የአዲስ አበባ ፖሊስ ዋና ጠቅላይ መምሪያ ስትራቴጂክ አመራሮች የአዲስ አበባ ፖሊስ ዩኒቨርሲቲን ኮሌጅን የስራ እንቅስቃሴ ጎበኙ፡፡
***
አዲስ አበባ፤ ጥቅምት 13 ቀን 2019 ዓ/ም (አዲስ ፖሊስ)፦ የአዲስ አበባ ፖሊስ ዩኒቨርሲቲ ኮሌጅ የረጅም ዓመታት የማሰልጠን ታሪክ ያለው ሲሆን የኮልፌ ፖሊስ ሠራዊት ትምህርት ማዕከል፣ የፖሊስ ማሰልጠኛ፣ ፖሊስ አካዳሚ፣ ፖሊስ ኮሌጅ ሲባል ቆይቶ አሁን ላይ ወደ ዩኒቨርሲቲ ኮሌጅ ለማደግ የመጨረሻው ምዕራፍ ላይ ደርሷል፡፡

ዩኒቨርሰቲ ኮሌጁ ከዚህ ቀደም በተለያዩ ምዕራፎች ሲሰጣቸው ከነበሩ መደበኛና አጫጭር የፖሊስ ስልጠናዎች ባሻገር በኮሌጅ ደረጃ የማዕረግ ሽግግር ስልጠናዎችን በመስጠት ያስመረቀ ሲሆን አሁን ላይ በዲፕሎማ ለማስተማር ከመንግስት እውቅና ከማግኘቱም ባሻገር በዲግሪ መርሀ ግብር ተማሪዎችን ተቀብሎ ለማስተማር ወደ መጨረሻዎቹ ምዕራፎች ተሸጋግሯል፡፡

በጉብኝቱ ላይ የተገኙት የዋና ጠቅላይ መምሪያው አዛዥ ሌ/ጀነራል አስራት ደኔሮ ትምህርትና መለዮ ለባሹ ጠንካራ ትስስር ያላቸው መሆኑን ገልጸዋል፡፡ ዩኒቨርሲቲ ኮሌጁ በሚመለከተው የመንግስት ተቋም ሊያሟላቸው እንደሚገባ የተቀመጡለትን መመዘኛዎች በማሟላት ተማሪዎችን ተቀብሎ ወደ ማስተማር ተግባሩ እንዲገባም የከተማ አስተዳደሩ ቁርጠኛ መሆኑን አስታውሰው የዋና ጠቅላይ መምሪያው ማኔጅመንት ለጉዳዩ ትልቅ ትኩረት ሰጥቶ እንደሚሰራበትም አብራርተዋል፡፡

በዩኒቨርሰቲ ኮሌጁ የተከናወኑ ተግባራት እና ስትራቴጂካዊ ትንተና የምክረ ሀሳብ ሪፖርት በዩኒቨርሲቲ ኮሌጁ ም/ፕሬዚዳንት አማካሪ ኮማንደር ሰይፈ ሙሉጌታ እንዲሁም በዶ/ር አሮን  አብርሃም የቀረበ ሲሆን በቀጣይ ሊፈፀሙ ስለሚገባቸው ተግባራትም ለስትራቴጂክ አመራሩ ጥያቄዎች ቀርበዋል፡፡
*
ዘገባ፡- ም/ኢንስፔክተር ዳዊት እርገጤ 
*
ለፖሊሳዊ መረጃዎቻችን፦
በፌስቡክ :- https://www.facebook.com/Addisababapolice
በቲክቶክ ፦https://www.tiktok.com/@addisababapoliceofficial?
በቴሌግራም:- https://t.me/addispolice
በዩትዩብ፦ https://www.youtube.com/c/AddisAbabaPoliceCommission
በትዊተር፦Twitter https://twitter.com/AddisPolice
ድረ ገጽ፦ web https://www.addispolice.gov.et/
በጀግንነት መጠበቅ ፤ በሰብዓዊነት ማገልገል!
Protect with Courage, Serve with Compassion!
🇪🇹 🏵💐🏵 🇪🇹

መኖሪያ ቤቶችን ጨምሮ በፔንስዮኖችና የሌሊት ጭፈራ ቤቶች ላይ በተደረገ ድንገተኛ ፍተሻ ከ15ሺህ በላይ የሺሻ ዕቃዎች ተወገዱ፡፡ 
***
አዲስ አበባ፤ ጥቅምት 13 ቀን 2019 ዓ/ም (አዲስ ፖሊስ)፦ የቂርቆስ ክፍለ ከተማ ፖሊስ ዋና መምሪያ የህብረተሰቡን ጥቆማ መነሻ በማድረግ ለ2 ወራት ያህል በመኖሪያ ቤቶች፣ በፔንሲዮኖች፣ በሆቴሎችና በሌሊት ጭፈራ ቤቶች ላይ ባደረገው ድንገተኛ ፍተሻ ከ15ሺህ በላይ የሆኑ የሺሻ ዕቃዎች እና 333 ግራም ካናቢስ የተባለ አደንዣዥ ዕፅ በቁጥጥር ስር በማዋል ማስወገዱን የዋና መምሪያው አዛዥ ኮማንደር ተስፋዬ ከተማ አስታውቀው ወንጀሉን ከምንጩ ለማድረቅ ከሚመለከታቸው ባለ ድርሻ አካላት ጋር በመሆን አንዳንድ ንግድ ቤቶችን ዘርፍ ከማስቀየር ጀምሮ የተለያዩ ስራዎች እየተከናወኑ መሆናቸውን ተናግረዋል።

አያይዘውም የህብረተሰቡን ጤና የሚጎዱና የአካባቢውን ሠላም የሚረብሹ አዋኪ ድርጊቶችን ለመከላከል መሠል እርምጃዎች ተጠናክረው ይቀጥላሉም ብለዋል፡፡

የክፍለ ከተማው ሠላምና ፀጥታ አስተዳደር ፅ/ቤት ኃላፊ አቶ ታዬ ሽፈራው በበኩላቸው የክፍለ ከተማውን ደህንነት ይበልጥ ለማረጋገጥ፣ ህብረተሰቡን የሠላሙ ባለቤት ከማድረግና አካባቢውን ከወንጀል ስጋት ነፃ ለማድረግ ሚናው ከፍተኛ መሆኑን ገልጸው ከፀጥታ አካላት ጋር በመተሳሰር አዋኪ ድርጊቶችን የመቆጣጠር ስራው ተጠናክሮ ይቀጥላል ብለዋል።

በኢ.ፌ.ዲ.ሪ ፍትህ ሚንስቴር የቂርቆስ ክ/ከተማ ፍትህ ፅ/ቤት ኃላፊ አቶ ጴጥሮስ አራጌ እንደተናገሩት በ1996 ዓ.ም በወጣው የወንጀል ህግ ላይ ሺሻን መጠቀም የጤንነትና የስነ ምግባር ደንብ መተላለፍ መሆኑ የተደነገገ ሲሆን ተጠያቂነትን እንደሚያስከትልም ገልፀዋል። በ2011 ዓ/ም በተሻሻለው በምግብና መድኃኒት አስተዳደር ስር ሆኖ በወጣው አዋጅ ሺሻን መጠቀምም ሆና ማስጠቀም በህግ እንደሚያስጠይቅ አስቀምጧል።

ጉዳዩ የወንጀል ተጠያቂነትን የሚያስከትል በመሆኑ ሁሉም ጥንቃቄ ሊያደርግ እንደሚገባም አሳስበዋል፡፡

አንዳንድ ያነጋገርናቸው የአካባቢው ነዋሪዎች በበኩላቸው የትውልዱን ጊዜና ገንዘብ የሚያባክኑ ሱስ የሚያሲይዙ ጉዳዮችን ሁሉም ዜጋ ያገባኛል በሚል መንፈስ ልጆቹን ከመምከር ጀምሮ ለፀጥታ አካላት አስፈላጊውን ትብብር ማድረግ እንዳለበትም አሳስበዋል። 

የአካባቢውን ሠላም የሚያውኩና ተማሪዎችን ከትምህርት ገበታቸው የሚያስተጓጉል እንዲሁም  ወደ ሱስ የሚገፋፉ  ጉዳዮች ሲያጋጥሙ ሁሉም ለሚመለከተው የፀጥታ አካል ጥቆማ በመስጠት የበኩሉን ድርሻ ሊወጣ እንደሚገባም የአዲስ አበባ ፖሊስ ዋና ጠቅላይ መምሪያ መልዕክቱን አስተላልፏል።
*
ዋና ሳጅን ደጀኔ ኡልፋታ
*
ለፖሊሳዊ መረጃዎቻችን፦
በፌስቡክ :- https://www.facebook.com/Addisababapolice
በቲክቶክ ፦https://www.tiktok.com/@addisababapoliceofficial?
በቴሌግራም:- https://t.me/addispolice
በዩትዩብ፦ https://www.youtube.com/c/AddisAbabaPoliceCommission
በትዊተር፦Twitter https://twitter.com/AddisPolice
ድረ ገጽ፦ web https://www.addispolice.gov.et/
በጀግንነት መጠበቅ ፤ በሰብዓዊነት ማገልገል!
Protect with Courage, Serve with Compassion!
🇪🇹 🏵💐🏵 🇪🇹