْحيل
‏ورى عوج الحنايا مابقالك روضٍ مشبّك

‏ولا اذكر مرّني ليل بحياتي مثل ذاك الليل
‏ذرفتك لين ماعاد بعيوني دمعٍ يصبّك

‏تكاثرت الغلا فيك ، وعفا قلب ، ونشف منديل
‏وابشرْك الجروح اللي لها عام فْـ رجا طبّك

‏بَرَت .. حتّى القصيد اللي بعودك كان عمْد يْميل
‏ماعاد يْدينه تْغشمر شعرْك ، وريحه تْهبّك

‏وانا ماني هذاك الاوّل اللي كنّت احبّك حيل
‏تغيّرت .. وقسا قلبي عليك ، وصرت ماحبّك

الليلة الشوق لافي خاطري بدري
ياشوق ذا الليل ربي منك ينجيني

ماباقي الا الاحي نايح القمري
وانا من جدود وعدودٍ عريبيني

ماردني عنك الا جاهي وقدري
لو ان صوتك وكلمة منك تحييني

" وشلون تقدر تخلي ظبيك العفري ؟
لليل ، والبرد ، وعلومٍ ماترضيني ! "

وشلون تقدر تفارق عودي المبري
اليّا تمثنى عليك " يسار ويميني "

وشلون والليل كان بضحكتي يسري !
وتهديني البيت .. وارده ببيتيني

تقول ماشفت مثل النعّس الخدري
واقول ماشفت حاجة من ربع زيني

لحيتك تكرم من الشكّات والغدري
والبورة اللي ماهي بـ منك ولا فيني

" خجلت اقول إنّا بعـــاد "

بكل ويكند لاقفّى ضجيج الجموع
واخذت ارتّب فناجيل المشب .. والدلال

بعض المعاميل صدّى من مسيل الدموع !
ياليت مثله يلبّي يوم انادي " تعال "

لاعادك الله تجمّع .. يانهار الربوع !
اخذت يومين وانا ابكي فقيد الرجال

ما مر مثله على وجه البسيطه قنوع ..
تشوف ضحكه لو مافي جيوبه ريال :)

‏يسعدني ان دمعك عشاني تهله
‏سمح المحيا خاطره منك مسموح

‏وشماغك المفهوق مهما تبله
‏ياما عليه اخلي الكحل مسفوح

‏هم قالوا ان اللي تحبه تجله
‏ما قالوا بـ حبك تخليه مجروح

‏من عدك سلاحه بـ وجهه تسله
‏اكذب الافعال ، و اصدق البوح ؟

‏من حقي انك تحزن العمر كله
‏ماني بـ طاري ياخذ شوي و يروح

‏مثل البدر فارق ما بين الاهله
‏شعوري الواضح مخليك مفضوح

‏غيري ، كلام ان مر سمعك تمله
‏انا الكلام اللي من الروح لـ الروح

‏أرقّ من النسيم اللي بعد طشّ المطر صدّيت
‏ و احنّ من الكلام العَذب ، ودّعتك و خلّيتك

‏نويت اشفي غليل الحزن و جراحك معي و ازريت
‏نعَم ، لانّي ورى قلبي عن الاوجاع خبّيتك

‏أبد والله ،‏ ما احب الموادع لكن انحدّيت
‏و إعذرني على هذا الطريق المرّ حدّيتك

‏كثر ما تلفح الذكرى هوانا / كثر ما عانيت
‏يا كذب القلب لو قالت مشاويره : تخطّيتك :)

‏عزاي اني : تمالكت العتب مرّيت ، ماضرّيت
‏ولا أخطيت في حق الهوى مرّة ، و خطّيتك .

‏و عزاي ان الندم مامرّ قلبي ‏قدّ ما حنّيت
‏و كنت الطف من الدنيا عليك و ما تحدّيتك

‏سمعتك للأخير ….!
‏و قمت ،
‏و استأذنتك ،
‏و قفّيت .

‏و خلّيت العمر عندك ، و أحلامي ، و خلّيتك .