Аят
“Сол (азап бастарына келетін) күні Алла олардың барлығын қайтадан тірілтіп, қабірлерінен шығарады әрі (дүниеде) не істеп, не қойғандарын өздеріне білдіріп, жаппай жауапқа тартады. Өздері ұмытып қалған болса да Алла олардың барлық істерін жіпке тізіп, жаздырып қойған. Өйткені, Алла барлық нәрсеге куә болушы”. (Мужәдәлә сүресі, 6)

Хадис
“Әлі уақыт бар, кейін жасаймын деу – шайтанның мүминдердің жүректеріне тастаған бір уәсуәсәсі”. (Рамуз әл-Әхадис)

Дұға
“Уа, Раббым! Біздерді (мұсылмандарды) иманнан, құлшылықтардан және діннің ұлы тәрбиесінен ешқашан мақрұм етпе! Барша Ислам әлемін әруақыт өркендеуге, әруақыт кіршіксіз бір өмірге ие ете гөр!” (Омар Насухи Билмен)

Мақал
“Көршің соқыр болса, Бір көзіңді қысып жүр”.

Аят
“Раббыларыңа іштей (яғни, бәсең дауыспен) жалбарынып дұға етіңдер. Шүбәсіз, Ол шектен шыққандарды ұнатпайды”. ("Ағраф" сүресі, 55)

Хадис
“Азан мен қамат арасында жасалған дұға қайтарылмайды”. (Әбу Дәуіт)

Дұға
“Уа, Алла тағалам! Күнәларымның барлығын, ірісі мен ұсағын, алғашқысы мен соңғысын, ашығы мен жасырын мен жариясын кешіре гөр”.

Мақал
“Жақсыдан шарапат, Жаманнан кесапат”.

Аят
“Жо-жоқ, (ол күні) бас сауғалап, паналайтын жер жоқ! Ол күні бәрінің барар жері Раббыңның құзыры болмақ”. ("Қиямет" сүресі, 11-12)

Хадис
“Бастарыңа келген қиыншылықтардан дұға арқылы, яғни, Алла тағалаға жалбарынумен арылыңыз”. (Әбу Дәуіт)

Дұға
“Уа, бүкіл дұғаларымызға жауап берген Раббымыз! Уа, қате-кемшіліктерімізді кешірген Раббымыз! Уа, қайғы-мұңды бізден алыстатқан Раббымыз! Бізді жәһаннам азабынан қорғағайсың!”

Мақал
“Адамның күні адаммен”.

Аят
“Әйтсе де, кезінде Ибраһимге қасиетті Үйдің (Қағбаның) орнын (құлшылық ететін жер ретінде) белгілеп бергенімізде оған: «Маған еш нәрсені серік етіп қоспа. Үйімді оны тауап ететіндер, онда қиямда (тікесінен тік) тұрып, рукуғ жасап (иіліп) әрі сәжде етіп құлшылық қылатындар үшін таза ұста», – деп, бұйырған едік”. ("Хаж" сүресі, 26)

Хадис
“Арапа, құрбан және тәшриқ күндері – мұсылмандардың мейрамы. Бұл күндер – бізге ішіп-жеу күні болады”. (Әбу Дәуіт)

Дұға
“Уа, Алла тағалам! Сенен отбасымды асырауға жетерліктей дүние сұраймын. Қайсыбір туыстарымның хақысын бере алмай, Өзіңнің ашуыңа ұшырап кетуден мені сақта!” (Зәйд ибн Сәбит (р.а))

Мақал
“Тойдың тамашасына бақпа, тағылымына бақ”.

Аят
“Күдіксіз, Біз саған Кәусарды (таусылмас мол жақсылық) бердік. Сен де Раббың үшін (шүкіршілік ретінде) намаз оқы және құрбан шал!” (Кәусәр сүресі, 1-2)

Хадис
“Адам баласы құрбан мейрамы күндерінде Алла үшін құрбан шалудан да артық бір іс жасай алмайды”. (Тирмизи)

Дұға
“Мен жүзімді көктерді және жерлерді жаратқан Жаратушы Иеге бұрдым әрі Оған ортақ қосушылардан емеспін. Намазым, һәм басқа да құлшылықтарым, денсаулығым мен өлімім бүкіл әлемдердің Раббысы болған Алла тағалаға тән. Оның ешқандай да серігі жоқ. Мен иман келтіргендерденмін. Уа, Раббым! Бұл құрбандық Сенен һәм Сен үшін”. (Құрбан дұғасы)

Мақал
“Пейіліңді кеңге сал, Қырманыңды дөңге сал”

Аят
“Келіп, қажылықта өздерін күтіп тұрған көптеген (рухани һәм дүнияуи) пайдаларды көрсін. Сондай-ақ, Алланың өздеріне ризық етіп берген малды белгілі күндерде Алланың атын атап, құрбандыққа шалсын. Сөйтіп, құрбандыққа шалынған малдың етінен өздерің де жеңдер, пақырлар мен кедейлерге де қарасыңдар”. ("Хаж" сүресі, 28)

Хадис
“Шалған құрбандарыңнан жеңдер, таратыңдар және жинаңдар”. (Бұхари)

Дұға
“Уа, жомарттық Иесі, Раббым! Қажылық жасаушыларды кешір! Өзіңе мұқтаж құлдарыңды кешір!”

Мақал
“Көптен безген көмусіз қалады”.

Аят
“Уа, иман еткендер! Алланың (қасиетті еткен жұма және айт намаздары, құрбандық, азан, жамағатпен оқылатын намаз, қажылық һәм оның рәсімдері сынды Исламның рәміздеріне айналған) нышандарын, (соғысуға тыйым салынған) қасиетті айларды, қажылық маусымында Қағбаға тарту етілген құрбандықтарды, һәм де ен салынып, белгі тағылған құбандық малдарды, сондай-ақ Раббыларының шексіз шарапаты мен разылығына бөленуді қалап Бәйтул-харамға (Қағбаға) бет алған қажыларды қорлаушы болмаңдар”. ("Мәида" сүресі, 2)

Хадис
“Қажылық немесе умра жасау үшін Қағбаға барғандар – мұсылмандардың Жаратушыға жіберген өкілдері. Егер олар дұға қылса Алла тағала қабыл етеді. Ал, кешірім сұраса кешіреді”. (Ибн Мәжә)

Дұға
“Еш күмәнсіз менім намазым, құрбаным, тірілуім, өлуім де ешбір серігі болмаған әлемдердің Раббысы болған Аллаға тән”. (Пайғамбарымыздың (с.а.с) дұғасы)

Мақал
“Көп ісінде береке”.

Аят
“Алла қасиетті Үйі Қағбаны адамдар үшін дін мен дүние тіршілігінің тірегі, әрі олардың қауіпсіздігі, танысып, табысулары һәм өзара жәрдемдесулері үшін маңызды себеп қылды”. ("Мәида" сүресі, 97)

Хадис
“Құрбанды шынайы, таза ниетпен шалыңдар”. (Тирмизи)

Дұға
“Уа, Алла тағалам! Халыққа жұмсақ қатынасқандарға Сен де жұмсақ қатынаса гөр”. (Пайғамбарымыздың (с.а.с) дұғасы)

Мақал
“Жүк ауырын нар көтереді, Ел ауырын ер көтереді”.

Аят
“Адам баласы өз басына жақсылық тілеуден әсте жалықпайды. Ал қандай да бір қиындыққа душар бола қалса, бірден салы суға кетіп, үміті үзіледі”. ("Фуссилат" сүресі, 49)

Хадис
“Кімде-кімді амалын кері кетірсе (дәрежесін түсірсе), оны ұрпағы ілгері сүйрей алмайды”. (Муслим)

Дұға
“Уа, Тәңірім! Мейріміңе және берген адал ризығыңа, есепсіз игілігіңе деген шүкірімізді көбейт. Біз Саған мұқтажбыз”. (Бәкір ибн Абдулла Музени)

Мақал
“Жақсыда кек жоқ, Жаманда тек жоқ”.

Аят
“Әууәл де Өзі, Әхир де Өзі, Заһир да Өзі, Батин да Өзі. Ол барлық нәрсені лайықты түрде біледі”. ("Хадид" сүресі, 3)

Хадис
“Кім (Алла тағаладан) білім сұраса, бұл ісі – оның өткен күнәларына кәффәрат (өтеу) болады”. (Тирмизи)

Дұға
“Уа, тасты гауһар, топырақты адам қылған Алла тағалам! Тамшыны теңіз қалған Раббым! Әрбір тіршілік иесінің қиыншылығын шешкен һәм қиындықтарын жеңілдеткен Алла тағалам! Шарасыз бір хәлге түстім, Өзіңнен жәрдем сұраймын!” (Азиз Махмуд Худайы)

Мақал
“Білімдімен бір жүрсең, Кемтік жерің білінбес”.

Аят
“Міне сол – күмәнсіз келетін һәм ақиқат үстем болатын күн. Ендеше бұдан былай, қалаған жан Раббысына тура қайтатын жолды ұстайды”. ("Нәбә" сүресі, 39)

Хадис
“Мүминнің Раббы хаққында жақсы ойда (хусни зан) болуы – оның құлшылығының көркемдігінен”. (Әбу Дәуіт)

Дұға
“Уа, Алла тағалам! Маған жәннатқа барар жолды жеңілдет һәм жәһәннам жолынан алыстат. ақиретте һәм дүниеде мені кешір”. (Абдулла ибн Омар (р.а))

Мақал
“Жақсы – көлмен тең, суы тәтті, Жаман – шөлмен тең желі қатты”.

Аят
“Дүниеде істеген игіліктерің үшін ерекше тәбетпен жеп-ішіңдер, ас болсын! Біз игілікке жаны құштар ізгі жандарды міне, осылай бағалап, сый-сияпатқа бөлейміз”. (Мурсалат сүресі, 43-44)

Хадис
“Егер жәннаттағы нәрселерден бір түйірі көрінген болса, жер мен көктің арасын әсемдікке толтырар еді”. (Тирмизи)

Дұға
“Уа, Раббым! Жәннатқа кіретіндей ізгі ісім жоқ, Жәһәннамға да шыдай алмаймын. Раббым Өзіңнен ғана пана тілеймін!” (Яхиа ибн Муаз)

Мақал
“Елдестірмек елшіден, Жауластырмақ жаушыдан”.

Аят
“(Уа, расулым, құбылаға қатысты бұйрық) Раббыңнан келген хақ пәрмен. Ендеше, күмәншілдерге қосылма”. ("Бақара" сүресі, 147)

Хадис
“Үйлердің ең кішкентайы (жұпынысы) – ішінде Алланың кітабынан еш нәрсе болмаған үй”. (Хаким)

Дұға
“Уа, Раббым! Мені Өзіңді танығандардан һәм әміріңе бойұсынғандардан еткейсің”. (Амр ибн Мурра (р.а))

Мақал
“Үйінде Құраны бардың, Ізгілікке құмары бар”.

Аят
“Алла құлдарына өте шарапатты. Қалағанына (қалағанынша) ризық береді. Ол – шексіз күш-қуат иесі, бәрінен үстем һәм құдіретті”. ("Шура" сүресі, 19)

Хадис
“Дүниеге деген сүйіспеншілікті жүрегіне кіргізбеген біреуді көрген кездеріңде оған жақындаңдар әрі онымен дос болыңдар”. (Әбу Яғла)

Дұға
“Уа, кешірімі мол, күнәларды жасырушы Раббымыз! Бізді күнәларымыз себепті азаптай көрме. Біз өз әлсіздігімізден нәпсі қалауы мен шайтанның азғыруына еріп қойсақ та бізді азаптай көрме”. (әзірет Мәулана)

Мақал
“Сіз-біз деген жылы сөз, Тіршіліктің ғаниметі”.

Аят
“Сол күні (сендерге ағыл-тегіл берілген) нығметтердің есебін бересіңдер”. (Тәкәсур сүресі, 8)

Хадис
“Алып-сатуда (саудада) көп серт беруден сақтаныңдар. Өйткені, серт малдың өтімін жеделдеткенмен, кейін құрдымға кетіреді (берекесі болмайды)”. (Муслим)

Дұға
“Уа, Алла тағалам! Осы жыл ішінде жасаған және мені сақтандырған қауіптерден сақтанбауым, Өзіңнің разы болмайтын істерді жасаған болсам мені кешір. Алла тағалам, Өзіңнен кешірім сұраймын, жарылқауыңды қалаймын. Өзіңе деген үмітімді үзе гөрме, аса жомарт болған Раббым!” (Ашура күнінің дұғасы)

Мақал
“Ұсталы ел озар, Ұстасыз ел тозар”.

Аят
“Көкке келсек, Біз оны құдіретімізбен тұрғыздық, оны үнемі кеңейтіп жатқан да – Біз. Өйткені Біз шексіз құдірет пен билік иесіміз”. (Зәриат сүресі, 47)

Хадис
“Алла тағалаға жасалған дұға аспан мен жердің арасында кідіріп тұрады. Маған салауат айтылмайынша Аллаға көтерілмейді”. (Тирмизи)

Дұға
“Уа, Раббым! Жүректерімізді безендір һәм бейнемізді көркемде”.

Мақал
“Арық айтып семіз шық”.

Аят
“Уа, адамдар! Алланың уағдасы, әлбетте, хақ. Олай болса, дүниенің қу тіршілігі сендерді қызықтырып, алдамасын. Сондай-ақ, әзәзіл сұм шайтан да сендерді Алланың кеңшілігіне, шексіз мейіріміне құр үміт арттырып, алдап соқпасын”. ("Фатыр" сүресі, 5)

Хадис
“Күмәнді нәрсені тастап, күмәнсіз нәрсені ал”. (Бұхари)

Дұға
“Уа, Алла тағалам! Тура жолдан тайып кетуден немесе адасудан, біреуге зұлымдық жасап қоюдан немесе зұлымдыққа ұшырап қалудан, бір нәрсені ойланбай істеп, жаза басудан Өзіңе сыйынамын”. (Пайғамбарымыздың (с.а.с) дұғасы)

Мақал
“Толмай жатып «толдым» деме, Болмай жатып «болдым» деме”.

Аят
“Ешбір күнәһар пенде өзгенің күнәсін арқаламайды”. ("Нәжім" сүресі, 38)

Хадис
“Сәжде – муминнің Раббысына ең жақын болған жері”. (Муслим)

Дұға
“Уа, Раббым! Разылығың қай жерде болса мені сол жерде ете гөр! Егер Сен құлыңа қандай да бір қиыншылық жіберсең, онымен қоса оған сабыр мен шыдамдылықты да бересің”. (Мухаммед Баба Семмаси)

Мақал
“Жақсы адам – күншуақ, Білімді адам – шам-шырақ”.

Аят
“Олар дүниедегі қу тіршіліктің тек сыртқы жағын ғана біледі. Ал ақирет мәселесіне келгенде мүлдем ғапыл әрі бейқам”. ("Рум" сүресі, 7)

Хадис
“Жасаған жақсылығын міндетсінген әрі сараңдыққа бой алдырған адам жәннатқа кіре алмайды”. (Тирмизи)

Дұға
“Уа, әрбір нәрсені құдірет қолында ұстап, Өзіне бас игізген һәм әр нәрсенің кілті қолында болған ұлы Раббымыз! Мені еш нәрседен сұраққа тартылмайтындай барша қателіктерімді кешіргейсің!” (Аллаға мойынсыну дұғасы)

Мақал
“Ізгі іс істе де, міндет қылма”.

Аят
“Уа, иман еткендер! Шайтанның ізіне (соңынан) ермеңдер. Кімде-кім шайтанның ізіне еретін болса, біліп қойсын, расында, ол үнемі арсыздық пен жамандықты бұйырады”. (Нур сүресі, 21)

Хадис
“Қиямет жақындағанда мұсылмандар арасында ең аз кездесетін нәрсе; адал жолмен табылған дүние-мүлік пен сенімді жолдас”. (Ибн Адий)

Дұға
“Уа, Раббым! Бізді – екі дүниенің де құштарлығынан құтқар. Жан-тәнімізді тек Өзіңе ғана құштар еткейсің”. (Мухаммед Әмин)

Мақал
“Шынайы екі дос иненің жасуындай жерге сияды”.