Аят
“Расында, мүміндер бір-біріне шынайы бауыр. Олай болса, (жүз шайысып, ат құйрығын кесіскен) бауырларыңның арасын жарастырыңдар, сондай-ақ, (бауыр ақысына келгенде) Алладан қорқыңдар (һәм үкіміне қарсы келуден сақтаныңдар)! Міне, сонда Оның рақымына бөленерсіңдер!” ("Хужурат" сүресі, 10)

Хадис
“Бір-бірлеріңе ас-ауқат тарту етіңддер. Бұл ризықтарыңның артуына жол ашады”. (Кутубу Ситтә)

Дұға
“Күллі жан иесін жаратқан һәм оларды түрлендірген Ұлы Жаратушыны пәктеймін. Барша жан иесінің ешқайсысын ұмытпастан олардың ризықтарын берген Алла тағалаға мақтау айтамын.” (Имам Ағзам Әбу Ханифа)

Мақал
“Көргенсізбен жолдас болма, Опасызбен сырлас болма”.

Аят
“Нәтижеде, кімнің амал дәптері оң жағынан берілсе, ол көңілі тасып: «Қане, келіңдер, оқыңдар! Мінеки менің амал дәптерім!». «Шынтуайтында, мен (күндердің күнінде дүниеде істеген істерім жөнінде) есеп беретініме имандай сенген едім», – дейді”. ("Хаққа" сүресі, 19-20)

Хадис
“Киінгенде һәм дәрет алғанда оң жақтарыңнан бастаңдар”. (Тирмизи)

Дұға
“Уа, Алла тағалам! Тәнімізді тек Өзіңе деген құлшылықпен қозғалт, жүректерімізді кешіріміңмен жадырат, әрдайым бізге қамқор бол. Бізді бұрынғы өткен ізгілердің қатарына қос әрі олардан аямағаныңдай бізден де жақсылығыңды аяма”. (Абдулқадир Гәйлани)

Мақал
“Мыңдаған малың болғанша, Бір балаң ғалым болсын”.

Аят
“Олар намаздарына ерекше көңіл бөледі (яғни, намазға алдын ала ниет етіп, дайындалады, әрбір намазды кемеліне келтіріп, мінсіз өтейді һәм намаздан кейін пайдасыз бос істер мен күнә атаулыдан бойын аулақ ұстайды). Міне, соларға жаннат бақшаларында зор сый-құрмет көрсетіледі”. ("Мағариж" сүресі, 34-35)

Хадис
“Кісі намазды тастап қойған уақытта оны мен күпірдің арасында ешбір перде қалмады деген сөз”. (Муслим)

Дұға
“Уа, Раббым! Намазымыз бен оразаларымызды қабыл ете гөр. Жасаған ғибадтарымызды кешіргейсің”.

Мақал
“Шіріген шөпті мал жақтырмайды, Шіренген адамды ел жақтырмайды”.

Аят
“Әрбір тірі жан (бір күні) өлімнің дәмін міндетті түрде татады. Қиямет күні бұл дүниеде істеген істеріңнің қарымын толық аласыңдар. Кімде-кім тозақтан аулақ әкетіліп, жұмаққа кірсе, зор жетістікке һәм мақсат-мұратына жеткені. (Біліп қойыңдар), бұл дүниенің тіршілігі алдамшы қызықтан, жалған бұйым-боқшадан басқа түк те емес”. ("Әли Имран" сүресі, 185)

Хадис
“Мүмин адам дүниеден өткенде – дүние тіршілігінің ауыртпалығы мен қиыншылығынан құтылады”. (Бұхари)

Дұға
“Уа, Раббым! Бізді ықыласты әрі ықыласқа жеткізілген, тақуа құлдарыңның арасында ете гөр”.

Мақал
“Дүниеден озған мүминнің, Алды – пейіш, арты – кеніш”.

Аят
“(Алла және адамзат алдындағы міндетіңді атқаруда қандай қиындыққа душар болсаң да) Раббың үшін сабыр ет!” (Муддәссир сүресі, 7)

Хадис
“Құлшылықты шын көңілден Оған ғана (Алла тағалаға) жасап, Оған ғана жалбарыныңдар”. (Муслим)

Дұға
“Уа, Алла тағалам! Бізге Өзіңе құлшылық жасауды әмір етіп, оның қарымын беруді де Өз мойныңа алдың. Бізді менмендігімізден арылта гөр. Өзіңе жан-тәнімізбен құлшылық етуімізді нәсіп еткейсің”. (Низами Гәнжәуи)

Мақал
“Орман тамырдан, ақыл сабырдан қуат алады”.

Аят
“Иман келтіріп, Алла үшін қоныс аударған һәм Алла жолында дүние-мүлкін де, шыбын жанын да аямай күресетіндер Алланың алдында ең жоғары мәртебеге ие. Нағыз жетістікке жеткендер, міне, солар”. ("Тәубе" сүресі, 20)

Хадис
“Муһажир – Алла тағаланың тыйым салған нәрселерінен ұзақ болған һәм оларды тәрк еткен адам”. (Бұхари)

Дұға
“Уа, Жаратушы Иеміз! Бүкіл істеріміздің соңын жақсы қыла гөр. Бұл дүниеде ұятқа қалудан, ақиретте тозаққа түсуден Өзің сақтағайсың”.

Мақал
“Темірді кеннен ізде, Бақытты терден ізде”.

Аят
“Сол кезде Мәриям (таңырқап): «Мен қалай бала көтермекпін, маған (ер) адам атаулының қолы тиген емес, сондай-ақ, мен әсте ардан безген жеңіл жүрісті әйел емеспін», – деді”. (Мәриам сүресі, 20)

Хадис
“Дұғасы қабыл болатындардан болу үшін адал аспен қоректен”. (Ихиә-у улумид дин)

Дұға
“Уа, Алла тағалам! Бұл жылы менің жасаған Өзіңнің разы болмайтын нәрселерді әлсіздігімнен ұмыттым. Алайда, Сен ұмытпайсың. Сөйте тұра мені жазалауға асықпай, маған уақыт бердің. Мен барлық күнә-қателіктерім үшін Өзіңнен кешірім сұраймын. Мені кешір! Уа, жомарттық иесі! Бұл жылы жасаған Өзің разы болатын істерімді қабыл еткейсің әрі үмітімнің үзілмеуін нәсіп ет!” (Пайғамбарымыздың (с.а.с) жыл соңында жасаған дұғасы)

Мақал
“Адалдан тапқаның өміріңе жетеді, Алдап тапқаның селге кетеді”.

Аят
“Ол (Алла тағала) күнді – шуақ шашқан жарық, ал айды – (күннен нәр алған) нұр етіп жаратты және жылдардың саны мен уақыттың есебін біліп жүрулерің үшін оған бірқатар кезеңдер межелеп қойды. Алла бұларды бостан босқа емес, белгілі бір мақсатта ғана ақиқат һәм мызғымас жүйе негізінде жаратты”. ("Юнус" сүресі, 5)

Хадис
“Адам баласының көбі алданып қалатын екі нығмет бар. Олар: денсаулық пен бос уақыт”. (Бұхари)

Дұға
“Уа, Раббым! Мені қанағатшыл ет. Маған берген ризығыңды берекетті қыл”. (Абдулла ибн Аббас (р.а))

Мақал
“Бос өткізу өмірді, Ақымаққа көңілді”.

Аят
“Уа, адамдар! Тақуалыққа қол жеткізу үшін өздеріңді әрі өздеріңнен бұрынғыларды жоқтан жаратқан Раббыларыңа құлшылық етіңдер”. ("Бақара" сүресі, 21)

Хадис
“Шын мәнінде, Алла тағала сендердің сыртқы дене-бітімдеріңе де, дәулеттеріңе де қарамайды. Алайда, ол сендердің жүректеріңе және іс-әрекеттеріңе қарайды”. (Муслим)

Дұға
“Уа, асқан құдіреттілігімен барлық нәрседен үстем болған Алла тағалам! Сен әртүрлі нұқсандықтардан пәксің. Уа, ұлықтығымен құлдарынан нығметтерін аямаған Алла тағалам! Біз сені пәктейміз”. (Пайғамбарымыздың (с.а.с) дұғасы)

Мақал
“Адам баласы әдемі киімімен жақсы болмайды, Әдеп, білімімен жақсы болады”.

Аят
“Уа, иман еткендер!.. Бір-біріңді аңдымаңдар және біріңді-бірің ғайбаттамаңдар!..” ("Хужурат" сүресі, 12)

Хадис
“Сөз тасығыштар сазайларын тартпайынша немесе күнәлары кешірілмейінше жәннатқа кіре алмайды”. (Муслим)

Дұға
“Уа, Алла тағалам! Сен құлдарыңның кемшіліктеріне қарама; айыптарын беттеріне баса көрме; оларды айырылысу отына салып жақпа! Бізге рақымшылық жасап, жәрдем берген Алла тағалам!” (Азиз Махмуд Һудайи)

Мақал
“Дос достығын айтады, Ез қастығын айтады”

Аят
“Сонда олар төбелеріндегі аспанға бір мәрте болса да зер салып қарамай ма?! Сөйтіп, Біздің оны қалай көтергенімізді және (жұлдыздармен) қалай безендіргенімізді һәм онда титтей де сызаттың жоқ (екенін көріп, ғибрат алмай ма?!)”. ("Қаф" сүресі, 6)

Хадис
“Өлімді ең көп еске алғандар әрі өздеріне келместен бұрын оған ең көп әзірлік жасағандар! Міне, солар – ақылдылар”. (Ибн Мәжә)

Дұға
“Адам баласына берер зияны ең ауыр нәрсе не екен деп ойладым. Сөйтсем, ол ғапылдық екен. Ғапылдықтың адамға тигізер зиянын сірә тозақ оты бере алмас. Уа Раббым! Бізді ғапылдық ұйқысынан оята гөр!” (Баязид Бистами)

Мақал
“Адам жасында тойшыл, қартайғанда ойшыл”.

Аят
“Біз жерді жиналу орны етпедік пе?! (Яғни, жер ананың үстін) тірілерге, (астын) өлілерге (тұрақ етпедік пе)?!” ("Мурсәләт" сүресі, 25-26)

Хадис
“Тозақ оты тимейтін екі көз бар: Алладан қорқып жылаған көз және түнін (отанын) Алла жолында күзетте өткізген көз”. (Тирмизи)

Дұға
“Уа, Раббымыз! Біздердің арамызды жақсарт, Бізді Ислам жолына ет. Бізді қараңғылықтан нұрға шығар. Барлық жасырын-жәрия жамандықтарды бізден алыстат”. (Абдулла ибн Мәсғуд)

Мақал
“Отансыз адам – ормансыз бұлбұл”.

Аят
“Шын мәнінде, Алла тағала үкім етушілердің ең әділі емес пе?”. ("Тин" сүресі, 8)

Хадис
“Мүмін адам қарым-қатынасы, адамдармен бітім жасауы көркем болған адам. Бітімсіз адамда қайыр болмайды”. (Муснәд)

Дұға
“Уа, Алла тағалам! Ұлы қорғаныңнан пана сұраған мына әлсіз құлыңды есігіңнен қуар болсаң, мен басқа қай есікке барып пана тілеймін! Егер де Сен мені азаптар болсаң, Сенің әділдігіңе шүбә жоқ! Алайда, Сенің кешірімің мен мейірімің барлық нәрсені қамтитындай өте кең”. (Абдулкадир Гайлани)

Мақал
“Ағаштың өзі түзу болса, көлеңкесі қисық болмайды”.

Аят
“Ғасырға серт! Шын мәнінде, адам баласы қасірет пен зиян ішінде”. (Аср сүресі, 1-2)

Хадис
“Бір күні бір күніне ұқсаған адам ұтылды”. (Кәшфул-Хафа)

Дұға
“Уа, Алла тағалам, бізге жәрдеміңді бер! Шынында Сен олардың бізден үстем болғанын қаламайсың!” (Пайғамбарымыздың (с.а.с) Меккені алар алдында оқыған дұғасы)

Мақал
“Елін ойламағанның – ерлігі зая, Ертеңін ойламағанның – тірлігі зая”.

Аят
“Алладан ұдайы кешірім тілеңдер! Шүбәсіз, Алла Ғафур (өте кешірімді), Рахим (әсіресе мүмін құлдарына ерекше мейірімді)”. ("Муззәммил" сүресі, 20)

Хадис
“Барлық адам баласы қателік жасайды. Қателесушілердің ең жақсылары тәубе етушілер”. (Тирмизи)

Дұға
“Алла тағалам! Мен күнә-қателіктерім себепті Өзіңнен қатты ұялам. Уа, Алла тағалам! Күнәларым көл-көсір. Бірақ, Сенің кешіріміңнің жанында олар бір тамшы құрлы болмайды. Алла тағалам! Өзіңнің сүйікті құлыңның құрметі үшін мені азабыңнан сақтай гөр! Мені мейірімің мен кешіріміңе бөлей гөр!” (Зәкария Ансари)

Мақал
“Адам қатесіз болмас, Көл бақасыз болмас”.

Аят
“Ол күні аспан бейне бір балқыған мыстай болады. Ал таулар түтілген түрлі-түсті жүндей болады”. ("Мағариж" сүресі, 8-9)

Хадис
“Пенде жан тапсырғанда періштелер:“ақиретке не алып кетті?” дейді. Ал, адамдар болса:“Артында не қалды?” дейді”. (Байһаки)

Дұға
“Уа, бүткіл жаратылысты қияметтің күнінде күмәнсыз жинайтын Алла тағалам! Бізді сол күннің қорқыныштарынан сақта әрі қиыншылықтар бізге жеңілдет. Бізді Пайғамбарымызбен (с.а.с) бірге болғандардың арасына қос”. (Жунәйди-Бағдади)

Мақал
“Құдайсыз қурай да сынбайды”.

Аят
“Иман келтіріп, Алла үшін қоныс аударған һәм Алла жолында дүние-мүлкін де, шыбын жанын да аямай күресетіндер Алланың алдында ең жоғары мәртебеге ие. Нағыз жетістікке жеткендер, міне, солар.” ("Тәубе" сүресі, 20)

Хадис
“Мұхажир – Алланың тыйым салған нәрселерінен іргесін аулақ салған әрі оларды тәрік қылған жан”. (Бұхари)

Дұға
“Уа, Алла тағалам! Бізді шайтанның азғыруынан сақта. Оны рақымыңнан аластатқаныңдай бізге оның жақындауына мұрсат берме. Өзіңнің кешіріміңнен үмітін үзгеніндей бізден де үмітін үздір. Мейірімің мен оның арасын алыстатқаныңдай бізбен оның арасын да алыс қыл. Өйткені, сенің құдіретің бәріне жетеді”. (Мухаммед ибн Уаси)

Мақал
“Дүние жиып не етерсің, Бір күн тастап кетерсің”.

Аят
“Расында, Біз саған (көптеген жеңістердің басы болған) ап-айқын жеңіс нәсіп еттік.” "Фатх" сүресі, 1)

Хадис
Алла елшісі (с.а.с) Меккені азат еткеннен кейін былай деді:“Енді бұл жеңістен соң хижрет болмайды. Бірақ Алла жолындағы күрес және ниет жалғасын табады”. (Кутубу Ситтә)

Дұға
“Уа, Алла тағалам! Бізге сұрағанымызды Өзіңнен басқа ешкім де бере алмайды. Бізді жетістікке жеткізе гөр!” (Молда Жами)

Мақал
“Ел дегенде езіліп, Жұрт дегенде жұмылып қызмет қыл”.

Аят
“Адам баласы өзін елеусіз, ескерусіз қала беремін деп ойлай ма?!” ("Қиямет" сүресі, 36)

Хадис
“Адам баласы қартайған сайын оның бойында екі нәрсе жасарады: дүние-мүлікке пен өмірге деген құштарлығы”. (Бұхари)

Дұға
“Уа, Раббым! Мен өте әлсізбін, маған күш-қуат бер! Тас жүрекпін, жүрегімді өзің жұмсарт! Алла тағалам,мен сараңмын, менің қолымды ашық қылғайсың!” (әзірет Омар (р.а)

Мақал
Жарлы болсаң да, арлы бол.

Аят
“Ей, иманға келгендер! Өз үйлеріңнен басқа үйлерге рұқсат алмай және үй иелеріне сәлем бермей тұрып кірмеңдер” ("Нұр" сүресі, 27-аят).

Хадис
“Кімде-кім Аллаға және ақирет күніне сенсе қонағына сый көрсетсін”. (Муслим)

Дұға
“Иә, Алла! Оның ұрпағы мен дәулетін көбейтіп, берген нәпсеңді берекелі ете гөр”.

Мақал
“Қонақтың алтынын алма, алғысын ал”.