РАДДИЯ

Сурат тариқасида келтирилган юқоридаги хабар бугун СА сайтида эълон қилинди. Аммо ушбу маълумотни келтириб ўтган сайт ходимига бироз нўноқ хабар етиб борган шекилли, мақолада келтирилган сўзлар ҳақиқатдан йироқроқ.

Тўғри, Анзур сон орқа мушакларидаги муаммо туфайли йиғиннинг айрим саналарида якка тартибда шуғулланишига тўғри келди, аммо бугунга келиб Анзур тўлиқ сафга қайтган ва умумий гуруҳда машғулотларда иштирок этмоқда. Унинг 1-турда майдонга тушиш-тушмаслиги эса тўлалигича бош мураббийнинг ихтиёрида. Балки у Анзурни ҳақиқатдан 1-ўйинга туширмас, аммо бунга тиббий жиҳат сабаб бўлмайди.

Хуллас, “Локо” масаласида, айниқса унинг тиббиётига алоқадор йўналишда маълумот келтиришдан аввал мутасаддилар билан боғланган маъқул. ОАВ ларига ҳурмат муносабати ила бу масалада клуб, айниқса камина мулоқотга доимо тайёрман.

@abrorpirmuhammad

Уззукун офисда, компьютер олдида ишловчи қадрдонлар ҳамда кун бўйи телефондан ортмайдиган ёшлар. Маслаҳатим, кеч бўлмасдан кўзингиз ҳақида ҳам қайғуриб туринг. Бадан тарбия ва тана мушакларини машқ қилдиришни биламизу, аммо кўпчилигимиз кўзларни ҳам машқ қилдириб туриш кераклиги ҳақида ўйлаб кўрмаймиз.

Мураккаб ва мукаммал тузилган кўз олмаси ва уни ҳаракатлантирувчи мушакларни машқ қилдириб туриш унинг узоқ йиллар сизга соғлом ҳолда хизмат қилишининг кафолатидир.
Шу сабабдан, юқорида – расмда келтирилган машқларни кўздан кечириб, уларни бот-бот бажариб турсангиз фойдадан холи бўлмайди.

@abrorpirmuhammad

Саримсоқпиёз (чеснок) – организм учун жуда фойдали сабзавот тури саналади.

Саримсоқпиёз юрак-қон томир тизимини қувватлайди; қондаги холестерин миқдорини камайтиради; қон босимида фойдали; қон томирларни эластиклигини ошириб, унда тромб ҳосил бўлиш хавфини кескин камайтиради; турли инфекциялар ва гижжаларга қарши таъсир кўрсатади; саратон (рак) касалликларининг олдини олади ва ҳ.

Ҳар куни 2 дона саримсоқпиёз тишчаси ёки янги – ҳали тишчалар ҳосил қилмаганидан бир бош истеъмол қилинса, ўзингизни кўплаб касалликлардан ҳимоя қилган бўласиз. Сизни хавотирга солаётган ҳидга келсак, саримсоқпиёздан сўнг бир дона олма истеъмоли ёки кўк чой шамасини чайнаш унинг ҳидини йўқотади; кечки емакда ейилса эрталабгача ҳид қолмайди. Қолаверса, инсон соғлиги ҳақида сўз бораётганда ҳид масаласи иккинчи ўринга тушиб қолади...

@abrorpirmuhammad

Донолар бисоти туркумидан:

Қирғоқ кўринмай қолишидан қўрқиб тураркансиз, ҳеч қачон уммонни кесиб ўта олмайсиз. (Христофор Колумб)

Ғалаба – бу мағлубиятдан мағлубиятгача оптимизмни йўқотмасдан бора олишдир.
(Уинстон Черчилль)

Ҳаётда ҳеч қоқилмаслик асосий ютуқ эмас, ютуғинг – ҳар гал тура олишингда! (Нельсон Мандела)

Сен қанчалар секин одимлаётганинг муҳим эмас, муҳими қанча узоқ одимлашингда! (Конфуций)

@abrorpirmuhammad

Бугунги кунда сўзамоллик – тил эгасининг мавқеини белгилайдиган мезонга айланиб қолгандек. Зотан, Яратганнинг наздида сукутни суювчи бандалар суюклироқдир.

У бирор сўз айтмас, магар ҳузурида (фаришта) ҳозиру нозир (Қоф сураси)

Ким Аллоҳга ва охират кунига иймон келтирган бўлса, яхши гап гапирсин ёки жим турсин! (Ҳадис)

То банданинг қалби тўғри бўлмагунча иймони тўғри бўлмайди. То тили тўғри бўлмагунча қалби тўғри бўлмас. (Расулуллоҳ с.а.в)

Эй ўғлим, агар одамлар чиройли гаплари билан фахрлансалар, сен гўзал сукутинг ила фахрлан! (Луқмони ҳаким)

Донолар бисотидан:
Гап ҳам дорига ўхшайди. Агар уни озайтирсанг, фойда беради; агар кўпайтирсанг, ўлдиради.

Сукут – сени турли муаммолардан асровчи қалқондир.

@abrorpirmuhammad

Кеча аксар футбол ишқибозлари чин дилдан “Бунёдкор”га мухлислик қилишди, десам муболаға қилмаган бўламан менимча.

Чунки бу ўйин бироз қийин вазиятга тушиб қолган жамоанинг ёш футболчилари учун қанчалар муҳим бўлса, чет эллик мутахассислардан кам билим ва савияга эга эмаслигини исботлашга интилган маҳаллий мураббийлар штаби учун ҳам шунчалар аҳамиятли эди. Анвар Ғофуров ва унинг шогирдлари бу тўсиқдан ишончли тарзда ўта олишди. Раҳбариятнинг ютуғи эса уларга ишона олишганида.

Хуллас, жамоа ғалабага тенг дурангдан – дурангга тенг бўлмаган ғалабалар сари интилаверсин!

@abrorpirmuhammad

Дам олиш кунлари табиат қўйнида сайр қилиш умидида тоғ ён бағрига чиқдик. Сўқоқ тоғларидан пойтахт устидаги ғубор (смог)ни кўриб, эсим оғай деди. Бир неча кун ёғингарчиликлардан кейинги ҳолат бу...

Ҳавонинг бундай ифлосланиши шунчаки бронхит, астма ёки бошқа бир кўринишда эмас, балки турфа хавфли касалликларга сабабчи омил бўлиши мумкин. Асосийси бу хатар ўсиб келаётган фарзандларимиз саломатлигига хавф туғдириши бирмунча қайғули ҳолат.

Хуллас, табиатни, бу орқали соғлигимизни асраш борасида жиддий тарзда қайғурадиган нуқтага етиб келдик.

Аждодларимиз Наврўзни яшариш ва янгиланиш фасли дея бежиз таърифлашмаган. Чунки ушбу кўклам мавсуми – қишдан чиққан организмни тозалаш, табиий витаминларга тўйинтириш ва руҳий тетикланиш давридир.

Ушбу мавсумда тайёрлаш урф бўлиб қолган – кўкатлардан тайёрланадиган турли таомлар: кўк сомса, кўк чучвара, кўк пичак ва ҳ., қўйингки турли кўк салатлардан тўйиб-тўйиб еб олинг. Ердаги бор фойдали элементларни ўзига олиб униб чиққан янги кўкатлар биз учун кони фойда. Улар организмни токсинлардан тозалайди ва ҳужайралар қаришини сусайтиради; иммун тизимни яхшилайди, ичаклар ишини меъёрлаштиради; асаб, қон-томир ва юрак тизимлари фаолиятига ижобий таъсир кўрсатади; вазн муаммоси борлар учун оздириб тўйдирувчи сеҳрли таомдир.

Алқисса, кўклам фаслини ўзингиз ва фарзандларингиз учун фойдали ўтишини истасангиз, аллақандай таркибли турли ширинлигу ярим тайёр емаклар учун дўконларга эмас, табиий витаминларга бой ва ҳақиқий соғлик гарови бўлган кўкатлар хариди учун бозорга шошилинг!

@abrorpirmuhammad

Қўнғироқ, гўшакнинг нариги тарафидан таниш овоз эшитилди.
-Ассалому алейкум тоға. Саломатмисиз, байрамлар билан.
Алик баробарида а-анчадан буён дараги йўқ жиянимнинг мубоорак кунларда ёдига тушганимдан хурсанд бўлиб, “улғайиб ақл кирибди” каби “чиройли” сўзлар хаёлимда туғён ураётган бир маҳал “топилган жиян” тағин деди:
-Тоға, мободо “опен бюджет”га овоз бериб қўймаганмидингиз?
Қўшним айнан шу масалада овозимни олиб бўлганини айтишим баробарида хайр-хўшни лўнда қилган овоз гўшакнинг узун-қисқа товушига уланаркан, тағин хаёлларим узоқ-узоқларга кетди:
-Ҳарқалай ҳол-аҳвол сўради-ю.., “опен бюджет” бор бўлсин!

Bashariyat shajarasi

@abrorpirmuhammad

1-апрельни дунёнинг кўп халқлари ҳазил куни тариқасида турли кўринишларда нишонлашади.

Ушбу кун ҳақида маълумотларни ўқиб туриб, 1976 йилнинг айнан ва атайин 1 апрелида Стив Жобс ва шериклари Apple Comp. Inc. компаниясига асос солишганию, 1-апрельда долларнинг "$" белгиси ўйлаб топилганига кўзим тушаркан:
-Кун келиб булар ҳам ҳазиллашгандик, деб қолишмаса бўлгани, - деган ўй ўтди хаёлимдан...

Ёшлар, айниқса спортчилар бўйларини ўстириш пайида бўлишади.

Бўй масаласида генетика - насл ўз сўзини айтади албатта. Шунингдек, организмда бўй ва мушакларнинг мутаносиб ўсиши учун жавоб берадиган “ўсиш гормони”(ЎГ - соматотроп гормон) бор. Одатда, ушбу гормон болалик, айниқса, балоғат даврида кўп ишланади. Унинг етарли ишлаб чиқарилиши учун қуйидагиларга эътибор қаратиш лозим:

1. Етарли уйқу. ЎГ фақат тунда – чуқур уйқу маҳали қонга ажралади.
2. Сифатли овқатланиш. Рационда оқсилга бой маҳсулотлар (гўшт, товуқ, тухум, балиқ, сут маҳсулотлари) бўлиши;
3. Мева ва сабзавотлар истеьмоли. Асосан сабзи, унинг таркибидаги бета-каротин ЎГ ишлаб чиқаришига яхшигина туртки беради (хом сабзини қиймалаб (тёрка), сметана ёки зайтун мойи аралаштириб еган маъқул)
4. Қайта ишлов берилмаган, қаттиқ (йирик) донли маҳсулотлар (ёрма, гречка, перловка) ейиш керак.
5. Витамин ва минераллар, асосан вит Д, Кальций ва Йод.
6. Психоэмоционал омил. Стресс ҳолатда ЎГ ажралиши кескин камаяди.
7. Мунтазам спорт билан шуғулланиш.